संसद बजट सत्र-दूसरा चरण
संसद के बजट सत्र के दूसरा चरण काली ले सुरू होही। ए सत्र आठ अप्रैल तक चलही। ए दउरान उन्नीस बइठका होही। दूनों सदन के कार्यवाही दिन म ग्यारह बजे ले सुरू होही, जे ह संझा छै बजे तक चलही। बजट सत्र के दूसरा चरण के दउरान कतकोन महत्वपूर्ण विधेयक पेस होय के संभावना हवय।
नीट/पीजी-कट ऑफ मार्क
देस म मेडिकल के खाली पीजी सीट ल भरे बर, केन्द्र सरकार ह राष्ट्रीय परीक्षा बोर्ड ल, नीट-पीजी दो हजार इक्कीस के जम्मों श्रेणी के कट ऑफ मार्क म पन्द्रह प्रतिसत कटौती करे के निरदेस दे हे। मेडिकल काउंसिलिंग कमेटी ह बोर्ड ल संसोधित परिणाम घोषित करे अउ नवा पात्र अभ्यर्थी के डेटा समिति ल भेजे बर किहीन हे। ए निर्णय राष्ट्रीय चिकित्सा आयोग के परामर्श ले ले गेहे। अखिल भारतीय अउ राज्य स्तर म दू बेरा के काउंसलिंग के बाद घलो आठ हजार ले जादा सीट खाली हे।
लोकवाणी
मुख्यमंत्री भूपेश बघेल ह किहीन कि महिला मनके मान-सम्मान ले ही हमर सभ्यता अउ संस्कृति के पहिचान होथे। ओमन किहीन कि नारी के सम्मान करइया समाज ह संस्कारी समाज होथे। छत्तीसगढ़ म महिला मन ल पूरा सम्मान दे जात हे। इही कारण हरय कि छत्तीसगढ़ के माईलोगिन अउ नोनी मन अब बड़े लक्ष्य बर निकल गेहे, जे मन ल रोके नइ जा सकय।
मुख्यमंत्री ह आज आकाशवाणी ले प्रसारित रेडियोवार्ता ‘‘लोकवाणी‘‘ के सत्ताईसवीं कड़ी म ‘‘छत्तीसगढ़ सरकार-नारी शक्ति के सरोकार‘‘ बिसय म गोठबात करीन। ओमन किहीन कि हमर पुरखा मनके देन हे कि आज हमन ल संविधान मिले हे, जेमा माता मन ल बराबरी के दरजा दे गेहे। हमर संस्कार अउ प्रयास के नतीजा ए हरय कि छत्तीसगढ़ विधानसभा म महिला सदस्य मनके प्रतिसत, देस के अन्य विधानसभा के तुलना म सबले जादा हवय। पंचायत राज संस्था के चुनाव म घलो महिला मन बर पचास प्रतिसत आरक्षण के प्रावधान हे। ओमन किहीन कि अचल संपत्ति के पंजीयन महिला मनके नाम कराय जाय म स्टाम्प सुल्क म एक प्रतिशत छूट देके प्रावधान करे गेहे। संगेसंग अब प्रत्येक जिला म राज्य सरकार ह महिला प्रकोष्ठ के गठन करही, जेखर ले माईलोगिन अउ नोनी मन ल सुरक्षा के वातावरण मिलय सकय।
मुख्यमंत्री-प्रवासी भारतीय मुलाकात
मुख्यमंत्री अउ राज्य ग्रीन काउंसिल के अध्यक्ष भूपेश बघेल ले आज रईपुर स्थित उंखर निवास कार्यालय म नीदरलैंड अउ अमेरिका ले आय प्रवासी भारतीय विशेषज्ञ मन ह मुलाकात करीन। ए मउका म राखे गे बइठका म वैश्विक परिवार ल जलवायु परिवर्तन के दुष्पपरिणाम ले बचत हुए सरलग विकास जारी राखे अउ एमा नवा उद्योग के संभावना म घलो विचार-विमर्श करे गीस। मुख्यमंत्री ह विशेषज्ञ मन ल, छत्तीसगढ़ के ग्रामीण महिला मन डहार ले बनाय गे गोबर के गुलाल भेंट करीन।
बइठका म अमेरिका ले आए एस.ईडी. फंड के सीईओ विकास मेहता, नीदरलैंड के डॉक्टर कार्तिकेय सिंह अउ स्वनीति इनीसिएटिव के सीईओ रित्विका भट्टाचार्य मौजूद रिहीन।
राज्यपाल-प्रतिमा अनावरण
राज्यपाल अनुसुईया उइके ह आज प्रगति शिक्षा केन्द्र रईपुर म वरिष्ठ पत्रकार अउ सामाजिक कार्यकर्ता स्वर्गीय गोविंदलाल वोरा के आदमकद प्रतिमा के अनावरण करीन। ए मउका म राज्यपाल ह किहीन कि पत्रकारिता जगत के पुरोधा स्वर्गीय वोरा के निष्पक्ष अउ निडर पत्रकारिता बर ओमन ल हमेसा सुरता करे जाही। साहित्य अउ शिक्षा के क्षेत्र म घलो ओमन अमूल्य योगदान दीन।
उहें, राज्यपाल ह राजधानी म सिंधी समाज डहार ले राखे गे ‘‘सेवा पखवाड़ा‘‘ युवा विकास अउ स्वास्थ्य जागरूकता संबंधी कारीकरम के उद्घाटन करीन। ए मउका म राज्यपाल ह किहीन कि देस के विकास म युवा मनके भूमिका महत्वपूर्ण हे। ए तरह के कारीकरम निश्चित रूप ले युवा मनके मार्गदर्शन करही।
वाहन-टैक्स वूसली
छत्तीसगढ़ परिवहन विभाग डहार ले गाड़ी मनके बकाया टैक्स वसूली बर सघन अभियान चलाय जावत हे। एखर तहत विभागीय उड़नदस्ता दल अउ चेकपोस्ट के अधिकारी-कर्मचारी डहार ले काली रईपुर, दुरूग, अंबिकापुर, रायगढ़, जगदलपुर, कोंडागांव, दंतेवाड़ा, कांकेर, मुंगेली, धमतरी, बेमेतरा अउ बालोद जिला म टैक्स वसूली अउ बकाया टैक्स के सेती गाड़ी मन ल जब्त करे के कार्रवाई करे गीस।
माओवादी-मुठभेड़
सुकमा जिला म आज सुरक्षा बल अउ माओवादी मनके बीच होय मुठभेड़ म डीआरजी के दू झिन जवान घायल होगे। उहें, सुरक्षा बल ह मुठभेड़ म कुछेक माओवादी मनके मारे जाय के दावा करे हे।
हमर संवाददाता ले मिले जानकारी के मुताबिक केरलापाल थाना क्षेत्र म डीआरजी अउ जिला पुलिस बल के संयुक्त दल तलासी अभियान म निकले रिहीस। इही दउरान चिचोरगुड़ा के तीर माओवादी मन ह गोलीबारी सुरू कर दीन। जवाब म जवान मन डहार ले घलो गोलीबारी करे गीस। ए घटना म दू झिन जवान ल मामूली चोट आय हे, जउन मन ल जिला अस्पताल म भर्ती कराय गेहे।
राज्यपाल-हॉकी प्रतियोगिता
राज्यपाल अनुसुईया उइके ह काली बिलासपुर के बहतराई स्टेडियम म राखे गे हॉकी प्रतियोगिता के फाइनल मैच के विजेता अउ उप विजेता टीम ल ट्रॉफी दीन। फाइनल मैच के पुरूष वर्ग म सेल राउरकेला के टीम, विजेता अउ यंग स्टार हरियाणा के टीम उप विजेता रिहीन। उहें, महिला वर्ग म मध्यप्रदेश हॉकी अकादमी ग्वालियर के टीम ह बाजी मारीन। जबकि, एस.पी.एस.बी. दिल्ली के टीम ह उप विजेता के खिताब म कब्जा करीन।
ए मउका म राज्यपाल ह किहीन कि खेल म हार-जीत मायने नइ राखय। ओमन किहीन कि जीवन म तरक्की बर अफसलता ल घलो चुनौती के रूप म लेना चाही।
महिला-सम्मान
महिला अउ बाल विकास मंत्री अनिला भेंड़िया अउ राज्यसभा सांसद छाया वर्मा ह काली राजनांदगांव म आयोजित एक कारीकरम म स्वच्छता बहिनी, आरोग्य समिति के सदस्य, आंगनबाड़ी कार्यकर्ता, सहायिका अउ मितानिन मन ल सम्मानित करीन। राजनांदगांव नगर निगम डहार ले आयोजित ए कारीकरम म लगभग एक हजार महिला मन ल सम्मानित करे गीस। कारीकरम म संबोधित करत श्रीमती भेंड़िया ह किहीन कि महिला मन हर क्षेत्र म आगे बढ़त हे। ए कारीकरम ल राजनांदगांव के महापौर हेमा देशमुख ह घलो संबोधित करीन।
कोरोना समाचार
प्रदेस म कोरोना संक्रमण के मामला म लगातार गिरावट आवत हे अउ औसत पॉजीटिविटी दर शून्य दशमलव दू-चार प्रतिशत म आ गेहे। प्रदेस म काली कोरोना संक्रमण के पैंतीस नवा मामला आगू अईस। उहें, प्रदेस के बारह जिला – कबीरधाम, धमतरी, महासमुंद, गरियाबंद, रायगढ़, जांजगीर-चांपा, मुंगेली, गौरेला-पेण्ड्रा-मरवाही, दंतेवाड़ा, सुकमा, नारायणपुर अउ बीजापुर म काली कोरोना संक्रमण के एको मामला सामने नइ आय हे। ए बेरा तीन सौ चौहत्तर मरीज मनके इलाज प्रदेस के आने-आने अस्पताल या होम आइसोलेशन म चलत हे।
अउ अब थोरकुन समाचार सार म-
– जशपुर जिला के दुलदुला विकासखंड सिक्षा अधिकारी ह एक झिन सिक्षक ल सराब के नसा म स्कूल आके लइका मन ले मारपीट करे के आरोप म निलंबित कर दे हे।
– जांजगीर-चांपा जिला के पामगढ़ थाना क्षेत्र के भैंसों गांव म आज अज्ञात गाड़ी के ठोकर ले मोटर साइकिल सवार एक झिन मनखे के मउत होगे।
अउ
– जांजगीर-चांपा जिला म मालखरौदा थाना क्षेत्र के बडे़ सीपत गांव ले छै दिन ले लापता ढाई साल के लइका के सव आज गांव के कुंआ ले बरामद करे गीस।