भाजपा स्थापना दिवस
प्रधानमंत्री नरेंद्र मोदी ह कीहिन हे कि सरकार के कामकाज म राष्ट्रहित सबले उपर हवय। भारतीय जनता पार्टी के स्थापना दिवस म कार्यकर्ता मन ल संबोधित करत श्री मोदी ह कीहिन कि देश करा नीति, संकल्प अउ निर्णय लेके क्षमता हरय। ओमन कीहिन कि सरकार आज केवल लक्ष्य निर्धारित नइ करय बल्कि ओला हासिल घलो करथे। ओमन कीहिन कि देश ह हालेच म अब तक के सबले जादा चार सौ अरब डालर मूल्य के निर्यात करे हे।
आज छत्तीसगढ़ म घलो प्रदेश भाजपा इकाई ह स्थापना दिवस म आने-आने कार्यक्रम के आयोजन करीन। कुशाभाउ ठाकरे परिसर स्थित पार्टी के प्रदेश कार्यालय म ध्वजारोहण के संग स्थापना दिवस मनाये गीस। ए कार्यक्रम म केंद्रीय इस्पात अउ ग्रामीण विकास राज्यमंत्री फग्गन सिंह कुलस्ते, भाजपा प्रदेश अध्यक्ष विष्णुदेव साय, पूर्व विधानसभा अध्यक्ष गौरीशंकर अग्रवाल समेत बड़का संख्या म भाजपा पदाधिकारी अउ कार्यकर्ता उपस्थ्ति रीहिन।
ए मउका म श्री कुलस्ते ह कीहिन कि भारतीय जनता पार्टी कार्यकर्ता मनके पार्टी हरय। संगेसंग ओमन यहू कीहिन कि पार्टी के संस्थापक सदस्य पंडित दीनदयाल उपाध्याय समेत दूसर प्रमुख नेता मनके सोच ल प्रधानमंत्री ह पूरा करीन हे। अपन संबोधन म प्रदेश भाजपा अध्यक्ष विष्णुदेव साय ह कीहिन कि पार्टी कार्यकर्ता मनके बदौलत आज भाजपा दुनिया के सबले बड़का राजनीतिक पार्टी बन गेहे। कार्यक्रम ल भाजपा के राष्ट्रीय उपाध्यक्ष अउ प्रदेश के पूर्व मुख्यमंत्री डॅाक्टर रमन सिंह ह घलो संबोधित करीन।
भाजपा सामाजिक न्याय पखवाड़ा
भारतीय जनता पार्टी काली सात अप्रैल ले सामाजिक न्याय पखवाड़ा मनाही। बीस अप्रैल तक पार्टी के कार्यकर्ता सरकार के कल्याणकारी योजना के जानकारी देबर बूथ, ब्लॉक अउ जिला स्तर म कार्यक्रम आयोजित करही। पार्टी डहार ले समाज सुधारक ज्योतिबा फुले के जयंती म नौ अप्रैल के अउ डॅाक्टर भीमराव अम्बेडकर के जयंती म चौदा अप्रैल के देशभर म आने-आने कार्यक्रम राखे जाही।
खैरागढ़ उपचुनाव
खैरागढ़ विधानसभा उपचुनाव बर राजनीतिक हलचल अउ तेज होगे हे। भाजपा, कांग्रेस अउ जनता कांग्रेस छत्तीसगढ़ समेत दूसर दल मनके वरिष्ठ नेता ए दिन म खैरागढ़ विधानसभा क्षेत्र के आने-आने जगा मन म जनसभा लेवत हे। इही कड़ी म केंद्रीय मंत्री फग्गन सिंह कुलस्ते ह भाजपा प्रत्याशी कोमल जंघेल के समर्थन म सालेवारा म चुनावी सभा ल संबोधित करीन।
उंहें केंद्रीय मंत्री प्रहलाद पटेल ह आज अमलीडीहकला, पीपरिया अउ उदयपुर म भाजपा प्रत्याशी के समर्थन म अलग-अलग जनसभा ल संबोधित करीन। भाजपा प्रत्याशी के समर्थन म आज प्रदेश के पूर्व मुख्यमंत्री अउ पार्टी के राष्ट्रीय उपाध्यक्ष डॅाक्टर रमन सिंह ह दूसर पदाधिकारी मनके संग मिलके राज्य सरकार के खिलाफ आरोप पत्र जारी करीन।
प्रदेश के मुख्यमंत्री भूपेश बघेल ह घलो आज कांग्रेस प्रत्याशी यशोदा वर्मा के समर्थन म आने-आने जगा म जनसभा लीन। ओमन संबोधन म राज्य सरकार के आने-आने उपलब्धि मनके चर्चा करीन अउ संगेसंग उपचुनाव बर कांग्रेस के घोषणा पत्र म खैरागढ़ ल जिला बनाय के वादा करीन। प्रदेश के स्वास्थ्य मंत्री अउ वरिष्ठ कांग्रेस नेता टी.एस. सिंहदेव ह घलो कांग्रेस प्रत्याशी यशोदा वर्मा के समर्थन म आने-आने जगा मन म जनसंपर्क करीन।
केंद्रीय मंत्री-भिलाई प्रेस
केंद्रीय खाद्य प्रसंस्करण अउ जलशक्ति राज्य मनके प्रहलाद सिंह पटेल ह केहे हे कि देश के आने-आने राज्य मन म प्रचलित स्थानीय खान-पान के वस्तु मनके राशि अउ अंतर्राष्ट्रीय स्तर म बिक्री करे बर केंद्र सरकार विशेष प्रयास करत हे ताकि भारत के पारंपरिक खान-पान ल विश्व मंत्र म पहिचान दिलाये जा सकय। एखर बर स्थानीय खाद्य पदार्थ मन म वसा के मात्रा कम करे के संगेसंग ओखर आकर्षक पैकेजिंग उपर घलो ध्यान दे जात हे ।
छत्तीसगढ़ के वन बहुल क्षेत्र म खाद्य प्रसंस्करण इकाई लगाये के सवाल म केंद्रीय मंत्री श्री पटेल ह कीहिन कि छत्तीसगढ़ समेत देशभर म खाद्य प्रसंस्करण ले जुड़े करीब चौबीस लाख समूह काम करत हे। ए दारी के बजट म दू लाख समूह मन ल खाद्य प्रसंस्करण बर दस हजार करोड़ रूपिया देके प्रावधान करे गेहे।
गणवेश वितरण
छत्तीसगढ़ के सरकारी स्कूल मन म प्राथमिक अउ माध्यमिक कक्षा के विद्यार्थी मन ल निशुल्क गणवेश के वितरण शाला प्रवेश के पहिली करे जाय। लोक शिक्षण संचालक ह शिक्षा विभाग के अधिकारी मन ल निशुल्क गणवेश बांटे के काम सोला जून तक पूरा करे के निर्देश दीन हे।
स्कूल शिक्षा विभाग के अनुसार राज्य के जम्मों सरकारी स्कूल मनके विद्यार्थी मन ल गर्मी के छुट्टी के पहिली पंद्रह जून तक गणवेश के दू-दू सेट उपलब्ध कराय जाही। उंहें पंजीकृत मदरसा के विद्यार्थी मन ल एक सेट देवाय जाही।
आत्मानंद स्कूल यूनिफॉर्म
स्कूल शिक्षा विभाग ह स्पष्ट करे हे कि स्वामी आत्मानंद शासकीय अंग्रेजी माध्यम स्कूल के विद्यार्थी कोनो भी दुकान ले यूनिफॅार्म खरीदे बर स्वतंत्र हवय अउ ओमन ल कोनो विशेष दुकान ले गणवेश खरीदे बर कोनो दबाव नइ डाले जात हे। विभाग के प्रमुख सचिव डॅाक्टर आलोक शुक्ला ह सोशल मीडिया म ए संबंध म फैले अफवाह मनके खंडन करत कीहिन कि सोशल मीडिया म स्वामी आत्मानंद अंग्रेजी माध्यम स्कूल के छवि ल धूमिल करे बर अइसने निराधार अउ झूठा जानकारी फैलाये जात हे ।
प्रमुख सचिव ह जम्मों आत्मानंद अंग्रेजी माध्यम स्कूल के प्राचार्य मन ल अपन विद्यालय के सूचना पटल म ए सूचना प्रदर्शित करे बर कीहिन जेमा स्पष्ट लिखे हो कि – स्वामी आत्मानंद विद्यालय म कोनो भी विद्यार्थी ल कोनो विशेष दुकान ले यूनिफॅार्म खरीदे बर दबाव नइ डाले जाय। ए विद्यालय के विद्यार्थी मन कोनो भी दुकान ले यूनिफॅार्म खरीदे बर स्वतंत्र हे।
लोकल ट्रेन पत्र
छत्तीसगढ़ ले गुजरने वाला लोकल ट्रेन मनके परिचालन पहिली जइसे राखे बर मुख्यमंत्री भूपेश बघेल ह अपन ट्वीट म रेलवे बोर्ड ले तुरते कदम उठाय के अनुरोध करीन हे। मुख्यमंत्री के निर्देश म राज्य सरकार के अपर मुख्य सचिव सुब्रत साहू ह ए संबंध म रेलवे बोर्ड के अध्यक्ष ल चिट्ठी लिखिन। ए पत्र म केहे गेहे कि छत्तीसगढ़ ले गुजरने वाला आठ ठिन लोकल ट्रेन मनके परिचालन बंद होय ले प्रदेश के नागरिक मन ल बहुत परेशानी होवत हे।
खासतौर म नवरात्रि परब के दउरान गाड़ी मन म जादा भीड़ के सेती अउ बाढ़ गेहे। अपर मुख्य सचिव ह पत्र म यहू लिखे हे कि प्रदेश म मध्यम अउ निम्न वर्ग के बहुत यात्री हवय। जउन मन हरएक दिन ए लोकल ट्रेन ले यात्रा करथे। अइसे म ए ट्रेन के बंद होय ले हरएक दिन के व्यवसाय, रोजगार, शिक्षा अउ शासकीय, अर्धशासकीय सेवा ल जुड़े व्यक्ति, कर्मचारी, अउ युवा मन ल आय जाय म असुविधा होवत हे।
बतादन कि दक्षिण पूर्व मध्य रेलवे बिलासपुर डहार ले पाछू इकतीस मार्च के जारी आदेश के तहत दस लोकल ट्रेन मनके परिचालन एक महीना बर बंद कर दे गेहे। एमा ले आठ ठिन ट्रेन छत्तीसगढ़ के आने-आने रेलमार्ग ले हरएक दिन आना जाना करथे।
मौसम
प्रदेश म पूर्वी अउ दक्षिणी हवा के सेती ए समय गर्मी के असर कुछ कम होगे हे। एखर प्रभाव ले अवइया चौबीस घंटा के दउरान दक्षिण छत्तीसगढ़ के एक दू जगा म हल्का बरसा या गरज चमक के संग छींटा पड़े के संभावना हरय।
मौसम म आय बदलाव के सेती आज जगदलपुर म तेज हवा अउ गरज चमक के संग हल्का बरसा होइस। एखर सेती लोगन मन ल गर्मी ले कुछ राहत मिलिस।
हाईकोर्ट रोक
छत्तीसगढ़ उच्च न्यायालय ह रायपुर के कैलाशपुर आवासीय क्षेत्र म एक ठिन निर्माण हटाय के संबंध म नगर निगम के कार्रवाई उपर रोक लगा दीन। ए मामला म पीड़ित मन डहार ले लगाए गे याचिका के हाईकोर्ट म काली रतिहा तुरते सुनवाई होइस अउ रातेच के हाईकोर्ट ह नगर निगम के कार्रवाई ल रोके बर निर्देश जारी कर दीन। मामला के अगला सुनवाई काली होही।