कोरोना टीका
भारत ह राष्ट्रव्यापी टीकाकरण अभियान के तहत सौ करोड़ टीका लगाय के लक्ष्य ल पाय के बाद एक ठन नवा इतिहास रच दीस। केन्द्रीय स्वास्थ्य मंत्रालय ह बतईन कि काली अड़तालीस लाख ले जादा लोगन मन ल कोरोना के टीका लगाय गीस।
ए मउका म प्रधानमंत्री नरेन्द्र मोदी ह सौ करोड़ टीका लगाय म देसवासी मन ल बधाई दीन हे। ओमन डॉक्टर, नर्स के संगेसंग ए अभियान ले जुड़े जम्मों लोगन मनके आभार परकट करीन। अपन ट्वीट संदेस म श्री मोदी ह किहीन कि हमर देस ह आज इतिहास रच दीस। ए जीत ह जम्मों देसवासी मनके हरय।
राष्ट्रपति रामनाथ कोविंद, उप राष्ट्रपति एम. वेकैंया नायडू, गृह मंत्री अमित शाह, रक्षा मंत्री राजनाथ सिंह ह ए टीकाकरण अभियान ले जुड़े जम्मों डॉक्टर अउ स्वास्थ्य कर्मी मनके बड़ई करीन अउ सहरईन।
उहें, केन्द्रीय सूचना अउ प्रसारण मंत्री अनुराग ठाकुर ह वीडियो संदेस के माध्यम ले ए अभियान ले जुड़े जम्मों लोगन मन बधई दीन।
कोरोना टीका-भाजपा
देशव्यापी टीकाकरण अभियान के तहत आज सौ करोड़ टीका लगाय के उपलक्ष्य म प्रदेस भाजपा डहार ले एला बहुत बड़े उपलब्धि बताय हे। राज्य के भारतीय जनता पार्टी के अध्यक्ष विष्णुदेव साय ह अपन बयान म किहीन कि सिरिफ नौ महीना के भीतर सौ करोड़ टीका लगना देस बर एक ठिन बहुत बड़े उपलब्धि हरय। ए मउका म राज्य के पूर्व मुख्यमंत्री डॉक्टर रमन सिंह ह पार्टी के पदाधिकारी मनके संग मंडी परिसर म टीकाकरण केन्द्र म जाके लोगन मनके आभार प्रकट करीन।
प्रधानमंत्री-एम्स
प्रधानमंत्री नरेन्द्र मोदी ह किहीन कि केन्द्र सरकार ह अखिल भारतीय आयुर्विज्ञान संस्थान-एम्स म मरीज मनके संगेसंग उंखर परिवार वाले मनके रेहे के बेवस्था घलो होना चाही। श्री मोदी ह वीडियो कान्फ्रेंस के माध्यम ले एम्स नई दिल्ली के राष्ट्रीय कैंसर संस्थान परिसर म इंफोसिस फाउंडेशन डहार ले बनाय गे विश्राम गृह के उद्घाटन कारीकरम ए बात किहीन।
कलेक्टर कॉन्फ्रेंस
मुख्यमंत्री भूपेश बघेल ह राज्य के जम्मों जिला कलेक्टर मन ले किहीन कि राज्य सरकार के जम्मों योजना मन ल आम जनता के बीच जादा ले जादा लाभ पहुंचाय के जिम्मेवारी जिला प्रसासन के हरय। एखर बर प्रसासन ल जादा ले जादा बुनियादी सुविधा उपर ध्यान राखे बर पड़ही।
श्री बघेल ह रईपुर म राखे गे कलेक्टर्स कान्फ्रेंस के दउरान अधिकारी मन ल संबोधित करत किहीन कि राजस्व प्रशासन के काम ह किसान अउ आम जनता ले जुड़े हवय। एखर सेती जादा धियान ए काम उपर देवय। मुख्यमंत्री ह किहीन कि कोरोना बीमारी ले निपटे खातिर प्रसासन डहार ले बहुत बढ़िया काम करे गेहे। ओमन यहू किहीन कि जिला दंडाधिकारी ह साप्ताहिक समीक्षा के बइठका ले पहिली पुलिस अधीक्षक अउ कार्यपालक दंडाधिकारी के संग कानून व्यवस्था के बने ढंग ले समीक्षा जरूर करय।
बइठका म कृषि मंत्री रविन्द्र चौबे, मुख्य सचिव अमिताभ जैन अउ पुलिस महानिदेसक डी.एम. अवस्थी के संगेसंग राज्य सरकार के बड़का अधिकारी मन ह घलो मौजूद रिहीन।
केन्द्रीय मंत्री-नंदिनी माइंस
केन्द्रीय इस्पात अउ ग्रामीण विकास राज्यमंत्री फग्गन सिंह कुलस्ते ह काली भिलाई स्टील प्लांट के नंदिनी माइंस के दउरा करीन। ए दउरान ओमन ल नंदिनी माइंस म बीएसपी डहार ले करे जात कई विकास काम के बारे म जानकारी दीन। ए मउका म संयंत्र के प्रभारी निदेशक अनिर्बान दासगुप्ता समेत बड़का अधिकारी मन ह मौजूद रिहीन।
मन की बात
प्रधानमंत्री नरेन्द्र मोदी ह ए महीना के चौबीस तारीख के आकाशवाणी ले ‘‘मन की बात‘‘ करीकरम म अपन विचार साझा करही। ए ह मासिक रेडियो कारीकरम के बियासी कड़ी हरय। प्रधानमंत्री ह लोगन मन ले ए कारीकरम खातिर सुझाव दे बर केहे हे। नमो ऐप या माई जीओवी ओपन फोरम म घलो सुझाव भेज सकत हव।
पुलिस स्मृति दिवस
आज पुलिस स्मृति दिवस हरय। देस के प्रति पुलिसकर्मी मन डहार करे गे ईमानदारी अउ बलिदान के सम्मान करे खातिर हरेक बछर एक्कईस अक्टूबर के ए दिन ल पुलिस स्मृति दिवस के रूप म मनाय जाथे। खबर के मुताबिक एक्कईस अक्टूबर ओन्नईस सौ ओनसठ के केन्द्रीय रिजर्व पुलिस बल-सीआरपीएफ के जवान मन ह हॉट स्प्रिंग्स म अपन वीरता के प्रदर्सन करत बलिदान दे रिहीन।
ए मउका म राजधानी रईपुर के माना म छत्तीसगढ़ सशस्त्र बल के चौथा बटालियन के मैदान म एक ठिन बिसेस कारीकरम राखे गीस। ए कारीकरम म राज्यपाल अनुसुईया उइके ह किहीन कि पुलिस के जवान मन ह धरती माता के रक्षा करे खातिर अपन बलिदान दे देथे। ओमन किहीन कि पुलिस जवान मन ह हमर सुरक्षा करथे, तेखर सेती हमन आज अपन घर म सुरक्षित हावन। राज्यपाल ह किहीन कि कोरोना बीमारी के दउरान हमर पुलिस के जवान मन ह अपन फरज ल बहुत अच्छा ढंग ले निभाईस हे। ए दउरान कई झिन पुलिसकर्मी मनके मउत घलो होईस हे। फेर ए जवान मन ह अपन ड्यूटी ल बहुत बढ़िया ढंग ले करीन। सुश्री उइके ह यहू किहीन कि छत्तीसगढ़ के पुलिस टीम डहार ले माओवाद परभावित क्षेत्र मन म सुरक्षा काम के संगेसंग उहां के भटके लोगन मन ल समाज के मुख्यधारा म जोड़े के काम करे जात हे। कारीकरम म राज्यपाल ह सहीद जवान मन ल श्रद्धांजलि देवत उंखर माता-पिता के प्रति अपन सम्मान प्रकट करीन।
ए मउका म मुख्यमंत्री भूपेश बघेल अउ गृह मंत्री ताम्रध्वज साहू ह सहीद होय जवान मनके मूर्ति म फूल-माला चढ़ाके उनला श्रद्धांजलि अर्पित करीन। श्री बघेल ह पुलिस मनके हरेक परकार के मदद करे के आश्वासन दीन। ए कारीकरम ल गृहमंत्री ताम्रध्वज साहू अउ पुलिस महानिदेशक डी.एम. अवस्थी ह घलो संबोधित करीन।
मुख्यमंत्री- नैनीताल भूस्खलन
मुख्यमंत्री भूपेश बघेल ह काली संझा अपन निवास कार्यालय ले उत्तराखंड के नैनीताल म फंसे भिलाई के यात्री मन ले फोन म गोठबात करीन अउ उंखर मनके हालचाल पूछीन। श्री बघेल ह जम्मों यात्री मन ले किहीन कि कोनों चिंता फिकर करे के बात नइ हे। राज्य सरकार डहार ले ओमन ल वापिस लाय के बेवस्था करे जात हे।
एक भारत-श्रेष्ठ भारत
एक भारत-श्रेष्ठ भारत अभियान के तहत पत्र सूचना कार्यालय, अहमदाबाद के अगुवई म आए गुजरात के चार सदस्यीय पत्रकार दल ह काली नवा रईपुर के पुरखौती मुक्तांगन अउ महासमुंद जिला के सिरपुर के भ्रमण करीन। ए दउरान ओमन छत्तीसगढ़ के आदिवासी संस्कृति खान-पान, रहन-सहन अउ रीति-रिवाज के बारे म जानकारी लीन।
अउ अब थोरकुन समाचार सार म –
– सुकमा जिला म राजपेंटा अउ मिलियमपल्ली गांव के बीच जंगल ले सुरक्षा बल के टीम डहार ले दू झिन माओवादी ल गिरफ्तार करे गीस।
– बालोद के सरदार पटेल मैदान म चार दिन ले चलत एक्कईसवां राज्य स्तरीय शालेय खेल प्रतियोगिता ह आज सिरा गे।
– कोरिया जिला के मनेन्द्रगढ़ वनमंडल म करीबन चालीस ठन हाथी के दल ह फसल ल नकसान पहुंचाय हे।
अउ
– आयुष्मान भारत योजना के तहत जउन भी हितग्राही मन ह आयुष्मान कार्ड नइ बनवाय हे, ओमन तीस अक्टूबर तक कोनों भी च्वाइस सेंटर म पंजीयन करा सकत हे।