मन की बात
प्रधानमंत्री नरेन्द्र मोदी ह चार सौ अरब डॉलर मूल्य के निर्यात लक्ष्य पाय उपर अपन गर्व जाहिर करीन। आकाशवाणी ले ‘‘मन की बात‘‘ कारीकरम म ओमन किहीन कि भारत के प्रोडक्ट ह दुनियाभर म पहुंचत हे। ओमन किहीन कि हमन लोकल प्रोडक्ट ल समर्थन देके ओला ग्लोबल यानि विश्व स्तर के बना सकत हन।
प्रधानमंत्री ह किहीन कि सरकारी बिसई वाले वेबसाइट ‘जेम‘ पोर्टल के माध्यम ले अब छोटे उद्यमी मन घलो सरकार ल अपन प्रोडक्ट सोझे बेचत हे। ओमन किहीन कि नवा भारत ह न केवल बड़का सपना देखथे, भलूक ओला उपर करे के साहस घलो राखथे।
प्रधानमंत्री ह सुरता देवईन कि सात अप्रैल के विश्व स्वास्थ्य दिवस हरय। योग हो या आयुर्वेद अउ दुनिया भर म स्वास्थ्य बर भारत के जीवनशैली के लोकप्रियता बाढ़त हे।
प्रधानमंत्री ह जल संरक्षण यानि पानी बचाय विषय म किहीन कि हमन ल पानी के हरेक बूंद ल बचाय के संकल्प ले बर पड़ही। संगे पानी के दू घांव बउरई उपर घलो जोर देके जरूरत हे। श्री मोदी ह नामी कवि रहीम के दोहा- रहिमन पानी राखिए, बिन पानी सब सुन, एखरो चर्चा करीन। ओमन किहीन कि आजादी के अमृत महोत्सव बेरा देस के हरेक जिला म कम से कम पचहत्तर ठिन अमृत सरोवर बनाय जा सकत हे।
श्री मोदी ह किहीन कि अवइया दिन म कई ठिन तिहार होही अउ नवरात्र घलो आने वाला हे। नवरात्र के पहला दिन गुड़ीपरवा के रूप मनाय जाथे। ईस्टर घलो अप्रैल म बनाय जाथे अउ रमजान के महीना घलो जल्दीच सुरू होवइया हे। ओमन आसा जाहिर करीन कि ए सब तिहार ले देस के विविधता ल बल मिलही।
कोयला खनन-अनुमति
राज्य सरकार ह राजस्थान के बिजली संयंत्र मन बर कोयला खोदाई के अनुमति दे देहे। राजस्थान के मुख्यमंत्री अशोक गहलोत संग छत्तीसगढ़ के मुख्यमंत्री भूपेश बघेल ले मुलाकात बाद वन अउ पर्यावरण विभाग ह एखर मंजूरी देहे, जेखर ले राजस्थान सरकार ह सरगुजा जिला म सरगुजा वनमंडल के पारसा ईस्ट-केते बासेन कोयला खदान के दूसर चरण म एक हजार एक सौ छत्तीस हेक्टेयर क्षेत्र म खनई कर सकत हे।
राज्य सरकार ह कलेक्टर अउ वनमंडल अधिकारी मन बर निकाले निरदेस म केहे हे कि कोयला खनई के परमिसन जरूरी सर्त के पालन होय बादे दे जाय। उहें, राज्य के वन अउ खनिज विभाग के अधिकारी मन स्पष्ट करीन कि राजस्थान सरकार ल कोनों नवा कोल ब्लॉक ले खनई के अनुमति या परमिशन नइ दे गेहे।
एनटीपीसी-सीपत
एनटीपीसी सीपत ह बछर दू हजार बीस-इक्कीस म परफारमेन्स-मूल्यांकन के आधार म जम्मों एनटीपीसी म पहलइया स्थान पाय हे। एनटीपीसी सीपत परियोजना डहार ले वित्तीय बछर दू हजार इक्कीस-बाईस म बीते चौबीस मार्च तक सीपत विद्युत गृह डहार ले इक्यासी दशमलव पांच आठ प्रतिसत पी.एल.एफ. म बीस हजार आठ सौ सत्यासी मिलियन यूनिट विद्युत उत्पादन ले सबो एनटीपीसी म चौथा अउ पी.एल.एफ के मामला छठवां स्थान पाय हे।
एनटीपीसी सीपत परियोजना के महाप्रबंधक घनश्याम प्रजापति ह आज बिलासपुर म होय एक ठिन पत्रकारवार्ता म बतईन कि सीपत परियोजना डहार ले गुजरात, महाराष्ट्र, मध्यप्रदेश अउ छत्तीसगढ़ के संगे गोवा, दमनदीव ल घलो बिजली सप्लाई करे जाथे।
मुख्यमंत्री-शदाणी दरबार
मुख्यमंत्री भूपेश बघेल काली राजधानी रईपुर के शदाणी दरबार के वर्षी महोत्सव म सामिल होईन। ए मउका म मुख्यमंत्री ह किहीन कि छत्तीसगढ़ म शिव अवतारी सद्गुरू संत सदाराम साहिब जी डहार ले स्थापित करे गे शदाणी दरबार तीर्थ परंपरा के मुख्य पीठ रईपुर म होना एक ठिन बड़का सौभाग्य हरय।
अतिक्रमण
भिलाई म नगर निगम के टीम ह आज शहर के मुख्य चौराहा घड़ी चउक ले गदा चउक तक सड़क अतिक्रमण करके व्यवसाय करइया व्यापारी मन हटईन। निगम आयुक्त प्रकाश सर्वें के अगुवई म ए कार्रवाई करे गीस। ए दउरान व्यवसायी मन निगम प्रसासन डहार ले होवत कार्रवाई के विरोध घलो करीन। फेर जिला अउ पुलिस प्रशासन के समझाय-बुझाय के बाद ओमन सांत होईन।
खैरागढ़ उपचुनाव
खैरागढ़ विधानसभा उपचुनाव के चलत काली अट्ठाईस मार्च के नाव वापिस लेके आखिरी दिन हे। इही दिन प्रत्यासी मन ल चुनाव चिन्हा घलो बांटे जाही।
इही बीच, जिला प्रसासन ह उपचुनाव ल लेके तैयारी तेज कर देहे। पुलिस अधीक्षक संतोष सिंह ह काली सुरक्षा व्यवस्था ल लेके जिला के सबो राजपत्रित अधिकारी, पुलिस, थाना अउ चौकी प्रभारी समेत चुनाव सेल म लगे अधिकारी अउ करमचारी मनके बइठका लीन। बइठका म माओवाद परभावित जगह म सुरक्षा व्यवस्था बढ़ाय खातिर रणनीति तैयार करे गीस।
उहें, उपचुनाव बर जिला प्रसासन ल डाक मतपत्र बर एक सौ छह ठिन आवेदन मिले हे। जेमा अस्सी बछर ले जादा उमर वाले अउ दिव्यांग मतदाता घलो हवय।
अमृत महोत्सव-कार्यशाला
आजादी के अमृत महोत्सव के चलत मुंगेली जिला मुख्यालय म काली पी.एम.एफ.एम.ई. योजना के चलत प्रोडक्ट आधारित कार्यसाला राखे गे रिहीस। कारीकरम म बोलत कलेक्टर अजीत वसंत ह किहीन कि ए कार्यसाला के उद्देश्य खाद्य प्रसंस्करण के गतिविधि ल बढ़ावा देना हे। कृषि विकास केन्द्र मुंगेली के विषय-वस्तु विशेषज्ञ अउ मास्टर ट्रेनर प्रमिला जोगी ह टमाटर प्रसंस्करण अउ एखर ले जुड़े मसीनरी बारे म जानकारी दीन। उहें, सी.एस.आई.डी.सी. के महाप्रबंधक सुरेश केशी ह योजना ले मिलइया अनुदान अउ आवेदन के पूरा प्रक्रिया बारे म जानकारी दीन।
कार्यकारिणी सदस्य-छत्तीसगढ़ प्रवास
भारतीय जनता पार्टी अल्पसंख्यक मोर्चा के राष्ट्रीय कार्यकारिणी सदस्य अउ एखर छत्तीसगढ़ प्रभारी जोसफ जॉन हुकिन्स काली अट्ठाईस मार्च के दू दिन के छत्तीसगढ़ दउरा म आवत हे। श्री हुकिन्स काली रईपुर सहर अउ ग्रामीण जिला इकाई के बइठका म भाग लीहीं। उहें, उनतीस मार्च के महासमुंद जिला के पिथौरा म अल्पसंख्यक मोर्चा के पदाधिकारी मन संग घलो बइठका लीहीं।
फ्लोरोसिस लक्षण
प्रदेस के सात ठिन जिला म फ्लोरोसिस के समस्या जादा हे। प्रदेस के सबो जिला चिकित्सालय सामुदायिक स्वास्थ्य केन्द्र अउ प्राथमिक स्वास्थ्य केन्द्र मन म फ्लोरोसिस के स्क्रीनिंग अउ इलाज के सुविधा हे। उहें, राजधानी रईपुर समेत बारह ठिन जिला म फ्लोरोसिस के जांच बर प्रयोगसाला राखे गेहे।
राज्य फ्लोरोसिस नियंत्रण कार्यक्रम के नोडल अधिकारी डॉक्टर शैलेन्द्र अग्रवाल ह बतईन कि फ्लोरोसिस ह असुरक्षित पेयजल ले होवइया एक ठिन गंभीर बीमारी हरय। एमा फ्लोराइड के मात्रा जादा होय ले दांत के पिवरई, समय ले पहिली दांत के खिअई, सरीर के हड्डी के विकृति अउ टेड़गा होवई, सामान्य रूप ले देखे जाथे। श्री अग्रवाल ह बतईन कि स्वास्थ्य विभाग के टीम ह सरलग फ्लोरोसिस ले ग्रसित गंवई म जाके एखर ले पीड़ित मनखे मनके जानकारी सकेलथे।
अउ अब थोरकुन समाचार सार म-
– केन्द्र सरकार ह प्रधानमंत्री गरीब कल्याण अन्न योजना के बेरा ल अउ छह महीना बढ़ा देहे। योजना के माध्यम ले राष्ट्रीय खाद्य सुरक्षा अधिनियम ले हरेक लाभार्थी ल हर महीना पांच किलोग्राम अनाज निःशुल्क मिलत हे।
– भक्तमाता कर्मा जयंती काली हरय। एखर पूर्व संझा म मुख्यमंत्री भूपेश बघेल ह प्रदेसवासी मन ल बधाई अउ सुभकामना दीन हे।
– नागालैंड के कोहिमा म राखे गे राष्ट्रीय क्रॉस कंट्री दउड़ म दक्षिण पूर्व मध्य रेलवे बिलासपुर मंडल के खिलाड़ी मुन्नी देवी ह स्वर्ण अउ दिनेश कुमार ह रजत पदक जीते हे।
– रायगढ़ म आज पंचधारी डेम म बूढ़े ल एक झिन जवान लइका के मउत होगे।
और
– कोंडागांव पुलिस ह एक ठिन कार ले पैंतीस किलो गांजा बरामद करे हे, जेखर कीमत करीबन सात लाख रूपिया आंके गेहे।