सीएम-वापसी अपील
मुख्यमंत्री भूपेश बघेल ह किहीन हे कि सलवा जुडूम के दउरान छत्तीसगढ़ के बस्तर अंचल ले विस्थापित लोगन तेलंगाना अउ आंध्रप्रदेश ले वापिस लहुटना चाहत हे, त राज्य सरकार उंखर स्वागत बर तैयार हे। ए बात मुख्यमंत्री आज रईपुर म तेलंगाना ले आय छत्तीसगढ़ के विस्थापित लोगन के प्रतिनिधिमंडल ले चरचा के दउरान कहिन अउ आश्वास्त करीन कि ओमन ल जमीन दे जाय के संग रासन दुकान, स्कूल, रोजगार संघरा मूलभूत सुविधा दे जाही।
मुख्यमंत्री-बस्तर/बलौदाबाजार
मुख्यमंत्री भूपेश बघेल ह बस्तर प्रवास के दउरान काली जगदलपुर म आदिवासी समाज के प्रमुख मन ले आदिवासी वर्ग बर चलत योजना उपर गोठबात करत बतईन कि आदिवासी मनके विरूद्ध दर्ज करे गे बारह सौ बयालीस प्रकरण ल वापस ले ले गेहे। संगेसंग आदिवासी समुदाय के लोगन ल वन अधिकार पत्र अउ किसान सम्मान निधि जइसन योजना मनके घलो फायदा दे जावत हे।
उहें, मुख्यमंत्री काली बलौदाबाजार-भाटापारा जिला के जर्वें गांव म राखे गे एक ठिन सामाजिक कारीकरम म बलौदाबाजार अनुविभाग के पलारी तहसील म एक दिन के लिंक कोर्ट, जिला मुख्यालय म स्वामी आत्मानंद के नाव ले नवा पुस्तकालय अउ बजट म सामिल जर्वे माइनर नहर लाइन ल जल्दी सुरू करे जाय के घोसना करीन।
राज्यपाल-व्हाईट कोट सेरेमनी
राज्यपाल अनुसुईया उइके ह आज चंडीगढ़ म पंजाब विश्वविद्यालय डहार ले राखे गे डॉक्टर हरवंश सिंह जज, दंत चिकित्सा संस्थान म बी.डी.एस. के प्रथम वर्ष म भर्ती होवइया विद्यार्थी मनके व्हाईट कोट सेरेमनी म सामिल होईन। अपन संबोधन म राज्यपाल ह किहीन कि ए स्वागत समारोह ह विद्यार्थी मनके आत्मविश्वास अउ उत्साह ल बढ़ाही। ओमन यहू किहीन कि एखर ले दंत चिकित्सा महाविद्यालय के विद्यार्थी मन ह अपन पेशा बर संवेदनशीलता अउ दायित्व के भावना ल समझही।
प्रसारण सेवा पोर्टल-शुभारंभ
केन्द्रीय सूचना अउ प्रसारण मंत्री अनुराग सिंह ठाकुर ह आज नई दिल्ली म प्रसारण सेवा पोर्टल के सुरूवात करीन। प्रधानमंत्री नरेन्द्र मोदी के पहल म कारोबार म सुविधा, डिजिटल इंडिया अउ मेक इन इंडिया ल ध्यान म राखत ए पोर्टल ले लाभार्थी मन ल सूचना अउ प्रसारण मंत्रालय ले जारी होवइया अनमुति, पंजीकरण अउ लाइसेंस एके जगह ले लेके सुविधा मिलही। ए मउका म श्री ठाकुर ह किहीन कि सरकार ह प्रणाली म पारदर्सिता लाय बर अउ एला जिम्मेदार बनाय बर प्रौद्योगिकी के उपयोग करे हे।
आदिवासी युवा विनिमय
आदिवासी युवा विनिमय कारीकरम म कांकेर जिला के माओवाद परभावित क्षेत्र म रहइया युवा मनके दल बैंगलोर गे रिहीस। ए दउरान दल के सदस्य मन ह दूसर राज्य के युवा मन ले भेंट करीन अउ एक-दूसर के खान-पान, रहन-सहन, वेशभूषा अउ संस्कृति ल समझीन। ए मउका म स्थानीय लोक कारीकरम के आयोजन घलो करे गीस। एमा के वाद-विवाद प्रतियोगिता म राज्य के कविता टेकाम ह पहला स्थान हासिल करीन। उहें, सांस्कृतिक कारीकरम म घलो राज्य के कलाकार मन ह पहला स्थान पाईन।
माओवादी-गिरफ्तार
सुकमा जिला के किस्टाराम इलाका म सुरक्षा बल ह एक झिन माओवादी ल गिरफ्तार करके ओखर तीर ले टिफिन बम बरामद करे हे। जिला के पुलिस अधीक्षक सुनील शर्मा ह बतईन कि माओवादी मन ह ए विस्फोटक ल पुलिस गाड़ी ल निसाना बनाय के उद्देश्य ले सड़क म लगाय रिहीन। फेर, सुरक्षा बल के सक्रियता ले एला निष्क्रिय कर दे गीस।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी म आज के प्रश्न हवय –
– ‘‘महात्मा गांधी ह कोन स्वतंत्रता सेनानी ल उंखर उत्साह अउ प्रतिबद्धता बर तूफानी बहन के नाव ले संबोधित करे रिहीन ? ओमन ह दिल्ली के बिरला मिल म मजदूर मनके हड़ताल के आयोजन करइया पहिली माईलोगिन घलो रिहीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही।
आईपीएल-सट्टा कार्रवाई
राज्य म ए बखत आईपीएल क्रिकेट मैच म ऑनलाइन सट्टा खेलइया मनके खिलाफ अभियान चलाके कार्रवाई करे जावत हे। इही कड़ी म दुरूग पुलिस डहार ले बड़ा कार्रवाई करके महादेव बुक के क्रिकेट बैट के नाव ले ऑनलाइन सट्टा खेलइया गिरोह के आठ झिन आरोपी मन ल गिरफ्तार करे गीस। दुरूग पुलिस के सट्टा गिरोह के खिलाफ ए ह तीसरा बड़ा कार्रवाई हे। इंखर मन तीर ले पचास हजार रूपिया ले जादा के नगद रासि अउ सट्टा-पट्टी बरामद करे गेहे।
पुलिस अधीक्षक बी.एन. मीणा ह बतईन कि जिला म सट्टा के कारोबार म रोग लगाय बर सरलग कार्रवाई करे जावत हे। ए गिरोह के सदस्य मन के राष्ट्रीय अउ अंतर्राष्ट्रीय स्तर म कनेक्शन के जांच घलो करे जावत हे।
उहें, रायगढ़ जिला म घलो आने-आने जघा ले पुलिस ह सट्टा खेलाय के मामला म छै झिन लोगन ल गिरफ्तार करके इंखर मन तीर ले नगर पइसा अउ लाखों रूपिया के सट्टा-पट्टी बरामद करे हे।
ऐति, कोरबा पुलिस ह कार्रवाई करत दू झन लोगन ल गिरफ्तार करके उंखर मन तीर ले लाखों रूपिया के सट्टा-पट्टी, चालीस हजार रूपिया ले जादा नगद पइसा अउ दूसर चीज बरामद करे हे।
अइसने, कोरिया जिला के चिरमिरी पुलिस ह मुखबिर के सूचना म दबिश देके आने-आने जगह म सट्टा खेलाने वाला दू झिन आरोपी मन ल गिरफ्तार करीन।
पैरा एथलेटिक्स
कबीरधाम पुलिस डहार ले चलत फोर्स एकेडमी के तीन झन दिव्यांग खिलाड़ी मन ह नेशनल पैरा एथलेटिक्स म जीत हासिल करके पांच ठन मेडल अपन नाव करीन हे। राष्ट्रीय स्तर म सुघ्घर प्रदर्सन करइया ए खिलाड़ी मन ल जिला के पुलिस अधीक्षक डॉक्टर लाल उमेद सिंह ह सम्मानित करीन। ए सबो खिलाड़ी मन ह ए बछर होवइया एशियन पैरा गेम के चयन ट्रायल म भाग लीहीं।
मौसम
प्रदेस म ए बखत भीषण गर्मी पड़त हे। दुरूग अउ बिलासपुर जिला के कतकोन जगह म लू के स्थिति बने हे। महासमुंद जिला म पारा तिरालीस डिग्री सेल्सियस तक पहुंच गे हवय। मौसम विभाग के मुताबिक अवइया दिन म बिलासपुर जिला के तापमान म अउ जादा बढ़ोतरी होय के संभावना हे।
उहें, उत्तरी अउ दक्षिणी हवा के संगम स्थल दक्षिण छत्तीसगढ़ म बने हे, जेखर सेती राज्य के दक्षिणी भाग म एक-दू जगह म हल्का वर्षा होय के संभावना हे।
अउ अब थोरकुन समाचार सार म-
– मुख्यमंत्री भूपेश बघेल ह आज अपन रईपुर निवास कार्यालय म समाजसेवी अउ छत्तीसगढ़ महान दानवीर कल्याण सिंह के जयंती म उंखर चित्र म फूल चढ़ाके ओमन ल श्रद्धांजलि दीन।
– छत्तीसगढ़ विधानसभा के सचिव दिनेश शर्मा ह आज विधानसभा अध्यक्ष डॉक्टर चरणदास महंत के आगू अपन कार्यभार ग्रहण करीन।
अउ
– बलरामपुर नगर पालिका परिषद के अध्यक्ष गोविंद राम ह अपन इस्तीफा दे दे हवय। अध्यक्ष पद म लगे अविश्वास प्रस्ताव उपर आज फइसला होना रिहीस। फेर एखर पहिलीच ओमन ह अपन पद ल छोड़ दीन।