स्व-सहायता समूह-मदद
केन्द्र सरकार ह किहीन कि अवइया दू बछर म ग्रामीण स्व-सहायता समूह के दू करोड़ पचास लाख महिला मन ल आजीविका बर मदद दे जाही। केन्द्रीय ग्रामीण विकास मंत्रालय ह किहीन कि सरकार ह स्व-सहायता समूह के महिला मन ल एक लाख रूपिया हरेक बछर कमाय योग्य बनाय के पहल के सुरूवात करे हे। मंत्रालय ह किहीन कि वर्तमान म छह हजार सात सौ पचास ले जादा प्रखंड मन ल ए योजना म सामिल करे गेहे। एखरे तहत सात करोड़ सत्तर लाख महिला मन ल सत्तर लाख स्व-सहायता समूह मन ले जोड़े गेहे।
राष्ट्रीय आदिवासी नृत्य महोत्सव
राजधानी रायपुर के साईंस कॉलेज मैदान म चलत राष्ट्रीय आदिवासी नृत्य महोत्सव के आखरी दिन आज पश्चिम बंगाल के संथाली समुदाय के नृत्य ह दर्सक मनके मनमोह लीस। रंग-बिरंगा आकर्षक परिधान पहिने हुए नर्तक दल के लयबद्ध नृत्य ल देख के दर्सक मन जमके सराहीन अउ ताली बजाके उंखर उत्साहवर्धन करीन। उहें, ए महोत्सव म झारखंड के कलाकार मन छाऊ नृत्य के प्रस्तुति दीन। एखर अलावा दमन-दीव के कलाकार मन तारपा नृत्य अउ गायन, महाराष्ट्र के कलाकार मन डहार ले लिंगो नृत्य अउ छत्तीसगढ़ के कलाकार मन डहार ले उरांव कर्मा नृत्य के आकर्षक प्रस्तुति दे गीस।
उहें, मुख्यमंत्री भूपेश बघेल ह राष्ट्रीय आदिवासी नृत्य महोत्सव अउ राज्योत्सव म लगाय गे अलग-अलग स्टॉल मनके निरीक्षण के दउरान नसा मुक्ति के प्रयास ल सराहीन। ओमन किहीन कि समाज कल्याण विभाग डहार ले लोक गीत मनके माध्यम ले नशामुक्ति के जेन संदेस दे जात हे, वो सराहनीय हे।
औद्योगिक नीति
मुख्यमंत्री भूपेश बघेल ह किहीन कि छत्तीसगढ़ के नवा औद्योगिक नीति ह उद्योग जगत के विश्वास अर्जित करे म सफलता पाय हे। रायपुर म आयोजित एक कार्यक्रम ल संबोधित करत हुए ओमन किहीन कि राज्य सरकार के नीति के कारण उद्योगपति मन ल ये विश्वास हे कि प्रदेश म एनपीए के स्थिति नइ बनय।
श्री बघेल ह किहीन कि लॉकडाउन के बावजूद प्रदेश के नवा उद्योग नीति के कारण राज्य म नवा उद्योग मनके स्थापना बर एक सौ बत्तीस एमओयू करे गेहे, जेमा लगभग अंठावन हजार नौ सौ पचास करोड़ रूपिया के निवेश होही। संगेसंग सत्तर हजार ले जादा लोगन मन ल रोजगार के अवसर मिलही। मुख्यमंत्री ह किहीन कि राज्य सरकार प्रदेश म कृषि, वन, उद्योग अउ व्यापार सहित सब्बो क्षेत्र मन ल लगातार बढ़ावा देके काम करत रइहि। ओमन किहीन कि आने वाला समय म छत्तीसगढ़ विकास के गढ़ के रूप म अपन नवा पहिचान बनाही।
चित्र प्रदर्शनी-लोकसंपर्क कार्यक्रम
प्रादेशिक लोकसंपर्क कार्यालय रायपुर डहार ले भिलाई के नेहरू आर्ट गैलेरी म आयोजित तीन दिवसीय चित्र प्रदर्शनी के आज आखिरी दिन कार्यक्रम के सुरूवात ‘‘फिट इंडिया फ्रीडम रन‘‘ से होइस। एमा एक सौ पच्चीस ले जादा छात्र-छात्रा मन अउ एनसीसी कैडेट्स मन भाग लीन। ए दउरान प्रतिभागी मन ह दू किलोमीटर ले जादा के दूरी तय करीन।
उहें, ए चित्र प्रदर्शनी के दूसरइया दिन काली ‘‘मेरे सपनों का भारत‘‘ विषय उपर चित्रकला प्रतियोगिता आयोजित करे गीस। ये प्रतियोगिता म नब्बे छात्र मन अउ एनसीसी कैडेट्स मन भाग लीन। एखर अलावा ‘‘स्वच्छता अभियान से बदलती देश की तस्वीर‘‘ विषय उपर भाषन प्रतियोगिता के आयोजन करे गीस। संगेसंग स्वतंत्रता आंदोलन उपर आधारित प्रश्न मंच के आयोजन घलो करे गीस।
इही बीच, क्षेत्रीय लोकसंपर्क कार्यालय बिलासपुर डहार ले काली इकतीस अक्टूबर के कोरबा जिला म ‘‘एक भारत-श्रेष्ठ भारत‘‘ विषय उपर एक दिवसीय समेकित लोक संपर्क कार्यक्रम के आयोजन करे जाही।
राष्ट्रीय संगोष्ठी
राष्ट्रीय आदिवासी नृत्य महोत्सव के अवसर म ‘‘मूल निवासियों की भाषा और संस्कृति के विविध आयाम तथा आदिवासी समाज की दशा और दिशा‘‘ विषय उपर आयोजित तीन दिवसीय राष्ट्रीय संगोष्ठी के आज समापन होगे। बीते अट्ठाईस अक्टूबर ले रायपुर के शहीद स्मारक भवन म आयोजित ये संगोष्ठी म आदिवासी मनके दशा और दिशा उपर चार सौ इकचालीस पेज के रिपोर्ट प्रस्तुत करे गीस, जेला खाका कमेटी रिपोर्ट केहे गेहे। ये समिति ल आदिवासी मनके समस्या के निराकरण बर बनाय गे रिहीस। संगोष्ठी म अलग-अलग राज्य ले आय शोधार्थी मन घलो आदिवासी, कला, संस्कृति अउ परंपरा के संगेसंग जल, जंगल, जमीन जइसे विषय मन उपर आधारित शोध पत्र प्रस्तुत करीन। संगोष्ठी म लुप्त होवत आदिवासी प्रजाति मन उपर घलो विशेषज्ञ मन अपन-अपन विचार राखीन।
कोरोना टीका
राष्ट्रव्यापी टीकाकरण अभियान के तहत देश म अब तक एक सौ पांच करोड़ उनचास लाख ले जादा कोविड टीका लगाय जा चुके हे।
ऐति, छत्तीसगढ़ म कोरोना ले बचाव बर अब तक दो करोड़ बत्तीस लाख सैंतीस हजार ले जादा टीका लगाय जा चुके हे। एमा एक करोड़ उनसठ लाख इक्यासी हजार ले जादा लोगन मन ल पहलइया टीका अउ बहत्तर लाख छप्पन हजार ले जादा लोगन मन ल कोरोना के दूनों टीका लगाय जा चुके हे।
इही बीच, प्रदेश म कोरोना संक्रमण के दर म लगातार सुधार होवत हे अउ औसत पॉजिटिविटी दर शून्य दशमलव एक-दू प्रतिशत म आ गेहे। प्रदेश म काली कोरोना संक्रमण के अट्ठाईस नवा मामला सामने आय हे।
अमृत महोत्सव-क्विज विजेता-जवाब
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के ग्यारहवां अंक म छत्तीसगढ़ी बुलेटिन म प्रश्न रिहीस- ‘‘स्वतंत्रता के पहली, छत्तीसगढ़ के पहिली मजदूर आंदोलन कोन तत्कालीन रियासत म होय रिहीस। – एखर सही जवाब हे- राजनांदगांव
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – दुर्ग जिला के निवासी प्रकाश गुप्ता। आकाशवाणी परिवार डहार ले हमन ह श्री गुप्ता ल अब्बड़ अकन बधाई अउ सुभाकामना देवत हन। श्री गुप्ता ह आकाशवाणी समाचार के नियमित श्रोता हरय।
बातों-बातों-में
श्रोतागण, वन्यजीव अउ उंखर संरक्षण बर प्रदेश म अलग-अलग स्तर म प्रयास करे जात हे। ए बारे म अउ अधिक जानकारी हासिल करे बर आकाशवाणी समाचार ह बात करीन, प्रदेश के वन्यजीव विशेषज्ञ अउ सतपुड़ा वन्यजीव फाउंडेशन के अध्यक्ष संदीप पौराणिक ले।
ये बातचीत के प्रसारण समसामयिक विषय उपर आधारित हमर साप्ताहिक कार्यक्रम ‘‘बातों-बातों-में‘‘ के तहत काली इकतीस अक्टूबर रविवार के बिहनिया साढ़े नौ बजे आकाशवाणी केन्द्र रायपुर ले करे जाही। एला छत्तीसगढ़ स्थित आकाशवाणी के सब्बो केन्द ्रएक साथ रिले करही।
अउ अब थोरकुन समाचार सार म –
– देश के पूर्व प्रधानमंत्री इंदिरा गांधी अउ प्रथम उप प्रधानमंत्री सरदार वल्लभ भाई पटेल के काली इकतीस अक्टूबर के पुण्यतिथि म मुख्यमंत्री भूपेश बघेल ह ओमन ल नमन करीन हे।
– राज्य के सामान्य प्रशासन विभाग ह छत्तीसगढ़ राज्य स्थापना दिवस एक नवंबर के सब्बो सासकीय भवन ल रोशन करे जाय के निर्देश देहे।
– दुर्ग जिला के पुलिस लाइन म ये बेरा प्रधान आरक्षक अउ आरक्षक मन बर रिफ्रेशर कोर्स संचालित करे जात हे। सात दिवसीय ये कार्यक्रम म पुलिसकर्मी मन ल नसा ले दूर रेहे, रोज व्यायाम करे अउ जनता ले उचित व्यवहार करे के सीख दे जात हे।
अउ
– बीजापुर जिला म एक लाख रूपिया के इनामी माओवादी ह पुलिस के समक्ष आत्मसमर्पण करे हे।