कोविड टीकाकरण-गीत
पेट्रोलियम मंत्री हरदीप सिंह पुरी अउ केन्द्रीय स्वास्थ्य मंत्री मनसुख मांडविया ह आज भारत म कोविड-नाइंटीन टीकाकरण ले जुड़े एक ठिन गीत ल जारी करीन। एला पद्मश्री कैलाश खेर ह गाय हे। ए मउका म श्री पुरी ह किहीन कि प्रधानमंत्री नरेन्द्र मोदी के कुशल अगुवई म कोविड-नाइंटीन के वैक्सीन के उत्पादन अउ वितरण सफलता पूर्वक करे जावत हे अउ जल्दीच भारत ह सौ करोड़ वैक्सीन के खुराक दे जाय के उपलब्धि ल हासिल कर लीहीं। ओमन किहीन कि ए सिरिफ सरकारी कारीकरम नइ हे, फेर ए ह जन आंदोलन हे।
विस्फोट-जवान घायल
रईपुर रेलवे स्टेशन म आज बिहनिया एक ठन हादसा म केन्द्रीय रिजर्व पुलिस बल-सीआरपीएफ के चार झन जवान मन घायल होगे।
सीआरपीएफ के दू सौ ग्यारहवां बटालियन के कमांडेट संजीव रंजन ह बतईन कि झारसुगुड़ा ले जम्मूतवी जावत स्पेशल ट्रेन ह प्लेटफार्म नंबर दू खड़े रिहीस, जेमा सीआरपीएफ के जवान मन हथियार-कोत लोड करत रिहीन। इही दउरान आर्म्स-एम्मुनिसन ले भरे एक ठन फ्यूज बॉक्स ह जवान के हाथ ले छूट के नीचे गिर गीस, जेखर ले फ्यूज बॉक्स ह ब्लॉस्ट होगे। ए बॉक्स के फटे ले प्रधान आरक्षक चौहान विकास लक्ष्मण ह घायल होगीन, जेला इलाज बर रईपुर के एक ठिन निजी अस्पताल म भर्ती कराय गे हवय अउ बाकी जवान मन प्राथमिक उपचार के बाद भेज दे गेहे। सीआरपीएफ ह ए घटना के जांच बर आदेस दे हवय।
स्वर्णिम विजय मशाल
भारतीय सेना के संग पूरा देस बछर 1971 के युद्ध म भारत के जीत के स्वर्णिम पचासवां वर्षगांठ मनावत हे। ए मउका म निकाले गे चार ठिन विजय मशाल के एक ठन विजय मशाल ह पाछु बारह अक्टूबर के छत्तीसगढ़ पहुंचे हे। ए मशाल ह परन दिन अट्ठारह अक्टूबर के बिलासपुर पहुंचही, जिहां भोजपुरी टोल प्लाजा के तीर मोटर साइकिल रैली निकाल के ए विजय मशाल के स्वागत करे जाही। एखर बाद युद्ध स्मारक अमर जवान चउक म सहीद मनके सम्मान करे जाही अउ जवान मन डहार ले विजय मशाल ल सलामी दे जाही। ए विजय मशाल उन्नीस अक्टूबर के कांकेर अउ धमतरी होवत 1971 के युद्ध म भाग लेवइया नायक मनके घर घलो जाही।
एन.एस.जी.-स्थापना दिवस
राष्ट्रीय सुरक्षा गार्ड आज अपन सैंतीसवां स्थापना दिवस मनावत हे। ए मउका म केन्द्रीय गृहमंत्री अमित शाह ह देस के राष्ट्रीय सुरक्षा गार्ड कर्मी मन ल सुभकामना दीन हे। श्री शाह एक ठिन ट्वीट म किहीन कि एन.एस.जी. सब्बो परकार के आतंकवाद ले निपटे बर विश्व स्तर के प्रसिक्षित बल हवय। ओमन किहीन कि बल ह अपन सिद्धांत, सर्वत्र, सर्वोत्तम, सुरक्षा के पालन करे बर हर समय तियार रहिथे। देस ल एन.एस.जी. उपर गर्व हे।
राज्यपाल-महिला समूह
राज्यपाल अनुसुईया उइके ह अपन बस्तर प्रवास के दउरान आज जगदलपुर अउ चित्रकोट म क्षेत्र के स्व-सहायता समूह के माईलोगिन मन ले भेंट करीन। ए दउरान माईलोगिन मन ह राज्यपाल ल समूह डहार ले बनाय गे तुम्बा अउ मेटल उत्पाद भेंट करीन। राज्यपाल ह माईलोगिन के उंखर उत्पाद ल बनाय के तरीका, कीमत अउ आमदनी के बारे म जानकारी लीन। सुश्री उइके ह अधिकारी मन ल स्व-सहायता समूह के उत्पाद बर बाजार देवाय के घलोक निरदेस दीन।
दुर्घटना-सहायता
मुख्यमंत्री भूपेश बघेल ह जशपुर जिला के पत्थलगांव म होय सड़क हादसा म मृतक गौरव अग्रवाल के परिवार वाला मन ल पचास लाख रूपिया के मुआवजा दे जाय के घोसना करीन हे। उहें, ए मामला म लापरवाही बरते म टीआई संतराम नेताम ल लाइन अटैच अउ एसआई के.के. साहू ल निलंबित कर दे गेहे।
घटना म गंभीर रूप ले घायल चार झिन मरीज मन ल रायगढ़ जिला अस्पताल भेजे गे हवय अउ दूनों आरोपी मन ल गिरफ्तार कर ले गे हवय।
सड़क दुर्घटना
कोंडागांव जिला म काली संझा एक ठिन तेज रफ्तार कार ह अंते-तंते होके पेड़ ले टकरा गे। ए हादसा म दू झिन मनखे के मउत होगे। मिले जानकारी के अनुसार कोंडागांव निवासी ए दूनों युवक मन दसहरा मनाय बर जावत रिहीन। इही दउरान ग्राम बाफना के तीर उंखर कार डगमगा के पेड़ ले टकरा गीस, जेखर ले दूनों युवक के मउकाच म मउत होगे।
उहें, राजनांदगांव जिला के अंबागढ़ चौकी विकासखंड के ग्राम ढाढूटोला के तीर घलो एक ठिन तेज रफ्तार गाड़ी के अंते-तंते होके पलटे ले एमा बइठे छह झिन लोगन घायल होगीन। एमन ल अंबागढ़ चौकी सामुदायिक स्वास्थ्य केन्द्र म भर्ती कराय गे हवय।
विशेष साक्षात्कार
बछर 1971 म होय युद्ध म भारतीय सेना के पाकिस्तान उपर सानदार जीत के ए बखत पचास बछर पूरा होवत हे अउ तेखरे सेती ए बछर ल स्वर्णिम विजय बछर के रूप म मनाय जावत हे। ए युद्ध म बड़े भूमिका निभाने वाला भारतीय वायुसेना के एक अधिकारी विंग कमांडर महावीर ओझा ले आकाशवाणी समाचार ह बात करीस। विंग कमांडर ओझा सोलह दिसंबर 1971 के पाकिस्तानी कमांडर डहार ले भारत के सैन्य कमांडर के आगू करे गे आत्मसमर्पण के साक्षा घलो रेहे। हे।
ए बातचीत के प्रसारण समसामयिक विषय उपर आधारित हमर साप्ताहिक कारीकरम ‘‘बातों-बातों में‘‘ म काली सत्रह अक्टूबर इतवार के बिहनिया साढ़े नौ बजे आकाशवाणी केन्द्र रईपुर ले करे जाही, जेला छत्तीसगढ़ के सब्बो केन्द्र मन ह एके संघरा रिले करही।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के दसवां अंक म छत्तीसगढ़ी बुलेटिन म प्रश्न रिहीस- ‘‘असहयोग आंदोलन के दउरान पंडित सुंदरलाल शर्मा ह छत्तीसगढ़ के कोन नगर म सत्याग्रह आश्रम के स्थापना करे रिहीन ?‘‘ एखर सही जवाब हे- रईपुर ।
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – बालोद जिला के ग्राम- बंगला मटिया निवासी शिव कुमार अंगारे। आकाशवाणी परिवार डहार ले हमन ह श्री अंगारे ल अब्बड़ अकन बधाई अउ सुभाकामना देवत हन। श्री अंगारे ह आकाशवाणी समाचार के नियमित श्रोता हरय।
मौसम
अवइया चौबीस घंटा के दउरान प्रदेस म कुछेक जघा म हल्का ले मध्यम बरसा होय के संभावना हे। उहें, एक-दू जघा म गरज-चमक के संग आकशीय बिजली गिरे के चेतावनी घलो दे गे हवय।
मौसम विभाग के अनुसार उत्तर तटीय आंध्रप्रदेश, दक्षिण तटीय ओड़िशा अउ पश्चिम मध्य बंगाल के खाड़ी के उपर एक ठिन निम्नदाब के क्षेत्र बने हे। एखरे संग उपरी हवा के चक्रवाती घेरा घलो बने हे, जेखर परभाव छत्तीसगढ़ म घलो देखे जावत हे। आज बिहनिया जगदलपुर संघरा बस्तर जिला के कुछेक जगह म हल्का ले मध्यम बरसा होईस।