मंत्रिमंडलीय उप समिति बैठक
राज्य सरकार ह नवा रायपुर म आंदोलन करइया किसान मनके मांग के निराकरण बर महत्वपूर्ण फैसला लीन हे। सरकार ह किसान मनके आठ म ले छै ठिन मांग ल पूरा करे बर अपन सहमति दे देहे।
ये जानकारी कृषि मंत्रि रविंद्र चौबे ह आज रायपुर म पत्रकार मनले बात करत दीन। एखर पहिली आयोजित मंत्रिमंडलीय उप समिति के बइठका म किसान मनके मांग ल लेके विचार विमर्श करे गीस। बाद म श्री चौबे ह ए निर्णय के जानकारी देवत बताइन कि नवा रायपुर ले प्रभावित भू-विस्थापित अउ भूमिहिन मन ल भू-खंड दे जाही। उंहें इकतालिस गांव मन ले सत्ताईस गांव ल एनओसी ले मुक्त करे जाही। एखर अलावा तेरा गांव मन ले खरीदी बिक्री के प्रतिबंध हटा ले गेहे। श्री चौबे ह बताइन कि किसान मनके मांग अनुसार बसाहट वाला इलाका मन म पात्रता अनुसार आवासीय पट्टा दे जाही। ओमन बताइन कि शिक्षित बेरोजगार मन ल प्राधिकरण के सेवा म साठ प्रतिशत आरक्षण दे जाही।
गृहमंत्री पत्रकार वार्ता
गृहमंत्री ताम्रध्वज साहू ह दावा करे हे कि प्रदेश के माओवाद प्रभावित क्षेत्र मन म विकास बर पाछू तीन साल के दउरान राज्य सरकार ह पिछला सरकार के तुलना म जादा काम करे हे। भिलाई म पत्रकार मनले चर्चा करत श्री साहू ह कीहिन कि प्रदेश म कानून बेवस्था घलो बने होय हे अउ कोनो मुद्दा नइ होय के सेती विपक्ष डहार ले बेवजह आरोप लगाये जात हे।
ओमन कहिन कि पाछू डेढ़ साल के दउरान राज्य म पर्यटन स्थल मन ल विकसित करे गेहे। एखर अलावा सी-मार्ट योजना के तहत स्व सहायता समूह ल विदेश मन म घलो मार्केट उपलब्ध कराय जात हे अउ ओमन ल उत्पाद मनके उचित मूल्य घलो मिलत हे।
माओवादी मुठभेड़
दंतेवाड़ा जिला म सुरक्षा बल मन संग होय मुठभेड़ म एक इनामी माओवादी मारे गेहे। अर्जुन सोरी नाव के ये माओवादी एरिया कमांडर रीहिस अउ एखर उपर पांच लाख रूपिया के इनाम घोषित रीहिस। मउका ले सोला नग देशी पिस्टल अउ पांच किलो वजनी टिफिन बम समेत दूसर सामान बरामद करे गेहे। जिला म माओवादी विरोधी अभियान चलाये जात हे। एखर तहत अरनपुर थाना क्षेत्र के बुरगुम के जंगल म जवान अउ माओवादी मनके बीच ये मुठभेड़ होइस।
कोविड समाचार
प्रदेस म कोरोना संक्रमण के मामला म सरलग कमी आवत हे। वर्तमान म प्रदेश क पॉजीटिवीटी दर दू दशमलव शून्य-दो प्रतिशत म आगे हे। काली प्रदेश म होय चौबीस हजार ले जादा सैंपल मनके जांच म पांच सौ चार मनखे मन कोरोना संक्रमित पाये गेहे। ए बेरा तीन हजार पांच सौ उनतालिस मरीज मनके इलाज प्रदेश के आने आने अस्पताल या होम आइसोलेशन म चलत हे।
इही बीच प्रदेश म कोरोना ले बचाव बर टीकाकरण अभियान घलो तेजी ले चलत हे। प्रदेश म अब तक तीन करोड़ चौहत्तर लाख ले जादा टीका लगाये जा चुके हे। एमा दू करोड़ साठ लाख अठयासी हजार ले जादा लोगन मन ल टीका के पहिली खुराक अउ एक करोड़ तिरसठ लाख एक हजार ले जादा लोगन मन ल दूनों खुराक दे गेहे।
परीक्षा हेल्पलाइन
राज्य माध्यमिक शिक्षा मंडल डहार ले दसवीं अउ बारहवीं के परीक्षा बर विद्यार्थी मन ल जरूरी सलाह देबर बाईस फरवरी ले हेल्पलाइन सुविधा शुरू करे जात हे। एमा विद्यार्थी, शिक्षक अउ अभिभावक बीहनिया साढ़े दस बजे ले संझा पांच बजे तक मंडल के टोल फ्री नंबर – एक आठ शून्य शून्य दू तीन तीन चार तीन छै तीन- म अपन समस्या के समाधान पा सकत हे।
मंडल ले मिले जानकारी के अनुसार हेल्पलाइन के माध्यम ले मनौवैज्ञानिक, मनोचिकित्सक, शैक्षिक अभिप्रेरक परीक्षार्थी मनके परीक्षा के डर, कोविड-19 संक्रमण के सुरक्षा अउ सावधानी अउ परीक्षा तनाव संबंधी समस्या मनके निराकरण करके उचित सलाह दीहीं। विषय विशेषज्ञ अवइया दिन के होने वाला विषय के परीक्षा ले जुड़े समस्या के निराकरण घलो करही।
सिविक एक्शन कार्यक्रम
भारत तिब्बत सीमा पुलिस आईटीबीपी डहार ले नारायणपुर जिला के हलामी मुंजमेटा म सिविक एक्शन कार्यक्रम के आयोजन करे गीस। उन्तीसवीं वाहिनी डहार ले ए कार्यक्रम के आयोजन माओवाद प्रभावित क्षेत्र म सामाजिक उत्थान अउ खेल प्रतियोगिता मन ल बढ़ावा देके उद्देश्य ले करे गीस। ए मउका म मुंजमेटा गावं म ग्रामीण मन बर स्वास्थ्य शिविर अउ पशु मन बर चिकित्सा शिविर लगाये गीस।
कार्यक्रम के दउरान जरूरतमंद ग्रामीण मन ल कपड़ा, बर्तन, लईका मन ल खेल अउ लेखन सामग्री संगेसंग युवा मन बर प्रतियोगी परीक्षा के तियारी करे बर सामान्य ज्ञान के पुस्तक घलो बांटे गीस।
दुर्घटना
गौरेला-पेण्ड्रा-मरवाही जिला म आज बीहनिया होय सड़क हादसा म एक दंपत्ति के मउत होगे। बताये जात हे कि ए दंपत्ति कार म सवार होके मध्यप्रदेश म राखे गे एक बिहाव कार्यक्रम म सामिल होय के बाद लहुटत रीहिन। इही दउरान गौरेला थाना क्षेत्र तीर ओमन के कार पेड़ ले टकरा गीस। दुर्घटना म गंभीर रूप ले घायल वाहन चालक के इलाज अस्पताल म चलत हे।
उंहें बिलासपुर के तारबहार थाना क्षेत्र म आज एक तेज रप्तार वाहन के चपेट म आय ले एक महिला के मउकाच म मउत होगे, जबकि दूसर नौ महिला मन घायल होगे हे। जेमा ले चार झिन महिला मनके हालत गंभीर बताय जात हे। कार चलावत नाबालिक युवक ल पुलिस ह गिरप्तार कर लेहे।
अइसने कोंडागांव जिला के सिरपुर गांव करा आज बीहनिया अज्ञात वाहन के चपेट म आय ले मोटर सायकिल सवार एक युवक के मउत होगे।
अनुतोष अभियान
पेंशन अउ जनउपयोगी सेवा ले जुड़े मामला मनके तुरते निराकरण बर राज्य विधिक सेवा प्राधिकरण बिलासपुर डहार ले अनुतोष अभियान शुरू करे गेहे। एखर बर बिलासपुर म हेल्प डेस्क सेवा शुरू करे गेहे। पक्षकार अपन आवेदन बिलासपुर स्थित प्राधिकरण के कार्यालय म सीधा प्रस्तुत कर सकत हे। प्राधिकरण के सदस्य सचिव सिद्धार्थ अग्रवाल ह बताइन कि पेंशन प्रकरण के अलावा परिवहन, डाक, टेलिग्राफ, टेलिफोन सेवा समेत दूसर सेवा मन बर कोनो तरह के परेसानी होय म लोगन मन ए अभियान के जरिया अपन सिकायत दर्ज करा सकत हें।
ठगी मामला
रायपुर जिला के तिल्दा स्थित एक निजी बैंक म पदस्थ एक महिला सहायक प्रबंधक डहार ले एक सियान ग्राहक ले ठगी करे के मामला आगू आय हे। आरोपी युवती ल पुलिस ह गिरप्तार कर लेहे।
मिले जानकारी अनुसार बुजुर्ग खाताधारक एटीएम चलाये बर नइ जानत रीहिस हे। एखर फायदा उठात आरोपी महिला ह गा्रहक के एटीम खुदे रख ले रीहिस अउ उंखर खाता ले रकम निकाले के संगेसंग बीमा राशि म घलो धोखाधड़ी करीस।
उंहें जांजगीर चांपा जिला के अकलतरा पुलिस ह कोटमी सुनार गांव के एक किसान ले मोबाइल टावर लगाय के नाव म करीबन सोला लाख रूपिया के ठगी के मामला म एक आरोपी ल कोलकाता ले गिरप्तार करे हे।
मौसम
प्रदेस म काली मौसम खुले के सेती न्यूनतम तापमान म गिरावट होय के अउ अधिकतम तापमान म बढ़ोत्तरी होय के संभावना हे। मौसम विभाग ले मिले जानकारी अनुसार एक ठिन द्रोणिका पूर्वी बिहार ले झारखंड छत्तीसगढ़ होवत पूर्वी विदर्भ तक फैले हे। एखर सेती अवइया दू दिन के दउरान छत्तीसगढ़ के मौसम म बदलाव हो सकत हे। तभो ले काली राज्य के मौसम शुष्क रेहे के संभावना हरय।
अउ अब थोरकुन समाचार सार म-
– रायपुर जिला के चिटफंड निवेशक मन ल जमा राशि लहुटाय बर जिला प्रशासन डहार ले लेगे आवेदन म कतकोन गलती पाये गेहे। एमा सुधार बर देवयानी चिटफंड के निवेशन मन ल वेबलिंक के माध्यम ले जानकारी भरे बर केहे गेहे।
– कोंडागांव जिला के संयुक्त एकलव्य आदर्श आवासीय विद्यालय म कक्षा छठवीं के प्रवेश परीक्षा म सामिल होय बर विद्यार्थी मनले दस मार्च तक आवेदन मंगाय गेहे।
–
अउ
– मुंगेली के स्वामी आत्मानंद शासकीय अंग्रेजी विद्यालय के विद्यार्थी मन नासा के साझेदारी म राखे गे इंटरनेशनल एस्टेरॉयड सर्च कैम्पेन के तहत एक नवा एस्टेरॉयड के खोज करे म सफलता हासिल करे हे।