प्रदेश म घलो स्वास्थ्य विभाग ह ए टीकाकरण अभियान के तैयारी पूरा कर लेहे। राज्य म ए उमर के 13 लाख 21 हजार 286 लईका मन ल टीका लगाये जाही। कोरोना टीकाकरण के राज्य नोडल अधिकारी अउ राष्ट्रीय स्वास्थ्य मिशन के संचालक डॅाक्टर प्रियंका शुक्ला ह बताइन कि 12 ले 14 बछर के लईका मन ल हैदराबाद के बॉयोलॉजीकल-ई ले बने कॅार्बेवैक्स टीका लगाये जाही। पहिली डोज के चार सप्ताह के बाद एखर दूसर डोज लगाये जाही।
आज रायपुर म पत्रकार मनले चर्चा करत ओमन कीहिन कि राज्य के संबंधित विभाग मन ल ये प्रयास करना चाही कि नई उड़ान, सीखो और कमाओ, पढ़ो परदेस जइसे योजना मनके तहत पात्र लोगन मन ल आवेदन करे बर प्रोत्साहित करके ओमन ल लाभ देवाय।
सुश्री शहजादी ह अपन तीन दिवसीय प्रदेश प्रवास के बेरा राज्यपाल अनुसूइया उइके ले सौजन्य भेंट करीन। एखरे संग अधिकारी मनके संग बैठक करके अल्पसंख्यक मन बर चलाये जात योजना मनके प्रगति के समीक्षा करीन। एखर अलावा ओमन ह आने आने अल्पसंख्यक समुदाय मनके प्रतिनिधि मनले भेंट करीन। सुश्री शहजादी ह बताइन कि ओमन ल मुख्य रूप ले इसाई समुदाय डहार ले कब्रिस्तान बर जमीन आबंटन, बौद्ध समुदाय डहार ले सिरपुर म धर्मशाला के निर्माण के संगेसंग मदरसा मनके शिक्षक मनले नियमित रूप ले वेतन नइ मिले के शिकाइत मिले हे।
राष्ट्रीय अल्पसंख्यक आयोग के कार्यवाहक अध्यक्ष ह राज्य सरकार के अधिकारी मनले अल्पसंख्यक समुदाय मनके ए मांग ल पूरा करे बर सकारात्मक पहल करे बर केहे हे।
ये आदिवासी बुढ़ा तालाब स्थित धरना स्थल ले विधानसभा के घेराव करे बर निकलिन। फेर एखर ले पहिली सप्रे स्कूल के तीर म बैरिकेड लगाके पुलिस ह रैली ल रोक दीस। ए बेरा आदिवासी समुदाय के लोगन अपन मांग ल लेके अड़े रीहिन, जेखर बाद पुलिस ह उंखर रैली ल रायपुर स्थित जयस्तंभ चौक तक जाय के अनुमति दीस। जिहां प्रदर्शनकारी मन ह अपन मांग ल लेके नाराबाजी करीन।
रैली म शामिल सर्व आदिवासी समाज के प्रदेश अध्यक्ष सोहन पोटाई ह आरोप लगाय हे कि सरकार उंखर मांग ल गंभीरता ले नइ लेत हे। जेखर चलत मजबूर होके विधानसभा घेराव के निर्णय ले गीस। ओमन कीहिन कि आदिवासी समुदाय ह सिलगेर मामला के प्रभावित लोगन मन ल मुआवजा अउ नौकरी, जनजाति मन ल जाति प्रमाण पत्र जारी करे अउ नवा भर्ती म आरक्षण- रोस्टर लागू करे के मांग ल लेके ये प्रदर्शन करे जात हे।
केंद्रीय ग्रामीण विकास मंत्रालय ह आजादी के अमृत महोत्सव के तहत मनरेगा मजदूर ले स्वरोजगार तक के सफर तय करइया प्रदेश के छै श्रमिक मन ल सम्मानित करे जाही।
24 मार्च के नई दिल्ली म होवइया ए कार्यक्रम म धमतरी जिला ले नीतूबाई साहू अउ फुलवंती कंवर, गरियाबंद जिला ले गीतांजलि ध्रुव अउ ओमेश्वरी कंवर अउ कोरिया जिला ले कृष्ण कुमार के संग महासमुंद जिला के विमल साव ल घलो सम्मानित करे जाही।
सुनइया मन ल बतादन कि आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे।
आज के प्रश्न हे – हिमांचल प्रदेश के ओ स्वतंत्रता सेनानी के नाव बतावव, जउन ल पहाड़ी गांधी के नाव ले जाने जाथे ।
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
आज-काल राज्य स्तरीय मानस मंडली प्रतियोगिता के आयोजन करे जात हे। राज्य सरकार के संस्कृति अउ पुरातत्व विभाग डहार ले आयोजित ये प्रतियोगिता दस मार्च के शुरू होइस, जउन अवइया दस अप्रैल तक चलही।
प्रतियोगिता के पहिली चरण म ग्राम पंचायत स्तर म कार्यक्रम होवत हे। उंहें दूसर चरण म ब्लॉक, तीसर चरण म जिला अउ चौथा चरण म राज्य स्तर म मानस मंडली प्रतियोगिता होही। राज्य स्तरीय प्रतियोगिता के विजेता ल पहिली पुरस्कार के रूप म पांच लाख रूपिया इनाम म दे जाही।
दंतेवाड़ा जिला के कटेकल्याण इलाका म सुरक्षा बल मनके संग होय मुठभेड़ म दू महिला माओवादी मन मारे गीन। मउका ले तीन नग हथियार घलो बरामद करे गेहे। घटना के बाद इलाका म सर्चिंग बढ़ा दे गेहे।
उंहें दंतेवाड़ा म ही लोनवर्राटू अभियान ले प्रभावित होके दू महिला सहित तीन माओवादी मन ह आत्मसमर्पण करे हे। ए माओवादी मन ह केंद्रीय रिजर्व पुलिस बल-सीआरपीएफ के डीआईजी अउ दंतेवाड़ा के पुलिस अधीक्षक के आगू आत्मसमर्पण करीन। ए माओवादी मन उपर कतकोन वारदात म शामिल होय के आरोप हे।
बतादन कि जिला म संचालित लोनवर्राटू अभियान ले प्रभावित होके अब तक 128 इनामी माओवादी मन सहित 529 माओवादी मुख्यधारा म शामिल होगे हे।
राज्य विधानसभा म आज तेंदूपत्ता बोनस राशि के भुगतान ल लेके घलो सवाल उठाये गीस। विपक्षी सदस्य डमरूधर पुजारी ह सदन म बोनस राशि के भुगतान के बारे म पूछत कीहिन कि एखर भुगतान कब करे जाही अउ बकाया भुगतान ल घलो कब तक दे जाही। जवाब म वनमंत्री मोहम्मद अकबर ह बताइन कि हिसाब किताब अउ ऑडिट के बाद बोनस राशि के भुगतान कर दे जाही।
एखर उपर सदस्य सौरभ सिंह ह बताइन कि बछर 2019 के ही 5 करोड़ रूपिया बोनस राशि के भुगतान बांचे हे। ऑडिट होय के बाद घलो अब तक ए राशि के भुगतान नइ करे गेहे। वनमंत्री ह सदन ल जल्दी ले जल्दी भुगतान करे के आश्वासन देहे।
प्रदेश म वन विभाग के निविदा मन म गड़बड़ी के मामला मनके शुरूआती जांच म नौ अधिकारी दोषी पाय गेहे। एमा भारतीय वन सेवा के छै अधिकारी शामिल हे। ये जानकारी आज राज्य विधानसभा म वनमंत्री मोहम्मद अकबर ह दीन हे। ओमन बताइन कि दोषी अधिकारी मन ल नोटिस दे गेहे अउ जवाब मिले म कार्रवाई करे जाही।
प्रश्नकाल म नेता प्रतिपक्ष धरमलाल कौशिक ह ए मामला ल उठाइस। जवाब म मोहम्मद अकबर ह ए स्वीकार करीन कि विभाग के 37 म ले 33 निविदा मन म अनियमितता पाय गेहे। मंत्री ह बताइन कि दोषी अधिकारी मनके खिलाफ विभागीय नियम के तहत कार्यवाही करे जाही।
उंहें महिला बाल विकास विभाग अउ समाज कल्याण मंत्री अनिला भेड़िया के विभाग मनके अवइया वित्तीय बछर बर 12 सौ 51 करोड़ 98 लाख ले जादा के अनुदान मांग सर्व सम्मति ले पारित करे गीस।
अइसने वन अउ जलवायु परिवर्तन, आवास अउ पर्यावरण, परिवहन अउ विधि-विधायी मंत्री मोहम्मद अकबर डहार ले प्रस्तुत करे गे 2 हजार 9 सौ 59 करोड़ रूपिया के अनुदान मांग पारित कर दे गीस।