प्रधानमंत्री-वेबीनार
प्रधानमंत्री ह किहीन हे कि युवा मन देस के भावी नेता अउ राष्ट्र-निर्माता हरय। उच्च सिक्षा के बारे म बजट घोषणा उपर राखे गे वेबिनार ल संबोधित करत ओमन किहीन कि सिक्षा क्षेत्र ले जुड़े पांच क्षेत्र म सबले पहिली जम्मों लोगन मन ल बढ़िया सिक्षा के सुविधा देवाना उंखर पहिली प्राथमिकता हरय। अंतर्राष्ट्रीय मातृभाषा दिवस के सुभकामना देवत प्रधानमंत्री ह किहीन कि मातृभाषा ह लइका मनके मानसिक विकास ल जुड़े होथे।
भाषाई सर्वे-कहानी उत्सव
अंतर्राष्ट्रीय मातृभाषा दिवस के मउका म काली ले प्रदेस के जम्मों प्राथमिक स्कूल मन म भाषाई सर्वे करे जाही। एमा स्कूली लइका मन डहार ले घर म बोले जाय भासा के जानबा ले जाही। ए सर्वे के काम प्राथमिक स्कूल के प्रधान पाठक के अगुवई म करे जाही।
समग्र सिक्षा के महाप्रबंधक नरेन्द्र दुग्गा ह बतईन कि राष्ट्रीय सिक्षा नीति के तहत देस के जम्मों राज्य मन ल भाषा के बारे म सर्वे करे बर केहे हे। ओमन बतईन कि ए सर्वेक्षण ले छत्तीसगढ़ के प्राथमिक स्कूल मन म आने-आने भाषा के बारे म आंकड़ा ले जाही अउ एखर फायदा लइका मन ल मिलही। ए बेरा प्रदेस म लइका मन ह छत्तीसगढ़ी, दोरली, हल्बी, भतरी, धुरवी, गोंडी, कुडुख, सरगुजिया अउ माड़िया के संगेसंग आने प्रदेस के भासा म लिखे पुस्तक ल घलो पढ़त हे।
उहें, लइका मन ह बने ढंग ले किस्सा-कहानी सुन सकय, एखर बर प्राथमिक स्कूल मन म काली ले कहानी उत्सव घलो मनाय जाही।
कोविड समाचार
प्रदेस म कोरोना संक्रमण के मामला ह सरलग कमती होवत हे। ए बेरा प्रदेश के पॉजीटिविटी दर एक दशमलव चार-दू प्रतिसत हवय। काली प्रदेस म चौदह हजार चार सौ उनतीस सैंपल के जांच करे गीस, जेमा दू सौ पांच मनखे मन कोरोना संक्रमित पाय गीस। ए बेरा तीन हजार चार सौ चार मरीज मनके इलाज प्रदेस के अस्पताल या होम आइसोलेशन म चलत हे।
उहें, प्रदेस म कोरोना ले बचाव बर टीकाकरण अभियान घलो जोर-सोर ले चलत हे। प्रदेस म अब तक तीन करोड़ चौहत्तर लाख तिरसठ हजार ले जादा टीका लगाय जा चुके हे।
गर्भवती महिला-बेहतर संसाधन
प्रदेस म जादा खतरा वाले गर्भवती माईलोगिन मनके जानबा लेके संगेसंग उंखर बने इलाज अउ सावधानी के बारे म स्वास्थ्य विभाग ह दिसा-निरदेस जारी करे हे। उहें, जम्मों जिला कलेक्टर अउ मुख्य चिकित्सा स्वास्थ्य अधिकारी मन ल मिलके काम करे बर केहे हवय।
स्वास्थ्य अउ परिवार कल्याण विभाग के संचालक डॉक्टर प्रियंका शुक्ला ह बतईन कि जादा जोखिम वाले गर्भवती माईलोगिन मन ल जिला चिकित्सालय, सामुदायिक प्राथमिक स्वास्थ्य केन्द्र मन म बेरा-बेरा म जांच के संगेसंग सर्जरी के सुविधा दे के बात केहे गेहे। डॉक्टर शुक्ला ह किहीन कि अइसन प्रयास करे ले प्रदेस म मातृ अउ शिशु मृत्यु दर म कमी आ सकथे।
फोर्टिफाइड चावल
प्रदेश के दस आकांक्षी अउ दू ठिन हाईबर्डन जिला मन म अवइया महीना ले सार्वजनिक वितरण प्रणाली कोति ले रासन कार्डधारी परिवार मन ल फोर्टिफाइड चाउर बांटे जाही। कुपोषण अउ एनीमिया के कमी ल दूर करइया ए चाउर ल राष्ट्रीय खाद्य सुरक्षा अधिनियम के तहत रासनकार्ड उपर देवइया फोर्टिफाइड चाउर के पूरा पइसा ल राज्य सरकार डहार ले दे जाही।
जानबा के मुताबिक ए फोर्टिफाइड चाउर ल बाटे के काम कोरबा, राजनांदगांव, महासमुंद, कांकेर, नारायणपुर, दंतेवाड़ा, बीजापुर, बस्तर, कोंडागांव, सुकमा अउ दू ठिन हाईबर्डन जिला कबीरधाम अउ रायगढ़ जिला म करे जाही।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी के तहत आज के प्रश्न हे –
ओड़िशा के बारह साल के अइसन स्वतंत्रता सेनानी के नाम बतावव, जउन ह अपन डोंगा म पुलिस अउ सैनिक मन ल बइठे ले मना कर दीन अउ सैनिक मनके आय के बारे म गांव के लोगन मन ल बताके अपन जान गंवा दीन। उखर बहादुरी ल जाने-माने उड़िया कवि सची राउत्रे के कविता बोटमैन ह अमर कर दे रिहीस। ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही। विजेता ल ई-प्रमाण पत्र घलो दे जाही।
रायगढ़-तहसील मामला
रायगढ़ तहसील आफिस म पाछु दिन होय कथित झड़प के घटना के बाद रायगढ़ तहसीलदार सुनील कुमार अग्रवाल ल धरमजयगढ़ अउ धरमजयगढ़ के तहसीलदार भोज कुमार डहरिया ल रायगढ़ के तहसीलदार बनाय गेहे।
जानबा के मुताबिक पाछु दिन तहसील कार्यालय म तहसीलदार के संगेसंग राजस्व विभाग के कर्मचारी अउ वकील मनके बीच मारपीट के घटना होय रिहीस, जेखर बाद दूनों पक्ष के खिलाफ एफ.आई.आर. दर्ज कराय के संगेसंग धरना-प्रदर्शन घलो सुरू होगे रिहीस।
ऐति, भाजपा कार्यकर्ता मन ह वकील मनके आंदोलन ल समर्थन दे हवय।
जांजगीर-धरना प्रदर्शन
जांजगीर-चांपा जिला के जैजेपुर म शासकीय कन्या उच्चतर माध्यमिक विद्यालय ल बंद करके ओ जगह म स्वामी आत्मानंद अंग्रेजी माध्यम स्कूल खोले अउ उहां के सिक्षक मनके तबादला ल दूसर स्कूल म करे जाय के मामला ल लेके आज छात्रा मन ह रैली निकाल के जिला प्रशासन ल ज्ञापन सौंपीन। पढ़ईया छात्रा मन ह तेईस फरवरी के धरना-प्रदर्शन करे के चेतावनी घलो दे हवय।
चित्र प्रदर्शनी
आजादी के अमृत महोत्सव के तहत प्रादेशिक लोकसंपर्क कार्यालय डहार ले मुंगेली जिला के पथरिया म ए बेरा मल्टीमीडिया चित्र प्रदर्शनी चलत हे। चित्र प्रदर्शनी के दूसर दिन काली पेंटिंग, खो-खो, फुगड़ी के संगेसंग आने-आने प्रतियोगिता होईस। चित्र प्रदर्शनी म लइका मन ह पेंटिंग के माध्यम ले सहीद मनके फोटो ल बने ढंग ले बनईन।
विभागीय अधिकारी शैलेष फाये ह बतईन कि युवा मन म फिटनेस ल बढ़ावा दे बर एमन ल इहे के खेलकूद उपर रूचि देवाय जात हे। ए दउरान ओमन केन्द्र सरकार डहार ले खिलाड़ी मन ल दे जात सुविधा के बारे म जानबा दीन।
सिविक एक्शन कार्यक्रम
सुकमा जिला के दोरनापाल म सीआरपीएफ के चौहत्तरवां बटालियन डहार ले सिविक एक्शन के कारीकरम राखे गीस। ए दउरान गांव के लोगन मन ल पुसवाड़ा म बिजली नइ होय के बात बटालियन के अधिकारी मन ल किहीन, जेखर बाद सीआरपीएफ कमांडेंट के पहल के बाद गोडेलगुड़ा गांव ल सोलर लाइन लगाय गीस। एखर पहिली, बटालियन कोति ले पोलमपल्ली म युवा मन बर क्रिकेट प्रतियोगिता के घलो आयोजन करे गीस।
विस्फोटक सामान-बरामद
माओवादी मन ल विस्फोटक जिनीस पहुंचाय के आरोप म पुलिस ह राजनांदगांव जिला के सीमा ले लगे गढ़चिरौली ले चार झिन माओवादी मनके सहयोगी मन ल गिरफ्तार करे हे। उहें, एक झिन आने सहयोगी के तलाश करे जात हे। गिरफ्तार माओवादी सहयोगी मनके तीर ले पुलिस ह चौदह बक्सा कार्डेक्स वायर जब्त करे हे।
मेडिकल प्रवेश परीक्षा-सफलता
अखिल भारतीय मेडिकल प्रवेश परीक्षा-नीट म एकलव्य आदर्श आवासीय विद्यालय के बारह झिन छात्र मन ल सफलता मिले हे। जेमा ले ग्यारह छात्र मनके एमबीबीएस अउ एक झिन छात्र के चयन डेंटल बर होय हे। आदिम जाति अउ अनुसूचित जाति विकास मंत्री डॉक्टर प्रेमसाय सिंह टेकाम ह ए परीक्षा म पास होय छात्र मन ल बधाई दे हवय।
अउ अब थोरकुन समाचार सार म-
– बस्तर संभाग म शिक्षा विभाग म प्रमोशन म अनियमितता के सिकईत के जांच बर तीन सदस्यीय जांच समिति गठित करे गेहे।
– रईपुर पुलिस ह प्रतिबंधित नसीला टैबलेट, ब्राउन सुगर अउ गांजा तस्करी के आरोप म दू झिन अंतर्राज्यीय के संगेसंग चार झिन लोगन मन ल गिरफ्तार करे हे।
अउ
– कोरिया जिला के मनेन्द्रगढ़ वनमंडल के चटनियां गांव म पाछु रतिहा एक ठिन हाथी ह अब्बड़ उत्पात मचईस।