कोरोना-मरीज
प्रदेस म आज घलो आने-आने जिला म कतकोन कोरोना संक्रमित मरीज मिले हे। त उहें, एक झिन कोरोना संक्रमित मरीज के अस्पताल म मउत होय के समाचार मिले हे।
राजधानी रईपुर म आज पैंसठ नवा कोरोना पाॅजिटिव मरीज के पुष्टि होय हे। एमा बाराडेरा स्थित सीआरपीएफ कैंप के बत्तीस जवान अउ आरंग स्थित आईटीबीपी कैम्प के आठ जवान के संगेसंग उंखर परिवार के सदस्य घलो सामिल हे।
बालोद जिला म आज कोरोना संक्रमित सात झिन नवा मरीज के पहिचान करे गेहे, जेमा गांव सोहतरा के एक झिन मनखे घलो सामिल हे, जउन ह थोरिक दिन पहिली बेंगलुरू ले लहुटे हे।
उहें, नारायणपुर जिला म आज तीन झिन नवा कोरोना पाॅजिटिव मरीज पाय गेहे, जेमा दू झिन मरीज कंटेनमेंट जोन अउ एक झिन मरीज क्वारेंटाइन सेंटर ले मिले हे।
ऐति, भिलाई इस्पात संयंत्र के दू झिन करमचारी के कोरोना पाॅजिटिव पाय जाय के बाद संयंत्र ह सतर्क होगे हे। संयंत्र प्रसासन ह दिसा-निरदेस के पालन करे बर केहे हे।
उहें, दुरूग जिला म कोरोना संक्रमित तेरह झिन मरीज के पुष्टि होय हे। एमा बीएसएफ के छह झिन जवान सामिल हे।
ओति, धमतरी जिला म दू ठिन अलग-अलग गांव ले दू झिन गाड़ी चलइया मन ह कोरोना पाॅजिटिव पाय गेहे। एमा एक झिन सिलीडीह अउ दूसर मुरागांव के रहइया हरय।
स्वास्थ्य मंत्रालय-सलाह
केन्द्रीय स्वास्थ्य अउ परिवार कल्याण मंत्रालय ह राज्य मन ल सलाह दे हवय कि कोरोना संक्रमण के जांच बर जम्मों थेरेपी के परयोग सिरिफ उही स्वास्थ्य केन्द्र मन म होना चाही, जिहां रोगी मनके बने ढंग ले इलाज हो सकय। भारतीय आयुर्विज्ञान अनुसंधान परिषद अउ अखिल भारतीय आयुर्विज्ञान संस्थान ह आॅक्सीजन थेरेपी, स्टीयोराॅयड अउ बने ढंग ले देखभाल के सिफारिश करे हे। थोरिक बहुत संक्रमण म हाइड्राॅक्सी क्लोरोक्वीन के परयोग करे के सिफारिश करे गेहे। कोरोना संक्रमित अस्सी प्रतिसत रोगी मन ल कमती संक्रमण होवत हे।
नेता प्रतिपक्ष-बयान
छत्तीसगढ़ विधानसभा म नेता प्रतिपक्ष धरमलाल कौशिक ह प्रदेस म कोरोना संक्रमित मरीज मनके सरलग बाढ़त संख्या ल लेके संसो जताय हे। ओमन किहीन कि राज्य सरकार ह अब तक कोनों बने ढंग ले योजना नइ बना पाय हे। ओमन किहीन कि आम लोगन मन ल कोरोना के खिलाफ ऐहतियात बरतना चाही। जेखर ले कोरोना संक्रमण ल खतम करे जा सकय।
नीति आयोग-एटीएल ऐप
नीति आयोग ह अटल नवाचार मिशन के तहत देसभर म स्कूली लइका मन बर एटीएल ऐप विकास माॅडयूल सुरू करे हे। ए ऐप ह मुफत वाले आॅनलाइन पाठ्यक्रम हरय। छह परियोजना ले जुड़े सिक्षण माॅड्यूल अउ आॅनलाईन परामर्स के माध्यम ले पढ़ईया युवा मन ह आने-आने भारतीय भासा म मोबाइल ऐप बनाय बर सीख सकथे।
नीति आयोग के मुख्य कार्यकारी अधिकारी अमिताभ कांत ह किहीन कि भारत ल आत्मनिर्भर बनाय बर प्रधानमंत्री ह लोगन मन ल प्रौद्योगिकी अउ नवाचार के परयोग करे बर आगू आय के बात केहे हे।
मुख्य सचिव-समीक्षा
मुख्य सचिव आर.पी. मंडल ह राज्य सरकार के प्राथमिकता वाले योजना ल बने ढंग ले कार्यरूप म लाय के निरदेस देहे। श्री मंडल ह काली रईपुर म गोधन न्याय योजना, मुख्यमंत्री सुपोषण, वन अधिकार पट्टा वितरण, माॅडल आश्रम छात्रावास, पौधारोपण जइसन योजना के समीक्षा करीन। ए दउरान मुख्य सचिव ह किहीन कि गोधन न्याय योजना बीस जुलाई के हरेली तिहार के मउका म सुरू होवइया हे। गौठान मन म स्व-सहायता समूह मन डहार ले पशुपालक मन ले बने गुणवत्ता वाले गोबर बिसाय जाही। मुख्य सचिव ह मुख्यमंत्री सुपोषण अभियान के समीक्षा करत किहीन कि आंगनबाड़ी केन्द्र मन म मुनगा के संगेसंग आने साग-भाजी अउ फलदार पेड़ लगाय जाय।
वन विभाग-सीड बाॅल
प्रदेस म वन विभाग डहार ले काली फल-सब्जी बीज अउ सीड बाॅल के बोआई करे गीस, जेमा प्रदेस के वन अउ आने क्षेत्र मन म पच्चीस लाख सीट बाॅल के बोआई करे गीस। वन मंत्री मोहम्मद अकबर ह बतईन कि जंगल ल ठीक-ठाक राखे के संगेसंग पर्यावरण अउ हरियाली बर ए कारीकरम जरूरी रिहीस। ए कारीकरम म बेर, जामुन, बेल, सीताफल, करौंदा, लौकी, बरबटी, भिंडी, भाटा अउ मुनगा के बुवाई करे गीस।
सुरक्षा बल-पौधरोपण
देस म आज अर्द्धसैनिक बल मन डहार ले जादा ले जादा पौधरोपण कारीकरम राखे गीस। इही मउका म छत्तीसगढ़ म घलो अर्द्धसैनिक बल मन ह परिसर म पौधरोपण के कारीकरम राखीन। भिलाई स्थित केन्द्रीय औद्योगिक सुरक्षा बल-सीआईएसएफ के परिसर म अधिकारी अउ जवान मन ह करीबन एक हजार पौधा के रोपण करीन। त उहें, सीमा सुरक्षा बल के महानिरीक्षक के संगेसंग आने अधिकारी अउ जवान मन डहार ले घलो पौधरोपण करे गीस।
वाहन-फास्टैग
केन्द्रीय सड़क परिवहन अउ राजमार्ग मंत्रालय ह देस म गाड़ी मनके फिटनेस प्रमाण पत्र जारी करत बेरा फास्टैग ब्यौरा सकेले के फइसला करे हे। मंत्रालय ह ए बारे म राष्ट्रीय सूचना विज्ञान केन्द्र के संगेसंग राज्य अउ केन्द्रसासित प्रदेस मन ल चिट्ठी लिखे हे। फास्टैग ह राष्ट्रीय राजमार्ग टोल प्लाजा उपर कोविड फैले के संभावना ल कम करे म घलो परभावी होही।
राजनांदगांव-श्रद्धांजलि कार्यक्रम
राजनादंगांव जिला के मानपुर म बारह जुलाई दू हजार नौ म होय माओवादी हमला म सहीद जवान मन ल आज श्रद्धांजलि दे गीस। राजनांदगांव पुलिस लाइन म राखे गे श्रद्धांजलि कारीकरम के सहीद जवान मनके परिवार मन ल साल, श्रीफल भेंट करके सम्मानित करे गीस।
आईजी विवेकानंद सिन्हा ह ठाकुर प्यारेलाल चैक म स्थापित सहीद पुलिस अधीक्षक वी.के. चैबे के मूर्ति म माला चढ़ाईन। मानपुर के संगेसंग जिला के जम्मों थाना मन म सहीद मन ल सुरता करत आने-आने कारीकरम राखे गीस।
मौसम
प्रदेस म ए समय मानसून सक्रिय हे। मौसम विभाग ह अवइया चैबीस घंटा के दउरान प्रदेस के कतकोन जघा म हल्का ले मध्यम बरसा होय के संभावना बताय हे। एक ठिन चक्रवाती घेरा पूर्वी बिहार अउ ओखर तीर-तखार म स्थित हे, जेखर असर ले प्रदेस म बरसा होय के संभावना बने हे। अवइया चैबीस घंटा म बस्तर अउ सरगुजा संभाग के कतकोन जघा म जोरदरहा बरसा हो सकथे।
उहें, आज राजधानी रईपुर के संगेसंग प्रदेस के जम्मों संभाग के कतकोन जघा म हल्का ले मध्यम बरसा होईस।
संक्षिप्त समाचार
अउ अब थोरकुन समाचार सार म-
– राज्य सरकार के योजना रोका-छेका अभियान म लापरवाही बरते के सेती नगरीय प्रशासन विभाग ह नगर-निगम रईपुर के दू झिन जोन कमिश्नर मन ल कारण बताओ नोटिस जारी करे हे।
– आम आदमी पार्टी के कार्यकर्ता मन ह चुने गे सिक्षक मनके नियुक्ति अउ जम्मों विभाग मन म खाली पद के भर्ती ल लेके आज नारायणपुर म प्रदर्सन करीन।
– नारायणपुर जिला म चलत एकलव्य आदर्श आवासीय विद्यालय छेरीबेड़ा अउ ओरछा म कक्षा छठवीं म प्रवेस बर परीक्षा सोलह जुलाई के होही।
– दुरूग जिला के भिलाई नगर म वीजा अवधि खतम होय के बाद घलो राहत एक झिन माईलोगिन ल पुलिस ह गिरफ्तार करे हे।
– जांजगीर-चांपा जिला म बलौदा क्षेत्र के भैसतरा अउ डोंगरी गांव म सांप के डसे ले दू झिन लोगन के मउत होगे।
– कबीरधाम जिला के गांव खपरी अउ दशरंगपुर चेक पोस्ट म मुरूम अउ रेती के अवैध उत्खनन के मामला म जिला प्रसासन ह एक ठिन जेसीबी के संगेसंग दू ठिन गाड़ी ल जब्त करे गेहे।
– दुरूग पुलिस कंट्रोल रूम म काली पुलिसकर्मी मनके मानसिक तनाव ल कम करे बर स्पंदन कारीकरम के आयोजन करे गीस।
अउ
– जांजगीर-चांपा जिला म चंद्रपुर पुलिस ह टरक म भरके मवेसी मन ल पश्चिम बंगाल ले जात चार झिन आरोपी मन ल गिरफ्तार करे हे।