राष्ट्रपति पद्म पुरस्कार
राष्ट्रपति रामनाथ कोविंद ह आज राष्ट्रपति भवन म राखे गे एक ठन समारोह म प्रमुख हस्ति मनल बछर दू हजार इक्कीस के पद्म पुरस्कार ले सम्मानित करीन।
ए बछर के सूची म सात पद्म विभूषण, दस पद्म भूषण, अउ एक सौ दू पद्मश्री पुरस्कार शामिल हे। मुर्तिकार सुदर्शन साहू अउ पुरातत्वविद् प्रोफेसर ब्रजवासी लाल अउ दूसर हस्ती मन ल पद्म विभूषण ले सम्मानित करे गीस।
प्रधानमंत्री नरेंद्र मोदी ह पद्म पुरस्कार ले अंलकृत सबो लोगन ल बधाई दीन हे। श्री मोदी ह कीहिन कि ओमन ल खुशी हे कि जमीनी स्तर ले जुड़े लोगन ल जनहित के काम म सुघ्घर प्रयास बर सम्मानित करे जावत हे।
राष्ट्रपति भवन म राखे गे समारोह म आज छत्तीसगढ़ के ख्याति प्राप्त पंथी नर्तक डॅाक्टर राधेश्याम बारले ल घलो बछर दू हजार इक्कीस बर पद्मश्री ले सम्मानित करे गीस।
मुख्यमंत्री भूपेश बघेल ह डॅाक्टर बारले ल फोन म बधाई दीन हे। ओमन अपन संदेश म कीहिन कि डॅाक्टर बारले ह पंथी नृत्य के माध्यम ले बाबा गुरू घासीदास के संदेश ल जन-जन तक पहुंचावत हे। ओमन अपन साधना ले छत्तीसगढ़ अउ देश के मान बढ़ाय हे।
दिशा कमेटी बैठक
मुख्यमंत्री भूपेश बघेल के अगवई म आज रायपुर म राज्य स्तरीय दिशा डेवलपमेंट कोआर्डिनेशन एंड मॉनिटरिंग कमेटी के बइठका होइस। ए बइठका म केंद्र अउ राज्य सरकार के आने आने योजना उपर चर्चा करे गीस। बाद म पत्रकार मनले गोठबात करत मुख्यमंत्री ह कीहिन कि राष्ट्रीय राजमार्ग के काम म तेजी लाये बर राज्य सरकार कोति ले केंद्र सरकार बर प्रस्ताव भेजे जावत हे ।
कोविड टीका
राष्ट्रीय कोविड टीकाकरण अभियान म अभी तक एक सौ नौ करोड़ बारा लाख ले जादा कोविड टीका लगाये गे हवय।
इही बीच प्रदेश म कोरोना संक्रमण के दर म सरलग सुधार होवत हे अउ औसत पॉजीटिवीटी दर शून्य दशमलव एक दू प्रतिशत म आगे हवय। काली राज्य के अठारा ठन जिला म कोविड के कोनो नवा मामला आगू नइ आय हे। उंहें काली कोरोना संक्रमण के छब्बीस नवा मामला आगू आय हे। अभी प्रदेश म दू सौ अड़तीस मरीज मनके इलाज आने आने अस्पताल या होम आइसोलेशन म चलत हे।
मुख्यमंत्री-सी मार्ट
मुख्यमंत्री भूपेश बघेल ह ग्रामीण अर्थव्यवस्था म विकास बर गांव मन म बनाये गे चीज ल शहर के बाजार ले जोड़े के शुरूआत करीन हे। एखर बर गंवई क्षेत्र म बने जीनिस के बने मूल्य तय करे बर अउ एला बाजार देबर शहर मन म आधुनिक शो-रूम जइसे सी-मार्ट बनाये के निर्देश दीन हे। जेखर ले महिला स्व सहायता समूह, शिल्पी, बुनकर, दस्तकार, कुंभकार के संगेसंग दूसर पारंपरिक अउ कुटीर उद्योग मन ल फायदा मिलही।
मुख्यमंत्री ह मुख्य सचिव ल निर्देश दीन हे कि पहिली चरण म सबो जिला मुख्यालय म नगर-निगम क्षेत्र के भीतर आठ ले दस हजार वर्गफुट अउ नगर पालिका क्षेत्र म छै ले आठ हजार वर्गफुट म आधुनिक शो रूम जइसे सी-मार्ट खोले जाये। अभी एखर बर कोनो शासकीय भवन के उपयोग करे के निर्देश श्री बघेल ह दीन हे।
छठ पर्व
देश के आने आने जगा म चार दिन के छठ महापर्व शुरू होगे हे। आज खरना हे, आज के दिन श्रद्धालु मन चावल-गुड़ अउ दूध ले बने खीर संगरा दूसर चीज के संग संझाकुन पूजा करके प्रसाद खाथे। एखर बाद छत्तीस घंटा के निर्जला उपवास शुरू हो जाथे। काली संझाकुन अर्घ दे जाही। उंहें परसों बीरस्पत के दिन निकलत सूरज ल अर्घ देके संग झठ के परब संपन्न हो जाही।
छत्तीसगढ़ म घलो ए तिहार बर गजब उछाह देखे जावत हे। रायपुर संगरा दूसर जिला मनके नदी अउ तरिया मनके किनारे छठ पूजा बर घाट के सफाई होगे हावय। रायपुर के महादेव घाट म घलो एखर बर तियारी कर ले गेहे। फेर कोरोना संक्रमण ल देखत छठ पर्व बर निर्देश जारी करे गेहे। जेखर पालन करना जरूरी होही।
इही बीच मुख्यमंत्री भूपेश बघेल ह लोगन ल छठ महापर्व के बधई दीन हे। अउ राज्य सरकार ह छत्तीसगढ़ म छठ पूजा बर सार्वजनिक अवकाश के घोषणा करे हे।
फिल्म फेस्टिवल
कानूनी जागरूकता उपर आधारित राष्ट्रीय शॉर्ट फिल्म फेस्टिवल अउ समारोह के शुरूआत आज नई दिल्ली म होइस। चार दिन के ये समारोह बारा नवंबर तक चलही। एखर तहत राजधानी रायपुर के दीनदयाल ऑडिटोरियम म घलो कानूनी जागरूकता म आधारित शॉर्ट फिल्म मनके प्रदर्शन करे जाही।
राष्ट्रीय विधिक सेवा प्राधिकरण नई दिल्ली डहार ले चलाये जात पैन इंडिया जागरूकता अउ आउटरीच प्रोग्राम के म राज्य विधिक सेवा प्राधिकरण बिलासपुर अउ जी.पी.आर.एस.एस. रायपुर के तकनीकी सहयोग ले ये कार्यक्रम आयोजित करे जावत हे। एखर उद्देश कानूनी जानकारी ल लोगन तक पहुंचाना हे।
कवर्धा सामुदायिक पुलिसिंग
कबीरधाम जिला के माओवाद प्रभावित क्षेत्र म सामुदायिक पुलिसिंग ल बढ़ावा दे जावत हे। एमा जिला के छत्तीसगढ़ सीमा के आखरी गांव पीपारखुटा म जिला के पुलिस अधीक्षक मोहित गर्ग अउ दूसर पुलिस अधिकारी मन ह ग्रामीण मनले भेंट करीन। ए मउका म सांस्कृतिक कार्यक्रम अउ क्रिकेट स्पर्धा घलो कराये गीस। पुलिस विभाग डहार ले जितइया मन ल पुरस्कार घलो दे गीस। संगेसंग ग्रामवासी मन ल गरम कपड़ा अउ दैनिक जरूरत के सामान घलो दे गीस।
अउ अब थोरकुन समाचार सार म-
– भिलाई इस्पात संयंत्र के मटेरियल रिकवरी डिपार्टमेंट म पाछू रतिहा विस्फोट होय ले इंहा काम करत छै झिन कर्मी मन झुलस गे। जेमा ले एक झनके हालत गंभीर बताये जात हे। घायल मनके इलाज सेक्टर नौ अस्पताल म चलत हे।
– धमतरी के सिहावा रोड के मथुराडीह मोड़ तीर एक झन युवक ल वन्यप्राणी तेंदुआ खाल के तस्करी करत गिरप्तार करे गीस हे।
– जांजगीर-चांपा जिला के चांपा क्षेत्र के सिवनी गांव म धान के फसल म भूरा माहो के बीमारी ले कई झिन किसान मनके फसल खराब होय के समाचार मिले हे। किसान मन ह सरकार ले फसल के क्षतिपूर्ति राशि देके मांग करीन हे।
– कोंडागांव पुलिस ह आने-आने माओवादी गतिविधि म शामिल एक झिन माओवादी ल मर्दापाल थाना क्षेत्र के कोडेनार के जंगल ले गिरप्तार करे हे ।
अउ
– रायगढ़ के जूट मिल चौकी थाना क्षेत्र म पाछू रतिहा एक ठन सड़क हादसा म एक झन युवक के मौत हो गीस।