राष्ट्रीय आदिवासी नृत्य महोत्सव
राजधानी रईपुर म काली ले राष्ट्रीय आदिवासी नृत्य महोत्सव सुरू होही, जउन तीस अक्टूबर तक चलही। ए महोत्सव के सुभारंभ समारोह के माईपहुना झारखंड के मुख्यमंत्री हेमंत सोरेन होही। समारोह काली बिहनिया ग्यारह बजे राजधानी के साईंस कालेज मैदान म राखे जाही। छत्तीसगढ़ के मुख्यमंत्री भूपेश बघेल कारीकरम के अगुवई करही।
काली संझा आठ बजे राष्ट्रीय आदिवासी नृत्य महोत्सव म होवइया कारीकरम के मुख्य अतिथि राज्यपाल अनुसुईया उइके रइही। उहें, उनतीस तारीख के संझा होवइया कारीकरम पंजाब के मुख्यमंत्री एस. चरणजीत सिंह चन्नी माईपहुना के रूप म संघरही।
एखर पहिली, मुख्य सचिव अमिताभ जैन ह आज कार्यक्रम स्थल म पहुंच के तियारी ल देखीन अउ बेवस्था के संबंध म जानकारी लेवत अधिकारी मन ल जरूरी निरदेस दीन। काली ले सुरू होवइया ए महोत्सव के बेरा गाड़ी मनके आय-जाय के बेवस्था यातायात पुलिस कोति ले रद्दा तय करे गेहे।
राष्ट्रीय आदिवासी नृत्य महोत्सव सिराय के अवइया इकतीस अक्टूबर के साईंस कालेज मैदान म ही पूर्व प्रधानमंत्री भारतरत्न इंदिरा गांधी अउ पूर्व उप प्रधानमंत्री लौह पुरूष सरदार वल्लभ भाई पटेल उपर प्रदर्शनी अउ संगोष्ठी राखे जाही।
राज्योत्सव
एक नवंबर के राज्य स्थापना दिवस के मउका म राज्य अलंकरण अउ राज्योत्सव समापन समारोह राखे जाही। ए कारीकरम राजधानी रईपुर के साईंस कालेज मैदान म संझा छह बजे ले होही। ए समारोह के माईपहुना राज्यपाल अनुसुईया उइके होही अउ मुख्यमंत्री भूपेश बघेल समारोह के अगुवई करही।
ए बेरा म एक नवंबर के संस्कृति विभाग कोति ले एसो आने-आने आठ ठिन विधा के विभूति मन ल छत्तीसगढ़ राज्य अलंकरण सम्मान दे जाही।
राज्यपाल-आदिवासी समुदाय
राज्यपाल अनसुईया उइके ह कांकेर जिला के आदिवासी समुदाय ल बतईन कि उंखर गांव ल नारायणपुर जिला म सामिल करे के संबंध म कांकेर जिला प्रशासन कोति ले राज्य सरकार ल चिट्ठी लिखे गेहे। ए जानकारी राज्यपाल ह कांकेर जिला ले पदयात्रा करत काली राजाधानी पहुंचे आदिवासी समूह संग गोठबात के बेरा दीन। ए दल म करीबन दू हजार के संख्या म आदिवासी रिहीन, जउन कांकेर जिला के बंडापार, कोलरपरगना अउ रावघाट क्षेत्र के अंठावन गांव के रहइया हरय। ए प्रतिनिधिमंडल राज्यपाल ले अपन अंठावन ठिन गांव ल कांकेर जिला ले हटा के नारायणपुर जिला म सामिल करे के आग्रह करे बर रईपुर पहुंचे रिहीन। राज्यपाल ह उंखर मांग ल जल्दी पूरा करे के आश्वासन दीन अउ बतईन कि ओमन ल ए पता चलीस कि आदिवासी समुदाय के लोगन पैदल चलके राजधानी पहुंचत हे। त ओमन ए संबंध म कांकेर जिला प्रसासन ले गोठबात करीन। गोठबात के बेरा प्रतिनिधिमंडल ह राज्यपाल ल बतईन कि उंखर क्षेत्र ले कांकेर जिला डेढ़ सौ किलोमीटर दूरिहा पड़थे। उहें, नारायणपुर जिला दस ले बीस किलोमीटर हवय, जेखर ले ओमन ल आय-जाय म परेसानी नइ होही।
एनजीटी-निर्देश
नेशनल ग्रीन ट्रिब्यूनल कोति ले जारी निर्देश के मुताबिक एसो देवारी, छठ गुरूपरब, नवा बछर अउ क्रिसमस के मउका म पटाखा फोड़े के बेरा दू घंटा तय करे गेहे। देवारी परब म रतिहा आठ बजे ले दस बजे तक अउ छठ पूजा म बिहनिया छह ले आठ बजे तक पटाखा फोड़े जा सकही।
जारी निरदेस के मुताबिक हरित पटाखा ही बेच अउ बउरे जा सकही, जेखर आवाज़ तय सीमा के भीतरी होवय। शीरीज पटाखा अउ लड़ी ल बेचे म प्रतिबंध राखे गेहे। ऑनलाइन पटाखा बेचे म प्रतिबंध रइही।
सड़क-डामरीकरण
रद्दा म अवई-जवई ल सुभीता बनाय बर राज्य के गांव-गंवई क्षेत्र म सड़क के डामरीकरण कराय जाही। ए काम लोक निर्माण विभाग कोति ले दू सौ करोड़ रूपिया के लागत ले होही। विभागीय स्तर म एखर तियारी सुरू कर दे गेहे। खबर के मुताबिक मुख्यमंत्री भूपेश बघेल ह लोक निर्माण विभाग ल राज्य के गंवई क्षेत्र म खराब होय रद्दा के सुधार काम पहिली पूरा कराय के निरदेस दे रिहीन।
रेलवे विशेष-रेलगाड़ी
भारतीय रेल ह अवइया तिहार ल देखत अवई-जवई बर बिसेस प्रबंध करे हे। रेलवे ह एसो दुर्गा पूजा ले छठ पूजा के बीच एक सौ दस बिसेस रेलगाड़ी के छह सौ अड़सठ फेरा चलाय हे। रेल मंत्रालय केहे हे कि तिहार म यात्री मनके सुभीता बर सामान्य रेलगाड़ी म डिब्बा के संख्या बढ़ाय गेहे।
इही बीच, रेल यात्री मनके सुभीता म बढ़वार करत रेल प्रसासन डहार ले वास्को द गामा अउ जसीडीह जंक्शन के बीच एक नवा स्पेशल ट्रेन के सुविधा दे जावत हे। ए ट्रेन मड़गांव ले जसीडीह के बीच पांच नवंबर ले अवइया बछर अट्ठाईस जनवरी तक चलही। उहें, विपरीत दिशा म जसीडीह ले मड़गांव के बीच आठ नवंबर ले अवइया बछर इकतीस जनवरी तक चलाय जाही।
आयुष्मान-कार्ड पंजीयन
आयुष्मान भारत योजना के पहिली पारी म जतका हितग्राही मन ह केन्द्र म आयुष्मान कारड बर पंजीयन कराय हे। ए सबो हितग्राही उही केन्द्र ले अपन कारड के जानकारी लेके आयुष्मान कारड मुफत म ले सकत हे। आयुष्मान कारड के दूसर चरण बर पंजीयन के काम अभी च्वाइस सेंटर म करे जावत हे, जउन हितग्राही मन अभी तक पंजीयन नइ कराय हे, ओमन अपन तीर के च्वाइस सेंटर म जाके तीस अक्टूबर तक पंजीयन करा सकत हे।
राष्ट्रीय सांख्यिकी कार्यालय बैठक
नीति नियोजन अउ आने सांख्यिकी आंकड़ा के जरूरत ल पूरा करे बर आने-आने सर्वेक्षण सर्वें के समीक्षा करे राष्ट्रीय सांख्यिकी कार्यालय कोति ले आज रईपुर म एक बइठका राखे गीस। ए बइठका म उप महानिदेशक अउ आंचलिक प्रमुख आर.सी. गौतम मौजूद रिहीन। बइठका के अगुवई राष्ट्रीय सांख्यिकी कार्यालय के अपर महानिदेशक एस.एल. मेनारिया ह करीन।
पीआईबी-सतर्कता जागरूकता सप्ताह
पत्र सूचना कार्यालय-पीआईबी अउ रीजनल आउटरीच ब्यूरो रईपुर कार्यालय म काली ले सतर्कता जागरूकता सप्ताह के आयोजन करे जात हे। काली पहिली दिन दूनों कार्यालय परिसर म अधिकारी अउ करमचारी मन ह भ्रष्टाचार के हटाय बर सत्यनिष्ठा के प्रतिज्ञा लीन।
राजनांदगांव-आत्महत्या
राजनांदगांव जिला के करमतरा गांव म पाछु रतिहा एके परिवार के चार झिन के मउत होगे। बताय जात हे कि लालबाग थाना क्षेत्र के करमतरा गांव म पाछु रतिहा एक मनखे ह अपन घरे म फांसी लगाके आत्महत्या कर लीन। एखर बाद ओखर घर गोसईन ह अपन दूनों लइका संग कुंआ म कूद के खुदकुसी कर लीन। पुलिस ह मामला के जांच सुरू कर देहे। सुरूवाती जांच म आपसी विवाद कारण बताय जात हे।
अउ अब थोरकुन समाचार सार म –
– मुख्यमंत्री भूपेश बघेल ह गांधीवादी विचारक डॉक्टर एस.एन सुब्बाराव के निधन म दुख जतावत श्रद्धांजलि दीन हे।
– राजनांदगांव के मोहारा के शिवनाथ नंदियां के एनीकट म जलभराव कमती होय म नगर निगम ह एनीकट के गेट बंद कर देहे।
अउ
– जांजगीर-चांपा के बलौदा पुलिस ह अवैध रूप ले पटाखा के भंडारण के मामला म दू झिन के खिलाफ कार्रवाई करे हे।