आदिवासी महिला-सम्मानित
फूड प्रोसेसिंग के क्षेत्र म उत्कृष्ट काम बर केन्द्र सरकार ह कोंडागांव जिला के आदिवासी महिला मन ल सम्मानित करीन हे। ए आदिवासी महिला ‘कोंडानार‘ ब्रांड के नाव ले कृषि खाद्य उत्पाद के निर्माण अउ बिक्री करथे। भारत सरकार के सूक्ष्म, लघु अउ मध्यम उद्यम मंत्रालय डहार ले फूड प्रोसेसिंग के क्षेत्र म बढ़िया काम करइया माईलोगिन मन ल आज नई दिल्ली म सम्मानित करे गीस। कृषि खाद्य उत्पाद के निर्माण अउ महिला उद्यमिता ल बढ़ावा दे बर एम.एस.एम.ई. के केन्द्रीय राज्यमंत्री भानु प्रताप सिंह वर्मा ह ए अवॉर्ड ल दीन।
मुख्यमंत्री भूपेश बघेल ह ए अवार्ड मिले म अपन खुसी जतईन।
कोंडागांव के कलेक्टर पुष्पेन्द्र मीणा ह बतईन कि उड़ान महिला किसान प्रोड्यूसर कंपनी- अचार, चटनी, मिल्क सेक, कुकीज, तीखुर, नारियल तेल संग तीस ले जादा खाद्य सामग्री बनाके ओला बेचे के काम करथे। ए कंपनी म दू सौ ले जादा माईलोगिन मन ल रोजगार मिले हे।
पोषण पखवाड़ा
छत्तीसगढ़ संग देसभर म आज ले जिला, विकासखंड अउ ग्राम स्तर म पोषण पखवाड़ा मनाय जात हे। एखर तहत आज पहिली दिन राज्य म अलग-अलग जगह ले पोषण जागरूकता बर सुपोषण रथ, पोषण साइकिल रैली अउ मोटर साइकिल रैली निकाले गीस। ए पखवाड़ा चार अप्रैल तक चलही। ए दउरान हर दिन आने-आने गतिविधि के आयोजन कर व्यक्तिगत अउ सामुदायिक स्तर म पोषण संबंधित व्यवहार म बदलाव के प्रयास करे जाही।
मुख्यमंत्री-पीएम सम्मान निधि
मुख्यमंत्री भूपेश बघेल ह पीएम किसान सम्मान निधि बर सबो जिला के कलेक्टर मन ल किसान मनके सत-प्रतिसत केवाईसी करवाय के निरदेस देहे। एखर बर ओमन ह अभियान चलाके पन्द्रह दिन म ए काम ल पूरा करे बर कहिन हे। मुख्यमंत्री ह कहिन कि अभियान के दउरान अइसन सबो किसान जेखर बैंक म केवाईसी नइ होय हे, ओला पूरा कराय जाय।
विस-समाचार
राज्य विधानसभा म आज मंत्री टी.एस. सिंहदेव ह मरवाही वनमंडल म मनरेगा के तहत गड़बड़ी के मामला म जिला पंचायत के तत्कालीन सीईओ संग पन्द्रह कर्मचारी मन ल निलंबित करे के घोसना करीन। एखर पहिली, कांग्रेस विधायक गुलाब सिंह कमरो ह ध्यानाकर्षण सूचना के माध्यम ले ए मामला ल उठईन। जवाब म मंत्री सिंहदेव ह ए स्वीकार करीन कि ए मामला के जांच म गड़बड़ी पाय गेहे अउ संबंधित अधिकारी मन उपर कार्रवाई करे जात हे। मंत्री के जवाब के बाद सत्ता पक्ष अउ विपक्ष के सदस्य मन ह दोषी अधिकारी मन ल निलंबित करे अउ उंखर ले रासि वूसले के मांग रखीन। एखर बाद मंत्री सिंहदेव ह किहीन कि सदन के गरिमा, नियम के पालन अउ नियम के अनुसार कार्रवाई ले ही बनथे। ओमन कहिन कि सरकार के काम करे के सीमा हे। ए मामला म सेवानिवृत्त डी.एफ.ओ. अउ वर्ग-ए के अधिकारी मन कोन तरह ले निलंबित करे जा सकथे। ओमन कहिन कि आई.एस.एफ. या ए-ग्रेड अधिकारी मन उपर कार्रवाई के मामला समन्वय बर भेजे जाही। मंत्री सिंहदेव ह सदन ल भरोसा देवईन कि बाचे दोषी के खिलाफ कार्रवाई करे जाही।
माओवादी-समाचार
सुकमा जिला के चिंतागुफा थाना क्षेत्र स्थित एलमागुंडा म कोबरा बटालियन के कैम्प म आज बिहनिया माओवादी मन ह हमला कर दीन। ए हमला म सीआरपीएफ के तीन जवान घायल होगे हे। कोबरा बटालियन के एक महीना पहिली खोले गे ए कैम्प उपर माओवादी मन ह देसी बैरल ग्रेनेड लांचर ले हमला करीन। जवान मनके जवाबी कार्रवाई के बाद माओवादी मन ह मउका जगह ले भाग गीन।
उहें, जिला के किस्टाराम इलाका म चौबीस माओवादी मन ह आत्मसमर्पण करीन हे। जिला के पुलिस अधीक्षक सुनील शर्मा ह बतईन कि ए माओवादी मन ह पोटकपल्ली कैम्प म कोबरा बटालियन, सीआरपीएफ अउ जिला पुलिस बल के वरिष्ठ अधिकारी मनके आगू आत्मसमर्पण करीन।
बीजापुर जिला म घलो भैरमगढ़ एरिया कमेटी के तहत एक मिलिशिया कमांडर ह अतिरिक्त पुलिस अधीक्षक पंकज शुक्ला के आगू आत्मसमर्पण कर दीन।
ऐति, नारायणपुर जिला के कड़ेमेटा अउ कड़ेनार कैम्प के तीर माओवादी मन ह सुरक्षा बल नुकसान पहुंचाय के उद्देश्य ले आईईडी लगाय रिहीन। फेर बीडीएस टीम के सक्रियता के सेती ए विस्फोटक ल बरामद करके ओला सुरक्षित तरीका ले निष्क्रिय कर दे गीस।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी म आज के प्रश्न हवय –
– ‘‘अगर मोर तीर उंखर जइसन ग्यारह अउ अनुयायी रिही त मैं एक बछर म ही ब्रिटिश शासन ले आजादी हासिल कर लूहूं‘‘। ए सब्द महात्मा गांधी ह कोन स्वाधीनता सेनानी के बारे म कहे रिहीन। कोन स्वाधीनता सेनानी ह आंध्रप्रदेश के निर्माण बर अपन प्राण के आहुति दे रिहीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही।
भाजपा-आरोप
भारतीय जनता पार्टी के प्रदेश अध्यक्ष विष्णुदेव साय ह आरोप लगाय गेहे कि राज्य के कांग्रेस सरकार अपराधी अउ अपराध म अंकुश लगाय म पूरा तरह ले विफल हवय। एक ठिन बयान जारी कर श्रीसाय ह महासमुंद के घटना के उल्लेख करत कहिन कि राज्य म जब पुलिसकर्मी मनके ही हत्या करे जात हे। तब अइसे म आम मनखे कोन तरह ले सुरक्षित रइही। ओमन कहिन कि राज्य म चाकूबाजी अउ हत्या के मामला संग नसा के कारोबार सरलग बाढ़त हे, जेला रोके खातिर कांग्रेस सरकार डहार ले कोनों ठोस कदम नइ उठाय जात हे। श्री साय ह कहिन कि राज्य म अपराधी मन ल पुलिस के डर नइ हे।
दुर्घटना
राजधानी रईपुर म काली देर रतिहा तेज रफ्तार कार के चपेट म आय ले एक झिन मनखे के मउत होगे। उहें, एक झिन लइका संग सोलह लोगन ह घायल होगे हे। पुलिस ह आरोपी कार चालक ल गिरफ्तार कर लेहे।
खबर के मुताबिक पुरानी बस्ती थाना इलाका म नसा के हालत म कार चलात एक झिन मनखे ह एक के बाद एक करीबन पांच कार ल टक्कर मारीस। ए दउरान सत्रह लोगन ह घायल होगे, जेमा ले एक झिन मनखे के इलाज के दउरान मउत होगे।
ओति, राजनांदगांव जिला के घूमका थाना क्षेत्र स्थित मुड़पार रद्दा म तेज रफ्तार कार के चपेट म आय ले मोटर साइकिल सवार दू लोगन के मउत होगे। उहें, इही जिला के चिचोला म एक ठिन मोटर साइकिल ह अनियंत्रित होगे पूल ले झूरा नदी म गिर ले एक झिन युवक के मउत होगे।
खैरागढ़-उपचुनाव
खैरागढ़ उपचुनाव बर अभी नामांकन पत्र भरे के प्रक्रिया चलत हे। अब तक एक झिन अभ्यर्थी ह नाम निर्देशन पत्र दाखिल करे हे। उहें, निष्पक्ष अउ सांतिपूर्ण मतदान कराय बर जिला के अधिकारी मन ल नोडल अधिकारी नियुक्त करके जिम्मेदारी सौंप दे गेहे। नामांकन पत्र चौबीस मार्च तक भरे जा सकही।
माईलोगिन मतदाता मनके भागीदारी बढ़ाय बर ए विधानसभा क्षेत्र म संगवारी मतदान केन्द्र बनाय गेहे, जिहां सिरिफ माईलोगिन मन ह मतदान दल म काम करही अउ माईलोगिन मन ही मतदाता होही।
उहें, खैरागढ़ उपचुनाव ल देखत जिला म लागू आचार संहिता के सेती नवरात्रि परब के मउका म लगइया मेला के आड़ म राजनीतिक गतिविधि ले जुड़े आयोजन या कोनों तरह के प्रचार-प्रसार म जिला प्रसासन ह रोक लगा देहे।
खबर के मुताबिक खैरागढ़ उपचुनाव बर बारह अप्रैल के मतदान होही।
एम्स-विशेष क्लीनिक
अखिल भारतीय आयुर्विज्ञान संस्थान-एम्स रईपुर म अब हरेक मंगलवार के मंझनिया ढाई बजे ले संझा पांच बजे तक ग्लूकोमा के रोगी मन बर विशेष क्लीनिकि आयोजित करे जाही। एम्स के निदेशक प्रोफेसर डॉक्टर नितिन एम. नागरकर ह बतईन कि ए मरीज मन ल एके संग इलाज के सुविधा देवाय बर बिसेस क्लीनिक सुरू करे गेहे।