प्रधानमंत्री-परीक्षा पे चर्चा
प्रधानमंत्री नरेंद्र मोदी ह काली ‘‘परीक्षा पे चर्चा‘‘ कारीकरम के पांचवां कड़ी म दुनियाभर के विद्यार्थी, सिक्षक अउ पालक मनके संग गोठबात करही। नई दिल्ली के तालकटोरा स्टेडियम म होवइया ए लाईव कारीकरम के माध्यम ले प्रधानमंत्री ह विद्यार्थी मनके परीक्षा के तनाव ले मुक्त रेहे ले संबंधित सवाल के जवाब दीहीं। कारीकरम म श्री मोदी ह बोर्ड परीक्षा म बइठका विद्यार्थी मन के संग गोठबात करही। जउन छात्र, सिक्षक अउ पालक मन ल प्रधानमंत्री ले सवाल पूछे के अवसर मिलही, उंखर चयन आने-आने बिसय म ऑनलाइन रचनात्मक लेखन प्रतियोगिता के आधार म करे गेहे। ए कारीकरम बर पन्द्रह लाख ले जादा छात्र, सिक्षक अउ अभिभावक मन ह पंजीयन कराय हे।
‘‘परीक्षा पे चर्चा‘‘ कारीकरम म बिलासपुर स्थित रेलवे हायर सेकेंडरी स्कूल के दू छात्र श्रीधर शर्मा अउ मनीष सहीह प्रधानमंत्री ले बातचीत करही। ए दूनों छात्र वर्चुअल रूप ले जुड़ही अउ प्रधानमंत्री ले सवाल पूछ सकहीं।
‘‘परीक्षा पे चर्चा‘‘ कारीकरम के सीधा प्रसारण बिहनिया ग्यारह बजे ले दूरदर्शन के डीडी नेशनल, दूरदर्शन समाचार, डीडी इंडिया संग आने-आने चैनल ले करे जाही।
मुख्यमंत्री घोषणा
मुख्यमंत्री भूपेश बघेल ह महापौर, अध्यक्ष अउ पार्षद निधि के रासि म डेढ़ गुना बढ़ोतरी करे के घोसना करे हे। उहें, नगरीय निकाय के जनप्रतिनिधि मनके मानदेय ल घलो दुगुना करे जाही। आज रईपुर म आयोजित एक ठिन कारीकरम म मुख्यमंत्री ह नगरीय निकाय मन म अधोसंरचना विकास बर प्रदेस के सबो नगर पालिका ल पांच-पांच करोड़ रूपिया, नगर पंचायत ल तीन-तीन करोड़ रूपिया अउ चौदह नगर निगम म विकास काम बर एक सौ चालीस करोड़ रूपिया के रासि देके घोसना करीन। इही तरह स्थानीय स्वशासन ल सशक्त बनाय खातिर कुल पांच सौ उनयासी करोड़ रूपिया के रासि मंजूर करे गेहे। कारीकरम ल संबोधित करत मुख्यमंत्री ह कहिन कि नगरीय निकाय के जनप्रतिनिधि मनके मेहनत अउ परिश्रम ले ही छत्तीसगढ़ ह लगातार तीन बार देस के स्वच्छतम प्रदेस के खिताब जीते हे।
उहें, आज मुख्यमंत्री ह शहरी स्लम स्वास्थ्य योजना के विस्तार कारीकरम के सुभारंभ करीन। ओमन ह घर पहुंच स्वास्थ्य सेवा उपलब्ध कराय खातिर साठ मोबाइल मेडिकल यूनिट ल हरा झंडी दिखाके आने-आने जगह मन बर रवाना करीन। ए सुविधा के सुरू होय ले नगर पालिका अउ नगर पंचायत मन म लोगन ल घर पहुंच स्वास्थ्य सेवा मिले बर लगही।
एखर संग मुख्यमंत्री ह आज राजीव गांधी न्याय योजना के तहत बीस लाख ंअंठावन हजार किसान मनके खाता म चौथा किश्त के रूप म एक हजार उनतीस करोड़ इकतीस लाख रूपिया के रासि ऑनलाइन जारी करीन। इही तरह गोधन न्याय योजना के तहत गोबर विक्रेता महिला स्व-सहायता समूह, गौठान समिति अउ कृषि मजदूर के संगेसंग तेंदूपत्ता संग्राहक मनके खाता मन म एक हजार एक सौ चौबीस करोड़ बयानवे लाख रूपिया के रासि जमा करे गीस। उहें, ग्रामीण भूमिहीन मजदूर परिवार मनके खाता म घलो दूसरा किश्त के रूप म एकहत्तर करोड़ आठ लाख रूपिया के रासि जारी करे गीस।
मुख्यमंत्री-शुभारंभ
प्रदेस म चार नवा अनुभाग अउ तेईस नवा तहसील बनाय गेहे, जेखर सुभारंभ आज मुख्यमंत्री भूपेश बघेल ह अपन रईपुर स्थित निवास कार्यालय ले करीन। नवा अनुभाग जगदलपुर जिला म तोकापाल, गौरेला-पेण्ड्रा-मरवाही जिला म मरवाही, सूरजपुर जिला म भैयाथान अउ गरियाबंद जिला म मैनपुर ल बनाय गेहे।
उहें, बिलासपुर जिला म सीपत अउ बोदरी, गौरेला-पेण्ड्रा मरवाही जिला म सकोला, जांजगीर-चांपा म अड़भार, रायगढ़ जिला म सरिया अउ छाल, कोरबा जिला म बरपाली, अजगरबहार अउ पसान, बलरामपुर-रामानुजगंज जिला म चांदो, रघुनाथ नगर अउ डोरा-कोचली अउ सूरजपुर जिला म बिहारपुर नवा तहसील होही। एखरे संगेसंग बलौदाबाजार-भाटापारा जिला म सुहेला अउ भटगांव, दुर्ग जिला म अहिवारा, बेमेतरा जिला म नांदघाट, कांकेर जिला म सरोना, दंतेवाड़ा जिला बारसूर, बीजापुर जिला म कुटरू अउ गंगालूर अउ नारायपुर जिला म छोटेडोंगर अउ कोहकामेटा म नवा तहसील बनाय गेहे।
क्वांटिफायबल डाटा आयोग
छत्तीसगढ़ क्वांटिफायबल डाटा आयोग डहार ले प्रदेस म अन्य पिछड़ा वर्ग अउ आर्थिक रूप ले कमजोर मनखे मनके सर्वें करे जात हे। आयोग के सचिव बी.सी. साहू ह बतईन कि अट्ठाईस मार्च तक आने-आने जिला मन म करे गे सर्वें के अनुसार ओबीस के संख्या एक करोड़ अट्ठारह लाख पांच हजार ले जादा हे। उहें, आर्थिक रूप ले कमजोर वर्ग के जनसंख्या दस लाख तीस हजार ले जादा हे।
खैरागढ़-उपचुनाव
खैरागढ़ विधानसभा उपचुनाव म कांग्रेस, भाजपा संग आने-आने राजनीतिक दल के प्रत्यासी मन ह प्रचार अभियान तेज कर देहे।
उहें, खैरागढ़ उपचुनाव के दउरान सुरक्षा व्यवस्था बनाय खातिर पैरा मिलिट्री फोर्स के बाईस कंपनी तैनात करे गेहे। निष्पक्ष अउ सांतिपूर्ण चुनाव संपन्न कराय खातिर जवान मन ल खैरागढ़ विधानसभा क्षेत्र के अलग-अलग थाना अउ चौकी संग बेस कैम्प म तैनात कर दे गेहे।
इही बीच, खैरागढ़ विधानसभा क्षेत्र म बारह अप्रैल के होवइया मतदान ल देखत निर्वाचन आयोग ह ए दिन बिहनिया सात बजे ले संझा सात बजे तक कोनों भी तरह के एग्जिट पोल म रोक लगा देहे। संगेसंग प्रिंट अउ इलेक्ट्रॉनिक मीडिया के माध्यम ले प्रकाशन या प्रचार-प्रसार म घलो प्रतिबंध लगाय गेहे। ए संबंध म आयोग ह अधिसूचना जारी कर देहे।
अमृत महोत्सव-विचार संगोष्ठी
बलरामपुर जिला के कोटागहना गांव म ‘‘पुरखा के ग्राम मेरा धरोहर‘‘ के तहत विचार संगोष्ठी के आयोजन करे गीस। आजादी के अमृत महोत्सव के तहत आयोजित ए संगोष्ठी म वरिष्ठ जन मन ह गांव के विकास म युवा मनके भूमिका उपर गोठबात करीन। संगेसंग गांव के परंपरा के पालन करे के बारे म घलो चर्चा करे गीस। ए कारीकरम म संसदीय सचिव चिंतामणि महाराज अउ कलेक्टर कुंदन कुमार ह वरिष्ठजन मनके सम्मान करीन।
माओवादी-पुनर्वास नीति
राज्य सरकार के पुनर्वास नीति ले प्रभावित होके माओवादी मन ह समाज के मुख्यधारा म लहुटत हे। पाछु फरवरी महीना म करीबन छप्पन माओवादी मन ह पुलिस अधिकारी मनके आगू आत्मसमर्पण करे हे। एखरे संगेसंग सुरक्षा बल डहार ले करे गे कार्रवाई के दउरान तैंतीस माओवादी मन ल गिरफ्तार करे गेहे। उहें, आने-आने मुठभेड़ म तीन झिन माओवादी घलो मारे गीस। ए दउरान सुरक्षा बल मन ह तीन नग हथियार बरामद करे हे। उहें, ग्यारह आईईडी ल निष्क्रिय करे गेहे।
स्कूल-समय सारिणी
भीषण गर्मी ल देखत कोंडागांव जिला म स्कूल संचालन के बेरा म बदलाव करे गेहे। एक पाली म लगइया प्राइमरी, मिडिल, हाई अउ हायर सेकेंडरी स्कूल के कक्षा बिहनिया साढ़े सात बजे ले साढ़े ग्यारह बजे तक लगही। उहें, दू पाली म लगइया कक्षा बिहनिया साढ़े सात बजे ले साढ़े ग्यारह बजे तक अउ साढ़े ग्यारह बजे ले संझा साढ़े चार बजे तक चलही। ए संबंध म कलेक्टर पुष्पेन्द्र कुमार मीणा ह सबो स्कूल संचालक मन ल आदेस के पालन सुनिश्चित करे बर केहे हे।
अउ अब थोरकुन समाचार सार म-
– स्थाई खाता संख्या माने पैन ल आधार ले जोड़े के समय-सीमा आज समाप्त हो जही। आज के बाद जउन लोगन के पैन ह आधार ले नइ जुड़े होही, उंखर मन उपर जुर्माना लगही।
– मुख्यमंत्री भूपेश बघेल ह नाचा के जनक दाऊ दुलार सिंह मंदराजी के जयंती म ओमन ल नमन करीन।
– कथित महंगाई के विरोध म कांग्रेस के पदाधिकारी अउ कार्यकर्ता मन ह आज प्रदेसभर म धरना-प्रदर्शन करीन। रईपुर म आयोजित धरना-प्रदर्शन म प्रदेस प्रभारी पी.एल. पुनिया अउ प्रदेश अध्यक्ष मोहन मरकाम सामिल होईन।
– पढ़ना-लिखना अभियान के तहत काली महापरीक्षा के आयोजन करे गीस। एमा चालीस हजार ले जादा परीक्षार्थी सामिल होईस।
– राजधानी रईपुर म राष्ट्रीय सहकारी सम्मेलन पच्चीस अप्रैल के आयोजित करे जाही। ए सम्मेलन म देसभर के चुनिंदा शीर्ष सहकारी संस्था के प्रतिनिधि सामिल होही।
– सुकमा जिला के अरलमपल्ली-कंटीपारा के तीर सुरक्षा बल ह दू आईईडी बरामद करे हे, जेला मउका म ही निष्क्रिय कर दे गीस।
अउ
– रायगढ़ जिला म कापू क्षेत्र के धवईडांड गांव के तीन लोगन के सव ल जंगल ले बरामद करे गेहे। पुलिस ह हत्या के आसंका जतावत जांच सुरू कर देहे।