मुख्यमंत्री-लोकार्पण
राज्य के मुख्यमंत्री भूपेश बघेल ह आज बिलासपुर जिला के दउरा करीन। ए दउरान ओमन एक सौ चालीस करोड़ रूपिया के लगात ले बनाय गे विकास काम मनके लोकार्पण करीन।
खबर के मुताबिक ए लोकार्पण म एक सौ सात करोड़ रूपिया के लागत ले बनाय गे एक हजार छह सौ बीस मीटर लंबा फ्लाई ओवर ब्रिज अउ छब्बीस करोड़ तिरासी लाख रूपिया के लागत ले बनाय गे व्यापार विहार स्मार्ट रोड सामिल हे। श्री बघेल ह बिलासपुर स्मार्ट सिटी लिमिटेड डहार ले साढ़े तीन एकड़ भूईंया म बनाय गे डॉक्टर ए.पी.जे. अब्दुल कलाम प्लेने-टोरियम के लोकार्पण घलो करीन।
यूक्रेन मदद
राज्य के मुख्यमंत्री भूपेश बघेल ह किहीन कि यूक्रेन के वर्तमान संकट ह एक ठन चिंता के विषय हरय। यूक्रेन म करीबन बीस हजार विद्यार्थी मन ह फंसे हवय, जेमा छत्तीसगढ़ राज्य के घलो सामिल हे। राज्य सरकार डहार ले फंसे मनखे मनके हरसंभव मदद करे जात हे।
मुख्यमंत्री-गोमूत्र कार्ययोजना
राज्य म कृषि के क्षेत्र म गउ मूत्र के वैज्ञानिक अउ उंखर बढ़िया ढंग ले उपयोग करे खातिर कार्ययोजना तैयार करे जाही। मुख्यमंत्री भूपेश बघेल ह मुख्य सचिव ल राज्य के कृषि वैज्ञानिक अउ कामधेनू विश्वविद्यालय के विशेषज्ञ मनके संग गोठबात करे के बाद खेती-किसानी म गउ मूत्र के वैज्ञानिक उपयोग करे खातिर ए कार्ययोजना ल दू हफ्ता के भीतर पेस करे के निरदेस दीन। संगेसंग ओमन रासायनिक खातू अउ कीटनाशक के बदला म गउ मूत्र के उपयोग करइया किसान मनके अनुभव ल घलो सामिल करे के निरदेस दीन।
बोर्ड परीक्षा-असाइनमेंट
छत्तीसगढ़ माध्यमिक शिक्षा मंडल के जम्मों मान्यता प्राप्त स्कूल मन ल एसो के सैक्षणिक सत्र म दसवीं अउ बारहवीं कक्षा म पढ़ईया लइका मन बर असाइनमेंट जमा करे के काम ल खतम कर देहे।
उहें, मंडल डहार ले होवइया बोर्ड परीक्षा बर समस्या के निदान करे खातिर हेल्पलाइन नंबर सुरू करे गेहे। समस्या निदान करे खातिर विद्यार्थी मन ह – एक आठ शून्य शून्य दो तीन तीन चार तीन छह तीन म बिहनिया साढ़े दस बजे ले संझा पांच बजे तक फोन लगाके अपन समस्या के बारे म जानकारी ले सकत हे।
दुर्ग-डीएनबी कार्य-मान्यता
दुरूग के जिला अस्पताल ल डॉक्टरेट ऑफ नेशनल बोर्ड डहार ले कान, नाक, गला अउ सिसु रोग-पिडियाट्रिक कोर्स बर मान्यता दे दे गेहे। एखर संगेसंग दुरूग जिला अस्पताल ह डी.एन.बी. कोर्स के मान्यता पाय म राज्य के पहिली जिला अस्पताल बन गेहे। मान्यता मिले के बाद अब ए अस्पताल म हरेक बछर नाक, कान, गला अउ पिडियाट्रिक कोर्स करे खातिर दू ठन सीट म पात्र डॉक्टर मन ह पढ़ई पूरा करके सर्टिफिकेट पा सकत हे।
बालवाड़ी-तैयारी
स्कूल शिक्षा विभाग डहार ले प्रदेस म पांच ले छह बछर तक के लइका मन बर बालवाड़ी खोले के तैयारी सुरू कर दे गेहे। ए संबंध म मास्टर ट्रेनर्स मन ल पांच दिन के बिसेस प्रसिक्षण दे जावत हे। स्कूल सिक्षा विभाग के विशेष सचिव अउ राज्य शैक्षिक अनुसंधान अउ प्रशिक्षण परिषद के संचालक राजेश सिंह राणा ह प्रशिक्षण म मौजूद मास्टर ट्रेनर्स मन ले किहीन कि ओमन लइका मन ल सैक्षणिक अउ मानसिक रूप ले तैयार करके स्कूल आय बर प्रेरित करय।
माओवादी-जवान हत्या
बीजापुर जिला म माओवादी मन डहार ले छत्तीसगढ़ सशस्त्र बल- सी.ए.एफ. के एक जवान के हत्या कर दे गीस। पुलिस अधीक्षक कमलोचन कश्यप ह घटना के पुष्टि करत बतईन कि अर्जुन कुड़ियाम ह छत्तीसगढ़ सशस्त्र बल के जवान रिहीन। ओमन बतईन कि ए जवान के तबीयत ह कुछ दिन पहिली खराब होगे रिहीन, जेखर सेती इलाज कराय बर अपन घर धनोरा आय रिहीन। इही दउरान माओवादी मन ह उंखर हत्या कर दीन।
निर्वाचन आयोग-प्रतियोगिता
भारत निर्वाचन आयोग डहार ले मतदान के महत्तम ल बढ़िया ढंग ले बताय खातिर ‘माई वोट ईज माई फ्यूचर, पावर ऑफ वन वोट‘ प्रतियोगिता के आयोजन करे जात हे। ए दउरान प्रश्नोत्तरी, स्लोगन, गीत, वीडियो अउ पोस्टर डिजाईन के प्रतियोगिता राखे जाही। ए प्रतियोगिता म भाग ले खातिर इच्छुक उम्मीदवार मन ह पन्द्रह मार्च तक पंजीयन करा सकथे।
सिविक एक्शन प्रोग्राम
केन्द्रीय रिजर्व पुलिस बल-सीआरपीएफ डहार ले गरियाबंद जिला के नवागढ़ कैम्प म सिविक एक्शन कारीकरम के आयोजन करे गीस। ए दउरान सीआरपीएफ के बड़का अधिकारी, आईजीपी, पुलिस अधीक्षक के मौजूदगी म राष्ट्रीय राजमार्ग म लगाय गे वाटर फिल्टर के लोकार्पण करे गीस। कारीकरम म बिंद्रानवागढ़ के सरपंच, पंच अउ गांव के मनखे मन सामिल होईन। ए दउरान गांव वाले मन ल कंबल, लुगरा अउ रेडियो के संगेसंग दैनिक सामान बांटे गीस।
शिशु संरक्षण माह
प्रदेस म अवइया चार मार्च ले शिशु संरक्षण माह के कारीकरम करे जाही। आठ अप्रैल तक चलइया ए कारीकरम के दउरान नौ महीना ले पांच बछर तक के छब्बीस लाख चालीस हजार लइका मन ल विटामिन ए के खुराक दे जाही। संगेसंग छह महिना ले पांच बछर तक के अट्ठाईस लाख तीस हजार लइका मन ल आयरन अउ फोलिक एसिड के सिरप घलो बाटे जाही।
स्वास्थ्य विभाग ह पालक मन ले अपील करे गेहे कि ए कारीकरम म अपन लइका मन ल जरूर फायदा देवाय।
निःशुल्क डायलिसिस कार्यक्रम
राज्य के आठ ठन जिला अस्पताल मन म ‘जीवन धारा‘ नाव ले निःशुल्क डायलिसिस सुविधा दे जात हे। राष्ट्रीय स्वास्थ्य मिशन के तहत राष्ट्रीय निःशुल्क डायलिसिस कारीकरम डहार ले एला चलाय जात हे। एमा दुरूग, कांकेर, कोरबा, बिलासपुर, जशपुर, सरगुजा, महासमुंद अउ बीजापुर जिला ल सामिल करे गेहे।
दुर्घटना
कांकेर जिला म पाछु रतिहा होय एक ठन सड़क हादसा म एक झिन मनखे के मउत होगे। उहें, चार झन मनखे मन ह घायल होगे। मिले खबर के मुताबिक चरचकिया गाड़ी म बइठ के पांच झिन मनखे मन ह चरामा ले जगदलपुर कोति जात रिहीन। उही समय झिपाटोला के तीर एक ठन हाइवा संग ए गाड़ी ह टकरा गे। ए घटना म एक झिन मनखे के मउकाच म परान छूट गे। उहें, चार झन मनखे मन ह गंभीर रूप ले घायल होगे, जिखर इलाज ह चरामा के जिला अस्पताल म चलत हवय।
ओति, दंतेवाड़ा बचेली रद्दा म भांसी गांव के तीर एक ठन टरक ह फटफटी ल टक्कर मार दीस। ए हादसा म एक झिन लइका के मउकाच म मउत होगे। उहें, तीन झिन लइका मन ह गंभीर रूप ले घायल होगे। घायल मनके इलाज ल दंतेवाड़ा के जिला अस्पताल म कराय जात हे। खबर के मुताबिक ए चारों झन लइका मन ह एके ठन फटफटी म बइठे के दंतेवाड़ा जावत रिहीन।
अउ अब पेश हे मौसम..
राज्य म अवइया चौबीस घंटा के दउरान मौसम ह सुष्क रेहे के संभावना हे। मौसम विभाग ले मिले जानकारी के मुताबिक उपरी हवा म एक ठन चक्रवाती घेरा पूर्वी मध्यप्रदेश अउ छत्तीसगढ़ के उपर बने हवय, जेखर सेती तापमान म थोरबहुत कमी आ सकत हे।
अउ अब थोरकुन समाचार सार म-
– प्रधानमंत्री नरेन्द्र मोदी ह केन्द्रीय बजट म स्वास्थ्य क्षेत्र बर करे गे प्रस्ताव म एक ठन वेबिनार के काली उद्घाटन करही।
– राष्ट्रीस समर स्मारक के आज तीसरा स्थापना दिवस हरय।
अउ
– रईपुर के सिविल लाइन पुलिस के टीम ह दस किलो गांजा के संग एक झन मनखे ल गिरफ्तार करे हे। जब्ती करे गे गांजा के कीमत ल करीबन एक लाख रूपिया बताय जात हे।