तहसीलदार आंदोलन
ें रायगढ़ जिला म वकील अउ नायब तहसीलदार के बीच दू दिन पहिली होय कथित झड़प के बाद राजधानी रायपुर के संगेसंग प्रदेश के आने जिला मन म पदस्थ तहसीलदार अउ उंखर कर्मचारी मन ह आज ले अनिश्चितकालिन हड़ताल शुरू कर देहे। कनिष्ठ प्रशासनिक सेवा संघ के बैनर तले आंदोलन करत तहसीलदान मन ह आज ले काम बंद करके प्रदर्शन करीन।
ओखर मनके मांग हे कि दोषी मनके खिलाफ तुरते कार्रवाई करे जाय अउ संगेसंग राजस्व अदालत मन म सुरक्षा बर गार्ड अउ मोहर्रिर के बेवस्था के मांग घलो करे हे। तहसीलदार के ये आंदोलन ल राजस्व निरीक्षक, पटवारी, क्लर्क, कोतवाल, अउ लघु वेतन कर्मचारी संघ ह समर्थन देवत हे। ए मामला म रायगढ़ पुलिस ह पांच झिन वकील मन ल आरोपी बनाय हे, जेमा ले तीन झिन ल गिरप्तार करे जा चुके हे।
जानबा के मुताबिक ये आंदोलन के समर्थन म रायगढ़ जिला म स्कूल, अस्पताल के संगेसंग आने जरूरी सेवा ल छोड़के जम्मों ऑफिस के कर्मचारी मन ह कलमबंद हड़ताल करीन।
एति धमतरी म राजस्व पटवारी संघ ह अधिकारी अउ कर्मचारी मनके सुरक्षा के मांग के बारे म जिला कलेक्टर ल ज्ञापन सौंपीन। त उंहे बिलासपुर जिला के जम्मों तहसील कार्यलय मन म घलो आज ताला लगे रीहिस।
स्वामी आत्मानंद स्कूल शिक्षक भर्ती
ें प्रदेस के आदिवासी बहुल संभाग अउ कोनो कोनो जिला मन म स्वामी आत्मानंद अंग्रेजी माध्यम स्कूल मन म शिक्षक मनके भर्ती बर उंहे के रहइया पात्र अभ्यर्थी मनके अनिवार्यता ल शिथिल कर दे गेहे।
राज्य सरकार ह विद्यार्थी मनके हित ल देखत बस्तर अउ सरगुजा संभाग के जम्मों जिला के संगेसंग गौरेला- पेण्ड्रा मरवाही अउ कोरबा जिला के स्वामी आत्मानंद स्कूल मन म शिक्षक के भर्ती बर स्थानीय निवासी के नियम ल शिथिल करे के प्रस्ताव राज्यपाल तीर भेजे रीहिन। राज्यपाल ह ए प्रस्ताव ल मंजूरी दे देहे। एखर ले बस्तर अउ सरगुजा संभाग के संगेसंग प्रदेश के आने जिला मन म पात्र उम्मीदवार मनके घलो भर्ती हो सकही।
राजीव युवा मितान क्लब गठन
ें प्रदेस म मुख्यमंत्री भूपेश बघेल के अगवई म राजीव युवा मितान क्लब के शासी निकाय के गठन करे गेहे। जेमा खेल अउ युवा कल्याण मंत्री उमेश पटेल ल उपाध्यक्ष बनाय गेहे, त उंहें पंचायत मंत्री टी.एस. सिंहदेव ह नगरीय प्रशासन अउ विकास मंत्री, डॅाक्टर शिवकुमार डहरिया, लोकसभा सांसद दीपक बैज, राज्यसभा सांसद छायावर्मा, विधायक देवेन्द्र यादव, विनय भगत मुख्य सचिव अमिताभ जैन अउ अपर मुख्य सचिव सुब्रत साहू मन ल सदस्य बनाय गेहे। ए निकाय म खेलअउ युवा कल्याण विभाग के सचिव ह पदेन सदस्य होही।
जानबा के मुताबिक प्रदेश म पंद्रह ले चालीस साल के युवा मन बर राजीव युवा मितान क्लब योजना शुरू करे गेहे। राज्य के जम्मों ग्राम पंचायत अउ नगरीय निकाय मन म युवा मितान क्लब बनाय जात हे।
केन्द्र-चीनी मोबाइल ऐप
ें केन्द्र सरकार ह राष्ट्रीय सुरक्षा बल उपर खतरा होवइया चौव्वन ठिन चीनी मोबाइल ऐप उपर रोक लगा देहे। इलेक्ट्रॉनिक्स अउ सूचना प्रौद्योगिकी मंत्रालय ह रोक लगाय गे ऐप के सूची जारी करे हे। ए रोक लगाय सूची म अइसन ऐप घलो सामिल हे, जेला सरकार ह पहिली घलो रोक लगाय रिहीस। फेर, दूसरइया घांव नवा नाम ले प्लेस्टोर म अउ सामिल होगे रिहीस।
पुलवामा हमला-श्रद्धांजलि
ें देस आज पुलवामा हमला म बलिदान देवइया जवान मन ल श्रद्धांजलि अर्पित करत हे। बछर दू हजार उन्नीस म आजे के दिन होय हमला म केन्द्रीय रिजर्व पुलिस बल के चालीस झिन जवान सहीद होगे रिहीन।
प्रधानमंत्री अउ केन्द्रीय गृह मंत्री ह सहीद जवान ल श्रद्धांजलि दीन।
अमृत महोत्सव-प्रश्नोत्तरी
आजादी के अमृत महोत्सव म आकाशवाणी समाचार डहार ले राष्ट्रीय स्तर म आयोजित करे जात प्रश्नोत्तरी के तहत आज के प्रश्न हे –
केरल ले आजाद हिन्द फौज के ओ क्रांतिकारी के नाम बतावव, जेला अंग्रेज मन ह छब्बीस साल के उमर म फांसी दे रिहीन। एमन मलाया म गुप्तचर एजेंट के प्रसिक्षण लेके के बाद उन्नीस सौ बयालीस म भारत आय रिहीन ?
श्रोता मन ह अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी अमृत महोत्सव क्विज एट द रेट प्रसार भारती डॉट जीओवी डॅाट इन म भेज सकथे। ए प्रतियोगिता बर एक भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही। विजेता ल ई-प्रमाण पत्र घलो दे जाही।
दुर्घटना
ें लखनउ ले बेमेतरा आवत एक ठिन यात्री बस ह कबीरधाम जिला के कुकदुर घाट म अंते-तंते होके पलट गे । जेखर ले एक झिन यात्री के मउत होगे अउ पंद्रह झिन यात्री धायल होगे हे। ओति जांजगीर चांपा जिला के खिशोरा गांव म एक ठिन गाड़ी अउ फटफटी के बीच टक्कर होगे जेखर ले फटफटी म बइठे एक झिन मनखे के मउत होगे अउ दू झिन आने मनखे मन घायल होगे।
त उंहें इही जिला के शिवरीनारायण म शबरी पुल के तीर बायपास रोड म एक ठिन कार के टक्कर ले फटफटी म बइठे दू झिन मनखे गंभीर रूप ले घायल होगे।
ठगी-आरोपी गिरफ्तार
ें भारतीय स्टेट बैंक के दुरूग शाखा के प्रबंधक के संग होय अट्ठारह लाख रूपिया के ठगी के मामला म चार झिन आरोपी मन ल गिरफ्तार करे गेहे।
दुरूग जिला के वरिष्ठ पुलिस अधीक्षक बद्रीनारायण मीणा ह आज एक ठिन पत्रकारवार्ता म राज्य म पहिली घांव एक ठिन नवा तरीका ले ठगी करे जाय के खुलासा करीन। ओमन बतईन कि गिरोह के सरगना के संगेसंग तीन झिन सदस्य फरार हवय। पुलिस ह ए आरोपी मनके तीर ले डेढ़ लाख रूपिया अउ आने-आने बैंक के एटीएम कार्ड बरामद करे हे।
जतरा मेला
ें सरगुजा जिला के बरगीडीह म ए बेरा जतरा मेला चलत हे। प्रदेस के खाद्य मंत्री अमरजीत भगत ह काली ए मेला के सुभारंभ करीन। ओमन किहीन कि मेला मड़ई छत्तीसगढ़ के संस्कृति के प्रमुख पहिचान हरय। जतरा मेला खुसहाली के संगेसंग लोगन मन म भाईचारा के घलो संदेस देथे।
ट्रांसजेंडर-रैम्प वॉक
ें प्रदेश म तृतीय लिंग समुदाय के प्रति लोगन मन म बने सोच अउ जागरूकता लाय के उद्देश्य ले बस्तर संभाग म एक ठिन अलगे ढंग ले फैशल शो राखे गीस। समाज कल्याण विभाग डहार ले चेतना फाउंडेशन के मदद ले जगदलपुर के आर्ट गैलरी म पाछु सनिचर के हाय ए कारीकरम म कांकेर, कोंडागांव अउ बस्तर जिला के बत्तीस ट्रांसजेंडर मन ह सामिल होईन। आदिवासी कला अउ बस्तर के संस्कृति उपर केन्द्रित ए कारीकरम म जम्मांं प्रतिभागी मन ह आदिवासी कपड़ा अउ गहना पहिन के रैम्प वॉक करीन। ए मउका म ट्रांसजेंडर प्रतिभागी मन ह सांस्कृतिक कारीकरम घलो पेस करीन। जिला प्रसासन कोति ले ए प्रतिभागी मन ल नगद पुरस्कार के संगेसंग तृतीय लिंग समुदाय के सदस्य के पहिचान पत्र घलो दे गीस।
मौसम
ें प्रदेस के मौसम के घांव फेर बदलत हे। मौसम विभाग के मुताबिक आज ले हवा पूरब कोति ले चलत हे। फेर काली ले ए ह दक्षिण-पूर्वी होय के संभावना हे। हवा के दिसा बदले के सेती प्रदेस म बंगाल के खाड़ी ले गरम हवा आ सकथे।
मौसम विज्ञानिक के मुताबिक काली प्रदेस के मौसम सुष्क रइही। फेर अड़तालीस घंटा के दउरान अधिकतम अउ न्यूनतम तापमान म बढ़ोतरी होय के संभावना हे। काली प्रदेस के कोनों-कोनों जघा म बादर घलो छा सकथे।
अउ अब थोरकुन समाचार सार म-
– भारतीय अंतरिक्ष अनुसंधान संगठन-इसरो ह श्री हरिकोटा ले धु्रवीय उपग्रह प्रक्षेपण यान पी.एस.एल.वी.-सी-बावन के सफल प्रक्षेपण करीन।
अउ
– बिलासपुर जिला के घानाकछार जंगल म एक ठिन तेंदुआ के सिकार करे के मामला म पांच झिन आरोपी मन ल वन्यप्राणी संरक्षण अनिनियम के तहत गिरफ्तार करके जेल भेज दे गेहे।