आज दिनभर के खबर ल अपन गुरतुर छत्तीसगढ़ी भाखा म पढ़व

राष्ट्रपति-रक्षा अलंकरण

राष्ट्रपति रामनाथ कोविंद ह आज राष्ट्रपति भवन म रक्षा अलंकरण समारोह म वीरता पुरस्कार प्रदान करीन। लद्दाख के गलवान घाटी म ऑपरेशन स्नो लेपर्ड के दौरान बलिदान देवइया कर्नल संतोष बाबू ल मरणोपरांत महावीर चक्र ले सम्मनित करे गीस।
सूबेदार संजीव कुमार ल जम्मू-कश्मीर के केरन सेक्टर म ऑपरेशन बर मरणोपरांत कीर्ति चक्र ले सम्मानित करे गीस। नायब सूबेदार सुदूराम सोरेन, हवलदार के. पलानी, नायक दीपक सिंह अउ सिपाही गुरतेज सिंह ल गलवान घाटी म उंखर वीरतापूर्वक कार्रवाई बर मरणोपरांत वीर चक्र ले सम्मानित करे गीस। उहें, भारतीय वायुसेना प्रमुख एयरचीफ मार्शल विवेक चौधरी ल परम विशिष्ट सेना मेडल ले अलंकृत करे गीस।


सीएम-पीएम पत्र

मुख्यमंत्री भूपेश बघेल ह प्रधानमंत्री नरेन्द्र मोदी ल पत्र लिख के छत्तीसगढ़ ल समय म बारदाना के आपूर्ति व्यवस्था सुनिश्चित करे के अनुरोध करे हे। श्री बघेल ह अपन पत्र म केहे हे कि योजना के अनुसार छत्तीसगढ़ ल 2 लाख 14 हजार गठान नवा जूट बारदाना जूट कमिश्नर कोलकाता के माध्यम ले खरीदे के अनुमति मिले हे। जबकि राज्य ल अभी के बेरा म सिर्फ 86 हजार 856 गठान नवा जूट बारदाना मिले हे। ओमन ह राज्य के धान खरीदी बर 5 लाख 25 हजार अउ बारदाना के जरूरत बतईन।

चिटफंड कंपनी-राशि वापस

मुख्यमंत्री भूपेश बघेल ह आज रायपुर स्थित निवास कार्यालय ले वीडियो कान्फ्रेंसिंग के माध्यम ले राजनांदगांव जिला के चिटफंड कंपनी मनके निवेसक मन ल 2 करोड़ 46 लाख रूपिया वापिस करीन। ए मउका म मुख्यमंत्री ह किहीन कि छत्तीसगढ़ देश के एकलौता राज्य हरय, जउन चिटफंड कंपनी म ठगी के शिकार होय निवेशक मन ल रासि वापिस लहुटात हे। एखर बर चिटफंड कंपनी मनके निवेशक मन उपर कानूनी कार्रवाई के संग उंखर संपत्ति ल कुर्क करके नीलामी के बाद मिले राशि ल निवेशक मन ल वापिस करे जात हे। श्री बघेल ह बतईन कि सबो जिला के कलेक्टर अउ पुलिस अधीक्षक मन ल चिटफंड कंपनी मनके खिलाफ कार्रवाई अउ वसूली के अभियान तेज करे के निर्देश दे गेहे। ओमन किहीन कि निवेशक मन ल उंखर पइसा वापिस लहुटाय के सिलसिला आगू घलो जारी रही।

माओवादी-गिरफ्तार

बीजापुर जिला म सुरक्षा बल मन ह 3 माओवादी मन ल गिरफ्तार करे म सफलता हासिल करे हे।
मिले जानकारी के अनुसार पामेड़ थाना क्षेत्र म सीआरपीएफ, कोबरा बटालियन अउ जिला पुलिस बल के संयुक्त दल तलाशी अभियान म निकले रिहीस। ए बेरा घेराबंदी करके 3 माओवादी मन ल गिरफ्तार करे गीस। इंखर मन उपर लूट, आगजनी अउ सुरक्षा बल उपर फायरिंग सहित आने माओवादी गतिविधि मन म सामिल होय के आरोप हे।
उहें, सुकमा जिला म घलो 1 लाख रूपिया के इनामी माओवादी ल गिरफ्तार करे गेहे।

बीएसएफ-स्थापना दिवस

सीमा सुरक्षा बल-बी.एस.एफ. 01 दिसंबर के अपन 56वां स्थापना दिवस मनाही। एखर बारे म बीएसएफ के महानिरीक्षक एस.के. त्यागी ह दुर्ग म पत्रकार मन ले चर्चा करत किहीन कि प्रदेश म माओवादी समस्या ले निपटे बर दूसर केन्द्रीय बल मनके संग सीमा सुरक्षा बल के घलो माओवाद प्रभावित जिला मन म तैनाती करे गेहे। ओमन बतईन कि अबूझमाड़ म बीएसएफ के तैनाती ले माओवादी मनके आवाजही के रद्दा बंद होय हे, जेखर ले माओवादी मन के प्रभाव कम होय हे।
श्री त्यागी ह बतईन कि बीएसएफ ह सरकार के विकास कार्य म घलो अपन सहभागिता देत हे। ओमन बतईन कि कोरोना काल के बेरा घलो जवान मन ह जरूरतमंद परिवार मन ल रासन, दवई अउ दैनिक उपयोग के सामान उंखर तक पहुंचइस। श्री त्यागी ह बतईन कि भविष्य के योजना मन म भिलाई इस्पात संयंत्र के मानिंग प्रोजेक्ट रावघाट ल सुरक्षा देना हे, जेखर ले जल्दी उत्पादन सुरू हो सके। एखर अलावा, अंतागढ़ ले जगदलपुर तक रेलवे लाइन परियोजना उपर घलो बीएसएफ ल कार्यभार सौंपे गेहे।

शिक्षण-संस्थान

राज्य सरकार ह नवा रायपुर के 20 एकड़ क्षेत्र म विश्व स्तरीय शिक्षण संस्थान के स्थापना के निर्णय लेहे। एखर बर मुख्यमंत्री भूपेश बघेल के अध्यक्षता म छत्तीसगढ़ उत्कृष्ट विद्यालय सोसायटी के गठन करे गेहे, जेखर पहिली बैठक आज मुख्यमंत्री निवास कार्यालय म आयोजित करे गीस।
जानकारी के अनुसार ए शिक्षण संस्था के निर्माण नवा रायपुर विकास            प्राधिकरण ह करही।

परीक्षा तिथि-संशोधन

छत्तीसगढ़ व्यावायिक परीक्षा मंडल डहार ले आयोजित होवइया ज्येष्ठ संपरीक्षक, सहायक संपरीक्षक अउ सहायक परियोजना क्षेत्रपाल भर्ती परीक्षा 2021 के आखरी तारीख म संशोधन करे गेहे। अब ए परीक्षा 2 जनवरी 2022 के दू पाली म आयोजित करे जाही। एखर अलावा, ए भर्ती परीक्षा मनके ऑनलाइन आवेदन जमा करे के तिथि 23 ले बढ़ाके 25 नवंबर कर दे गेहे। उहें, 26 ले 28 नवंबर तक त्रुटि सुधार करे जा सकथे।

अमृत महोत्सव-प्रश्नोत्तरी

आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – एलबर्ट विधेयक विवाद का हरय, जउन भारतीय मनके खिलाफ ब्रिटेन के नस्ली विचारधारा ल उजागर करथे ?
ये प्रश्न के उत्तर वाट्सअप नंबर – आठ आठ दू छै पांच चार छै दो छै दो – या ई-मेल अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।

कार्य निरीक्षण

सुकमा जिला के जगरगुंडा-चिंतलनार रद्दा ल जल्दी पूरा करे बर अउ जन-जीवन सामान्य करे बर पुलिस के वरिष्ठ अधिकारी मन ह सड़क निर्माण कार्य के जायजा लेत हे। ए सिलसिला म अतिरिक्त पुलिस महानिदेशक पवन देव अउ बस्तर रेंज के पुलिस महानिरीक्षक पी. सुंदरराज ह निर्माणाधीन जगरगुंडा-चिंतलनार मार्ग के निरीक्षण करीन। ए बेरा ओमन ह ठेकादार मन ल जल्दी सड़क बनाय के निरदेस दीन। उहें, जिला के पुलिस अधीक्षक सुनील शर्मा ह चिंतलनार, गड़गड़मेटा, बुरकापाल अउ चिंतागुफा म लगाय गे शिविर मन म जवान मन ले मुलाकात करीन। संगेसंग सुरक्षा व्यवस्था के जायजा घलो लीन।

कीमोथैरेपी सुविधा

बस्तर अउ सरगुजा अंचल के जिला अस्पताल मन म अब निःशुल्क कीमोथैरेपी के सुविधा उपलब्ध कराय जात हे। प्रदेश के 17 जिला अस्पताल मन म ए सुविधा विकसित करे गेहे। डे-केयर कीमोथैरेपी के सुविधा वाले ए 17 अस्पताल मे ले 8 बस्तर अउ सरगुजा अंचल के हवय।

भाजपा-ज्ञापन

भाजपा किसान मोर्चा ह प्रदेश म होय बे-मौसम बरसात के सेती फसल मन के नुकसान के क्षतिपूर्ति सहित किसान मनके 6 सूत्रीय मांग ल लेके काली प्रदेशभर म प्रदर्शन करीस। ए दौरान राज्यपाल के नाम घलो ज्ञापन सौंपे गीस।
भाजपा किसान मोर्चा के प्रदेश अध्यक्ष श्याम बिहारी जायसवाल ह मीडिया ले चर्चा म बतईन कि बे-मौसम बरसात ले प्रदेश के करीब 20 ले ज्यादा जिला मनके किसान प्रभावित होय हे। ओमन ह राज्य सरकार ले फसल मनके नुकसान के क्षतिपूर्ति जल्दी देके मांग करे हे। ओमन चेतावनी दीन कि यदि राज्य सरकार किसान मनके हित म नइ लीहीं त प्रदेश स्तरीय आंदोलन करे जाही।


अब पेश हे मौसम के हाल..

बीते दू दिन ले होय बे-मौसम बरसात के बाद प्रदेश के कतको हिस्सा म कोहरा छाय रेहे के खबर हे। राजधानी रायपुर म आज बिहनिया घना कोहरा छाय रिहीस।
मौसम विभाग ले मिले जानकारी के अनुसार प्रदेश म काली ले शुष्क हवा के आय के संभावना हे, जेखर सेती राज्य म मौसम शुष्क रेहे अउ उत्तरी भाग म ठंडा हवा आय ले तापमान म गिरावट के संभावना हे। बाकी हिस्सा म अधिकतम अउ न्यूनतम तापमान म बदलाव के संभावना नइ हे।

Leave a Reply

Your email address will not be published. Required fields are marked *