प्रधानमंत्री-केदारनाथ
प्रधानमंत्री नरेन्द्र मोदी ह किहीन हे कि भारत के सफलता अब जुन्ना मापदंड म आधारित नइ हे। ओमन अपन बात म जोर देवत किहीन कि भारत अपन सेना ल आत्मनिर्भर बनावत हे। आज केदारनाथ म आने-आने विकास परियोजना मनके आधारसिला राखे अउ कुछु-कुछु आने योजना मन ल राष्ट्र ल समर्पित करे के बाद श्री मोदी ह किहीन कि भारतीय दर्शन म मानव कल्याण सबले उपर हवय।
प्रधानमंत्री ह किहीन कि ‘‘एक भारत-श्रेष्ठ भारत‘‘ कारीकरम राष्ट्रीय एकता ल बताथे। ओमन किहीन कि गोवर्धन पूजा के दिन बाबा केदारनाथ के उनला दर्सन के सौभाग्य मिलीस। ए मउका म जनसभा ल संबोधित करत प्रधानमंत्री ह भारत के महान अध्यात्मिक ऋषि परंपरा ल सुरता घलो करीन।
दीपावली-गोवर्धन पूजा
राजधानी रईपुर समेत प्रदेसभर म आज गोवर्धन पूजा अउ अन्नकूट के तिहार बड़ उछाह अउ उमंग के संग मनाय जावत हे। आज के दिन गउ माता के पूजा करके ओला भोग अर्पित करे जाथे। रईपुर के जुन्ना दूधाधारी मठ म घलो अन्नकूट अउ गोवर्धन पूजा के कारीकरम आयोजित करे गीस। प्रदेश के आने जिला मन म घलो अन्नकूट अउ गोवर्धन पूजा के तिहार मनाय जाय के खबर मिल हे।
राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल गौरा-गौरी अउ गोवर्धन पूजा के अपन सुभकामना अउ बधाई दीन हे।
गौठान दिवस
प्रदेस म आज गोवर्धन पूजा के तिहार ल गौठान दिवस के रूप म मनाय जावत हे। मुख्यमंत्री भूपेश बघेल ह अपन रईपुर स्थित निवास म आज बिहनिया अपन पत्नी अउ परिवारवाला मन संग गाय ल खिचड़ी खवा के गोवर्धन के पूजा करके देवारी अउ गोवर्धनपूजा के रस्म अदा करीन। संगेसंग गौरा-गौरी के पूजा-अर्चना कर जम्मों प्रदेसवासी मनके खुसहाली अउ फले-फूले के कामना घलो करीन। ए दउरान पारंपरिक लोक धुन के बीच सुआ अउ राउत नर्तक दल मन ह अपन आकर्षक प्रस्तुति दीन।
एखर पहिली, श्री बघेल ह दुरूग जिला के जंजगिरी गांव म प्रदेसवासी मनके मंगलकामना खातिर सांटा के प्रहार झेले के रस्म घलो पूरा करीन।
ऐति, रईपुर जिला कलेक्टर सौरभ कुमार अउ जिला पंचायत के सीईओ मयंक चतुर्वेदी आज सांकरा, खपरी अउ मोहदी गांव के गौठान म पहुंच के गोवर्धन पूजा म सामिल होईन। जिला के जम्मों गांव मन म आज के दिन ल गौठान दिवस के रूप म मनाय गीस।
ओति, राजनांदगांव जिला म कलेक्टर तारण प्रकाश सिन्हा अउ जिला पंचायत के सीईओ लोकेश चंद्राकर ह ग्राम अंजोरा के गौठान म पारंपरिक तरीका ले गाय ल खिचड़ी खवा के गोवर्धन पूजा करीन।
उपराष्ट्रपति-स्वतंत्रता सेनानी
उपराष्ट्रपति एम. वेंकैया नायडू ह आज देस के युवा मन ले स्वतंत्रता संग्राम सेनानी मनके बलिदान ले प्रेरणा ले खातिर अउ एक सामंजस्यपूर्ण-समावेशी समाज के दिसा म प्रयास करे के आह्वान करीन। श्री नायडू ह विशाखापट्टनम म श्री विश्व विज्ञान विद्या अध्यात्मिका पीठम के पहिली के पुजारी उमर अलीशा उपर एक ठिन पुस्तक विमोचन के मउका म अपन ए विचार राखीन। उपराष्ट्रपति ह किहीन कि राष्ट्रीय प्रगति बर माईलोगिन मनके सशक्तिकरण जरूरी हवय।
शहीद जवान-परिजन मुलाकात
गृह मंत्री ताम्रध्वज साहू अउ दुरूग जिला के ए.डी.जी. अउ एस.एस.पी. ह आज शहीद पुलिस जवान अउ कोरोना वॉरियर्स के घर पहुंच के उंखर परिवार वाला मन संग भेंट करके उंखर मनके हालचाल जानीन। ए मउका म गृह मंत्री ह किहीन कि सहीद जवान मनके बलिदान ल कभू भुलाय नइ जा सकय। पुलिस अधिकारी मन जिला के 31 ठिन शहीद परिवार अउ कोरोना संक्रमण के दउरान अपन जान गंवइया 6 झिन पुलिस जवान मनके परिवार ले भेंट घलो करीन।
ओति, कोंडागांव जिला म पुलिस अधीक्षक सिद्धार्थ तिवारी ह शहीद पुलिस जवान मनके घर म जाके उंखर परिवार वाला मन ले भेंट करके ओमन ल देवारी के सुभकामना दीन।
अमृत महोत्सव-क्विज प्रतियोगिता-छ.ग.
सुनइया मन ल बतादन कि आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे हवय। एमा छत्तीसगढ़ी बुलेटिन सुनइया मन बर आज के सवाल हवय-
छत्तीसगढ़ के राज्य गीत के रचियता कोन हरय ?
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेज सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग ओला प्रादेशिक समाचार एकांश डहार ले ई-प्रमाण पत्र घलो जारी करे जाही।
माओवादी गिरफ्तार
सुकमा जिला म सुरक्षा बल ह 6 झिन इनामी समेत आठ झिन माओवादी मन ल गिरफ्तार करीन हे। जिला के पुलिस अधीक्षक सुनील शर्मा ह बतईन कि कोबरा बटालियन अउ जिला पुलिस बल के संयुक्त टीम चिंतलनार थाना क्षेत्र म सर्चिंग खातिर भेजे गे रिहीस। इही दउरान मोरपल्ली इलाका म आई.ई.डी. लगावत आठ झिन माओवादी मन ल घेराबंदी करके गिरफ्तार करे गीस। एमा ले एक झिन माओवादी उपर 8 लाख रूपिया, दूसर उपर 5 लाख अउ चार झिन आने माओवादी मन उपर 1-1 लाख रूपिया के इनाम घोषित रिहीस। एखर मनके पास ले डेटोनेटर, आई.ई.डी. अउ माओवादी समान मन ल बरामद करे गीस। गिरफ्तार माओवादी मन ल न्यायालय म पेस करे बाद ओमन ल जेल भेज दे गे हवय।
कोविड टीका
छत्तीसगढ़ म कोरोना ले बचाव खातिर अब तक 2 करोड़ 36 लाख 31 हजार ले जादा टीका लगाय जा चुके हे। एमा 1 करोड़ 61 लाख 22 हजार लोगन मन ल पहला टीका अउ 75 लाख 8 हजार ले जादा लोगन मन ल कोविड के दूनों टीका लगाय जा चुके हे।
इही बीच, प्रदेस म कोरोना संक्रमण के दर म सरलग सुधार होवत हे, जेखर ले औसत पॉजिटीविटी दर घटके 0.16 प्रतिशत म आ गे हवय। प्रदेश म काली कोरोना संक्रमण के सिरिफ 8 ठिन नवा मामला आगू आईस हे। अभी के बेरा म 279 मरीज मनके इलाज आने-आने अस्पताल अउ होम आइसोलेशन म चलत हे।
कोरिया-निजात अभियान
कोरिया जिला म पुलिस डहार ले चलाय जावत नशामुक्ति अभियान ‘‘निजात‘‘ ल लेके लोगन मन म बड़ उछाह देखे ल मिलत हे। देवारी के मउका म लोगन मन ह अपन घर के आंगन म बनाय गे रंगोली के जरिया ले नशामुक्ति के संदेस दीन। ए बूता म माईलोगिन अउ लइका मन ह बढ़ उछाह के संग भाग लेवत हे। जिला के पुलिस अधीक्षक संतोष कुमार सिंह ह लोगन मन ले मिलके ए अभियान ‘‘निजात‘‘ ल सफल बनाय के अपील करीन हे।
देवव्रत सिंह-अंतिम संस्कार
जनता कांग्रेस छत्तीसगढ-जे के विधायक अउ पूर्व सांसद देवव्रत सिंह के काली खैरागढ़ म पूरा राजकीय सम्मान के संग अंतिम संस्कार करे गीस। उंखर बेटा आर्यवर्त सिंह ह उनला मुखाग्नि दीन। ए मउका म पूर्व मुख्यमंत्री डॉक्टर रमन सिंह, कृषि मंत्री-रविन्द्र चौबे, आबकारी मंत्री-कवासी लखमा समेत क्षेत्र के जनप्रतिनिधि अउ परमुख लोगन मन उपस्थित रिहीन।
जानबा के मुताबिक देवव्रत सिंह के निधन बीते 3 नवंबर के दिल के दौरा पड़े ले होगे गे रिहीस।
आवव अब सुनथन मौसम के हाल..
प्रदेस म अवइया दिन म न्यूनतम तापमान म गिरावट आय के संभावना हवय, जेखर ले ठंड बाढ़े के आसार दिखत हे।
मौसम विभाग ले मिले जानबा के मुताबिक ए बेरा बंगाल के खाड़ी ले नमी आय के सेती दक्षिण छत्तीसगढ़ म आंसिक रूप ले बादर छाय हे, जेखर ले हवा के दिसा बदले के कारण मौसम म बदलाव होय के संभावना हवय।