आज दिनभर के खबर ल अपन गुरतुर छत्तीसगढ़ी भाखा म पढ़व

मन की बात-01

प्रधानमंत्री नरेन्द्र मोदी ह हर क्षेत्र म अगुवई करे खातिर देश के माईलोगिन मनके सराहना करीन हें। आकाशवाणी ले ‘‘मन की बात‘‘ कारीकरम म राष्ट्र ल संबोधित करत श्री मोदी ह किहीन कि माईलोगिन मन कतकोन क्षेत्र म नवा ऊंचाई ल छूवत हें अउ पुराना मिथक ल तोड़त हें। ओमन किहीन के 8 मार्च के देशभर म अंतर्राष्ट्रीय महिला दिवस मनाय जाही।
ए मउका म श्री मोदी ह किहीन कि बेटी अउ बेटा मन ल समान अधिकार देवत बिहाव के उमर म समानता लाने के प्रयास करे जावत हे। बेटी बचाओ-बेटी पढ़ाओ अभियान के सफलता ले देश म बेटी-बेटा के अनुपात म सुधार होय हे। उहें, स्कूल जवइया नोनी मनके संख्या घलो बाढ़े हे। श्री मोदी ह ये घलो किहीन कि स्वच्छ भारत अभियान ले महिला मन ल खुल्ला म सौच ले मुक्ति मिले हे, तीन तलाक जइसन सामाजिक बुराई के घलो अंत होवत हे। अइसन परिवर्तन एखर सेती आवत हे, काबर कि माईलोगिन मन अब खुद परिवर्तन अउ विकास के प्रयास के अगुवई करत हें।

मन की बात-02

हाल ही म अंतर्राष्ट्रीय मातृभाषा दिवस मनाय गीस, जेखर उपर श्री मोदी ह किहीन कि मातृभाषा ह एक व्यक्ति के जीवन ल आकार देथे। प्रधानमंत्री ह किहीन कि राष्ट्रीय शिक्षा नीति म मातृभाषा म पढ़ाई उपर जोर दे गे हे। ओमन किहीन कि पेशेवर पाठ्यक्रम ल घलो क्षेत्रीय भासा म पढ़ाय बर प्रयास करे जात हे।
काली 28 फरवरी के राष्ट्रीय विज्ञान दिवस हे। ए दिन ह रमन प्रभाव के खोज बर घलो जाने जाथे। प्रधानमंत्री ह चन्द्रशेखर वेंकेटरमन अउ सबो वैज्ञानिक मन ल श्रद्धांजलि दीन हे। विज्ञान दिवस के मउका म प्रधानमंत्री ह सबो पालक मन ले लइका मन म वैज्ञानिक सोच विकसित करे बर नान्हे-नान्हे उदिम करे के आह्वान करीन।

पल्स पोलियो अभियान

राष्ट्रीय सघन पल्स पोलियो अभियान के तहत आज प्रदेस म पांच बछर उमर तक के लइका मन ल पोलियो के दवा पिलाय गीस। बतादन कि ए अभियान ह तीन दिन तक चलही।
उहें, राज्य टीकाकरण अधिकारी डॉ. वी.आर. भगत ह बतईन कि ए अभियान के तहत प्रदेस म 36 लाख 25 हजार 940 लइका मन ल पोलियो के दवा पिलाय के लक्ष्य राखे गेहे। पहिली दिन आज बूथ स्तर म लइका मन ल पोलियो के खुराक दे गीस। एखर बर शहर अउ ग्रामीण क्षेत्र मन म 14 हजार 504 बूथ बनाय गे रिहीस। आज जउन लइका पोलियो के दवा पीये ले छूट गीन हें, ओमन ल काली अउ परनदिन घर-घर जाके पोलियो दवा पिलाय जाही।

मुख्यमंत्री-राजस्व प्रकरण

मुख्यमंत्री भूपेश बघेल ह प्रदेश के तहसील कार्यालय मन म राजस्व प्रकरन के निराकरन जल्दी कराय के निरदेस सबो संभाग आयुक्त मन ल दीन हे। मुख्यमंत्री ह आयुक्त मन ले किहीन हे कि तहसील कार्यालय म अवइया राजस्व प्रकरण के निराकरन के सरलग जायजा लेवंय अउ महिना म कम से कम दू तहसील या उप तहसील के अनिवार्य रूप ले निरीक्षन करंय। ओमन किहीन कि तहसील कार्यालय म हर राजस्व प्रकरन पंजीबद्ध होना चाही। राजस्व प्रकरन के निराकरन बर निर्धारित बेरा के अनिवार्य रूप ले पालन करे जाय।

यूक्रेन-विद्यार्थी वापसी

राज्यपाल अनुसुईया उइके ह यूक्रेन संकट ल देखत हुए भारतीय छात्र मनके सुरक्षित घर लहुटे के कामना करीन हे। ओमन किहीन कि केन्द्र सरकार एखर बर सरलग प्रयास करत हे अउ छात्र मन ल बिसेस विमान ले वापस घलो लाने जावत हे। राज्यपाल ह राज्य सरकार ले घलो यूक्रेन म फंसे छत्तीसगढ़ के लइका मनके सुरक्षित लहुटे बर केन्द्र सरकार ले गोठबात कर के प्रयास तेज करे बर किहीन। ओमन किहीन कि छत्तीसगढ़ के लइका मन ले संपर्क कर के ओमन ल सरकार के सहायता केन्द्र के बारे म जानकारी दे जाय।
उहें, मुख्यमंत्री भूपेश बघेल ह किहीन कि यूक्रेन ले अपन खरचा म छत्तीसगढ़ लहुटइया छात्र अउ नागरिक मनके खरचा के वहन राज्य सरकार करही। संगे मुख्यमंत्री ह विमान ले लहुटइया छत्तीसगढ़ के छात्र अउ नागरिक मनके दिल्ली अउ मुंबई होके छत्तीसगढ़ पहुंचे बर सबो जरूरी बेवस्था करे बर किहीन हे।
इही बीच, मुख्यमंत्री ह यूक्रेन ले लहुटइया छत्तीसगढ़ के 6 छात्र मन ले नई दिल्ली के छत्तीसगढ़ सदन म भेंट कर हालचाल जानिन। एमन आज एयर इंडिया के विमान ले नई दिल्ली लहुटे हें, इंखर ठहरे बर छत्तीसगढ़ सदन म बेवस्था करे गे हे।

कोंडागांव-बूटा कटाई तिहार

प्रदेश के दक्षिण कोंडागांव वनमंडल म 3 ले 5 मार्च तक ‘‘बूटा कटाई तिहार‘‘ मनाय जाही। बूटा कटाई के लगभग 50 दिन बाद एके संघरा तेंदूपत्ता तोड़ई सुरू होही। ए बछर दक्षिण कोंडागांव के वनमंडल म 21 हजार मानक बोरा तेंदूपत्ता संग्रहण के लक्ष्य राखे गेहे।

बाइक रेसिंग चैंपियनशिप

राजधानी रईपुर के बूढ़ातालाब के तिर आउटडोर स्टेडियम म अवइया 5 अउ 6 मार्च के एम.आर.एफ. नेशनल सुपर क्रॉस बाइक रेसिंग चैंपियनशिप-2022 के आयोजन करे जाही। ए चैंपियनशिप म राष्ट्रीय अउ अंतर्राष्ट्रीय बाइकर्स भाग लिहीं।
उहें, मुख्यमंत्री भूपेश बघेल ह अपन निवास कार्यालय म चैंपियनशिप  पोस्टर के विमोचन करीन। ए मउका म मुख्यमंत्री ह देशभर के बाइकर्स मन ल छत्तीसगढ़ आय के नेवता देवत किहीन कि कोरोना महामारी के बाद एहा राज्य के पहिली महत्वपूर्ण खेल आयोजन हे। एखर ले राज्य के जनता अउ विशेष रूप ले युवा मन म नवा ऊर्जा के संचार होही।

एनएसएस-विशेष कैम्प

राष्ट्रीय सेवा योजना-एन.एस.एस. के 7 दिवसीय विशेष सिविर काली ले दुरूग के अमलेश्वर के श्रीराम चंद मिशन आश्रम सुरू होगे हे। ए सिविर 4 मार्च तक चलही। सिविर के उद्घाटन रविशंकर शुक्ल विश्वविद्यालय के कुलपति ह करीन। सिविर के दउरान हर दिन बौद्धिक सत्र म स्पोकन इंग्लिश के कक्षा लगाय जाही। उहें, संझा बेरा छत्तीसगढ़ी लोक नृत्य प्रस्तुत करे जाहीं।

माओवादी मुठभेड़

बीजापुर जिला म आज सुरक्षाबल के संग होय मुठभेड़ म दू झिन वर्दीधारी महिला माओवादी मारे गीन। जिला के अतिरिक्त पुलिस अधीक्षक पंकज शुक्ला ह घटना के पुष्टि करत बतईन कि डीआरजी अउ सी.आर.पी.एफ. के संयुक्त टीम ह नैमेड थाना इलाका म तलाशी अभियान म निकले रिहीस। इही बेरा दुरधा पहाड़ी के तिर माओवादी मन सुरक्षा बल उपर गोलीबारी सुरू कर दीन। जवान मन घलो जवाबी कार्रवाई करीन, जेमा दू माओवादी मारे गीन, जिंखर शव बरामद कर ले गेहे। घटना के जगह ले जवान मन बंदूक, पिस्टल समेत अब्बड़ अकन विस्फोटक अउ माओवादी जिनीस बरामद करे हे।

अउ अब जानव मौसम के हाल..

प्रदेस के कुछ इलाका म चक्रवाती घेरा के प्रभाव ले मौसम बदल गेहे। कोरिया जिला के कई जगह म गरज-चमक के संग रूक-रूक के बरसा होवत हे। मनरेन्द्रगढ़, झगराखांड, चिरमिरी अउ खड़गवां क्षेत्र म करा गिरे के घलो खबर मिले हे।
उहें, राजनांदगांव के पहाड़ी इलाका म घलो आज बिहनिया मौसम बदले के सेती गरज-चमक के संग थोरबहुत बरसा होईस। मौसम विभाग ह अवइया 48 घंटा के दउरान प्रदेस के कुछु हिस्सा म हल्का ले मध्यम बरसा होय के संभावना जताय हे। एखरे संग न्यूनतम तापमान म घलो गिरावट हो सकथे।

संक्षिप्त समाचार

– प्रदेश के स्वास्थ्य मंत्री टी.एस. सिंहदेव ह भ्रामक समाचार प्रसारित करे के मामला म एक वेबपोर्टल के संचालक के खिलाफ रईपुर के सिविल लाइन थाना म एफ.आई.आर. दर्ज करईन।

– आजादी के अमृत महोत्सव के तहत सूचना अउ प्रसारण मंत्रालय के क्षेत्रीय लोकसंपर्क कार्यालय डहार ले तखतपुर विकासखंड के ग्राम पोड़ी के हायर सेकेंडरी स्कूल म काली एक दिवसीय लोकसंपर्क कारीकरम के आयोजन करे जाही।

– प्रदेस के राजस्व न्यायालय म कथित भ्रष्टाचार के खिलाफ अधिवक्ता मन ह रायगढ़ म रैली निकाल के प्रदर्शन करीन।

– विशाखापट्टनम ले नागपुर जावत बेरा कोयला ले लदे मालगाड़ी के एक डिब्बा म आगी लग गीस। ए मालगाड़ी ल भिलाई नगर स्टेशन म रोके गीस, जेखर बाद दमकल के मदद ले आगी ल बुझाय गीस।

अउ

– प्रधानमंत्री आवास देवाय के नांव म लोगन ले लाखांं रूपिया वसूली के आरोप म पुलिस ह जगदलपुर निगम के एक महिला पार्षद ल गिरफ्तार करे हे।