प्रधानमंत्री आयुष्मान भारत
प्रधानमंत्री नरेंद्र मोदी ह उत्तरप्रदेश के वाराणसी म एक ठिन कार्यक्रम म महत्वाकांक्षी प्रधामंत्री आयुष्मान भारत स्वास्थ्य बुनियादी ढांचा मिशन के शुभारंभ करीन। ए मउका म ओमन कीहिन कि ए मिशन ह चौसठ हजार एक सौ अस्सी करोड़ रूपिया के लागत वाले विकास के सबले बड़का योजना म एक हवय।
केंद्र डहार ले चलाये जात ए योजना के उद्देश्य अवइया छै बछर बर देश म शहरी अउ गांव गंवई के क्षेत्र म स्वास्थ्य बुनियादी ढांचा, निगरानी अउ स्वास्थ्य अनुसंधान के क्षेत्र के खाई ल भरना हे। कोनो भी प्रकार के बीमारी ले निपटे बर हेल्थ सिस्टम ल तियार करे जात हे। ए योजना म देश के पांच लाख ले जादा आबादी वाले जम्मों जिला मन म ब्लाक स्तर के अस्पताल म विशेष सुविधा रीही।
ए योजना के उद्देश्य सतरा ठिन नवा सार्वजनिक स्वास्थ्य इकाई ल चलाना अउ हवाई अड्डा, बंदरगाह म तैंतीस सार्वजनिक स्वास्थ्य इकाई मन म सुविधा ल मजबूत करना हे।
स्वच्छ भारत अभियान
केंद्रीय युवा कार्य अउ खेल मंत्री अनुराग ठाकुर ह कीहिन हे कि स्वच्छ भारत अभियान म अब तक देशभर ले पचहत्तर लाख किलोग्राम कचरा उठाय गेहे। एक महीना तक चलइया ए कार्यक्रम ल एक अक्टूबर के शुरू करे गे रीहिस।
नेहरू युवा केंद्र संगठन डहार ले चलाये गे ये कार्यक्रम के अगवई युवा मन ह करीन। एमा देश के सात सौ चौवांलिस जिला मनले छै लाख गांव मन म कचरा हटाये के अभियान चलाये गीस।
कोविड टीका
देश म अब तक एक अरब दू करोड़ इकतीस लाख ले जादा कोविड रोधी टीका लगाये जा चुके हे। एति प्रदेश म कोरोना ले बचाव बर अब तक दो करोड़ चौबीस लाख बंयालिस हजार ले जादा टीका लगाये जा चुके हे।
एति कोरिया जिला के कलेक्टर ह जिला म शत प्रतिशत टीकाकरण पूरा करे के निर्देश देहे।
उंहें प्रदेश के इक्कीस ठिन जिला मन म काली कोरोना संक्रमण के एको मामला नइ आय हे। ए बेरा प्रदेश के सात जिला म कोरोना के एको मरीज नइ हे। काली प्रदेश म बीस नवा कोरोना संक्रमित मरीज मिले हे।
कारीगर शुल्क आदेश
अभी अभी मिले समाचार के मुताबिक इंहे के कारीगर मन ल बढ़ावा देबर राज्य सरकार ह दीपावली के मउका म कुम्हार स्व सहायता समूह अउ छोटे कारीगर मनले कोनो प्रकार के शुल्क नइ लेके फैसला लेहे।
मुख्यमंत्री ह जनता मनले अपील करे हे कि दीवारी त्यौहार म प्रयोग म अवइया जीनिस जिहां तक बने इंहे के कारीगर मनले बनाये गे जीनिस ल खरीदंय।
जल जीवन मिशन
जल जीवन मिशन के तहत एसो के वित्तीय बछर म पच्चीस अक्टूबर तक एक लाख ले जादा गांव के घर मन म पेयजल बर नल कनेक्शन दे गेहे। ए मिशन के तहत प्रदेश म अब तक छै लाख पचास हजार गांव के लोगन मन ल नल कनेक्शन दे जा चुके हे। जल जीवन मिशन के तहत प्रदेश के गांव गंवतरी वाले जगा म हरएक मनखे मन ल रोजे पचपन लीटर साफ पानी दे जात हे।
अमृत महोत्सव प्रश्नोत्तरी
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – भारतीय राष्ट्रीय ध्वज के निर्माता कोन हरय – सुनइया मन अपन उत्तर वाट्सअप नंबर आठ आठ दो छै पांच चार छै दो छै या ई-मेल अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई प्रमाण-पत्र अउ सांकेतिक पुरस्कार दे जाही।
माओवादी मुठभेड़
बीजापुर जिला के सीमा ले लगे तेलंगाना के मुलगू जिला म पुलिस अउ माओवादी मनके बीच मुठभेड़ होय के समाचार मिले हे। ए मुठभेड़ म पुलिस ह तीन झिन माओवादी मन ल मार गिराये हे। मउका ले चार हथियार घलो बरामद करे गेहे।
हमर संवाददाता ले मिले जानबा के मुताबिक बीजापुर जिला के सीमा अउ तेलंगाना के मुलगू जिला के सीमा के बीच माओवादी मनके होय के सूचना मिले के बाद तेलंगाना के ग्रे-हाउंड फोर्स अउ बीजापुर पुलिस ह सर्चिंग म निकले रीहिन। इही दउरान मुठभेड़ होगे। ए मुठभेड़ म तीन झिन माओवादी मारे गीस। पुलिस के मुताबिक बदरू उर्फ कल्लू ह दक्षिण बस्तर संभाग म माओवादी मनके नेता रीहिन। उंहें एक झिन अउ माओवादी कम्मा ह महाराष्ट्र के गढ़चिरौली डिवीजन म सक्रिय रीहिन।
सुरक्षा बल मन ह घटना वाले जगा ले एके-फोर्टी सेवन, एसएलआर, एलएमजी अउ एयर गन बरामद करे हे।
हाथी विचरण
सरगुजा जिला म अंबिकापुर शहर ले सटे गांव मन म हाथी मनके आय के समाचार मिले हे। हमर संवाददाता के मुताबिक शहर सीमा ले सिरिफ पांच किलोमीटर के दूरिहा म गांव लब्जी अउ झुमरपारा थोर म चौबीस ठिन हाथी मन हवय। हाथी मन ह फसल मन ल नुकसान पहुंचावत हे। हाथी मनके आय ले गांव के लोगन मनके संगेसंग अंबिकापुर शहर के बाहरी जगा म रहइया लोगन मन म घलो डर बने हुए हे।
जानबा के मुताबिक वन विभाग कोति ले हाथी के दल ल भगाय के प्रयास करे जात हे। दू दिन पहिली जिला म ए हाथी मन ह एक झिन मनखे ल मार डारे रीहिस।
मालगाड़ी डिरेल
अंबिकापुर के तीर पाछू रतिहा एक ठिन मालगाड़ी ह पटरी ले उतर गे । जानबा के मुताबिक मालगाड़ी के आठ ठिन डब्बा ह पटरी ले उतर गे। ए घटना के सेती ए रद्दा म रेलगाड़ी मनके अवई जवई प्रभावित होय हे। पटरी ल ठीक करे बर अंबिकापुर-जबलपुर एक्सप्रेस ल रद्द कर दे गेहे।
लोकवाणी
मुख्यमंत्री भूपेश बघेल ह लोकवाणी म ए दारी उद्यमिता और जन सशक्तिकरण का छत्तीसगढ़ मॉडल बिसय उपर गोठबा करही। ए बारे म कोनो भी मनखे आकाशवाणी रायपुर के दूरभाष नंबर शून्य सात सात एक दू चार तीन शून्य पांच शून्य एक, पांच शून्य दू अउ पांच शून्य तीन म सत्ताईस ले उन्तीस अक्टूबर तक मंझनियां तीन ले चार बजे के बीच फोन करके अपन सवाल रिकार्ड करा सकत हे।
मुख्यमंत्री के मासिक रेडियो वार्ता लोकवाणी के तेइसवां कड़ी के प्रसारण चौदा नवंबर के होही। एखर प्रसारण छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले करे जाही।