बालवाड़ी-मानक संचालन प्रक्रिया
प्रदेस के छह हजार ले जादा प्राथमिक स्कूल मन म अवइया सत्र ले बालवाड़ी के संचालन करे जाही। एमा पांच ले छह साल के उमर के लइका मन ल प्रवेस दे जाही। एखर बर स्कूल सिक्षा विभाग डहार ले मानक संचालन प्रक्रिया जारी कर दे गेहे। स्कूल सिक्षा विभाग के प्रमुख सचिव डॉक्टर आलोक शुक्ला ह जिला कलेक्टर मन ल बालवाड़ी के मानक संचालन प्रक्रिया के मुताबिक जरूरी कार्रवाई करे बर केहे हवय। कलेक्टर मन ल जारी मानक संचालन प्रक्रिया म केहे गेहे कि बाल्या अवस्था म लइका मनके तेजी ले सारीरिक अउ मानसिक विकास होथे, जेखर सेती लइका मन ल खेल-खेल म सीखे बर आगू लाय जाय।
प्रधानमंत्री-गति शक्ति योजना
प्रधानमंत्री नरेन्द्र मोदी ह किहीन हे कि बछर दू हजार बाईस-तेईस के बजट ह इक्कीसवीं सदी के भारत के विकास के गतिशक्ति बना लेहे। गतिशक्ति योजना के कल्पना अउ बजट म राखे गे प्रावधान उपर वेबिनार ल संबोधित करत प्रधानमंत्री ह किहीन कि आधारभूत संरचना उपर आधारित विकास ले देस के अर्थव्यवस्था मजबूत होही अउ रोजगार के नवा मउका मिलही।
राष्ट्रीय विज्ञान दिवस
आज राष्ट्रीय विज्ञान दिवस हरय। हर साल अट्ठाईस फरवरी के रमन प्रभाव के खोज के सुरता म ए दिन ल मनाय जाथे। आजे के दिन भारतीय भौतिक विज्ञानी सर सी.वी. रमन ह रमन प्रभाव के खोज के घोसना करे रिहीन। ए खोज बर ओमन ल बछर उन्नीस सौ तीस म नोबेल पुरस्कार ले सम्मानित करे गे रिहीस।
उप राष्ट्रपति एम. वेंकैया नायडू ह राष्ट्रीय विज्ञान दिवस के मउका म वैज्ञानिक मन ल बधाई दे हवय। त ऐति, प्रदेस के मुख्यमंत्री ह घलो राष्ट्रीय विज्ञान दिवस के मउका म वैज्ञानिक मन ल अपन सुभकामना दे हवय।
कोविड समाचार
प्रदेस म कोरोना संक्रमण के मामला म सरलग सुधार आवत हे। ए बेरा प्रदेस के पॉजिटीविटी दर शून्य दशमलव नौ चार प्रतिशत हवय। काली प्रदेस म कोरोना संक्रमण के एक सौ सत्रह मामला आय हे। ए बेरा एक हजार सात सौ पांच मरीज मनके इलाज अस्पताल या होम आइसोलेशन म चलत हे।
ऐति, प्रदेस म कोरोना टीकाकरण के काम घलो चलत हे। अब तक प्रदेस म तीन करोड़ नवासी लाख ग्यारह हजार ले जादा टीका लगाय जा चुके हे।
डीनएनबी-पाठ्यक्रम मान्यता
नेशनल बोर्ड ऑफ एक्जामिनेशन्स इन मेडिकल साइंसेज नई दिल्ली ह रईपुर, कांकेर अउ सूरजपुर स्थित जिला अस्पताल मन ल दू साल के पोस्ट एमबीबीएस डिप्लोमा पाठ्यक्रम बर मान्यता दे देहे। ए जम्मों अस्पताल मन ल पांच-पांच साल बर ए कोर्स के अनुमति दे गेहे।
रईपुर जिला अस्पताल ल एसो जनवरी ले दिसंबर दू हजार छब्बीस तक बर डी.एन.बी. के कुल छह सीट के मान्यता मिले हे। जेमा ले शिशु रोग के तीन, स्त्री रोग के दू अउ फैमली मेडिसीन के एक सीट सामिल हे। अइसने, कांकेर जिला अस्पताल ल घलो दिसंबर दू हजार छब्बीस तक बर नेत्र रोग म एक ठिन सीट के मान्यता दे गेहे। उहें, सूरजपुर जिला अस्पताल ल दिसंबर दू हजार पच्चीस तक बर स्त्री अउ प्रसूति रोग म एक सीट के मान्यता दे गेहे।
राष्ट्रीय कुष्ठ उन्मूलन कार्यक्रम
राष्ट्रीय कुष्ठ उन्मूलन कार्यक्रम के तहत प्रदेस म कुष्ठ रोगी मनके पहिचान अउ उंखर इलाज बर कतकोन कारीकरम चलाय जात हे। ए अभियान म स्वास्थ्य विभाग के टीम ह घरो-घर जाके कुष्ठ रोगी मनके पहिचान करत हे। राष्ट्रीय स्वास्थ्य मिशन के संचालक डॉक्टर प्रियंका शुक्ला ह बतईन कि चालू वित्तीय बछर म अब तक प्रदेस के जम्मों जिला मन म दू करोड़ बीस लाख बीस हजार ले जादा लोगन मनके जांच करे गेहे, जेमा ले दू हजार एक सौ दस लोगन म कुष्ठ रोग के लक्षण मिले हे।
जानबा के मुताबिक प्रदेस के जम्मों जिला चिकित्सालय, सिविल अस्पताल, सामुदायिक अउ प्राथमिक स्वास्थ्य केन्द्र मन म कुष्ठ रोगी मनके मुफत म जांच करे जात हे।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी के तहत आज के प्रश्न हे –
तमिलनाडु के ओ स्वतंत्रता सेनानी के नाम बतावव, जउन मन स्वतंत्रता संग्राम म सामिल होय के इच्छुक युवा मन बर ‘‘देशबंधु यूथ एसोसिएशन‘‘ के सुरूवात करे रिहीन अउ 1932 म ब्रिटिश शासन के विरोध प्रदर्शन म सहीद होगे रिहीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही। विजेता ल ई-प्रमाण पत्र घलो दे जाही।
मोटर दुर्घटना-मुआवजा राशि
केन्द्र सरकार ह हिट एंड रन मोटर वाहन दुर्घटना म मारे गे मनखे के परिवार वाले मन ल मुआवजा पच्चीस हजार ले बढ़ाके दू लाख रूपिया कर देहे। गंभीर रूप ले घायल ए मामला म अब मुआवजा पचास हजार रूपिया मिलही। केन्द्रीय सड़क परिवहन अउ राजमार्ग मंत्रालय ह एक ठिन अधिसूचना म केहे हे कि ए योजना ल हिट एंड रन मोटर वाहन दुर्घअना योजना-दू हजार बाईस नाव दे गेहे। ए योजना एसो एक अप्रैल ले लागू होही।
गिरौदपुरी मेला
बलौदाबाजार जिला के गिरौदपुरी धाम म सात मार्च ले तीन दिन के गिरौदपुरी मेला होही। मेला के अध्यक्ष श्री विजय गुरू ह कोरोना संक्रमण ल देखत मेला म अवइया दर्शानार्थी मन ले कोरोना ले बचाव बर राखे गे जरूरी दिशा-निरदेस के पालन करे के अपील करे हे।
बइठका म लोक स्वास्थ्य यांत्रिकी मंत्री गुरू रूद्र कुमार ह मेला वाले जघा म पीये के पानी जइसन जरूरी सुविधा करे के निरदेस अधिकारी मन दे हवय।
नेशनल बॉल बैडमिंटन चैंपियनशिप
सड़सठवां सीनियर नेशनल बॉल बैंडमिंटन चैंपियनशिप बर छत्तीसगढ़ के पुरूष अउ महिला टीम के घोसना कर दे गेहे। ए प्रतियोगिता दू मार्च ले छह मार्च तक कर्नाटक के मूडबिद्री मगलुरू म होही। छत्तीसगढ़ बॉल बैडमिंटन संघ के महासचिव ह बतईन कि महिला वर्ग के टीम ह पाछु साल ए प्रतियोगिता म कांस्य पदक जीते रिहीन।
गोंडवाना कप टेनिस टूर्नामेंट
राज्यपाल अनुसुईया उइके ह काली रईपुर म भारत के जाने-माने गोंडवाना कप ऑल इंडिया टेनिस टूर्नामेंट के सुभारंभ करीन। ए मउका म ओमन किहीन कि खिलाड़ी मन खेल भावना ले खेलय। गोंडवाना कप के सुरूवात करीबन पच्यासी साल पहिली उन्नीस सौ सड़तीस-अड़तीस म होय रिहीस।
ए मउका म महापौर एजाज टेबर ह किहीन कि रईपुर नगर निगम डहार ले पढ़ईया स्कूली लइका मन बर आने-आने खेल मनके प्रशिक्षण सिविर मुफ्त म लगाय जाही।
अउ अब थोरकुन समाचार सार म-
– स्वतंत्रता संग्राम सेनानी बाबू छोटेलाल श्रीवास्तव के आज जयंती हरय। ए मउका म मुख्यमंत्री ह ओमन ल सुरता करत उंखर बड़का भूमिका के बारे म बतईन।
– रईपुर अधिवक्ता संघ के बैनर म आज वकील मन ह प्रदेस म अधिवक्ता सुरक्षा कानून लागू करे के मांग ल लेके राज्यपाल के नाव ज्ञापन सौंपीन।
– एंटी करप्शन ब्यूरो के टीम ह बेमेतरा जिला के अनुविभागीय कार्यालय साजा म पदस्थ एक झिन करमचारी ल 10 हजार रूपिया के रिश्वत लेवत पकड़े हे।
– जांजगीर-चांपा जिला के बम्हनीडीह जनपद सीईओ अउ अधिकारी मन ल धमकी देके मामला म पुलिस ह दू झिन लोगन मन ल गिरफ्तार करे हे।
– कोरिया जिला के खड़गवां विकासखंड म ए बेरा बीस ठिन हाथी के दल ह घूमत हवय।
अउ
– जांजगीर-चांपा जिला के शिवरीनारायण मेला म चाकूबाजी के घटना म एक झिन घायल मनखे के इलाज के दउरान मउत होगे।