विधानसभा-रेडी-टू-ईट
राज्य विधानसभा के बजट सत्र के पांचवां दिन आज विधानसभा म रेडी-टू-ईट वितरण व्यवस्था म बदलाव के मुद्दा गूंजीस। प्रश्नकाल म भाजपा सदस्य रजनीश कुमार सिंह डहार ले पूछे गे सवाल के जवाब म महिला अउ बाल विकास मंत्री अनिला भेंड़िया ह बतईन कि मंत्रिमंडल के निर्णय के बाद रेडी-टू-ईट वितरण व्यवस्था म बदलाव करे गेहे। ओमन किहीन कि ए बेवस्था एक अप्रैल ले लागू होही। एमा विपक्षी सदस्य मन ह आरोप लगईन कि रेडी-टू-ईट के काम महिला स्व-सहायता समूह मन ले लेके उद्योगपति मन ल दे जात हे। एखर बाद मंत्री के जवाब ले असंतुष्ट भाजपा सदस्य विरोध प्रदर्सन करत सदन के गर्भगृह म चल दीन अउ फेर विधानसभा के नियम अनुसार खुदे निलंबित होगे।
आज प्रश्नकाल म पूर्व मुख्यमंत्री डॉक्टर रमन सिंह ह बोधघाट सिंचाई परियोजना ले जुड़े मामला उठावत ए परियोजना के धीमी गति ल लेके सरकार ल घेरीन। डॉक्टर सिंह किहीन कि मुख्यमंत्री ह तीन साल के भीतर ए परियोजना ल पूरा करे के बात सदन म केहे रिहीन। लेकिन, तीन साल ले जादा समय बीते उपर डीपीआर घलो नइ बन पाय हे। डॉक्टर सिंह ह ए महत्वपूर्ण बिसय म चरचा कराय के मांग करीन। एमा विधानसभा अध्यक्ष डॉक्टर चरणदास महंत ह व्यवस्था दीन कि आने वाला दिन म ए परियोजना के अद्यतन स्थिति उपर सदन म आधा घंटा के चरचा कराय जाही।
पंजीयन कार्यालय
प्रदेश के पंजीयन कार्यालय ए महीना अवकाश के दिन म घलो खुला रइही। ए संबंध म महानिरीक्षक पंजीयन ह जम्मों जिला कलेक्टर मन ल पत्र जारी करे हे। एमा केहे गेहे कि चालू वित्तीय बछर के आखिरी महीना पूरा होय म अब कुछेक दिन बाचे हे। एखरे बर ए महीना के अवइया जम्मों सनिवार अउ रविवार के अलावा अट्ठाईस मार्च के भक्त माता कर्मा जयंती म सासकीय अवकाश के बावजूद पंजीयन कार्यालय मन म कामकाज आम दिन मन जइसे होही। जनसुविधा अउ सासकीय राजस्व संग्रहण ल ध्यान म राखत अवकास के दिन म घलो पंजीयन कार्यालय चालू रखे बर अउ नियमित पंजीयन काम करे बर केहे गेहे।
अंतर्राष्ट्रीय महिला दिवस-सम्मान
अंतर्राष्ट्रीय महिला दिवस के उपलक्ष्य म मनाय जावत ‘आइकॉनिक वीक‘ के तहत राज्य मनरेगा कार्यालय ह मनरेगा के अंतर्गत निजी भूमि म आजीविका संवर्धन के कार्य मन ले लाभान्वित एक सौ चालीस महिला मन ल सम्मानित करे गीस। मणिपुर ले ए कारीकरम म वर्चुअल सामिल पंचायत अउ ग्रामीण विकास मंत्री टी.एस. सिंहदेव ह प्रत्येक जिला के पांच-पांच महिला मन ल सम्मानित करीन।
वेक्टरजनित रोग
मुख्य सचिव अमिताभ जैन ह प्रदेस म वेक्टरजनित बीमारी मनके रोकथाम अउ मच्छर मन उपर नियंत्रण बर सब्बो जिला कलेक्टर अउ जिला पंचायत के सीईओ ल परिपत्र जारी करे हे। ओमन ग्राम पंचायत अउ नगरीय निकाय मनके सहभागिता ले गांव अउ सहर मन म मच्छर उपर नियंत्रण बर जरूरी उपाय करे के निरदेस दीन हे। उहें, मुख्य सचिव ह जम्मों सरकारी भवन के दरवाजा अउ खिड़की मन म जाली लगाय बर घलो किहीन हे।
बलौदाबाजार-आरटीपीसीआर
बलौदाबाजार जिला म घलो अब आरटीपीसीआर जांच के सुविधा मिलही। भारतीय आयुर्विज्ञान परिषद-आईसीएमआर ह एला मंजूरी दे देहे। बलौदाबाजार के जिला अस्पताल म वायरालॉजी लैब के स्थापना करे गेहे, जिहां आरटीपीसीआर जांच के मसीन लगाय गेहे। जिला अस्पताल के सिविल सर्जन डॉक्टर राजेश कुमार अवस्थी ह बतईन कि जिला म आरटीपीसीआर जांच के सुविधा सुरू होय ले हर दिन करीबन साढ़े तीन सौ सैंपल मनके जांच करे जा सकही। जिला म ए जांच के सुविधा सुरू होय ले कोरोना मरीज मनके सैंपल बाहर भेजे के जरूरत नइ होही अउ लोगन मन ल चौबीस घंटा म जांच रिपोर्ट मिल सकही।
माओवादी-मुठभेड़
बीजापुर जिला म आज सुरक्षा बल मन संग होय मुठभेड़ म तीन लाख रूपिया के एक इनामी माओवादी मारे गेहे। उहें, मुठभेड़ के दौरान माओवादी मन डहार ले करे गे आईईडी विस्फोट म एक जवान घायल होगे हे, जेखर उपचार जिला अस्पताल म चलत हे।
हमर संवाददता ह बतईन कि डीआरजी अउ सीआरपीएफ के संयुक्त टीम आज तड़के कैका, मोसला अउ कडेर कोति गश्त म निकले रिहीस। इही दउरान नैमेड़ थाना क्षेत्र के कैका अउ मोसला के बीच जंगल म माओवादी मन सुरक्षा बल उपर फायरिंग सुरू कर दीस। जवान मन डहार ले करे गे जवाबी कार्रवाई म एक इनामी माओवादी मारे गीस, जेखर सव बरामद कर ले गेहे। मृत माओवादी के पहिचान नेशनल पार्क एरिया कमेटी सदस्य अउ सेंड्रा एलओएस डिप्टी कमांडर रितेश पूनेम के रूप म होय हे। सुरक्षा बल मन मुठभेड़ म अउ माओवादी मनके मारे जाय के संभावना जताय हे। बाद म घटनास्थल के तलाशी के दउरान सुरक्षा बल मन मउका ले एक रायफल, पांच जिंदा कारतूस, कार्डेक्स वायर, टिफिन बम समेत दैनिक उपयोग के सामान बरामद करे हे।
उहें, बीजापुर जिला के उसूर अउ बासागुड़ा थाना क्षेत्र ले सुरक्षा बल मन तेरह झिन माओवादी मन ल गिरफ्तार करे हे। सीआरपीएफ, जिला पुलिस बल अउ डीआरजी के संयुक्त कार्रवाई म ए माओवादी मन करा ले विस्फोटक सामान बरामद करे गेहे।
राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली डहार ले छत्तीसगढ़ सहित देसभर म काली बारह मार्च के राष्ट्रीय लोक अदालत के आयोजन करे जाही। लोक अदालत म बिसेस रूप ले भाड़ा नियंत्रण, चेक बाउंस, आबकारी विधि, सिविल विधि, जलकर, भूमिकर समेत आने-आने मामला के निराकरण करे जाही।
सिविक एक्शन प्रोग्राम
बीजापुर जिला के मिरतुर थाना क्षेत्र के फुलगुट्टा गांव म सामुदायिक पुलिसिंग के तहत सीआरपीएफ डहार ले सिविक एक्शन प्रोग्राम के आयोजन करे गीस। एमा फुलगुट्टा ग्राम पंचायत के सौ ले जादा ग्रामीण सामिल होईन। ए दउरान सीआरपीएफ के कमांडेट रजा हैदर ह सिविक एक्सन प्रोग्राम के तहत बने सामुदायिक भवन के उद्घाटन करीन। ओमन ग्रामीण मन ल सासन डहार ले चलाय जावत आने-आने जन कल्याणकारी योजना मनके जानकारी देवत सुविधा मनके लाभ ले बर किहीन। कारीकरम म स्थानीय लोगन मन अउ लइका मन ल दैनिक उपयोग के वस्तु, खेलकूद सामग्री अउ रेडियो सेट बांटे गीस।
मल्टी मीडिया-चित्र प्रदर्शनी
सूचना अउ प्रसारण मंत्रालय के प्रादेशिक लोकसंपर्क कार्यालय रायपुर डहार ले बिलासपुर जिला के रतनपुर म आजादी के अमृत महोत्सव विषय उपर आज ले तीन दिन के मल्टीमीडिया चित्र प्रदर्शनी के आयोजन करे जात हे। प्रदर्सनी के मुख्य अधिकारी शैलेष फाये ह बतईन कि प्रदर्सनी म ईस्ट इंडिया कंपनी के भारत आगमन ले लेके आजादी मिले तक के दुर्लभ अउ वास्तविक चित्र मन ल प्रदर्सित करे गेहे। एमा छत्तीसगढ़ के छब्बीस मुख्य स्वतंत्रता संग्राम सेनानी मनके काम ल घलो दर्साय गेहे। प्रदर्सनी के दउरान निबंध अउ रंगोली जइसे स्पर्धा मनके आयोजन करे गीस। संगेसंग जारूकता रैली घलो निकाले गीस। जेमा स्थानीय स्कूल कॉलेज के विद्यार्थी मन बढ़-चढ़ के हिस्सा लीन। प्रदर्सनी स्थल म डाक विभाग डहार ले विभागीय सुविधा उपलब्ध कराय जात हे। अइसने, महिला अउ बाल विकास विभाग के सहयोग ले सुपोषण स्टॉल घलो लगाय गेहे।
संगोष्ठी
साहित्य अकादमी अउ छत्तीसगढ़ संस्कृति परिषद डहार ले राज्य के संस्कृति विभाग के सहयोग ले काली बारह अउ तेरह मार्च के रईपुर म ‘‘लोकतंत्र के पक्ष अउ साहित्य‘‘ बिसय म संगोष्ठी के आयोजन करे जाही। रईपुर के रजबंधा मैदान स्थित मायाराम सुरजन स्मृति लोकायन हॉल म राखे गे ए समारोह म काली संझा कहानी पाठ होही। उहें, तेरह मार्च के ‘‘साहित्य, असहमति अउ लोकतंत्र के भविष्य‘‘ बिसय उपर एक चर्चा सत्र अउ कविता पाठ के आयोजन करे जाही।
अउ अब थोरकुन समाचार सार म-
– रेल मंत्रालय ह केहे हे के सब्बो पद मन बर आयोजित परीक्षा मनके संसोधित परिणाम अगला महीना के पहिली हफ्ता घोषित कर दे जाही। मंत्रालय ह केहे हे कि पहला स्तर के कम्प्यूटर आधारित परीक्षा ए साल जुलाई म हो सकत हे।
– राज्यपाल अनुसुईया उइके ले आज राजभवन म संत गहिरा गुरू विश्वविद्यालय सरगुजा के कुलपति प्रोफेसर अशोक सिंह ह मुलाकात करीन। ए दउरान ओमन विश्वविद्यालय म अवइया पच्चीस मार्च के आयोजित होने वाला दीक्षांत समारोह बर राज्यपाल ल आमंत्रित करीन।
– छत्तीसगढ़ योग आयोग डहार ले ‘‘कोविड-नाइंटीन संक्रमण म योग के भूमिका‘‘ बिसय उपर काली रईपुर नगर निगम के सभागार म अंतर्राष्ट्रीय वेबिनार के आयोजन करे जाही। ए वेबिनार के सुभारंभ महिला अउ बाल विकास मंत्री अनिला भेंड़िया ह करही।
अउ
– बलरामपुर जिला के पस्ता थाना पुलिस ह करीबन ग्यारह लाख रूपिया गबन के मामला म छत्तीसगढ़ राज्य ग्रामीण बैंक के तत्कालीन साखा प्रबंधक ल गिरफ्तार कर लेहे।