कोविड टीका उपलब्धि
केंद्रीय स्वास्थ्य मंत्री डॅाक्टर मनसुख मांडविया ह कीहिन कि देश ह पात्र वयस्क जनसंख्या के अस्सी प्रतिशत लोगन ल कोविड के टीका लगाके एतिहासिक उपलब्धि हासिल करे हे। ओमन कीहिन कि प्रधानमंत्री नरेंद्र मोदी के अगवई म सबका प्रयास के सिद्धांत के संगेसंग भारत शत प्रतिशत टीकाकरण के लक्ष्य ल हासिल करे बर तेजी ले आगू बाढ़त हे।
केंद्र सरकार राज्य अउ केंद्रशासित प्रदेश मन ल लागू प्रतिबंध ल हटाय के सलाह पहिलीच ले दे देहे, काबर कि देश म कोविड के स्थिति म पहिली ले काफी सुधार हे।
कोविड समाचार
प्रदेस म कोरोना संक्रमण के मामला म सरलग कमी आवत हे। अभी प्रदेश के पॉजीटिवीटी दर ह एक दशमलव तीन-तीन प्रतिशत म आगे हावय। काली प्रदेश म होय उनतीस हजार ले जादा सैंपल के जांच म तीन सौ बयानबे लोगन कोरोना संक्रमित पाये गीस। ए बखत तीन हजार आठ सौ छप्पन मरीज मनके इलाज प्रदेश के आने आने अस्पताल या होम आइसोलेशन म चलत हे।
इही बीच प्रदेश म कोरोना ले बांचे बर टीकाकरण अभियान घलो जोर शोर ले चलत हे। प्रदेश म अभी तक तीन करोड़ तिहत्तर लाख चौहत्तर हजार ले जादा टीका लगाये गे हावय। एमा दू करोड़ सात लाख अठहत्तर हजार ले जादा लोगन ल टीका के पहिली खुराक अउ एक करोड़ बांसठ लाख छियालिस हजार ले जादा लोगन ल दूनो खुराक देगे हवय। उंहें तीन लाख उनचास हजार ले जादा लोगन ल बूस्टर डोज देगे हवय।
खाद भंडारण
कृषि मंत्री रविंद्र चौबे ह अपेक्स बैंक ल उर्वरक अग्रिम उठाव योजना म सोसायटी मन म रासायनिक उर्वरक के भंडारण तेजी ले सुनिश्चित करे के निर्देश दीन हे। उर्वरक अग्रिम उठाव योजना के तारीख एक फरवरी ले इकतीस मई तक निर्धारित हे। एमा मार्कफेड के संग्रहण केंद्र म मिलने वाला रासायनिक उर्वरक के उठाव करइया किसान अउ समिति मन उपर ब्याज के राशि नइ ले जाही।
मार्कफेड के महाप्रबंधक ह बताइन कि संग्रहण केंद्र म आने आने प्रकार के उन्नीस हजार मीटरिक टन ले जादा रासायनिक उर्वरक हवय। मार्कफेड डहार ले चालू रबी सीजन म अभी तक इकतीस हजार मीटरिक टन ले जादा यूरिया सोसायटी मन ल देगे हवय।
विद्युत वार्षिक विवरण
प्रदेस म छत्तीसगढ़ विद्युत शुल्क नियम म हरएक फैक्ट्री डहार ले प्रारूप-एच अउ जे के वार्षिक विवरण प्रस्तुत करे के बाध्यता ल खतम करे जाही। काली मुख्यमंत्री भूपेश बघेल के अगवई म राखे गे राज्य मंत्रिमंडल के बइठका म ये फैसला ले गीस। ये दूनो प्रारूप समाप्त करे ले अउ नियम के सरलीकरण ले विद्युत शुल्क के वसूली म कोनो प्रभाव नइ पड़य। संगेसंग फैक्ट्री मन बर वार्षिक विद्युत विवरण जमा करे के प्रक्रिया सरल हो जाही। एखर ले अनुपालन भार म कमी आही अउ बिजली ले जुड़े जानकारी प्रभावित नइ होही।
मंत्रिपरिषद के बइठका म कृषि अउ ओखर ले जुड़े विभाग मन बर वस्तु के दर के निर्धारण बर बीज विकास निगम ल अधिकृत करे के घलो फैसला लेगे हवय। जेखर ले राज्य के किसान मन ल अब आसानी ले बेरा म जरूरी कृषि संबंधी सामान मिल सकही
आजीविका तकनीकी सहयोग
देश के जाने माने इंजीनियरिंग संस्थान आईआईटी बांबे डहार ले छत्तीसगढ़ के रायगढ़ जिला म चलत आने आने आजीविका ले जुड़े गतिविधि मन ल बेहतर बनाय बर तकनीकी सहयोग दे जाह। एखर ले उत्पाद म गुणवत्ता के संग लागत कम करके ओला जादा फायदा वाले बनाय जा सकही। संगेसंग एखर ले जुड़े माइलोगिन मन ल तकनीकी अउ व्यावसायिक प्रशिक्षण घलो दे जाही।
आईआईटी बांबे के सेंट्रल फॅार टेक्नॉलाजी अल्टरनेटिव्स फॅार रूरल एरियाज के प्रोफेसर बकुल राव के अगवई म तीन झन सदस्य वाले टीम ह ए बखत रायगढ़ जिला के दउरा म हवय। ये टीम गौठान अउ गंवई इलाका म माइलोगिन मनके काम अउ स्थानीय पंरपरागत उत्पाद ल तियार करे जाय के तरीका के अध्ययन करत हे।
शाला सुरक्षा प्रशिक्षण
स्कूल मन म आपदा प्रबंधन बर संभावित दुर्घटना मन ल रोके बर बिना समय गंवाये तुरते प्राथमिक उपचार के बेवस्था अउ बचाव के उपाय के जानकारी होना जरूरी हे। शाला सुरक्षा अउ व्यक्तिगत सुरक्षा विषय उपर शिक्षा महाविद्यालय रायपुर म पांच दिन के प्रशिक्षण कार्यक्रम कराये गीस।
एमा आपदा प्रबंधन अउ व्यक्तिगत सुरक्षा ले जुड़े आने आने विषय ल मॉकड्रील के माध्यम ले बताये गीस। उंहें संभावित दुर्घटना ल रोके बर बिना समय गंवाये तुरते इलाज करे के तरीका बताये गीस। ए दउरान गैस सिलेण्डर फटे म, आगी लगे म, बाल शोषण अउ शारीरिक शोषण के विषय म जानकारी दे गीस। ए प्रशिक्षण म राज्य के सबो जिला ले एक सौ पच्चीस प्रतिभागी मन शामिल होइन।
राजनांदगांव निजात अभियान
राजनांदगांव जिला के माओवाद प्रभावित बेलगांव, राजकट्टा, सीतागांव, अउ चंवर गांव म सामुदायिक पुलिसिंग अउ नशा उन्मूलन कार्यक्रम निजात के आयोजन करे गीस। पुलिस अउ आईटीबीपी डहार ले राखे गे ए कार्यक्रम म स्कली लइका अउ ग्रामीण मन ल नशा के दुष्परिणाम अउ सायबर ठगी ले बांचे के उपाय के बारे म जानकारी दे गीस। एखरे संग महिला सुरक्षा संबंधी एप अभिव्यक्ति पॉक्सो एक्ट अउ यातायात नियम बर घलो स्कूली लइका अउ ग्रामीण मन ल जागरूक करे गीस।
विशेष साक्षात्कार
आजादी के अमृत महोत्सव म प्रादेशिक समाचार एकांश आकाशवाणी रायपुर डहार ले छत्तीसगढ़ म स्वतंत्रता संग्राम ले जुड़े प्रमुख घटना अउ इंहा के सेनानी मनले जुड़े विशेष कार्यक्रम के श्रृंखला प्रसारित करे जावत हे। इही श्रृंखला म स्वतंत्रता संग्राम के दउरान अठारा सौ संतावन ले उन्नीस सौ बीस के कालखंड के दउरान छत्तीसगढ़ म होय प्रमुख आंदोलन अउ स्वतंत्रता सेनानी मनके बारे म आकाशवाणी समाचार ह वरिष्ठ इतिहासकार आचार्य रमेंद्रनाथ मिश्र ले गोठबात करीन।
ये विशेष वार्ता के पहिली अंक के प्रसारण सम-सामयिक विषय उपर आधारित कार्यक्रम बातों-बातों में – म आकाशवाणी केंद्र रायपुर डहार ले काली इतवार के बीहनिया नौ बजके तीस मिनट ले करे जाही। जेला छत्तीसगढ़ के सबो आकाशवाणी केंद्र मन ह एके संगरा रिले करहीं।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा छै बजके तीस मिनट ले छै बजके पैंतीस मिनट तक जिला के चिट्ठी कार्यक्रम के प्रसारण करे जाही। ये कार्यक्रम आकाशवाणी के रायपुर केंद्र डहार ले प्रसारित होही। जेला सबो केंद्र मन ह रिले करही। ए बखत के अंक म धमतरी जिला के गतिविधि के बारे म जानकारी दे जाही।
अउ अब थोरकुन समाचार सार म-
– राजनांदगांव जिला के कोतवाली पुलिस ह लोगन ले लाखों रूपिया के धोखाधड़ी करे के मामला म चिटफंड कंपनी के एक संचालक ल राजस्थान के प्रतापगढ़ जिला के जेल ले गिरप्तार करे हे।
– जांजगीर-चांपा जिला के अकलतरा म विकासखंड कार्यालय के तीर हाइवा के चपेट म आय ले एक झन मनखे के मउत होगे। घटना के बाद गुस्साये लोगन मन रद्दा म चक्का जाम कर दीन। समझाइश के बाद ग्रामीण मन शांत होइन।
– प्रवर्तन निदेशालय ईडी ह माओवादी फंडिग के मामला म धन शोधन निवारण अधिनियम के अंतर्गत अश्विनी वर्मा अउ ओखर भाई के नाव म राजनांदगांव के एक ठन अचल संपत्ति ल कुर्की के अस्थायी आदेश जारी करे हे।
अउ
– रायपुर पुलिस ह तिलदा के रिटायर शिक्षक ले धोखाधड़ी के मामला म निजी बैंक के एक झन महिला कर्मचारी ल पुणे ले गिरप्तार करे हे ं
 | ReplyForward |