आज दिनभर के खबर ल अपन गुरतुर छत्तीसगढ़ी भाखा म पढ़व

परीक्षा पे चर्चा
प्रधानमंत्री नरेन्द्र मोदी ह किहीन हे कि नवा राष्ट्रीय शिक्षा नीति ह इक्कीसवां सदी के आकांक्षा ल पूरा करत हे। दिल्ली म ‘परीक्षा पे चर्चा‘ कारीकरम म छात्र, सिक्षक अउ पालक मनके संग गोठबात करत श्री मोदी ह किहीन कि सिक्षा नीति बनाय ले पहिली देसभर म आने-आने वर्ग के लोगन मन ले बड़े स्तर म विचार-विमर्स करे गेहे। ओमन किहीन कि समय के संग देस ल बदलना होही। प्रधानमंत्री ह किहीन कि प्रौद्योगिकी कोनों अभिशाप नइ हे अउ एखर स्वागत अउ परभावी ढंग ले इस्तेमाल करे जाना चाही।
परीक्षा ले पहिली विद्यार्थी मन ल श्री मोदी ह सलाह दीन कि ओमन परीक्षा के तनाव म झन आवय अउ मानके चले कि ओमन पहिली घलो अइसन स्थिति के सामना करे हे।
प्रधानमंत्री ह कहिन कि माता-पिता अउ सिक्षक के अधूरा सपना ल लइका मन उपर थोपे नइ जा सकय। प्रधानमंत्री ह किहीन कि एक दिव्यांग मनखे कई ठिन क्षमता ले वंचित रहिथे, फेर ओ ह ए कमजोरी मन ल ताकत म बदल देथे। ओमन किहीन कि छात्र मन ल आत्मनिरीक्षण करना चाहिए अउ देखना चाही कि कोन कमजोरी ओमन ल आगू बाढ़े ले रोकत हे।
प्रधानमंत्री ह किहीन कि देस के युवा मन बर अपार संभावना हवय। ओमन कहिन कि उंखर प्रतिस्पर्धा जादा हो सकथे, फेर उंखर तीर कतकोन मउका हे। श्री मोदी ह नोनी मनके सशक्तिकरण के बात घलो किहीन।
ऐति, छत्तीसगढ़ के राज्यपाल अनुसुईया उइके ह परीक्षा पे चर्चा कारीकरम के बाद राजभवन पहुंचे विद्यार्थी मन ले गोठबात करीन। ओमन विद्यार्थी मन ल आनंद अउ उत्साह के संग परीक्षा म सामिल होय के प्रधानमंत्री के संदेस ल आत्मसात करे बर किहीन।
परीक्षा पे चर्चा कारीकरम म छत्तीसगढ़ ले बिलासपुर रेलवे हायर सेकेंडरी इंग्लिश मीडियम स्कूल के बारहवीं कक्षा के दू झिन छात्र – श्रीधर शर्मा अउ मनीष साहिस घलो सामिल होईन। दूनों छात्र मन ह वर्चुअल माध्यम ले सीधा           प्रधानमंत्री ले गोठबात करीन अउ परीक्षा ल लके सवाल पूछीन। श्रीधर शर्मा के सवाल के जवाब म प्रधानमंत्री ह ओमन ल परीक्षा म बढ़िया रिजल्ट नइ आय म निरासा ले निकले के मंत्र दीन।

आंगनबाड़ी-समय

प्रदेस म जादा गरमी ल देखत आंगनबाड़ी केन्द्र मनके बेरा म बदलाव करे गेहे। महिला अउ बाल विकास विभाग डहार ले जारी आदेस के मुताबिक आज ले आंगनबाड़ी केन्द्र मनके संचालन बिहनिया सात बजे ले ग्यारह बजे तक करे जावत हे। ए आदेस आज एक अप्रैल ले लागू होगे हे, जउन तीस जून तक रइही। एक जुलाई ले आंगनबाड़ी केन्द्र के संचालन पहिली जइसन बिहनिया साढ़े नौ बजे ले मंझनिया साढ़े तीन बजे तक करे जाही।

मुख्यमंत्री-जांजगीर

मुख्यमंत्री भूपेश बघेल ह आज जांजगीर-चांपा जिला के विकासखंड मुख्यालय सक्ती म दू सौ छब्बीस करोड़ रूपिया ले जादा के आने-आने विकास काम के लोकार्पण अउ भूमिपूजन करीन। ए मउका म ओमन सक्ती के हटरी चौक म स्थापित स्वतंत्रता संग्राम सेनानी स्वर्गीय बिसाहू दास महंत के मूर्ति के अनावरण घलो करीन।

संपत्ति कर-समय अवधि

राज्य सरकार ह आम नागरिक मनके सुविधा ल देखत नगरीय निकाय म संपत्तिकर अउ विवरणी जमा करे के तिथि इकतीस मार्च ले बढ़ाके पन्द्रह अप्रैल कर देहे। ए संबंध म नगरीय प्रशासन विभाग डहार ले जिला कलेक्टर, संभाग आयुक्त अउ मुख्य नगर पालिका अधिकारी, नगर पालिका परिषद अउ नगर पंचायत मन ल निरदेस जारी कर दे गेहे। आदेस म केहे गेहे कि लोगन कार्यालय म खुदे पहुंच के संपत्ति कर जमा कर सकत हे।

शिक्षक-चयन सूची वैधता

लोक शिक्षण संचालनालय ह प्रदेस म व्याख्याता, सिक्षक अउ सहायक सिक्षक के कुल चौदह हजार पांच सौ अस्सी पद मन म भर्ती बर तैयार करे गे चयन सूची के वैधता एक साल बर बढ़ा देहे। एखर मुताबिक अब चयन सूची के वैधता इकतीस मार्च दू हजार तेईस तक रिही।

खैरागढ़ उपचुनाव

खैरागढ़ विधानसभा उपचुनाव बर कांग्रेस ह अपन घोसना पत्र जारी कर देहे। काली रतिहा खैरागढ़ म प्रदेस प्रभारी पी.एल. पुनिया के मौजूदगी म मुख्यमंत्री भूपेश बघेल ह तेईस बिन्दु के घोसना पत्र जारी करीन। पत्रकार मन ले गोठबात करत मुख्यमंत्री ह ऐलान करीन कि उपचुनाव म कांग्रेस प्रत्यासी के जीते के चौबीस घंटा के भीतर खैरागढ़-छुईखदान-गंडई ल जिला बनाय के औपचारिक घोसना कर दे जाही।
मुख्यमंत्री ह घोषणा पत्र म किहीन कि खैरागढ़ सहर के कोनों एक जघा स्वर्गीय राजा देवव्रत सिंह के मूर्ति स्थापित करे जाही। संगेसंग एक ठिन चौक के नाव देवव्रत सिंह के नाम म राखे जाही। उहें, साल्हेवारा ल तहसील बनाय अउ जालबांधा के संगेसंग पैलीमेटा म सहकारी बैंक खोले अउ साल्हेवारा म एसबीआई बैंक के स्थापना के कोसिस करे जाही। कांग्रेस ह अपन घोसना पत्र म किहीन हे कि खैरागढ़ अउ साल्हेवारा म स्वामी आत्मानंद अंग्रेजी माध्यम स्कूल खोले जाही। एखर संगेसंग बाजार अतरिया अउ जालबांधा म कालेज खोले के बात घलो केहे गेहे। घोसना पत्र म केहे गेहे कि गंडई-छुईखदान-साल्हेवारा म पचास बिस्तर वाला अस्पताल बनाय जाही।

सियान जतन क्लीनिक

प्रदेस के पांच जिला आयुर्वेदिक अस्पताल अउ बाईस सामुदायिक स्वास्थ्य केन्द्र म अब हरेक महीना के पहिली गुरूवार के सियान जतन क्लीनिक के आयोजन करे जाही। एखर सुरूवात विश्व स्वास्थ्य दिवस के मउका म सात अप्रैल ले होही। ए अस्पताल म साठ बछर ले जादा उमर के सियान मनके मुफत जांच के संगेसंग उंखर इलाज करे जाही।
उहें, शासकीय आयुर्वेदिक महाविद्यालय चिकित्सालय रईपुर अउ बिलासपुर म हरेक सुक्रवार के बिसेस ओपीडी संचालित करके मानसिक स्वास्थ्य ले पीड़ित मरीज मनके निःशुल्क जांच करके उंखर इलाज करे जाही। ए बिसेस व्यवस्था आज एक अप्रैल ले सुरू होगे हे।

दाऊ मंदराजी/बिसाहू दास महंत-जयंती

लोककला ‘‘नाचा‘‘ के जनक स्वर्गीय दाऊ दुलार सिंह मंदराजी अउ स्वतंत्रता संग्राम सेनानी स्वर्गीय बिसाहू दास महंत के आज जयंती हरय। ए मउका म मुख्यमंत्री भूपेश बघेल ह आज अपन रईपुर निवास कार्यालय म दाऊ दुलार सिंह मंदराजी अउ बिसाहू दास महंत के फोटू म फूलमाला चढ़ाके ओमन ल नमन करीन। ए मउका म मुख्यमंत्री ह किहीन कि दाऊ मंदराजी ह ‘‘नाचा‘‘ ल बचाय खातिर अपना पूर जिनगी समर्पित कर दीन। उंखर व्यक्तित्व अवइया पीढ़ी ल प्रेरित करत रइही।
उहें, मुख्यमंत्री ह स्वतंत्रता संग्राम सेनानी बिसाहू दास महंत ल सुरता करत किहीन कि श्री महंत ह अविभाजित मध्यप्रदेश म विधायक अउ मंत्री के रूप म प्रदेस के विकास बर अपन सेवा दीन। हसदेव बांगो सिंचाई परियोजना उंखर सपना के साकार रूप हवय।

नीति आयोग-सराहना

नीति आयोग के टीम ह काली रईपुर पहुंचके मुख्यमंत्री भूपेश बघेल अउ राज्य सासन के बड़का अधिकारी मन ले प्रदेस ले जुड़े बिसय मन उपर गोठबात करीन। बइठका के दउरान मुख्यमंत्री ह राज्य ल धान ले एथेनॉल उत्पादन के मंजूरी देवाय म मदद करे आग्रह करीन। संगेसंग ओमन राज्य मन ल जीएसटी क्षतिपूर्ति के रासि अवइया दस बछर तक जारी राखे बर घलो किहीन। उहें, मुख्यमंत्री ह वर्मी कम्पोस्ट के उत्पादन म घलो केन्द्र सरकार डहार ले सब्सिडी दे जाय के आग्रह करीन।

चैत्र नवरात्र

मां शक्ति के आराधना के परब चैत्र नवरात्रि काली ले सुरू होवत हे। एला लेके राजधानी रईपुर समेत प्रदेस के जम्मों शक्तिपीठ अउ देवी मंदिर मन ल सुंदर ढंग ले सजाय गेहे।
ए बखत डोंगरगढ़ रेंगत जवइया श्रद्धालु मनके रद्दा म बदलाव करे गेहे। श्रद्धालु मन खुर्सीपार तिराहा ले मुड़के ठगड़ा बांधा ओवरब्रिज होवत महाराजा चउक वाले रद्दा ले डोंगरगढ़ जा सकत हे। फ्लाई ओव्हर बने के सेती ए बखत रेंगत यात्री मनके रद्दा म बदलाव करे गेहे।
मुख्यमंत्री भूपेश बघेल ह प्रदेसवासी हिन्दू नववर्ष, चैत्र नवरात्रि, गुड़ी पड़वा अउ चेट्रीचंड्र के बधाई अउ सुभकामना दीन हे।