विश्वविद्यालय-ऑनलाइन परीक्षा
प्रदेस म एसो घलो आने-आने विश्वविद्यालय के वार्षिक परीक्षा ह ऑनलाइन होही। ए बारे म उच्च सिक्षा विभाग ह आदेस जारी कर देहे। विभाग कोति ले केहे गेहे कि कोरोना संक्रमण के सेती राज्य के कॉलेज मन म पढ़ई-लिखई देरी ले सुरू होईस, जेखर सेती कोर्स पूरा होय म घलो देरी होगे। वार्षिक परीक्षा हर साल करीबन पचास ले साठ दिन तक चलथे। अतेक लंबा बेरा तक व्यवस्था करना परीक्षा केन्द्र बर बड़का चुनौती हरय, जेला देखत कॉलेज के वार्षिक परीक्षा ल ऑनलाइन राखे गे फइसला ले गेहे।
जीएसटी क्षतिपूर्ति-पत्र
केन्द्र सरकार डहार ले जून दू हजार बाईस के बाद ले राज्य मन ल जीएसटी क्षतिपूर्ति के पइसा ल नइ देके फइसला उपर मुख्यमंत्री भूपेश बघेल ह मध्यप्रदेश, ओड़िसा के संगेसंग सत्रह ठिन राज्य के मुख्यमंत्री मन ल चिट्ठी लिख के ए फइसला ले राज्य मन ल होवइया घाटा उपर गोठबात करीन हे। चिट्ठी म मुख्यमंत्री ह राज्य के मुख्यमंत्री मन ले केन्द्र सरकार ले क्षतिपूर्ति ल दस साल तक जारी राखे के बिनती करे हे। अपन चिट्ठी म मुख्यमंत्री ह तीन ठिन बिन्दु उपर घलो बात राखे हे।
ट्रेड यूनियन-हड़ताल
केन्द्रीय ट्रेड यूनियन के आह्वान उपर आज पूरा देश म हड़ताल के समर्थन करत भिलाई इस्पात संयंत्र के सात ठिन यूनियन अउ इंटक के नेता, कार्यकर्ता मन आज बिहनिया भिलाई म मिलके अपन आने-आने मांग ल लेके प्रदर्सन करीन। संयुक्त ट्रेड यूनियन के प्रतिनिधि ह बतईन कि बाढ़त महंगाई, सार्वजनिक उपक्रम के निजीकरण अउ ठेका श्रमिक मन ल न्यूनतम मजदूरी दे जइसन कतकोन मांग ल लेके प्रदर्सन करे गीस।
ओति, दंतेवाड़ा जिला म बचेली ट्रेड यूनियन ह ए राष्ट्रव्यापी हड़ताल के समर्थन म काम बंद राखीन। एखर ले किरंदुल-बचेली के एन.एम.डी.सी. संयंत्र म उत्पादन प्रभावित होईस।
बस्तर फाईटर्स-भर्ती प्रक्रिया
बस्तर संभाग के जम्मों सात जिला मन म बस्तर फाईटर्स आरक्षक मनके भर्ती प्रक्रिया नौ मई ले पन्द्रह जुलाई तक करे जाही। ए दउरान इक्कीस सौ आरक्षक के भर्ती होही। हरेक जिला म बस्तर फाईटर्स के तीन सौ आरक्षक के नवा पद मंजूर करे गेहे। पन्द्रह जुलाई के चुने गे आरक्षक मनके सूची प्रकाशित करे जाही।
ट्रेन-हादसा
रायगढ़ जिला के जामगांव के तीर आज एक ट्रेन हादसा के खबर मिले हे। इहां दू मालगाड़ी आपस म टकरा गे। ए दुर्घटना म छह ले जादा डिब्बा पटरी ले उतर गेहे। घटना के सेती मुंबई-हावड़ा रेललाइन म रेलगाड़ी मनके अवई-जवई परभावित होय हे। रेलवे के अधिकारी मउका वाले जघा बर रवाना होगे हे। आने-आने यात्री ट्रेन मन ल फिलहाल अलग-अलग स्टेसन म रोके गेहे।
माओवादी घटना
बीजापुर जिला के कुटरू-बेदरे रद्दा ल पाछु रतिहा माओवादी मन ह नकसान पहुंचाय हे, जेखर ले ए रद्दा म अब्बड़ देर तक अवई-जवई परभावित रिहीस। पुलिस अधीक्षक कमलोचन कश्यप ह एखर पुष्टि करत बतईन कि माओवादी मन ह उसकापट्टनम के तीर कतकोन जगह म रद्दा ल काटके ओमा गढ्ढा बना देहे। घटना के बाद पुलिस ह मउका म पहुंच के सुधार काम सुरू कर देहे।
परीक्षा पर चर्चा
प्रधानमंत्री नरेन्द्र मोदी ह एक अप्रैल के नई दिल्ली के तालकटोरा स्टेडियम म ‘‘परीक्षा पर चर्चा‘‘ कारीकरम म छात्र, अध्यापक अउ पालक मनके संग गोठबात करही। गोठबात म तनाव ले दुरिहा रहि के परीक्षा देवाय के बारे म गोठबात करे जाही। प्रधानमंत्री ह ए कारीकरम म जादा ले जादा सामिल होय के बिनती करे हे।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी म आज के प्रश्न हवय –
– ‘‘तत्कालीन मैसूर राज्य म ध्वजारोहण म भाग लेवइया पहिली माईलोगिन कोन रिहीस, जेमन गांव के माईलोगिन मनके स्वास्थ्य के रक्षा बर मातृ मंदिर के स्थापना घलो करे रिहीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही।
भाजपा किसान मोर्चा-बैठक
भारतीय जनता पार्टी किसान मोर्चा के कांकेर म होय बइठका म पूर्व मुख्यमंत्री डॉक्टर रमन सिंह, विधायक बृजमोहन अग्रवाल अउ किसान मोर्चा के राष्ट्रीय मंत्री बजरंगी प्रसाद यादव सामिल होईन। किसान मोर्चा के प्रदेस प्रभारी संदीप शर्मा ह बतईन कि बइठका म किसान मोर्चा के अवइया कारीकरम के समीक्षा करके ओखर उपर योजना बनाय जाही।
स्वामी आत्मानंद स्कूल
प्रदेस म एक सौ छै ठिन स्वामी आत्मानंद हिन्दी माध्यम स्कूल मन म सिक्षक मनके पदस्थापना ल प्रतिनियुक्ति के आधार म करे जाही। ए बारे म स्कूल सिक्षा विभाग ह आदेस जारी करत किहीन कि स्कूल मन म सिक्षक मनके पद बर संविदा नियुक्ति या सीधी भर्ती नइ करे जाय। जिला ले मिले प्रस्ताव अउ मांग के मुताबिक ए स्कूल मन म तीन सौ अंठावन पद उपर नियुक्ति करे जाही। जिला सिक्षा अधिकारी अउ जिला कलेक्टर के अनुमोदन के बाद ए स्कूल मन म प्रतिनियुक्ति उपर हिन्दी माध्यम के सिक्षक मनके भर्ती के प्रस्ताव ल एक हफ्ता म भेजे जा सकही।
कोंडागांव-कबड्डी प्रतियोगिता
कोंडागांव पुलिस डहार ले बड़ेडोंगर गांव म राखे गे तीन दिन के जिला स्तरीय कबड्डी प्रतियोगिता के खिताब ल गारे गांव के टीम ह जीत लेहे। ए प्रतियोगिता म दूर-दराज के गांव के बैसठ ठिन टीम के छह सौ पचास खिलाड़ी मन ह भाग लीन। विजेता टीम ल पन्द्रह हजार रूपिया दे गीस। जिला के अतिरिक्त पुलिस अधीक्षक ह बतईन कि अइसन आयोजन करे के उद्देश्य पुलिस अउ जनता के बीच आपस म विश्वास पैदा करना हवय। प्रतियोगिता के दउरान साइबर सेल डहार ले गांव के लोगन मन ल साइबर धोखाधड़ी ले जुड़े जानबा घलो दे गीस।
क्षेत्रीय सरस मेला
छत्तीसगढ़ राज्य ग्रामीण आजीविका मिशन बिहान कोति ले बनाय गे महिला स्व-सहायता समूह मन डहार ले बने जिनीस के प्रदर्सनी अउ ओला बेचे बर रईपुर के पंडरी हाट म काली उनतीस मार्च ले क्षेत्रीय सरस मेला राखे गेहे। सात अप्रैल तक चलइया ए मेला म छत्तीसगढ़ी खानपान के स्टॉल इहां लगाय जाही। मेला वाले जघा म संझाकुन सांस्कृतिक कारीकरम घलो होही अउ संगेसंग आने-आने जिला ले बिना रसायनिक खातू वाले चाउर जइसे – ब्लैक राईस, सुगंधित चाउर, मसाला, तेल, जंगल म उपजाय गे जनीस अउ मंदरस घलो बेचे जाही। क्षेत्रीय सरस मेला म असम, गुजरात, मध्यप्रदेश, ओड़िसा, उत्तरप्रदेश अउ राजस्थान के संगेसंग कतकोन राज्य के गांव के लोगन मन ह अपन जिनीस ल बेचही।
उहें, छत्तीसगढ़ हाट परिसर म ए बेरा हथकरघा प्रदर्सनी चलत हे, जेमा काली सहर अउ गांव-गंवई के माईलोगिन मन ह फैंशन शो म अपन कला देखईन। ए प्रदर्सनी इकतीस मार्च तक चलही।
अउ अब थोरकुन समाचार सार म-
– हेमचंद विश्वविद्यालय दुरूग म एक अप्रैल ले सुरू होवइया प्राईवेट स्नातकोत्तर के वार्षिक परीक्षा स्थगित कर दे गेहे।
– राजनांदगांव जिला म पुलिस विभाग म नौकरी देवाय के नाव म आठ लाख रूपिया के ठगी करे के आरोप म एक झिन आरक्षक के खिलाफ मामला दर्ज करे गेहे।
– कोंडागांव जिला के फरसगांव म पाछु रतिहा टरक के टक्कर ले फटफटी म बइठे दू झिन युवक के मउत होगे।
– जांजगीर-चांपा जिला के मुलमुला क्षेत्र म दू ठिन गाड़ी के टक्कर म फटफटी म बइठे दू झिन मनखे के मउत होगे। घटना के बाद गुस्साय लोगन मन ह बनाहिल चउक म चक्काजाम कर दीन।
– इही जिला के कैथा गांव म पति-पत्नी के हत्या के मामला म पुलिस ह दंपत्ति के दामाद ल हिरासत म लेहे।
और
– राजनांदगांव जिला के डोंगरगांव म पुलिस ह एक झिन मनखे के तीर ले सात किलो गांजा जब्त करे हे।