कोविड प्रतिबंध-समीक्षा
केन्द्र सरकार ह जम्मों राज्य अउ केन्द्रसासित प्रदेस ल कोरोना संक्रमित लोगन के संख्या म कमी ल देखत हुए वर्तमान स्थिति के समीक्षा करे अउ कोविड संबंधी प्रतिबंध म संसोधन करे बर केहे हे। केन्द्रीय स्वास्थ्य सचिव राजेश भूषण ह ए संबंध म राज्य के मुख्य सचिव अउ मुख्य प्रशासक मन ल पत्र लिखे हे। ओमन ह किहीन कि इक्कीस जनवरी ले देस म कोरोना महामारी म लगातार गिरावट देखे जावत हे। श्री भूषण ह किहीन कि पाछु महीना संक्रमित लोगन के संख्या म बढ़ोतरी के बाद कुछ राज्य ह अपन सीमा अउ हवाई अड्डा म अतिरिक्त प्रतिबंध लगा दे रिहीस। ओमन ह किहीन कि अतिरिक्त प्रतिबंध ले लोगन के आवागमन अउ आर्थिक गतिविधि म बाधा न हो, ए बात के ध्यान रखे जाना चाही।
हाईकोर्ट-तबादला आदेश
छत्तीसगढ़ उच्च न्यायालय ह अपन एक अहम फैसला म किहीन कि आरक्षक ले निरीक्षक तक के तबादला सिर्फ पुलिस स्थापना बोर्ड ही कर सकत हे। एसपी, डीआईजी, आईजी, एडीजी अउ डीजीपी जइसे आईपीएस अधिकारी ए तबादला नइ कर सकय। हाईकोर्ट के ए फैसला प्रदेशभर के पुलिस अधिकारी उपर लागू होही।
उच्च न्यायालय के मुख्य न्यायाधीश अरूप कुमार गोस्वामी अउ न्यायाधीश एन.के चंद्रवंशी के खंडपीठ ह अपन फैसला म कहिन कि पुलिस अधिनियम- दो हजार सात छत्तीसगढ़ के सबो पुलिस अधिकारी अउ कर्मचारी उपर लागू होथे। अधिनियम के ‘‘धारा बाईस-दो-ए‘‘ के तहत सिपाही ले निरीक्षक तक सब्बो पुलिसकर्मी के तबादला करे के अधिकार सिर्फ पुलिस स्थापना बोर्ड ल हे। ए बोर्ड म पांच आईपीएस अधिकारी मनके एक समिति तबादला के संबंध म आदेश जारी करथे। ए संबंध म एक महिला पुलिस कर्मचारी ह पुलिस महानिरीक्षक डहार ले कोरबा जिला ले गौरेला-पेंड्रा-मरवाही जिला म करे गे अपन तबादला के आदेश ल चुनौती देवत हुए याचिका दायर करे रिहीस।
इंस्पायर अवार्ड
प्रदेस के तीस विद्यार्थी मनके मॉडल राष्ट्रीय स्तर म चुने गेहे। विद्यार्थी मन डहार ले तैयार करे गे मॉडल – शिक्षा, स्वास्थ्य, सुरक्षा, कृषि अभियांत्रिकी, पुनर्चक्रीय ऊर्जा अउ कृषि जइसन महत्वपूर्ण विषय बर बनाय गेहे। इंस्पायर अवार्ड मानक योजना के तहत राज्य ले विज्ञान अउ सामाजिक अनुप्रयोग म मूल विचार अउ नवाचार के अंतर्गत साढ़े तीन हजार ले जादा प्रतिभागी मनके चयन राज्य स्तर म करे गे रिहीस। एमा ले तीस विद्यार्थी के मॉडल राष्ट्रीय स्तर बर चुने गेहे।
राज्यपाल-मदकूद्वीप प्रकल्प
मुंगेली जिला के मदकूद्वीप म काली पर्यावरण तीर्थ प्रकल्प के आयोजन करे गीस। ए प्रकल्प के सुभारंभ करत हुए राज्यपाल अनुसुईया उइके ह किहीन कि मानव सभ्यता के विकास प्रकृति के सानिध्य म ही होय हे। ओमन ह किहीन कि कोरोना के वैश्विक महामारी ह हमन ल पर्यावरण ल सुरक्षित-संरक्षित रखे के प्रति एक घाव फेर सचेत करे हे कि हमन ल आने वाले पीढ़ी बर प्रकृति डहार ले प्राप्त चीज ल सहेज के रखे के आवश्यकता हे।
ए बेरा म राज्यपाल ह मदकूद्वीप के प्राचीन गणेश मंदिर म पूजा-अर्चना करीन अउ प्रदेसवासी मनके सुख-समृद्धि के कामना करीन। ओमन ह मदकूद्वीप म उत्खनन म पाय गे ज्योतिर्लिंग अउ आने पुरातात्विक मूर्ति मनके जानकारी घलो लीन। अपन प्रवास के दउरान राज्यपाल ह मंदिर परिसर म पीपल के पौधा रोपित घलो करीन।
रायगढ़ कोर्ट-प्रदर्शन
रायगढ़ म पाछु दिन तहसीलदार संग राजस्व विभाग के कर्मचारी अउ वकील मनके बीच होय कथित झड़प के घटना के बाद पूरा प्रदेश म तहसीलदार अउ राजस्व विभाग के आने अधिकारी-कर्मचारी हड़ताल म चले गेहे। कनिष्ठ राज्य प्रशासनिक संघ के अधिकारी मन ह अपन तीन सूत्रीय मांग नहीं माने जाय तक आंदोलन जारी रखे के ऐलान करे हे।
कनिष्ठ राज्य प्रशासनिक सेवा संघ के प्रदेश अध्यक्ष के.के. लहरे अउ कार्यकारी अध्यक्ष संध्या नामदेव ह बतईन कि कुछ लोगन आंदोलन ल दिग्भ्रमित करे बर गलत संदेस सोसल मीडिया म वायरल करत हे। आंदोलन करत अधिकारी मनके कहना हे कि राजस्व अदालत म उंखर सुरक्षा के समूतिच व्यवस्था करे अउ कथित झड़प के घटना म सामिल सब्बो अभियुक्त के गिरफ्तारी उंखर प्रमुख मांग हे। घटना के संबंध म प्रार्थी रामप्रसाद सिदार ह आज रायगढ़ के नगर पुलिस अधीक्षक ल एक लिखित सिकायत देके घटना के सबो आरोपित ल गिरफ्तार करे के मांग करीन। ए आंदोलन के वजह ले आज घलो प्रदेस के आने-आने तहसील म कामकाज प्रभावित रिहीस।
उहें, रायगढ़ म आज वकील मन ह घलो अंबेडकर प्रतिमा के सामने टेंट लगाके अनिश्चितकालीन धरना-प्रदर्शन सुरू करीन। वकील मन ह प्रदर्शन के दउरान पुतला टांग के शंख घलो बजईन।
ओति, बलौदाबाजार म आज राजस्व अधिकारी मन ह उंखर आंदोलन म वकील डहार ले करे गे कथित टिप्पणी उपर आपत्ति जतात हुए जिला प्रशासन ले उचित कार्रवाई के मांग करीन। राजस्व अधिकारी मन ह नगर म पैदल मार्च करके कलेक्टर ल छह बिन्दु के ज्ञापन घलो सौंपीन।
कोविड समाचार
प्रदेस म कोरोना संक्रमण के मामला म लगातार गिरावट आवत हे। ए समय प्रदेश म संक्रमण के दर डेढ़ प्रतिशत ले कम होगे हे। काली प्रदेश म कोरोना संक्रमण के चार सौ तैंतीस नवा मामला सामने आईस। वर्तमान म चार हजार आठ सौ तीन मरीज के इलाज प्रदेश के आने-आने अस्पताल अउ होम आइसोलेशन म चलत हे।
उहें, प्रदेस म कोरोना संक्रमण के घटत संख्या ल देखत हुए आने-आने जिला म लागू प्रतिबंध म छूट दे जावत हे। इही कड़ी म राजनांदगांव जिला म सार्वजनिक कार्यक्रम सहित बिहाव जइसन आयोजन म उपस्थिति ले संबंधित प्रतिबंध ल हटा दे गेहे।
अमृत महोत्सव-जनसंचार कार्यक्रम
‘‘आजादी के अमृत महोत्सव‘‘ के तहत सूचना अउ प्रसारण मंत्रालय के दुर्ग स्थित क्षेत्रीय लोकसंपर्क कार्यालय डहार ले जिला के कंडरका ग्राम पंचायत म बिसेस जनसंचार कार्यक्रम के आयोजन करे गीस। कार्यक्रम के मुख्य अतिथि जनपद पंचायत के अध्यक्ष सरस्वती रात्रे रिहीस।
अध्यक्ष रात्रे ह अपन संबोधन म किहीन कि आजादी के पचहत्तरवां वर्षगांठ ल पूरा देस म भव्य रूप ले मनाय जाय के उद्देश्य स्वाधीनता के बाद जन्म लेने वाला पीढ़ी ल ओखर गौरवपूर्ण महत्व ले अवगत कराना हे। ए बेरा जागरूकता रैली के घलो आयोजन करे गीस।
स्कूल-कार्यशाला
केन्द्र सरकार ह वर्तमान परिदृश्य म सुरक्षा नियम के जागरूकता ल स्कूल डहार ले लागू करे बर बिसेस जोर देहे। ए संबंध म काली राजधानी रायपुर म राज्य स्तरीय कार्यसाला के आयोजन करे गीस। एमा केन्द्रीय सिक्षा अउ साक्षरता मंत्रालय के संयुक्त सचिव मनीष गर्ग बिसेस रूप म सामिल होईन। ए कार्यसाला के आयोजन राज्य शैक्षिक अनुसंधान अउ प्रशिक्षण परिषद डहार ले यूनिसेफ छत्तीसगढ़ अउ एक गैर सरकारी संस्था के सहयोग ले करे गीस। कार्यसाला ल संबोधित करत हुए श्री गर्ग ह किहीन कि मौजूदा परिस्थिति ल देखत हुए सुरक्षा नियम के बारे म जागरूकता पैदा करे बर स्कूल सबले प्रभावी माध्यम हो सकत हे।
पुलिस अधिकारी-ग्रामीण मुलाकात
नारायणपुर जिला के पुलिस अधीक्षक गिरिजाशंकर जायसवाल ह काली अपन अधीनस्थ अधिकारी मनके संग अबूझमाड़ क्षेत्र के दस ले जादा गांव के ग्रामीण मन ले मुलाकात करीन। एमा सोनबट्टी, ओरछा, धनोरा, धुरी, राजपुर, तिरंगरंई, चमेली, पेडमापाल, मडनार, टेकानार अउ रायनार के ग्रामीण सामिल रिहीन।
स्कूल-परीक्षा
बिलासपुर जिला के सबो स्कूल म स्थानीय परीक्षा ऑनलाइन तरीका ले होही। जिला सिक्षा अधिकारी ह ए संबंध म आदेश जारी कर देहे। आदेस म ए स्पष्ट करे गेहे कि केवल माध्यमिक सिक्षा मंडल डहार ले आयोजित बोर्ड के परीक्षा ही ऑफलाइन होही। ए आदेस बिलासपुर जिला के सबो सरकारी अउ निजी स्कूल उपर लागू होही।
रेल परिचालन
रेल यात्री मनके सुविधा ल ध्यान म राखत हुए रेलवे प्रसासन ह कोरबा ले अमृतसर तक चलने वाला छत्तीसगढ़ एक्सप्रेस अउ बिलासपुर-गेवरारोड पैसेंजर ट्रेन ल आगामी छब्बीस फरवरी ले रोज चलाय के आदेश जारी करे हे। अभी ए दूनों ट्रेन ल हफ्ता म चार दिन चलाय जात रिहीस।
अउ अब पेस हे मौसम के हाल..
काली प्रदेस म हवा के दिसा बदले के संभावना हे। मौसम विभाग के अनुसार काली ले प्रदेस के दक्षिणी भाग म दक्षिण दिसा ले अउ उत्तरी छत्तीसगढ़ म उत्तर दिशा ले हवा चले के संकेत हे। एखर प्रभाव ले प्रदेस म आंसिक रूप से बादल छाय रेहे सकत हे। हालांकि, प्रदेस के न्यूनतम तापमान म बिसेस परिवर्तन होय के संभावना नइ हे। ए दउरान प्रदेस के मौसम आमतौर म सुष्क रइही।
इही बीच, राजधानी रायपुर सहित प्रदेश के एक-दू जगह म आज बूंदाबांदी होईस।