माओवादी-मुठभेड़-जवान शहीद
ें बीजापुर जिला म माओवादी मन संग होय मुठभेड़ म सीआरपीएफ के एक सहायक कमांडेंट ह सहीद होगीन। उहें, एक झिन दूसर जवान घायल होय हे, जेला अस्पताल म भर्ती कराय गेहे।
जिला के पुलिस अधीक्षक कमलोचन कश्यप ह घटना के पुष्टि करत बतईन कि सीआरपीएफ एक सौ अड़सठवां बटालियन के एक ठन टीम ह आज बिहनिया बासागुड़ा थाना क्षेत्र म तलाशी अभियान म निकले रिहीन। इही दउरान ग्राम पुतकेल के आगे डोंगल चिंता नाला तीर माओवादी मन ह घात लगाके सुरक्षा बल उपर फायरिंग सुरू कर दीन। जवान मन घलो जवाबी कार्रवाई करीन। ए मुठभेड़ म सीआरपीएफ के सहायक कमांडेंट शांति भूषण तिर्की ह शहीद होगीन अउ एक झिन दूसर जवान ह घायल होगे। घटना के बाद इलाका म उपरहा बल तैनात करके सर्चिंग ल बढ़ा दे गेहे।
राज्यपाल अनुसुईया उइके अउ मुख्यमंत्री भूपेश बघेल ह सहीद सहायक कमांडेंट के सहादत म दुख व्यक्त करत किहीन कि जवान मनके सहादत व्यर्थ नइ जाही। राज्यपाल ह किहीन कि केन्द्र अउ राज्य सरकार के समन्वय ले माओवाद के खात्मा जल्दीच होही। उहें, मुख्यमंत्री ह घटना म घायल जवान मन ल बने इलाज देवाय के निरदेस अधिकारी मन ल दीन हे।
स्माइल योजना
ें वंचित मन ल आजीविका अउ उद्यम बर मदद करे के केन्द्र सरकार के योजना-‘‘स्माइल‘‘ सुरू होगे हवय। केन्द्रीय सामाजिक न्याय अउ अधिकारिता मंत्रालय के ए योजना के फायदा ट्रांसजेडर अउ भिक्षावृत्ति करइया मन ल घलो मिलही।
सामाजिक न्याय अउ अधिकारिता मंत्री डॉक्टर वीरेन्द्र कुमार ह ए योजना के सुरूवात करत किहीन कि केन्द्र सरकार ह ट्रांसजेडर समुदाय अउ भीख मांगने वाला मन म आत्मविश्वास अउ सुरक्षा के भावना लाय बर प्रतिबद्ध हे। ओमन किहीन कि कौशल प्रशिक्षण अउ आधुनिक सिक्षा के संग ए योजना ह निश्चित रूप ले ट्रांसजेडर समुदाय ल मुख्यधारा म आगू बढ़ाय के सक्षम बनाही अउ सबका साथ-सबका विकास के प्रधानमंत्री नरेन्द्र मोदी के परिकल्पना ल साकार करही।
ओरो स्कॉलर
ें प्रदेश म कक्षा पहली ले बारहवीं तक स्कूली लइका मन बर ओरो स्कॉलर अउ खास जरूरत वाले लइका मन बर ‘‘प्रोजेक्ट इन्क्ल्यूजन‘‘ कारीकरम सुरू करे जाही। स्कूल सिक्षा मंत्री डॉक्टर प्रेमसाय सिंह टेकाम ह ए कारीकरम के वर्चुअल सुरूवात करीन। ए कारीकरम म लइका मन पढ़ई करके अउ क्विज प्रतियोगिता म भाग लेके हजारों रूपिया के स्कॉलरशिप ले सकही। ए कारीकरम बिसेस आवश्यकता वाले लइका मनके पहिचान करके ओमन ल सामान्य लइका मन संग सामिल करे बर हे।
रेलवे-भोजन सुविधा
ें भारतीय रेल खान-पान अउ पर्यटन निगम-आई.आर.सी.टी.सी. ह चौदह फरवरी ले सब्बो रेलगाड़ी म पके भोजन के सुविधा फेर सुरू करे के फइसला करीन हे। आई.आर.सी.टी.सी. ह केहे हे कि यात्री मनके जरूरत अउ देस म कोविड प्रतिबंध म ढील ल देखत आई.आर.सी.टी.सी. ह रेलगाड़ी मन म पके भोजन के सुविधा सुरू करे के पूरा तैयारी कर लेहे।
मुख्य सचिव-समीक्षा
ें प्रदेस के धान खरीदी केन्द्र ले धान के जादा ले जादा उठाव पन्द्रह मार्च तक पूरा करे के निरदेस दे गे हवय। मुख्य सचिव अमिताभ जैन ह मंत्रालय ले धान उठाव के संग भारतीय खाद्य निगम अउ नागरिक आपूर्ति निगम म चावल जमा करे बर सबो संभागीय आयुक्त अउ जिला कलेक्टर मनके वर्चुअल बइठका लीन। मुख्य सचिव ह बतईन कि धान खरीदी केन्द्र म तीस लाख मीटरिट टन धान हवय। मिलिंग बर मिलर मन डहार ले सीधा समिति मन ले धान उठाव करे जाही। मुख्य सचिव ह यहू घलो बतईन कि निजी भूमि म प्राकृतिक रूप ले बाढ़े अउ व्यवसायिक उत्पादन वाले पेड़ मनके कटाई के सरलीकरण के प्रक्रिया ले जुड़े अधिसूचना के प्रकासन जल्दीच करे जाही।
कोदो/कुटकी खरीदी
ें प्रदेस म समर्थन मूल्य म कोदो-कुटकी अउ रागी के खरीदी करे जावत हे। अभी तक पच्चीस हजार कुंटल ले जादा कोदो-कुटकी अउ रागी के संग्रहण होगे हवय। एखर बर पन्द्रह फरवरी तक बेरा ल अउ बढ़ा दे गेहे। राज्य शासन डहार ले प्रदेश म मिलेट्स के उपज ल बढ़ावा दे बर मिलेट मिशन सुरू करे गेहे। एमा ए फसल के समर्थन मूल्य म खरीदी करे के संग प्रसंस्करण अउ मार्केटिंग के बेवस्था घलो करे जावत हे।
ऋण वितरण-संगोष्ठी
ें प्रदेस म बैंक मन डहार ले वार्षिक ऋण योजना म बछर दू हजार बाईस-तेईस के दउरान उनतीस हजार एक सौ सौ सत्तर करोड़ रूपिया ले जादा के करजा बाटे जाय के अनुमान हे। नवा रईपुर के नाबार्ड के क्षेत्रीय कार्यालय म राखे गे राज्य ऋण संगोष्ठी म नाबार्ड के मुख्य महाप्रबंधक डॉक्टर डी. रविन्द्र ह ए जानकारी दीन।
संगोष्ठी म मुख्य अतिथि के रूप म गे कृषि मंत्री रविन्द्र चौबे ह ए मउका म सब्बो सहकारी बैंक मन ल अपन-अपन ब्रांच एरिया म कमती ले कमती पांच ठन एटीएम लगाय के आग्रह करीन, जेखर ले किसान मन ह रासि ल जल्दी ले सकय।
मन की बात
ें प्रधानमंत्री नरेन्द्र मोदी सत्ताईस फरवरी के बिहनिया ग्यारह बजे आकाशवाणी म ‘‘मन की बात‘‘ कारीकरम म देस-बिदेस के लोगन ले अपन विचार साझा करही। लोगन नमो ऐप या माई जीओवी ओपन फोरम म अपन विचार साझा कर सकत हे। ओमन ह टोल फ्री नंबर- एक-आठ शून्य-शून्य – एक-एक-सात-आठ शून्य-शून्य म घलो डायल करके हिन्दी अउ अंग्रेजी म प्रधानमंत्री बर अपन संदेस ल रिकार्ड करा सकत हे। ए फोन लाइन चौबीस फरवरी तक खुला रइही।
लोकवाणी
ें मुख्यमंत्री भूपेश बघेल के मासिक रेडियोवार्ता लोकवाणी के छब्बीसवां कड़ी के प्रसारण काली तेरह फरवरी के होही। मुख्यमंत्री ह लोकवाणी म ए बखत ‘‘सुगम उद्योग, व्यापार-उन्नत कारोबार‘‘ म प्रदेशवासी मनले गोठबात करही। लोकवाणी के प्रसारण छत्तीसगढ़ के आकाशवाणी के सबो केंद्र, एफ.एम. रेडियो अउ क्षेत्रीय समाचार चैनल मन ले बीहनिया साढ़े दस बजे ले ग्यारा बजे तक करे जाही।
बातों-बातों-में
सुनइया मन ल बतादन कि प्रादेशिक समाचार एकांश के समसामयिक विषय उपर आधारित कार्यक्रम ‘‘बातों-बातों-में‘‘ म ए बखत जन्मजात ह्दय दोष जागरूकता दिवस म केन्द्रित रइही। जन्मजात ह्दय दोष का होथे, काबर होथे, अउ एखर इलाज कइसे करे जाथे। इही सब बारे म जानकारी हासिल करे बर आकाशवाणी समाचार ह बात करीन, नवा रईपुर के श्री सत्य सांई संजीवनी हॉस्पिटल के बाल ह्दय रोग विभाग के विभागाध्यक्ष डॉक्टर अतुल प्रभु ले। ए भेटवार्ता के प्रसारण आकाशवाणी केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के आकाशवाणी के सब्बो केन्द्र मन ह एके संघरा रिले करही।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा छह बजके तीस मिनट से छह बजके पैंतीस मिनट तक ‘‘जिले की चिट्टी‘‘ कार्यक्रम के प्रसारण करे जाही। जिले के चिट्ठी के ये कार्यक्रम आकाशवाणी के रायपुर केन्द्र डहार ले प्रसारित होही। एला छत्तीसगढ़ के आकाशवाणी के सब्बो केन्द्र मन ह एके संघरा रिले करही। ए बखत के अंक म कबीरधाम के गतिविधि मनके बारे म जानकारी दे जाही।
अउ अब थोरकुन समाचार सार म-
– विश्व रेडियो दिवस के मउका म काली तेरह फरवरी के राजधानी रईपुर के सिविल लाइन के वृंदावन हाल म ओल्ड लिसनर्स गु्रप ऑफ इंडिया डहार ले महान गायिका लता मंगेशकर के श्रद्धांजलि के कारीकरम कराय जाही।
– बलरामपुर जिला के राजपुर क्षेत्र के ग्राम झींगो तीर दू ठन गाड़ी के बीच होय भिडंत म एक झिन माईलोगिन के मउत होगे। फेर, तीन झन दूसर लोगन घायल होगे हे।
अउ
– महासमुंद जिला के कोमाखान थाना क्षेत्र म परकोम मोड़ के तीर एक ठिन चारपहिया गाड़ी के पलटे ले चौबीस झन घायल होगे हे। गंभीर रूप ले घायल छह झन ल महासमुंद जिला अस्पताल रिफर करे गेहे।