आदिवासी नृत्य महोत्सव
राजधानी रईपुर के साईंस कालेज मैदान म आयोजित राष्ट्रीय आदिवासी नृत्य महोत्सव म आज दूसर दिन पांरपरिक त्यौहार, अनुष्ठान, फसल कटाई अउ आने पारंपरिक विधा उपर आधारित लोकनृत्य प्रतियोगिता कराय गीस। एखर अगाज उत्तराखंड के झींझीहन्ना लोकनृत्य के संग करे गीस। रंग-बिरंगा पारंपरिक वेशभूषा ले सजे-धजे थारू समुदाय के आदिवासी लोक कलाकार मन ह मनमोहक प्रस्तुति दीन। उत्तराखंड म नवा फसल के आगमन म गांव के माईलोगिन मन डहार ले घर-घर जाके ए पारंपरिक नृत्य करे जाथे। संगेसंग पुरूष कलाकार मन डहार ले घलो हन्ना नृत्य प्रस्तुत करे गीस। महोत्सव म छत्तीसगढ़ के प्रतिभागी मन डहार ले कर्मा नृत्य पेश करे गीस। लोक कलाकार मन ह कर्मा नृत्य के माध्यम ले पर्यावरण ल बचाय रखे के संदेस दीन। एखर अलावा महोत्सव म देस के कलाकार मन ह लद्दाख के जबरो, असम के बीहू, मिजोरम के चेराव लाम नृत्य, मध्यप्रदेश के भगोरिया, केरल के वट्टाकली अउ महाराष्ट्र के गादली सुसून लोक नृत्य के प्रस्तुति दीन।
एखर पहिली, आदिवासी नृत्य महोत्सव म काली रतिहा राज्यपाल अनुसुईया उइके ह किहीन कि छत्तीसगढ़ के संग पूरा देस-दुनिया म आदिवासी मनके संस्कृति बहुत समृद्ध हवय। आदिवासी, समृद्ध संस्कृति के वाहक होय के संगेसंग प्रकृति के पूजक घलो हे। उंखर जीवनसैली अउ प्रकृति के बीच एक गहरा सामंजस्य हे। राज्यपाल ह किहीन कि आधुनिक समाज ल कई मायना म आदिवासी मन ले बहुत कुछ सीखे के जरूरत हे।
उहें, राष्ट्रीय आदिवासी नृत्य महोत्सव अउ राज्योत्सव म काली तीसरइया दिन राष्ट्रीय अउ अंतर्राष्ट्रीय कलाकार मन डहार ले आने-आने विधा म आधारित कारीकरम प्रस्तुत करे जाही।
कोविड टीका
राष्ट्रव्यापी टीकाकरण अभियान के अंतर्गत देस म अब तक एक सौ चार करोड़ पच्यासी लाख ले जादा कोविड टीका लगाय गेहे। काली चौहत्तर लाख तैंतीस हजार ले जादा टीका लगाय गीस।
ऐति, छत्तीसगढ़ के दुरूग जिला म कोविड टीकाकरण के लक्ष्य ल पूरा करे के उद्देश्य ले मितानिन मन ह लोगन मनके घर-घर जाके ओमन ल टीका लगवाय बर प्रेरित करत हे। संगेसंग टीका लगवाय ले छूटे मनखे मनके जानकारी घलो इकट्ठा करत हे। जिला टीकाकरण अधिकारी सी.वी.एस. बंजारे ह बतईन कि जिला म इक्कीस ले अट्ठाईस अक्टूबर तक बिसेस टीकाकरण अभियान चलाय गीस। एखर तहत पन्द्रह लाख छब्बीस हजार पात्र लोगन मन ल कोविड के टीका लगाय गीस।
कृषि विवि-नेट परीक्षा
कृषि वैज्ञानिक चयन मंडल नई दिल्ली डहार ले राखे गे राष्ट्रीय पात्रता परीक्षा-नेट दू हजार इक्कीस म इंदिरा गांधी कृषि विश्वविद्यालय रईपुर के दू सौ अंठावन विद्यार्थी मन ह सफलता हासिल करे हे। उहें, विश्वविद्यालय के सोलह विद्यार्थी, कृषि अनुसंधान सेवा भर्ती के लिखित परीक्षा म घलो पास होय हे।
इंदिरा गांधी कृषि विश्वविद्यालय के कुलपति डॉक्टर संजय कुमार पाटील ह जम्मों सफल विद्यार्थी मन ल बधाई अउ सुभकामना दीन हे। ओमन किहीन कि विश्वविद्यालय के इतिहास म पहिली बार ढाई सौ ले जादा विद्यार्थी मन ह नेट परीक्षा क्वालीफाई करके एक ठिन नवा कीर्तिमान स्थापित करे हे।
अमृत महोत्सव-क्विज प्रतियोगिता-छ.ग
आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे। एमा छत्तीसगढ़ी बुलेटिन सुनइया मन बर आज के सवाल हे-
स्वतंत्रता के पहली, छत्तीसगढ़ के पहिली मजदूर आंदोलन कोन तत्कालीन रियासत म होय रिहीस ?
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेज सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग ओला प्रादेशिक समाचार एकांश डहार ले प्रमाण पत्र घलो जारी करे जाही।
खेल स्पर्धा
इक्कीसवां राज्य स्तरीय शालेय क्रीडा प्रतियोगिता आज ले कोंडगांव म सुरू होईस। जिला प्रशासन अउ सिक्षा विभाग डहार ले आयोजित ए तीन दिवसीय प्रतियोगिता म सरगुजा, दुरूग, रईपुर, बस्तर अउ बिलासपुर संभाग के पांच सौ इकचालीस खिलाड़ी भाग लेवत हे। स्पर्धा म तीरंदाजी, क्रिकेट, टेबल टेनिस अउ मलखंभ जइसन खेल आयोजित करे जाही।
क्वांटीफायबल डाटा आयोग
छत्तीसगढ़ क्वांटीफायबल डाटा आयोग के अध्यक्ष सी.एल. पटेल ह काली सर्वेक्षण काम के राज्य स्तरीय समीक्षा करीन। बइठका म बताय गीस कि रईपुर जिला म अवइया चार सौ दो ग्राम पंचायत में से एक सौ इकहत्तर ग्राम पंचायत म सर्वेक्षण के काम पूरा कर ले गेहे। एमा आरंग, तिल्दा, धरसींवा अउ अभनपुर विकासखंड के ग्राम पंचायत सामिल हे। बइठका म जिला नोडल अधिकारी ह बतईन कि सर्वेक्षण के काम काली तीस अक्टूबर तक पूरा कर ले जाही।
बइठका म बताय गीस कि प्रदेस के सबो जिला ले अन्य पिछड़ा वर्ग अउ आर्थिक रूप ले कमजोर वर्ग के व्यक्ति मनके कुल चौरासी लाख उनयासी हजार ले जादा आवेदन मिले हे।
राष्ट्रीय मीडिया अवॉर्ड-नामांकन
भारत निर्वाचन आयोग डहार ले मतदाता जागरूकता के क्षेत्र म उत्कृष्ट कार्य करने वाला मीडिया संस्थान मनके चयन राष्ट्रीय मीडिया अवॉर्ड बर करे जाही। एखर बर संस्था मन ले तीस नवंबर तक आवेदन मंगाय गेहे। इच्छुक मीडिया संस्थान अपन नामांकन सीधा भारत निर्वाचन आयोग, निर्वाचन सदन अशोका रोड नई दिल्ली म जमा कर सकत हे।
छत्तीसगढ़ मुख्य निर्वाचन पदाधिकारी डहार ले मीडिया संस्थान मन ल राष्ट्रीय मीडिया पुरस्कार देके संबंध म जारी पत्र के अनुसार राष्ट्रीय मीडिया सम्मान चार श्रेणी म दे जाही। एमा प्रिंट मीडिया, इलेक्ट्रॉनिक मीडिया, टेलीविजन, रेडियो अउ ऑनलाइन सोसल मीडिया सामिल हे।
अउ अब थोरकुन समाचार सार म –
– छत्तीसगढ़ राज्य स्थापना दिवस के मउका म एक नवंबर के जम्मों शासकीय संस्था अउ कार्यालय मन म छुट्टी घोषित करे गेहे।
– दुरूग जिला म सत्रह पुलिसकर्मी मनके तबादला करे गेहे। एमा दस निरीक्षक, पांच उप निरीक्षक अउ सहायक उप निरीक्षक सामिल हे।
– कोरिया जिला के बैकुंठपुर म पदस्थ उप निरीक्षक दीपेन्द्र सिंह के सव खड़गवां विकासखंड के सोंस गांव तीर गजे नदी ले बरामद करे गेहे। ए उप निरीक्षक पाछु पच्चीस अक्टूबर ले लापता रिहीस।
– कोरिया जिला म बैकुंठपुर तीर चरचा बस्ती रकया मार्ग म सोनहत ले बैकुंठपुर आवत एक यात्री बस अनियंत्रित होके पलट गीस। ए हादसा म नौ व्यक्ति घायल होगे हे। एमा ले एक के हालत गंभीर हवय। घायल मन ल बैकुंठपुर के अस्पताल म भर्ती कराय गेहे।
– जांजगीर-चांपा जिला म पटाखा के अवैध भंडारण करे के मामला म पुलिस ह दो लोगन ल गिरफ्तार करे हे। इंखर तीर ले करीब एक लाख रूपिया कीमत के पटाखा जब्त करे गेहे।
– राजनांदगांव के घुमका थाना क्षेत्र के अंतर्गत सलोनी गांव म पाछु रतिहा अज्ञात लोगन मन ह एक दंपत्ति के हत्या कर दीन। ए दंपत्ति हरियाणा के रहइया रिहीन।
अउ
– टी-ट्वेंटी क्रिकेट मैच म सट्टा खेलाय के आरोप म पुलिस ह दू लोगन ल गिरफ्तार करे हे। एखर तीर ले एक लैपटॉप, मोबाइल सहित करीब पांच हजार रूपिया नगद बरामद करे गेहे।