डब्ल्यूएचओ-कोवैक्सीन मंजूरी
विस्व स्वास्थ्य संगठन ह भारत बायोटेक के कोविड रोधी टीका को-वैक्सीन के आपात उपयोग के अनुमति दे दे हवय। जी-ट्वेंटी सिखर सम्मेलन म प्रधानमंत्री नरेन्द्र मोदी ह को-वैक्सीन ल विस्व स्वास्थ्य संगठन के मंजूरी दे जाय म बल दे रिहीन। ओमन केहे रिहीन कि भारत ह बछर 2022 तक कोविड के 500 करोड़ वैक्सीन के उत्पादन करही। स्वास्थ्य संठगन के तकनीकी सलाहकार समूह के काली होईस एक बइठका म को-वैक्सीन के आपात उपयोग के सिफारिस करे गीस।
भारत के औषधि नियंत्रक महानिदेसक ले आपात उपयोग खातिर अनुमति वाला वैक्सीन सूची म को-वैक्सीन छठवां वैक्सीन हवय। कोविसील्ड अउ स्पूतनिक-वी के संग राष्टव्यापी टीकाकरण म एखर उपयोग करे जावत हे।
केंद्रीय स्वास्थ्य मंत्री मनसुख मांडविया ह को-वैक्सीन के आपात उपयोग के मंजूरी ल बड़का उपलब्धि बताए हे।
इहीं बीच, राष्टव्यापी टीकारकण अभियान के तहत अब तक देस म 1 अरब 7 करोड़ 66 लाख ले जादा कोविड रोधी टीका लगाए जा चुके हवय। केंद्रीय स्वास्थ्य मंत्रालय ह किहीन हे कि काली 30 लाख 90 हजार ले जादा टीका लगाए गीस।
ऐती, छत्तीसगढ़ के मुख्यमंत्री भूपेश बघेल ह प्रधानमंत्री नरेन्द्र मोदी ल पत्र लिखकर प्रदेश म वैक्सीन अउ सिंरंज के कमी डहार धियान देवाय हे। श्री बघेल ह प्रदेस खातिर 1 करोड़ वैक्सीन डोज के मांग घलो प्रधानमंत्री ले करे हे।
देवव्रत सिंह-निधन
जनता कांग्रेस छतीसगढ-जे के विधायक और पूर्व सांसद देवव्रत सिंह के पाछू रतिहा दिल के दउरा पड़े ले निधन हो गीस। ओमन 52 बछर के रिहीन। श्री सिंह खैरागढ विधानसभा ले 4 घांव विधायक अउ राजनांदगांव लोकसभा ले एक घांव सांसद रिहीन।
मुख्यमंत्री भूपेश बधेल अउ विधानसभा अध्यक्ष डाक्टर चरणदास महंत ह विधायक देवव्रत सिंह के अचानक होईस निधन म दुख जताय हवय। श्री बघेल ह अपन शोक संदेश म किहीन कि छत्तीसगढ ह एक झिन उर्जावान अउ लोकप्रिय जनप्रतिनधि ल गंवा दे हवय। उंखर निधन ले प्रदेश के राजनीति ल बहुत बड़ क्षति पहुंचे हे। मुख्यमंत्री ह देवव्रत सिंह के परिवार वाला मन खातिर अपन संवेदना प्रकट करत दिवंगत आत्मा के शांति के खातिर ईश्वर ले प्रार्थना करिन हे। उहें, विधानसभा अध्यक्ष ह घलो देवव्रत सिंह के निधन म अपन श्रद्धांजलि व्यक्त करत किहीन कि बहुत कम उमर म ओमन ह अपन सरलता-सहजता ले एक अमिट छाप छोड़िन हे।
ऐती, जनता कांग्रेस छत्तीसगढ़ के प्रदेस अध्यक्ष अमित जोगी ह अपन सोक संदेस म किहीन कि देवव्रत सिंह के निधन ले प्रदेस के राजनीति म एक ठिन अधूरापन आ गेहे, जेला आसानी ले नई भरे जा सकय।
ओती, प्रदेस कांग्रेस अध्यक्ष मोहन मरकाम अउ कांग्रेसजन मन ह घलो श्री सिंह ल अपन श्रद्धांजलि अर्पित करीन हे। श्री मरकाम ह किहीन कि श्री सिंह के निधन ले छत्तीसगढ़ ह अपन एक होनहार युवा राजनेता ल गवां दे हवय।
दीपावली
कार्तिक अमावस्या के दिन मनाय जाने वाला दीया के तिहार देवारी आज छत्तीसगढ़ सहित पूरा देसभर म बड़ उछाह के साथ मनाय जावत हे। ए तिहार अंधकार अउ निरासा ल दूर भगा के लोगन मनके जिनगी म सुख, सांति अउ समृद्धि लाय के तिहार हे। देवारी के मउका म आज लोगन मन के घर-बार म दीया अउ बिजली के रंग-बिरंगा झालर मनके रोसनी ह जगमगावत हे। अइसन मान्यता हवय कि लंका म जीत हासिल करे के बाद भगराम राम के अयोध्या पहुंचे के खुसी म लोगन मन दीया बार के उंखर सुवागत करे रिहीन। तेखरे सेती ए खुसी म आज के दिन देवारी तिहार मनाय जाथे।
देवारी के मउका म ए बेरा लोगन मन पूजा बर देवी लक्ष्मी के आकर्षक मूर्ति अउ घर मन ल सजाय के जिनीस घलो खरीदत हवय। समृद्धि के प्रतीक माने जाने वाला धान के बाली ले बने झालर यानि फाता के मांग ए दरी बाजार म जादा रिहीस।
देवारी के मउका म राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह देसवासी मन ल अपन बधाई अउ सुभकामना दीन। उहें, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह घलो प्रदेसवासी मन ल देवारी तिहार के सुभकामना दीन हे।
एनजीटी-निर्देश
राष्टीय हरित अधिकरण-एनजीटी के आदेस के मुताबिक देवारी तिहार के मउका म रतिहा आठ बजे ले दस बजे तक सिरिफ दू घंटा तक ही फटाका फोडे़ जा सकही। जानबा के मुताबिक सिरिफ उहीं फटाका मन ल उपयोग खातिर बेचे जा सकही, जेखर ल अवइया आवाज के स्तर राखे गे सीमा के भीतर होवय।
इहीं बीच, देवारी तिहार के चलत फटाका ले आंखी म लगे चोट के इलाज खातिर आज ले रईपुर म दू दिन के मुफत नेत्र सिविर के आयोजन करे जावत हे। आंखी रोग विसेषज्ञ डाक्टर दिनेश मिश्रा ह बतईन कि ए सिविर काली रात तक चलही। ओमन लोगन मन ले अपील करीन कि फटाका फोड़े के बेरा म सावधानी बरते के संग दूरिया बनाए राखय अउ लइका मन के फटाका फोड़े के बेरा म बड़का लोगन मन संग रहयं।
पैरादान महाअभियान
दुरूग जिला म काली गोवर्धन पूजा ले पंचायत स्तर म पैरादान महाअभियान के सुरूआत होही। ए दारी जनपद स्तर म सबले जादा पैरा इकट्ठा करइया तीन ठिन पंचायत मन ल जिला परसासन घलो सम्मानित करही। दुरूग कलेक्टर डाक्टर सर्वेश्वर नरेन्द्र भूरे ह गांव वाला मन ले जादा ले जादा संख्या म ए अभियान म सामिल होय के अपील करीन हे।
गौठान समिति-राशि
मुख्यमंत्री भूपेस बघेल ह गौठान मन म पसुधन खातिर उंखर मन के चारा पैरा के बेवस्था कर बर गौठान समिति मन ल 40-40 हजार रूपिया के रासि स्वीकृत करे हे। राज्य के 6 हजार दू सौ गौठान मन बर कुल 24 करोड़ 80 लाख रूपिया दे गे हवय। ए रासि ल गौठान समिति, किसान मन डहार ले दान करे गे पैरा के संग्रहण, मजदूरी अउ परिवहन म खर्चा कर सकही।
मनरेगा जॉब कार्ड
प्रदेश म ‘‘महात्मा गांधी राष्ट्रीय ग्रामीण रोजगार गारंटी अधिनियम-मनरेगा’’ के जॉब कार्ड के नवीनीकरण अउ सत्यापन बर 30 नवंबर तक विशेष अभियान चलाये जावत हे। ए संबंध म राज्य मनरेगा आयुक्त मोहम्मद कैसर अब्दुल हक ह सबो कलेक्टर मन ल परिपत्र जारी कर दीन हे। अभियान के दउरान जॉब कार्ड के वैधता के जांच करे के संगेसंग संबंधित जानकारी के सत्यापन घलो करे जाही।
अउ अब थोरकुन समाचार सार म-
– पेटोल अउ डीजल म उत्पाद सुल्क कम करे के केन्द्र सरकार के निर्णय के बाद भारतीय जनता पार्टी अउ एनडीए सासित बहुत अकन राज्य मन ह उपभोक्ता मन ल राहत दे खातिर ईंधन म मूल्य संवर्धित कर-वैट घटाने के घोषणा करे हे।
– छत्तीसगढ़ राज्यगीत ‘‘अरपा पैरी के धार, महानदी के अपार’’ के रचयिता डाक्टर नरेन्द्र देव वर्मा के आज जयंती हरय। ए मउका म मुख्यमंत्री भूपेस बघेल ह ओमन ल नमन करत किहीन कि डाक्टर वर्मा ह छत्तीसगढ़ी भाषा-अस्मिता ल बनाए राखे अउ इहां के संस्कृति ल विसेस पहिचान दिलाए म अपन जरूरी भूमिका निभाए हे।