खैरागढ़-उपचुनाव
कांग्रेस ह खैरागढ़ उपचुनाव बर महिला प्रत्याशी यशोदा वर्मा ल अपन उम्मीदवार घोसित करे हे। ए संबंध म कांग्रेस पार्टी मुख्यालय ले एक पत्र जारी करे गेहे। श्रीमती वर्मा ब्लॉक कांग्रेस कमेटी के अध्यक्ष हरय। प्रत्यासी चयन बर कांग्रेस चुनाव समिति के बैठक म 24 दावेदार मनके नाव आघू आय रिहीस। एमा ले 7 नाम ल केन्द्रीय चुनाव समिति के आघू भेजे गे रिहीस, जिहां यशोदा वर्मा ल पार्टी प्रत्यासी चुने गीस।
इही बीच, खैरागढ़ उपचुनाव बर नामांकन पत्र भरे के प्रक्रिया जारी हे। अब तक सिर्फ एके झिन अभ्यर्थी ह नामांकन पत्र जमा करे हे। नाम निर्देशन पत्र दाखिल करे के आखिरी तारीख 24 मार्च हरय। 25 मार्च के नामांकन पत्र मनके जांच होही अउ 28 मार्च तक उम्मीदवार अपन नाव वापस ले सकही।
विश्व जल दिवस
आज विश्व जल दिवस हरय। ए दिवस स्वच्छ जल के महत्व अउ जल संसाधन मनके कुशल अउ सत्त प्रबंधन उपर ध्यान केन्द्रित करथे। विश्व जल दिवस के उद्देश्य विशेष रूप ले सत्त विकास लक्ष्य के तहत बछर 2030 तक सबो बर पानी अउ स्वच्छता उपर ध्यान केन्द्रित करना हे। ए बछर के थीम हे – ‘‘भूमिगत जल अदृश्य को दृष्टिगोचर बनाना‘‘। प्रधानमंत्री नरेन्द्र मोदी ह पानी के एक-एक बूंद बचाय बर आह्वान करीन।
मुख्यमंत्री भूपेश बघेल ह प्रदेसवासी मन ल विश्व जल दिवस के सुभकामना दीन हे। ओमन किहीन कि छत्तीसगढ़ तरिया अउ नदिया के प्रदेस हरय, जबकि सही देखरेख अउ जागरूकता के अभाव म ए जल स्त्रोत सुखात हे। छत्तीसगढ़ सरकार ह नरवा कार्यक्रम के तहत ए जल स्त्रोत मनके संवर्धन के प्रयास करत हे। मुख्यमंत्री ह लोगन मन ले सहभागिता के आग्रह करत किहीन कि जल स्त्रोत मन ल बचाय बर खुदे पहल करके नवा पीढ़ी ल घलो एखर बर प्रेरित करव।
विधानसभा अनुदान मांग
राज्य विधानसभा म काली अवइया वित्तीय बछर बर मुख्यमंत्री भूपेश बघेल के विभाग मन ले जुड़े 12 हजार 681 करोड़ 75 लाख रूपिया ले जादा के अनुदान मांग ध्वनिमत ले पारित कर दे गीस। मुख्यमंत्री ह सदन म होय चर्चा के जवाब देत किहीन कि राज्य सरकार ‘‘सेवा, जतन, सरोकार‘‘ अउ ‘‘गढ़बो नवा छत्तीसगढ़‘‘ ए दू धेय वाक्य ल लेके चलत हे। ओमन किहीन कि बीते तीन साल म लोगन मनके जीवन म बड़े बदलाव आय हे अउ आजीविका के साधन बाढ़े हे। श्री बघेल ह किहीन कि राज्य म खनिज राजस्व म लगातार बढ़ोतरी होवत हे। ए बछर करीब 11 हजार 900 करोड़ रूपिया राजस्व प्राप्त होय के अनुमान हे। मुख्यमंत्री ह बतईन कि ए बछर लोक सेवा केन्द्र मन ले 25 लाख ले जादा नागरिक मन ल आने-आने सरकारी सेवा मनके लाभ मिले हे। उहें, हाफ बिजली बिल योजना के तहत 40 लाख 74 हजार घरेलू उपभोक्ता मन ल 2200 करोड़ रूपिया के राहत मिले हे। श्री बघेल ह यहू किहीन कि प्रदेस म पुरानी पेंशन योजना बहाल करे ले अधिकारी अउ करमचारी मन ल सेवानिवृत्ति के बाद राहत मिलही।
बेरोजगारी दर-आंकड़ा
सेंटर फॉर मॉनिटरिंग इंडियन इकोनॉमी संगठन डहार ले जारी करे गे बेरोजगारी के नवा आंकड़ा के अनुसार छत्तीसगढ़ 1.7 प्रतिशत के संग देस म सबले कम बेरोजगारी दर वाले राज्य मन म तीसर स्थान म हे। बीते फरवरी महीना के स्थिति म सी.एम.आई.ई. के अनुसार देश म सबले कम बेरोजगारी दर 1 प्रतिशत ओड़िसा म हे। जबकि सबले जादा बेरोजगारी दर राजस्थान म करीब 32 प्रतिशत अउ हरियाणा म 31 प्रतिशत हे।
ए उपलब्धि उपर खुसी जतावत मुख्यमंत्री भूपेश बघेल ह किहीन कि ग्रामीण अर्थव्यवस्था के मॉडल अउ बेहतर कार्य प्रबंधन ले राज्य के बेरोजगारी दर म कमी आय हे।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी म आज के प्रश्न हवय –
– ‘‘ओ स्वतंत्रता सेनानी के नाव बतावव, जउन स्वाधीनता संग्राम के बेरा जेल जवइया उत्तराखंड के पहिली महिला रिहीन। ओमन ह सविनय अवज्ञा आंदोलन के दौरान अलमोड़ा ले विरोध-प्रदर्शन के नेतृत्व करे रिहीन?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही।
विधानसभा-बीज निगम/शून्यकाल
राज्य विधानसभा म आज विधानसभा अध्यक्ष डॉक्टर चरणदास महंत ह बीज निगम डहार ले ब्लैक लिस्टेड फर्म ल भुगतान करे जाय के मामला के जांच विधानसभा के समिति ले कराय के घोसना करीन। सदन म नेता प्रतिपक्ष धरमलाल कौशिक ह डी.ए.एन. टेस्ट के बिना हाईब्रिड धान अउ हाईब्रिड मक्का के बीजा प्रदान करइया कंपनी ल भुगतान करे जाय के मुद्दा उठईन। एखर उपर मंत्री रविन्द्र चौबे ह गलती स्वीकार करत किहीन कि कंपनी ल भुगतान नइ करे जाना रिहीस। फेर ओमन ह ए स्पष्ट करीन कि अब तक पूरा भुगतान नइ करे गेहे। वरिष्ठ सदस्य अजय चंद्राकर, शिवरतन शर्मा अउ सौरभ सिंह ह ए मुद्दा उपर सत्तापक्ष ल घेरत जांच के मांग करीन। जवाब म मंत्री श्री चौबे ह सदन ल भरोसा देवइन कि किसान मनके मुद्दा म कोन्हों भी प्रकार के गड़बड़ी बर्दास्त नइ करे जाय। ओमन ह ए मामला के जांच के मांग स्वीकार करत किहीन कि दोषी मन उपर कार्रवाई करे जाही।
उहें, राज्य विधानसभा म आज विपक्षी सदस्य मन ह मीसाबंदी मन ल फेर पेंशन देके मांग ल लेके हंगामा करीन। एखर चलत सदन के कार्रवाई पांच मिनट बर स्थगित करे गीस। शून्यकाल म भाजपा सदस्य मन ह मीसाबंदी मनके पेंशन बहाली के मुद्दा उपर स्थगन के माध्यम ले चर्चा के मांग करीन। सदस्य अजय चंद्राकर ह किहीन कि न्यायालय के फैसला के बाद घलो मीसाबंदी मन ल पेंशन के लाभ नइ दे जात हे। नेता प्रतिपक्ष धरमलाल कौशिक ह ए मुद्दा ल लेके राज्य सरकार उपर हठधर्मिता के आरोप लगईन। एखर बाद विपक्षी सदस्य मन ह सदन म नाराबाजी घलो करीन।
ठग आरोपी-गिरफ्तार
छत्तीसगढ़ सहित देस के आने राज्य मन म लोगन मन ले करोड़ो रूपिया के ठगी करे के मामला म दुर्ग पुलिस ह फर्जी कॉल सेंटर के पर्दाफाश करे हे। ए गिरोह के चार आरोपी मन ल नई दिल्ली ले गिरफ्तार करे गेहे। जिला के वरिष्ठ पुलिस अधीक्षक बद्रीनारायण मीणा ह एक पत्रकारवार्ता म किहीन कि ए गिरोह ह ग्रुप इंश्योरेंस के झासा देके भिलाई के एक सियान ले सोलह लाख रूपिया के ठगी करे रिहीस। मामला दर्ज होय के बाद साइबर सेल अउ पुलिस के टीम ह नई दिल्ली दबिस दीस अउ आरोपी मन ल गिरफ्तार कर लीन।
स्नातक पाठ्यक्रम-प्रवेश परीक्षा
केन्द्रीय विश्वविद्यालय मन म स्नातक पाठ्यक्रम मन म प्रवेस बर अब छात्र मन ल साझा प्रवेस परीक्षा म भाग लेना जरूरी होही। विश्वविद्यालय अनुदान आयोग-यूजीसी के अध्यक्ष एम. जगदीश कुमार ह किहीन कि केन्द्रीय विश्वविद्यालय ए बछर ले स्नातक पाठ्यक्रम मन म साझा विश्वविद्यालय प्रवेस परीक्षा सीयूईटी म मिले अंक ल आधार बनाके छात्र मन ल प्रवेस दीही। ओमन बतईन कि शैक्षणिक बछर 2022-23 ले राष्ट्रीय परीक्षा एजेंसी-एन.टी.ए. स्नातक अउ परा-स्नातक पाठ्यक्रम मन म प्रवेश बर सीयूईटी परीक्षा संचालित करही। श्री कुमार ह बतईन कि सीयूईटी के विषय-वस्तु एन.सी.आर.टी. के 12वीं कक्षा के पाठ्यक्रम म आधारित रइही। यू.जी.सी. अध्यक्ष ह बतईन कि परीक्षा जुलाई के पहिली सप्ताह म आयोजित करे जाही। स्नातक पाठ्यक्रम मन बर प्रवेस परीक्षा के आवेदन प्रक्रिया अप्रैल के पहिली सप्ताह ले सुरू होही।
खादी-प्रदर्शनी
रायपुर के पंडरी स्थित छत्तीसगढ़ हाट परिसर म आज ले राज्य स्तरीय खादी प्रदर्सनी सुरू होवत हे। 31 मार्च तक चलइया ए प्रदर्सनी के आयोजन खादी अउ ग्रामोद्योग बोर्ड डहार ले करे जात हे। ए प्रदर्सनी बिहनिया 11 बजे ले रतिहा 9 बजे तक खुले रइही। प्रदर्सनी स्थल म कतकोन प्रकार के छत्तीसगढ़ी व्यंजन मनके घलो आनंद ले जा सकथे। संगेसंग हर दिन सांस्कृतिक कार्यक्रम घलो आयोजित करे जाही।