जल शक्ति अभियान
राष्ट्रपति रामनाथ कोविंद ह देस म जल सुरक्षा ल बने ढंग सुरक्षित राखे बर ‘‘जल शक्ति अभियान-कैच द रेन‘‘ के सुभारंभ करीन। ए अभियान एसो तीस नवंबर तक चलही। ओमन किहीन कि सरकार ह पानी ल बने ढंग ले राखे बर जलाशय मन ल संजो के राखे के परयास करत हे।
ए मउका म राष्ट्रपति ह नई दिल्ली म तीस राष्ट्रीय जल पुरस्कार दीन। ग्यारह श्रेणी म राज्य, संगठन अउ मनखे मन ल संतावन पुरस्कार दे गीस।
स्कूल-पढ़ाई
प्रदेस के स्कूल मन म अंग्रेजी, गणित अउ विज्ञान विसय के पढ़ाई ल बढ़िया रोचक ढंग ले पढ़ाय जाही। एखर बर सिक्षक मन ल टाटा इंस्टीट्यूट ऑफ सोशल साईंस डहार ले हाइब्रिड कोर्स के प्रसिक्षण दे गेहे। ए प्रसिक्षण कोरोना काल के दउरान लइका मनके सीखे के बारे म आय कमी ल दूरिहा करे म सहायता करही। प्रसिक्षित सिक्षक मन ह कक्षा म पढ़ई के दउरान सूचना, संचार प्रौद्योगिकी आईसीटी तकनीक के परयोग करके पढ़ई-लिखई ल बढ़िया रोचक ढंग ले लइका मन ल बताय जाही। हाइब्रिड प्रसिक्षण म सामिल तीन सौ सिक्षक मन ल विषय-विशेषज्ञ मन ह आईसीटी तकनीक अउ ऐप के परयोग के बारे म जानबा दीन।
छिंदिया ग्राम पंचायत-पुरस्कृत
पानी के बने ढंग ले व्यवस्था करे के सेती सूरजपुर जिला के छिंदिया ग्राम पंचायत ल राष्ट्रीय स्तर म दूसर पुरस्कार मिले हे। ए पुरस्कार हर साल केन्द्रीय जलशक्ति मंत्रालय डहार ले दे जाथे। इनाम देके उद्देश्य पानी के कम ले कम परयोग कइसे करे जाय, एला आम लोगन मन तक पहुंचाय के संगेसंग पानी के रखरखाव बर घलो आगू लाना हे।
मुख्यमंत्री भूपेश बघेल ह राष्ट्रीय जल पुरस्कार मिले के बाद ग्राम पंचायत छिंदिया के पदाधिकारी अउ गांव के लोगन मन ल बधाई अउ सुभकामना दे हवय।
खैरागढ़ उपचुनाव
खैरागढ़ विधानसभा उपचुनई म अब दस झिन प्रत्यासी चुनावी मैदान म हवय। ए जम्मों प्रत्यासी मन ल चुनाव चिन्हा दे जा चुके हे। कांग्रेस के यशोदा वर्मा, भारतीय जनता पार्टी के कोमल जंघेल अउ जनता कांगेस छत्तीसगढ़ के नरेन्द्र सोनी ह घलो उम्मीदवार हवय। ए उपचुनई म बारह झिन प्रत्यासी मन नामांकन भरे रिहीन, जेमा ले काली दू झिन उम्मीदवार मन ह अपन नाव वापिस ले लीन। खैरागढ़ विधानसभा के उपचुनई बारह अप्रैल के होही।
ऐति, सामान्य प्रेक्षक शान्तनु पी. गोटमारे के उपस्थिति म काली जिला निर्वाचन अधिकारी तारन प्रकाश सिन्हा ह स्टैडिंग कमेटी के बइठका लीन। अधिकारी मन बतईन कि उपचुनई बर कुल दू सौ इंक्यानवे मतदान केन्द्र बनाय गेहे।
ट्रेन-हादसा
रायगढ़ जिला के जामगांव के तीर काली दू ठिन मालगाड़ी ह आपस म टकरा गे रिहीस, जेखर सेती ए रद्दा म चलइया कतकोन रेलगाड़ी के अवई-जवई परभावित होय रिहीस।
घटना के जानबा मिलतेच बिलासपुर परिमंडल के महाप्रबंधक आलोक कुमार अउ रेलमंडल प्रबंधक आलोक सहाय के संग बड़का अधिकारी अउ करमचारी मन ह ए रद्दा ल ठीक-ठाक करके रेलगाड़ी मनके अवई-जवई ल थोरकुन सुरू कर देहे।
ऐति, रेलवे ह कोनो-कोनो रेलगाड़ी मन ल रद्द कर देहे, जेमा रायगढ़-बिलासपुर पैसेंजर, बिलासपुर-रायगढ़ पैसेंजर, गोंदिया-झारसुगुड़ा पैसेंजर, झारसुगुड़ा-गोंदिया पैसेंजर, टिटलागढ़-बिलासपुर पैसेंजर अउ बिलासपुर-टिटलागढ़ पैसेंजर सामिल हे। अइसने, गोंदिया-रायगढ़ जनशताब्दी ह बिल्हा स्टेशन तक चलही अउ रायगढ़ ले चलइया रायगढ़-निजामुद्दीन एक्सप्रेस ह बिलासपुर तक ही चलही।
राज्यपाल-क्षमता निर्माण कार्यक्रम
राज्यपाल अनुसुईया उइके ह काली रईपुर जिला के तिल्दा स्थित एमिटी विश्वविद्यालय डहार ले राखे गे बी.डी.एस.पी. क्षमता निर्माण कारीकरम म सामिल होईन। ओमन प्रसिक्षण लेवइया माईलोगिन मन ले किहीन कि दूसर माईलोगिन मन ल घलो ए प्रसिक्षण के बारे म बतावयं।
जानबा के मुताबिक एमिटी विश्वविद्यालय ल व्यवसाय विकास सहायता प्रदाता नियुक्त करे गेहे, जेमा आने-आने जिला ले आय स्व-सहायता समूह के दू सौ तीस माईलोगिन मन कौशल विकास के प्रसिक्षण लेवत हे।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी म आज के प्रश्न हवय –
– ‘‘ओ स्वतंत्रता सेनानी के नाम बतावव, जउन मन पुद्दूचेरी मजदूर संघ आंदोलन के सुरूवात करे रिहीन अउ ओमन ल फ्रांस अउ ब्रिटेन के उप निवेस अधिकारी मन ह जेल म डाल दे रिहीन ? ओमन सुतंतिरम या स्वतंत्रता के प्रकाशन घलो सुरू करे रिहीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही।
आईईडी विस्फोट-जवान घायल
नारायणपुर जिला म आज माओवादी मन डहार ले करे गे आईईडी विस्फोट के चपेट म आय ले डीआरजी के दू झिन जवान घायल होगे, जेमा ले एक झिन जवान के हालत गंभीर बने हे।
जिला के अतिरिक्त पुलिस अधीक्षक नीरज चंद्राकर ह बतईन कि डीआरजी के जवान मन ह रोड ओपनिंग बर सर्चिंग म निकले रिहीन। इही दउरान जीवलापदर रद्दा उपर आज बिहनिया माओवादी मन ह सरलग पांच ठिन आईईडी विस्फोट करीन। ए घटना म दू झिन जवान सानउ वड्डे अउ रामजी पोटाई घायल होगे हे।
वीर गुण्डाधूर-आभार आयोजन
भूमकाल विद्रोह के जननायक वीर गुण्डाधूर के सूरता म बस्तर जिला के गांव नेतानार म उंखर स्मारक वाले जगह म आभार आयोजन करे गीस। ए मउका म उंखर वंशज मन ल सम्मानित करे गीस। आजादी के अमृत महोत्सव के तहत ए कारीकरम के आयोजन आदिम जाति अनुसंधान अउ प्रसिक्षण संस्थान नवा रईपुर के संगेसंग बस्तर जिला प्रसासन डहार ले करे गीस। कारीकरम म स्वतंत्रता संग्राम म वीर गुण्डाधूर के योगदान उपर परिचर्चा अउ उंखर जिनगी उपर आधारित लघु पुस्तिका ल बांटे के संगेसंग ओखर बढ़िया कामकाज के उपर नाटक के घलो मंचन करे गीस।
कारीकरम ल संबोधित करत संसदीय सचिव रेखचंद जैन ह किहीन कि वीर गुण्डाधूर ह बछर उन्नीस सौ दस म अंग्रेज मनके खिलाफ विद्रोह म भाग लीन अउ बस्तर के विकास म बढ़िया भूमिका निभईन।
दुर्घटना
उत्तरप्रदेश के बांदा म होय सड़क दुर्घटना म छत्तीसगढ़ के भिलाई म रहइया एकेच परिवार के चार झिन लोगन के मउत होगे। हमर संवाददाता ले मिले जानबा के मुताबिक भिलाई के नेहरू नगर म रहइया ए परिवार मन ह पारिवारिक कारीकरम म सामिल होय बर वाराणसी ले मध्यप्रदेश के छतरपुर जावत रिहीन। इही दउरान झांसी-मिर्जापुर राष्ट्रीय राजमार्ग उपर उंखर कार ह अनते-तनते होके रूख ले टकरा गे। ए घटना म इंजीनियर के संगेसंग तीन झिन लोगन के मउकाच म परान छूट गे। उहें, इंजीनियर के नोनी के अस्पातल म इलाज के दउरान मउत होगे।
मौसम
प्रदेस म ए बेरा चरचरावत गर्मी पड़त हे अउ तापमान चालीस डिग्री सेल्सियस ल पार कर गेहे। मौसम विभाग ले मिले जानबा के मुताबिक राजनांदगांव म सबले जादा तापमान चालीस दमशलव पांच डिग्री सेल्सियस दरज करे गीस। त उहें, बिलासपुर म चालीस दमशलव दू डिग्री तापमान दरज करे गेहे। मौसम विभाग के मुताबिक अवइया बेरा म घलो तापमान म बढ़ोतरी होय के संभावना हे।
राष्ट्रीय फेसिंग प्रतियोगिता
तेईसवां सब जूनियर राष्ट्रीय फेंसिंग प्रतियोगिता के बालक वर्ग के खिताब हरियाणा ल अउ बालिका वर्ग के खिताब कर्नाटक ल मिले हे। रईपुर म राखे गे प्रतियोगिता के समापन समारोह म छत्तीसगढ़ अल्पसंख्यक आयोग के चेयरमेन ह विजेता खिलाड़ी मन ल मेडल देके सम्मानित करीन।