विस टैबलेट-खरीदी
छत्तीसगढ़ विधानसभा के बजट सत्र के छठवां दिन आज विधानसभा अध्यक्ष डॉक्टर चरणदास महंत ह विधानसभा के समिति कोति ले टैबलेट बिसाय के जांच कराय के घोसना करीन हे। आज सदन म विधायक लखेश्वर बघेल ह स्कूल मन म बायोमेट्रिक टैबलेट ले हाजिरी के मामला उठावत एखर उपर खरच करे गे रकम के संगेसंग वर्तमान म चलाय जात टैब के जानकारी के मुद्दा उठईन। एखर जुवाब म सिक्षा मंत्री प्रेमसाय सिंह टेकाम ह बतईन कि वर्तमान म सात टैबलेट उपयोगी हे अउ तीन सौ छियासठ टैबलेट खराब हवय। ओमन बतईन कि खराब टैबलेट के सुधार साला अनुदान निधि ले करे जा सकत हे। ओमन यहू किहीन कि खराब टैबलेट सुधारे नइ जा सकय।
उहें, आज सदन म नवागढ़ के सहकारी समिति म धान बिसाय म गड़बड़ी के मामला ल लेके कांग्रेस विधायक आशीष छाबड़ा के बहस के बेरा मंत्री अमरजीत भगत कोति ले करे गे टिप्पणी ले नाराज होके विपक्षी सदस्य मन ह जमके हंगामा करीन।
संसद-बजट सत्र
संसद के बजट सत्र के दूसर चरण आज ले सुरू होगे हे। कोरोना मामला म कमी के सेती दूनों सदन के बइठका सामान्य रूप ले होवत हे। बजट सत्र के दूसर पारी के आज पहिली दिन राज्यसभा के सभापति एम. वेंकैया नायडू ह सदस्य मन ले सत्र के पहिली चरण असन सकारात्मक भावना बनाय राखे के आग्रह करीन। श्री नायडू ह संसदीय स्थाई समिति के बइठका म सदस्य मनके उपस्थिति कमती होय के जानकारी दीन अउ किहीन कि सदस्य मन ल ए बइठका म सामिल होय ल प्राथमिकता देना चाही। संसद के बजट सत्र के दूसर पारी आठ अप्रैल तक चलही। ए बेरा म सदन के उन्नीस बइठका होही।
कोविड टीका
केन्द्र सरकार ह ए महीना के सोलह तारीख ले बारह ले चौदह बछर आयु वरग के लइका मन ल कोविड रोधी टीका लगाय के काम सुरू करे के फइसला करे हे। बछर दू हजार आठ-नौ-दस पैदा होय लइका मन ल कोर्बेवैक्स टीका लगाय जाही। ए टीका हैदराबाद के बायोलॉजिकल इवान्स औषधि निर्माता कंपनी ह बनाय हे।
खबर के मुताबिक चौदह बछर ले जादा आयु वरग के लइका मन ल कोविड रोधी टीका लगाय गेहे। सरकार ह आने बीमारी ले पीड़ित साठ बछर ले जादा आयु वरग के लोगन ल टीका के ऐहतियाती डोज लगाय के फइसला करे रिहीस। फेर अब ए सरत ल खतम कर देहे। सोलह मार्च ले साठ बछर ले जादा उमर के जम्मों झन ऐहतियाती टीका लगवा सकही।
डी. पुरंदेश्वरी-छत्तीसगढ़
भारतीय जनता पार्टी के महामंत्री अउ प्रदेश प्रभारी डी. पुरंदेश्वरी आज ले छत्तीसगढ़ दउरा म हवय। ए बेरा म जगदलपुर के मां दंतेश्वरी एयरपोर्ट पहुंचे म उंखर भाजपा कार्यकर्ता मन ह स्वागत करीन। एखर बाद डी. पुरंदेश्वरी ह सुकमा म राखे गे कार्यसमिति के बइठका म सामिल होईन। अपन दउरा के बेरा ओमन बीजापुर, नारायणपुर अउ बस्तर जिला के दउरा घलो करही।
खैरागढ़ उपचुनाव-तैयारी
खैरागढ़ उपचुनाव ल लेके आने-आने राजनीतिक पार्टी मन ह तियारी सुरू कर देहे। एमा आज भारतीय जनता पार्टी के प्रदेस अध्यक्ष विष्णुदेव साय ह खैरागढ़ उपचुनाव म प्रत्यासी के नाव तय करे बर एक पर्यवेक्षक समिति बनाय हे। ए समिति म विधायक शिवरतन शर्मा अउ सौरभ सिंह, प्रदेश उपाध्यक्ष मोतीलाल साहू अउ प्रवक्ता केदार कश्यप ल सामिल करे गेहे।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी म आज के प्रश्न हवय –
– उत्तराखंड के ओ स्वतंत्रता सेनानी के नाव बतावव, जउन कुमाऊँ केशरी के नाव ले लोकप्रिय रिहीन अउ जउन मन क्रांतिकारी विचार के समाचार पत्र शक्ति के प्रकाशन करीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही।
मुठभेड़-जवान शहीद
नारायणपुर जिला म आज माओवादी मन कोति ले करे गे बम विस्फोट म भारत तिब्बत सीमा पुलिस-आईटीबीपी के एक जवान सहीद होगे। उहें, एक आने जवान गंभीर रूप ले घायल हवय।
खबर के मुताबिक आईटीबीपी के जवान जिला के सोनपुर ले ढोंडरीबेड़ा के बीच रद्दा बनाय के काम म सुरक्षा ल देखत ए क्षेत्र के जांच बर निकले रिहीन। इही बेरा सोनपुर तीर बम विस्फोट होगे, जेखर चपेट म आय ले एक ए.एस.आई. राजेन्द्र सिंह सहीद होगे। उहें, हेड कांस्टेबल महेश ल गंभीर हालत म अस्पताल म भर्ती कराय गेहे।
ऐति, सुकमा जिला के करीगुंडम रद्दा म सीआरपीएफ अउ जिला पुलिस बल के संयुक्त टीम ह दस किलो वजनी बम बरामद करीन हे। हमर संवाददाता के मुताबिक माओवादी मन ह ए बम जवान मन ल नकसान पहुंचाय खातिर लगाय रिहीन।
ओति, कबीरधाम जिला म दू इनामी माओवादी मन ह पुलिस के आगू आत्मसमर्पण करीन हे।
ईडी-छापा
दुरूग जिला म पाटन के गातापारा गांव म आज बिहनिया कांग्रेस नेत्री अउ पूर्व जिला पंचायत सदस्य जयंती साहू अउ उंखर भाई विमल साहू के घर प्रवर्तन निदेशालय-ईडी के टीम ह छापा मार कार्रवाई करीन। ए टीम म ईडी के डिप्टी डायरेक्टर समेत सात सदस्य सामिल हे। ए टीम उंखर निवास म बिहनियाच ले दस्तावेज के जांच करत हे। ईडी के टीम के संग सुरक्षा खातिर सीआरपीएफ के सशस्त्र बल घलो मौजूद हे। ए कार्रवाई के मुख्य कारण के संबंध म अभी कोनों किसम के जानकारी नइ मिल पाय हे।
उहें, ईडी के टीम ह बालोद जिला के एक सराब अउ होटल कारोबारी सुभाष शर्मा के घर छापा मारीन। ईडी के टीम ह करीबन हफ्ता भर पहिली ए कारोबारी ल मनी लॉड्रिंग के मामला म दिल्ली ले गिरफ्तार करे रिहीन।
गांजा-बरामद
रायगढ़ जिला के डोंगरीपाली म पुलिस ह करीबन डेढ़ कुंटल गांजा बरामद करे हे, जेखर बाजार म कीमत करीबन पन्द्रह लाख रूपिया बताय जात हे।
खबर के मुताबिक डोंगरीपाली पुलिस ल सूचना मिले रिहीस कि कुछेक लोगन साग-भाजी के आड़ म गांजा के तस्करी करत हे। एखर बाद पुलिस ह कार्रवाई करके एक गाड़ी ले बड़ मात्रा म गांजा बरामद करीन, जउन ल साग-भाजी के बीच लुकाय गे रिहीस हे।
उहें, महासमुंद जिला के सिंघोड़ा पुलिस ह जांच के बेरा एक गाड़ी ले अस्सी किलो गांजा के संगेसंग चार झिन आरोपी ल गिरफ्तार करे हे। जब्त गांजा के कीमत करीबन सोलह लाख रूपिया बताय गेहे।
अइसने, बालोद जिला के पुरूर थाना क्षेत्र ले पुलिस ह उत्तरप्रदेश ले आवत एक गाड़ी ले चालीस किलो गांजा जब्त करे हे, जेखर कीमत करीबन आठ लाख रूपिया आंके गेहे।
अमृत महोत्सव चित्र प्रदर्शनी
सूचना अउ प्रसारण मंत्रालय के प्रादेशिक लोकसंपर्क कार्यालय रईपुर कोति ले बिलासपुर जिला के रतनपुर म आजादी के अमृत महोत्सव बिसय म राखे गे तीन दिवसीय चित्र प्रदर्शनी के काली समापन होईस। चित्र प्रदर्शनी ले जलियांवाला बाग नरसंहार के जिम्मेवार जनरल डायर ले बदला लेवइया अमर सेनानी उधम सिंह ल सुरता करे गीस। कारीकरम म देशभक्ति गीत के संगेसंग कतकोन जन-जागरूकता प्रतियोगिता घलो राखे गीस।
कार्यक्रम के मुख्य अतिथि बिलासपुर सीआरपीएफ के डीआईजी एल.एन. मिश्रा ह किहिन कि आजादी के रक्षा करे के जिम्मेवारी सिरिफ वर्दी वाले मनके नो हे, भलूक हर भारतीय के जिम्मेवारी हवय।
दुर्ग-आरोपी गिरफ्तार
दुरूग पुलिस ह हरियाणा के मेवात ले एक आरोपी ल गिरफ्तार करे हे। ए आरोपी सोशल मीडिया म फेक आईडी बना के लोगन ले दोस्ती करके पीड़ित ल उकसा के अश्लील वीडियो बनात रिहीस अउ वीडियो ल वायरल करे के धमकी देय के ब्लैकमेल करत रिहीस हे।
दुरूग के वरिष्ठ पुलिस अधीक्षक बद्रीनारायण मीणा अउ अतिरिक्त पुलिस अधीक्षक संजय धु्रव ह आज एक पत्रकारवार्ता म बतईन कि दुरूग पुलिस के टीम ह एक आरोपी ल हरियाणा ले गिरफ्तार करे हे। ए मामला के दू आने आरोपी फरार हवय।