दसवीं/बारहवीं परीक्षा
ें छत्तीसगढ़ माध्यमिक शिक्षा मंडल के दसवीं अउ बारहवीं के मुख्य परीक्षा मार्च के पहिली सप्ताह म शुरू होही। दसवीं के परीक्षा तीन मार्च ले अउ बारहवीं के परीक्षा दू मार्च ले होही। बोर्ड परीक्षा बर ए बखत प्रदेश म छै हजार सात सौ सत्यासी परीक्षा केंद्र बनाय गेहे। कोरोना संक्रमण ल देखत ए बछर माध्यमिक शिक्षा मंडल के मुख्य परीक्षा बर मान्यता प्राप्त सबो स्कूल ल परीक्षा केंद्र बनाय गेहे।
खबर के मुताबिक नियमित विद्यार्थी जउन स्कूल म पढ़त हे, उही स्कूल म परीक्षा दीही। उंहें स्वाध्यायी छात्रा मन ह जेन स्कूल ले अपन परीक्षा फार्म भरे हे, ओमन उही स्कूल म परीक्षा म शामिल होही।
कोविड समाचार
ें प्रदेश म कोरोना संक्रमण के मामला म सरलग गिरावट आवत हे, अउ पॉजीटिवीटी दर गिरके तीन प्रतिशत ले कम होगे हे। काली प्रदेश म कोरोना संक्रमण के एक हजार आठ नवा मामला आगू आय हे। उंहें प्रदेश म काली कोरोना संक्रमण ले सात लोगन के मउत होइस।
अभी म नौ हजार आठ सौ संतानवे मरीज के इलाज प्रदेश के आने आने अस्पताल अउ होम आइसोलेशन म चलत हे। इही बीच प्रदेश म कोरोना ले बचाव खातिर अब तक तीन करोड़ पैंसठ लाख सोला हजार ले जादा कोविड रोधी टीका लगाये जा चुके हे। एमा ले दू करोड़ छै लाख चौरासी हजार ले जादा लोगन ल टीका के पहिली डोज अउ एक करोड़ पचपन लाख बीस हजार ले जादा लोगन मन ल दूनो डोज दे जा चुके हे।
पीएम आवास स्वीकृति
ें छत्तीसगढ़ म प्रधानमंत्री आवास योजना – सबके लिए आवास मिशन शहरी के तहत बारा हजार साठ आवास बनाये के स्वीकृति दे गेहे। ये स्वीकृति मुख्य सचिव अमिताभ जैन के अध्यक्षता काली मंत्रालय म होय प्रधानमंत्री आवास योजना शहरी के राज्य स्तरीय स्वीकृति अउ निगरानी समिति के बइठका म दे गीस। बइठका म मुख्य सचिव ह अधिकारी मन ल निर्देश दीन कि जउन हितग्राही ह योजना के तहत पहिली आवास बुक कराय हे, ओमन ल प्राथमिकता के आधार म आवास आवंटित करे जाही।
स्कूल अकादमिक निरीक्षण
ें राज्य म कोरोना संक्रमण के सेती होय लाकडाउन के बाद विद्यार्थी मनके शैक्षणिक स्तर म आये गिरावट म सुधार लाये खातिर अकादमिक निरीक्षण के व्यवस्था लागू करे जाही।
राज्य स्तर ले लेके संकुल स्तर ले एखर निगरानी करे जाही । ए संबंध म काली समग्र शिक्षा डहार ले वेबिनार आयोजित कर अकादमिक निरीक्षण के तकनीकी पहलू के जानकारी दे गीस। स्कूल शिक्षा विभाग के प्रमुख सचिव डॅाक्टर आलोक शुक्ला ह सबो प्रतिभागी मन ल कोरोना काल म लाकडाउन के दउरान शिक्षक मन डहार ले लइका मनके पढ़ई सरलग जारी रखे बर करे गे प्रयास के सराहना करत निरीक्षण म सबो बिंदु उपर सही जानकारी भरे बर जोर दीन ।
शिक्षा विभाग स्थानांतरण आवेदन
ें प्रदेश म स्कूल शिक्षा विभाग म स्वैच्छिक स्थानांतरण चाहने वाला कर्मचारी अउ अधिकारी मन ल अब ऑनलाइन आवेदन करना होही। ये आवेदन एनआईसी डहार ले बनाये गे वेबसाइट के माध्यम ले करे जा सकही। ऑनलाईन आवेदन नही करे के स्थिति म सिर्फ कागज म करे गे आवेदन उपर विचार नइ करे जाही।
स्कूल शिक्षा विभाग डहार ले ए संबंध म आदेश जारी कर दे गेहे। एमा केहे गेहे कि प्रशासनिक स्थानांतरण के एंट्री संचालनालय लोकशिक्षण डहार ले एनआईसी के वेबसाइट म करे जाही अउ ओखर ले निकाले गे प्रिंट ल ही फाइल म लगाके भेजे जाही। बिना वेबसाईट म एंट्री करे कोनो प्रशासनिक स्थानांतरण घलो नइ करे जाय। स्थानांतरण आदेश घलो एनआईसी वेबसाईट के माध्यम ले ही जारी होही। संबंधित कर्मचारी के कार्यमुक्ति अउ नवा जगा म जाइनिंग घलो एनआईसी के वेबसाईट के माध्यम ले ही करे जाही।
माओवादी समाचार
ें बीजापुर जिला के बेदरे थाना क्षेत्र म माओवादी मन ह एक झिन इंजीनियर के अपहरण कर लेहे। अतिरिक्त पुलिस अधीक्षक पंकज शुक्ला ह बताइन कि इंद्रावती नदी म पुल बनाये के काम चलत हे। जेमा काम करइया इंजीनियर ल माओवादी मन ह अगवा कर लीन। ओमन ह बताइन कि जवान अउ माओवादी के बीच फायरिंग होय के सूचना घलो मिले हे।
नेता प्रतिपक्ष आरोप
ें नेता प्रतिपक्ष धरमलाल कौशिक ह आरोप लगाय हे कि प्रदेश म हिंदी माध्यम के स्कूल ल बंद कराये जात हे। जेखर ले पढ़इया लइका मनके भविष्य ह अधर म हे। ओमन कीहिन कि शिक्षा के विस्तार बर प्रदेश म नवा विद्यालय खोले जाना चाही। फेर एला लेके राज्य सरकार के कोनो तियारी नइ हे। श्री कौशिक ह कीहिन कि बछर दू हजार तीन म प्रदेश म कुल इक्कीस हजार बंयासी स्कूल संचालित रीहिस, जेला भाजपा शासन के दउरान बछर दू हजार अठारा तक बढ़ाके साठ हजार सात सौ छब्बीस कर देगे रीहिस।
फेर प्रदेश म जबले कांग्रेस के सरकार बने हे, तब ले नवा स्कूल खोले के बजाय पुराना स्कूल भवन म ही आत्मानंद विद्यालय शुरू करे जात हे। ओमन ह राज्य सरकार उपर आरोप लगाय हे कि ओ स्कूल म पढ़ईया लइका मनके भविष्य के चिंता राज्य के कांग्रेस सरकार ल नइ हे। श्री कौशिक ह कीहिन कि राज्य सरकार ल आत्मानंद स्कूल के संचालन बर नवा भवन बनाना चाही। जेखर ले अध्यापन के काम सुचारू रूप ले चल सकय।
भूमकाल स्मृति दिवस राज्यपाल
ें राज्यपाल अनुसूइया उइके ह काली भूमकाल स्मृति दिवस के मउका म राजभवन म वीर गुण्डाधुर के चित्र म फूलमाला चढ़ाके ओमन ल नमन करीन। ए मउका म ओमन कीहिन कि वीर गुण्डाधुर ह समाज म अपन काम ले जागरूकता लाइन। ओमन अदम्य साहस के प्रतिक हरय अउ अंग्रेज के खिलाफ लड़ई म महत्वपूर्ण भूमिका निभाइन।
राज्यपाल कीहिन कि बछर उन्नीस सौ दस म जननायक वीर गुण्डाधुर े नेतृत्व म बस्त म होय भूमकाल विद्रोह म आदिवासी मन ह अंग्रेज मनले जमके मुकाबला करीन।
उंहें उद्योग मंत्री कवासी लखमा ह काली दंतेवाड़ा जिला के ग्राम पंचायत गढ़मिरी म भूमकाल के महानायक ल सुरता करत ओमन ल श्रद्धांजलि दीन। ए अवसर म ओमन ह सर्व आदिवासी समाज डहार ले आयोजित क्रातिकारी शहीद वीर कवासी रोडापेदा के बलिदान ल सुरता करीन।
रायगढ़ कोर्ट मारपीट
ें रायगढ़ के तहसील कोर्ट म वकील अउ कर्मचारी मनके बीच होय मारपीट के मामला आगू आय हे। घटना के बाद अधिकारी कर्मचारी मन काम ल बंद करके कलेक्टोरेट ले बाहिर निकल गीस अउ कुछ देर बाद जिला भर म काम बंद करे के एलान करत दप्तर म ताला लगाके धरना म बइठ गीन। उंहें वकील मन ह घलो अधिकारी मनके खिलाफ नारेबाजी करीन। घटना ल देखत कोर्ट परिसर म बड़ संख्या म पुलिस बल तैनात कर दे गेहे।
इही बीच अधिकारी अउ कर्मचारी ह चक्रधर नगर थाना म तीन वकील के खिलाफ नामजद अपराध दरज करवाके उंखर गिरप्तारी के मांग करे हे। ए मामला म अपर कलेक्टर आर.ए. कुरूवंशी ह कीहिन कि मामला के जानकारी लेके दोषी म उपर नियमानुसार कार्रवाई करे जाही।
लोकवाणी
ें मुख्यमंत्री भूपेश बघेल के मासिक रेडियोवार्ता लोकवाणी के छब्बीसवां कड़ी के प्रसारण परनदिन तेरा फरवरी के होही। मुख्यमंत्री लोकवाणी म ए बखत सुगम उद्योग, व्यापार उन्नत कारोबार म प्रदेशवासी मनले बातचीत करही। लोकवाणी के प्रसारण छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारा बजे तक करे जाही।
अउ अब थोरकुन समाचार सार म-
– महाअधिवक्ता छत्तीसगढ़ कार्यालय बिलासपुर म सहायक ग्रंथपाल अउ शीघ्रलेखक अंगेजी के पद म भर्ती बर लिखित अउ कौशल परीक्षा सत्ताईस फरवरी के दू पाली म आयोजित करे जाही।
– प्रधानमंत्री गा्रम सड़क योजना म स्टेट क्वालिटी मानिटर्स के इम्पैनलमेंट बर तेईस फरवरी तक आवेदन मंगाय गेहे।
अउ
– प्रदेश के कोंडागांव जिला म सत्ताईस फरवरी के पल्स पोलियो अभियान के तहत शून्य ले पांच बछर के लइका मन ल पोलियो के दवा पिलाय जाही।