प्रधानमंत्री परियोजना शिलान्यास
प्रधानमंत्री नरेंद्र मोदी ह कीहिन कि देश ल सरलग पर्यावरण के विकास उपर धियान देना चाही, जउन मजबूत अर्थव्यवस्था, धन अउ हरित विकास ल प्रोत्साहित करय। ओमन कहिन कि हर शहर म एक ठिन आधुनिक कचरा प्रबंधन प्रणाली अउ आधुनिक अपशिष्ट प्रबंधन संयंत्र होना चाही।
प्रधानमंत्री ह ये विचार पुणे म मुला-मुथा नदी के प्रदूषण कमती करे ले जुड़े परियोजना के शिलान्यास के बाद कीहिन। ओमन कीहिन कि जल संसाधन के महत्ता ल समझाय बर शहर अउ जिला म नदी उत्सव ल प्रोत्साहित करना चाही।
विधानसभा बजट सत्र
छत्तीसगढ़ विधानसभा के बजट सत्र काली ले शुरू होही। पच्चीस मार्च तक चलइया ए सत्र के दउरान कुल तेरह बइठका होही।
सत्र के शुरूआत काली राज्यपाल के अभिभाषण ले होही। राज्यपाल के अभिभाषण बीहनिया ग्यारा बजे ले शुरू होही। एखर सोझे प्रसारण आकाशवाणी अउ दूरदर्शन ले करे जाही। उंहें मुख्यमंत्री भूपेश बघेल नौ मार्च के अवइया वित्तीय बछर बर बजट प्रस्तुत करही।
मुख्य न्यायाधीश बैठक
मुख्यमंत्री भूपेश बघेल अउ छत्तीसगढ़ हाईकोर्ट के मुख्य न्यायाधीश न्यायमूर्ति अरूप कुमार गोस्वामी के उपस्थिति म आज रायपुर म एक िइन बइठका आयोजित करे गीस। बइठका म उच्च न्यायालय सहित प्रदेश के जम्मों न्यायालय म सुविधा बढ़ाय, आईटी के जादा ले जादा उपयोग, ई-कोर्ट अउ ई-चालान प्रणाली के प्रगति के संग कोर्ट म डॅाक्टर मनके वीडियो कॉन्फ्रेसिंग के माध्यम ले उपस्थिति समेत कतकोन विषय उपर गोठबात होइस।
बतादन कि छत्तीसगढ़ के न्यायालय मन म न्यायिक प्रक्रिया ल नागरिक मन बर सुविधाजनक अउ पारदर्शी बनाय के संग ऑनलाइन जानकारी देवाय बर प्रौद्योगिकी के उपयोग करे जावत हे।
कोरोना समाचार
प्रदेश म कोरोना संक्रमण के मामला म सरलग कमी आवत हे। अउ औसत संक्रमण दर शून्य दशमलव चार-चार फीसदी म आगे हे। प्रदेश म काली कोरोना संक्रमण के बयासी ठिन नवा मामला आगू आये रीहिस। उंहें प्रदेश के दस ठिन जिला – महासमुंद, रायगढ़, जांजगीर-चांपा, सरगुजा, सूरजपुर, बलरामपुर, जशपुर, सुकमा, कांकेर अउ बीजापुर म काली कोरोना संक्रमण के एको मामला आगू नइ आइस। ए बेरा आठ सौ इकतीस मरीज मनके इलाज प्रदेश के आने आने अस्पताल अउ होम आइसोलेशन म चलत हे।
यूक्रेन संकट
विदेश मंत्री डॅाक्टर एस. जयशंकर ह कीहिन हे कि यूक्रेन म फंसे दू हजार पांच सौ भारतीय ऑपरेशन गंगा के तहत तेरह ठिन उड़ान ले आज स्वदेश पहुंचही।
अब तक यूक्रेन के आसपास के देश ले तेरह हजार ले जादा भारतीय वापिस लहुंटे हे। नई दिल्ली म काली विदेश मंत्रालय के प्रवक्ता ह बताइन कि पाछू चौबीस घंटा म करीबन दू हजार नौ सौ भारतीय मन ल स्वदेश लाने गीस। ओमन कीहिन कि खारकीव ले करीबन सबो भारतीय निकाले गीन हे।
उंहें यूक्रेन म भारतीय दूतावास ह बताइन कि पेसोचिन ले सबो भारतीय सुरक्षित निकल चुके हे। दूतावास ह एक ट्वीट म कीहिन कि अपन नागरिक मन ल सुरक्षित वापसी भारत के प्राथमिकता हे।
जन औषधि सप्ताह
देशभर म चलत जनऔषधि सप्ताह के काली समापन होही। समापन समारोह म प्रधानमंत्री नरेंद्र मोदी रायपुर के जनऔषधि केंद्र म बीहनिया ग्यारा बजे वचुअर्ल माध्यम ले औषधि संचालक अउ लाभार्थी मनले गोठबात करही। रायपुर म मुख्य कार्यक्रम भारतीय जन औषधि केंद्र खंडेलवाल पॉलिक्निनिक कोटा म आयोजित करे जाही।
महिला मंडई
महिला अउ बाल विकास मंत्री अनिला भेड़िया ह काली राजधानी रायपुर के शंकर नगर के बीटीआई मैदान म चार दिवसीय महिला मड़ई के शुभारंभ करीन। ए दउरान प्रदेश के कई जिला ले आये महिला स्व सहायता समूह अउ महिला उद्यमी मन डहार ले बनाये गे जीनिस के प्रदर्शनी लगाये गेहे। ए मउका म श्रीमती भेड़िया ह कीहिन कि राज्य सरकार ह महिला मन ल आत्मनिर्भर बनाये बर कतकोन नवा रद्दा गढ़े हे। ए मड़ई म महिला मन के सशक्त अउ आत्मनिर्भर होत जीनगी के झलक दिखाई देवत हे। एखर ले महिला समूह अउ उद्यमी मन ल नवा चिन्हारी मिलही।
ए महिला मड़ई म गोबर ले बनाये झालर, फिनाइल, हर्बल साबुन, मोमबत्ती अउ पेंटिंग समेत कतकोन जीनिस बेचे बर उपलब्ध हे।
ग्लॉकोमा सप्ताह
प्रदेश म लोगन मन ल ग्लूकोमा के बारे म जागरूक करे बर आज ले विश्व ग्लूकोमा सप्ताह मनाये जावत हे। बारह मार्च तक चलइया ग्लूकोमा सप्ताह के दउरान सबो प्राथमिक अउ सामुदायिक स्वास्थ्य केंद्र के संगेसंग सबो जिला अस्पताल मन म चालीस बछर ले जादा उमर के लोगन मनके आंखी के जांच करके निशुल्क चश्मा घलो बांटे जाही। ए बीमारी के बारे म लोगन ल जागरूक करे बर आंगनबाड़ी, स्कूल अउ सामुदायिक भवन म संगोष्ठी घलो आयोजित करे जाही।
बतादन कि ग्लूकोमा यानि काला मोतिया आंखी के गंभीर बीमारी हे । ये बीमारी ह उम्रजनित अउ अनुवांशिक घलो होथे।
ऑक्टेव आयोजित
देश के पूर्वोत्तर राज्य मनके संस्कृति- नृत्य, शिल्प अउ व्यंजन उपर आधारित कार्यक्रम ऑक्टेव के आयोजन रायपुर के शासकीय विज्ञान महाविद्यालय के मैदान म करे जावत हे। काली ले आयोजित ये कार्यक्रम के शुभारंभ गृहमंत्री ताम्रध्वज साहू ह करीन। ऑक्टेव के आयोजन पूर्वोत्तर के आठ राज्य के पारंपरिक संस्कृति के प्रोत्साहन अउ संवर्धन बर जम्मों देश म करे जात हे।
दक्षिण मध्य क्षेत्र के सांस्कृतिक केंद्र नागपुर, केंद्र अउ राज्य सरकार के संस्कृति विभाग के तत्वावधान म आयोजित ए कार्यक्रम म पूर्वोत्तर राज्य के करीबन दू सौ पचास कलाकार अपन अपन राज्य के सांस्कृतिक नृत्य के प्रस्तुति देवत हे। कार्यक्रम के दौरान दर्शक मन पूर्वोत्तर राज्य मनके स्वादिष्ट व्यंजन के स्वाद ले सकत हे।
बतादन कि केंद्र सरकार के संस्कृति मंत्रालय डहार ले स्थापित दक्षिण मध्य क्षेत्र सांस्कृतिक केंद्र सात क्षेत्रीय केंद्र म ले एक हे। जेखर मुख्यालय नागपुर म हवय। एमा छत्तीसगढ़ के संग महाराष्ट्र, मध्यप्रदेश, तेलंगाना, आंध्रप्रदेश अउ कर्नाटक ल घलो शामिल करे गेहे।
आक्टेव के समापन आठ मार्च के होही। ए कार्यक्रम म संस्कृति मंत्री अमरजीत भगत शामिल होही।
कृषि मेला
रायपुर जिला के चंदखुरी म जिला स्तरीय जैविक कृषि मेला सह-स्वाइल हेल्थ कार्ड योजना के तहत प्रशिक्षण अउ प्रदर्शनी कार्यक्रम के आयोजन करे गीस। कार्यक्रम म नगरीय प्रशासन मंत्री डॅाक्टर शिवकुमार डहरिया ह कीहिन कि कृषि विभाग सरकार के सबले महत्वपूर्ण विभाग हे।
ए मउका म ओमन राज्य सरकार डहार ले किसान के हित म चलाये जावत योजना के जानकारी लीन। संगेसंग कृषि, उद्यानिकी अउ मत्स्य विभाग के हितग्राही मन ल चेक अउ कृषि ले जुड़े जीनिस घलो बांटीन।
दुर्घटना
रायपुर के तिर सेरीखेड़ी म होय एक सड़क दुर्घटना म एक झिन युवक के मउत होगे। उंहें चार झिन आने नाबालिग मन घायल होगिन । घायल मन ल अस्पताल म भर्ती कराय गेहे।
मिले जानकारी के अनुसार आज बीहनिया पांच झिन छात्र गाड़ी ले घुमे बर निकले रीहिन। इही दउरान सेरीखेड़ी के पुलिया पार करत बेरा गाड़ी पलटके पुलिया के खाल्हे गिर गीस। मंदिर हसौद पुलिस घटना के जांच करत हे।
अउ अब थोरकुन समाचार सार म-
– दुर्ग म सड़क निर्माण कारज शुरू करे के मांग उपर भाजपा कार्यकर्ता मन आज मानव श्रृंखला बनाके नगर निगम अउ प्रदेश सरकार के खिलाफ प्रदर्शन करीन।
– जांजगीर-चांपा म जिला शिक्षा अधिकारी ह डभरा बीईओ ऑफिस के एक झिन लिपिक ल शिक्षक के सर्विस बुक म छेड़छाड़ करे के आरोप म निलंबित कर दीस।
– कांडागांव जिला के बासकोट चौकी क्षेत्र म पुलिस ह अवैध रेत परिवहन करत तीन टै्रक्टर ल जब्त करे हे।
अउ
– राजनांदगांव जिला के चिखली पुलिस ह करीबन डेढ़ किलो गांजा के संग एक झिन युवक ल गिरप्तार करे हे।