स्वस्थ बालक-बालिका स्पर्धा
छह बछर तक के लइका मन म पोसन के स्तर जाने बर छत्तीसगढ़ समेत देसभर म काली इक्कीस मार्च ले ‘स्वस्थ बालक-बालिका स्पर्धा‘ राखे गेहे। सत्ताईस मार्च तक चलइया ए अभियान बेरा स्वास्थ्य अउ पोसन संबंधी बिसय उपर समुदाय के भागीदारी बढ़ाय के परयास करे जाही। आंगनबाड़ी केन्द्र अउ स्कूल मनके संगेसंग प्राथमिक स्वास्थ्य केन्द्र म जाके लइका मन म होवत विकास ल जांचे जाही।
ए अभियान के उद्देश्य छह बछर तक के लइका मनके पोसन स्तर ल सुघ्घर बनाना अउ उंखर सुपोषण बर बाप-महतारी ल संवेदनशील बनाना हे। एखर अंतर्गत एकीकृत बाल विकास योजना के विस्तार घलो करे जाही। ए काम म आंगनबाड़ी केन्द्र के संगे लायंस क्लब, रोटरी क्लब समेत आने सामाजिक संस्था अउ लइका मनके दाई-ददा के घलो सहयोग ले जाही। प्रदेस के महिला अउ बाल विकास मंत्री अनिला भेंड़िया ह प्रदेस के जनप्रतिनिधि मन ल पाती पठो के अनुरोध करे हे कि ओमन नान्हें लइका मन ल कुपोषण मुक्त बनाय के परयास म अपन सुघ्घर भूमिका निभावय।
मुख्यमंत्री-बलौदाबाजार
मुख्यमंत्री भूपेश बघेल ह आज बलौदाबाजार के विप्रवाटिका म होय सर्व ब्राम्हण समाज के शपथ ग्रहण समारोह म सामिल होईन। ए मउका म ओमन बलौदाबाजार पॉलीटेक्निक के नामकरण पूर्व सांसद करूणा शुक्ला के नाव उपर करे के संगे उंखर नाव म समाज बर भवन निर्माण कराय के घोसना करीन। मुख्यमंत्री ह माता कौशिल्या के जनम तिथि के पता लगाय बर इतिहासकार विशेषज्ञ अउ धरमगुरू मन ल आग्रह करीन।
उहें, मुख्यमंत्री ह छत्तीसगढ़ मनवा कुर्मी क्षत्रिय समाज के अधिवेशन ल संबोधित करत मोपका भाटापारा म कॉलेज के नामकरण रामनाथ वर्मा के नाव उपर करे के घोसना करीन। संगे गांव के तिल्दा बांधा म पानी के बेवस्था ल तय राखे बर किहीन।
मुख्यमंत्री-लोकार्पण
मुख्यमंत्री भूपेश बघेल ह कुम्हारी नगर पालिका म बैडमिंटन कोर्ट भवन के लोकार्पण करीन। इहां दू ठिन कोर्ट बनाय गेहे, जेमा चेंजिंग रूम घलो रइही। उहें, ए जगह म वर्टिकल गार्डन घलो बनाय गेहे। ए मउका म मुख्यमंत्री ह किहीन कि प्रदेस के कई ठिन जिला म खेल के अधोसंरचना बनाय जात हे, जेखर ले छत्तीसगढ़ ह खेल के क्षेत्र म मजबूत होके आगू आही।
अपन दउरा बेरा मुख्यमंत्री ह नगर पालिका कुम्हारी के फीगल स्लज ट्रीटमेंट प्लांट के घलो निरीक्षण करीन। ए मकउा म बताय गीस कि ए ह प्रकृति आधारित समाधान हे। उपचारित जल ल बाग-बगीचा अउ खेती काम बउरे जा सकही। उहें, सूखा स्लज ल खाद बनाय जाही।
मुख्यमंत्री ह कुम्हारी म सात करोड़ रूपिया ले जादा के कई ठिन निर्माण काम के लोकार्पण अउ भूमिपूजन करीन। संगे कुम्हारी म तेईस करोड़ रूपिया के लागत ले सब्जी मंडी निर्माण अउ मछरी पाले बर खदान ल सुधारे के घोसना घलो करीन।
भाजपा-आरोप
भारतीय जनता पार्टी ह आरोप लगाय गेहे कि छत्तीसगढ़ सरकार ह सरकारी मशीन के अउ पुलिस के दुरूपयोग करत हे। पार्टी के प्रदेस प्रवक्ता संजय श्रीवास्तव, पूर्व विधायक देवजी भाई पटेल अउ नवीन मारकंडे ह पत्रकारवार्ता म बतईन कि भाजपा ह प्रदेस म पन्द्रह बछर तक जनता के सेवा करे हे। फेर, भाजपा के कार्यकाल म कभू भी सरकारी मसीनरी अउ पुलिस के दुरूपयोग नइ होईस। ओमन आरोप लगाय हे कि राज्य म कानून व्यवस्था सबो डहार ले चरमरा गेहे।
खैरागढ़ उपचुनाव
खैरागढ़ उपचुनाव बर नामांकन पत्र भरे के प्रक्रिया चलत हे। नामांकन पत्र ल चौबीस मार्च तक भरे जा सकही। उहें, पच्चीस मार्च के नामांकन पत्र मनके जांच होही, तहां अट्ठाईस मार्च तक उम्मीदवार मन अपन नाव वापिस ले सकत हे। खैरागढ़ उपचुनाव बर कई ठिन राजनीतिक दल मन उम्मीदवार चुने के प्रक्रिया तेज कर देहे।
इहां ए बतादन कि खैरागढ़ उपचुनाव बर बारह अप्रैल के मतदान होही। ए सीट ह जनता कांग्रेस छत्तीसगढ़ के विधायक देवव्रत सिंह ले निधन होय बाद ले रिता हवय।
नदी तट-वृक्षारोपण कार्यक्रम
प्रदेस म नंदियां मनके तीरे-तीर ल भू-क्षरण ले रोके अउ नंदियां के पानी सरलग चलत रहय, तेखर बर नदी तट वृक्षारोपण कारीकरम चलाय जात हे। एखर बर अवइया वित्तीय बछर के बजट म सात करोड़ अट्ठाईस लाख रूपिया के प्रावधान राखे गेहे।
आदिवासी युवा विनिमय कार्यक्रम
आदिवासी युवा विनिमय कारीकरम के चलत सीमा सुरक्षा बल-बीएसएफ डहार ले कांकेर जिला के दुर्गूम क्षेत्र के जवान लइका मनके दूसरा जत्था आज दुरूग रेलवे स्टेशन ले चेन्नई बर पठोय गीस। टीम के सदस्य मन तमिलनाडु के चेन्नई समेत कई ठिन जिला म जाके जवान आदिवासी लइका मन ले भेंट करे बाद उहां के कला, संस्कृति अउ रहन-सहन ल जानही। केन्द्रीय युवा कार्यक्रम अउ खेल मंत्रालय के नेहरू युवा केन्द्र संगठन नई दिल्ली अउ गृह मंत्रालय डहार ले राखे गे ए कारीकरम म जवान आदिवासी लइका मन ल उंखर अधिकार बारे म जानबा घलो दे जाही।
अपहरण-आरोपी गिरफ्तार
रईपुर के सिविल लाइन थाना क्षेत्र ले दस दिन आगू अगवा होय एक झिन नान्हें लइका ल पुलिस ह सकुसल छोड़ाय हे। ए मामला म दू झिन आरोपी ल उत्तराखंड ले गिरफ्तार करे गेहे।
पुलिस के मुताबिक मुख्य आरोपी के देहरादून मेंं रेहे के सूचना मिले बाद एंटी क्राईम अउ साइबर यूनिट के प्रभारी निरीक्षक के अगुवई म दस झिन सदस्य वाले टीम ल रवाना करे गे रिहीस। पुलिस के टीम ह देहरादून म जाके मुख्य आरोपी ल गिरफ्तार करे के संगे नान्हें लइका ल सकुशल छोड़ा लीस।
विश्व गोरैया दिवस
आज विश्व गोरैया दिवस हरय। चिरई मनके संरक्षण अउ ओखर बारे म जागरूकता बढ़ाय बर हर बछर बीस मार्च के गोरैया दिवस मनाय जाथे। गोरैया के संख्या म तेजी ले कमती होवत देखत एखर महत्व अउ बाढ़ गेहे। गोरैया के संख्या कम होय के पाछु कीटनाशक के बउरई, घर-दुवार बनाय के ढंग म बदलाव अउ बाग-बगीचा के सिरई ह मुख्य कारण हवय। संगे मोबाइल अउ टीवी टावर ले होवइया रेडिएशन के सेती गोरैया के संख्या ह घटत जात हे।
अउ अब थोरकुन समाचार सार म-
– विधायक अउ कांग्रेस के प्रदेस अध्यक्ष मोहन मरकाम ह कोंडागांव म कोतवाली थाना के नवा बिल्डिंग के उद्घाटन करीन।
– महासमुंद साइबर सेल म पदस्थ ए.एस.आई. उपर बीते रतिहा कोनों बात ल लेके अज्ञात आरोपी मन हमला कर दीस। ए.एस.आई. के उपचार बेरा मउत होगे। पुलिस ह ए मामला म पांच झिन आरोपी ल गिरफ्तार कर लेहे।
– दुरूग जिला के अंडा थाना क्षेत्र म बालोद रद्दा कार के ऐति-तेति होके रूख ले टकराय ले एक सिक्षिका के मउत होगे। उहें, एक झिन आने मनखे गंभीर रूप ले घायल होगे हे।
– कोरबा जिला के रामपुर पुलिस चौकी क्षेत्र म दुपहिया गाड़ी के बीच होय टक्कर ले एक झिन जवान नोनी के मउत होगे।
– महासमुंद जिला म कोतवाली थाना क्षेत्र के बरौंडाबाजार तरिया म बुड़े ले तीन झिन नान्हें लइका म ले एक झिन के इलाज बेरा मउत होगे। उहें, एक झिन लइका के लास काली तरिया ले मिले हे अउ एक लइका के इलाज अस्पताल चलत हे।
– छत्तीसगढ़ प्रदेस टेनिस संघ डहार ले भिलाई के सेक्टर-छह स्थित बीएसपी टेनिस कॉम्पलेक्स म आई.टी.एफ. जूनियर वर्ल्ड टूर जे-फाईव टेनिस टूर्नामेंट काली इक्कीस ले छब्बीस मार्च तक राखे गेहे।
अउ
– गौरेला-पेण्ड्रा-मरवाही जिला के मरवाही वनमंडल के गांव रूमगा म हाथी मनके हमला ले एक झिन नान्हें नोनी के मउत होगे।