कोरोना टीका-समाचार
देस ह कोविड रोधी टीकाकरण म जल्दीच 100 करोड़ के आंकड़ा ल पूरा कर लीही। अब तक देसभर म 96 करोड़ 82 लाख ले अधिक कोविड रोधी टीका लगाय जा चुके हे।
इही बीच, नीति आयोग के सदस्य डॉक्टर वी.के. पॉल ह आकाशवाणी ले बिसेस गोठबात करत किहीन कि कोरोना महामारी ले बचाव खातिर टीकाकरण बहुतेच जरूरी हे। डॉक्टर पॉल ह तिहार मन म कोविड संक्रमण बाढ़े के आसंका ल देखत लोगन मन ले अपन-अपन घर म रहि के तिहार मनाय के अपील करीन हे।
उहें, राष्ट्रीय टीकाकरण तकनीकी सलाहकार समूह के प्रमुख डॉक्टर एन.के. अरोड़ा ह लइका मनके टीकाकरण के बात म किहीन कि आने प्रकार के कोनों बीमारी ले ग्रसित लइका मन खातिर अवइया 4 ले 6 हफ्ता म टीकाकरण के सुरूवात हो जाही।
ऐति, छत्तीसगढ़ म कोरोना संक्रमण ले बचाव खातिर अब तक 2 करोड़ 6 लाख ले जादा टीका लगा दे गे हवय। एमा ले 01 करोड़ 44 लाख 44 हजार ले जादा लोगन मन ल पहली टीका अउ 61 लाख 56 हजार ले जादा लोगन मन ल कोविड के दूनों टीका लगाय जा चुके हे।
इही बीच, प्रदेस म कोविड संक्रमण के दर म सरलग सुधार होवत हे अउ औसत पॉजिटीविटी दर घटके 0.14 प्रतिशत म आ गे हवय। राज्य के पांच जिला – कबीरधाम, महासमुंद, गौरेला-पेण्ड्रा-मरवाही, कोरिया अउ नारायणपुर म अभी के बेरा म कोविड के एको ठिन नवा मामला सक्रिय नइ हवय। प्रदेस म काली कोरोना संक्रमण के 28 ठिन नवा मामला आगू आय हे। अभी के बेरा म प्रदेस के आने-आने अस्पताल अउ होम आइसोलेशन म 207 मरीज मनके इलाज चलत हवय।
स्वर्णिम विजय मशाल
स्वर्णिम विजय वर्ष के मउका म निकाले जावत विजय मशाल ल आज रईपुर म बछर 1971 के युद्धनायक मनके घर मन म ले जाय गीस।
सबले पहिली आज ए विजय मशाल ल विंग कमांडर महाबीर ओझा के निवास स्थान म ले जाय गीस। जउन ह 1971 के भारत-पाक युद्ध के बेरा म फारवर्ड एयर कंट्रोलर रिहीन अउ ओमन भारतीय वायुसेना के युद्धक विमान मनके मार्गदर्शन करके दुश्मन के सेना ल तबाह करे म बड़का भूमिका निभाय रिहीन।
एखर अलावा आज राजधानी रईपुर के दीनदयाल उपाध्याय ऑडिटोरियम म मिलिट्री बैंड डहार ले प्रस्तुति घलो दे जावत हे।
काली स्वर्णिम विजय बछर के मउका म एक ठिन मोटरसाइकिल रैली घलो निकाले जाही, जउन ह नवा रईपुर स्थित आर्मी कैम्प ले सुरू होके घड़ी चौक, जयस्तंभ चौक, टाटीबंध होवत भिलाई जाही अउ फेर उहां ले वापस आही। एखर अलावा काली ए विजय मशाल ल बछर 1971 के युद्ध म सहीद होय जवान मनके परिजन के घर घलो ले जाय जाही।
स्वच्छ भारत अभियान
केन्द्रीय युवा मामला अउ खेल मंत्री अनुराग सिंह ठाकुर ह किहीन हे कि स्वच्छ भारत अभियान के माध्यम ले अब तक देसभर म 40 लाख किलोग्राम ले अधिक कचरा इकट्ठा करे जा चुके हे। कचरा ल साफ करे खातिर महीनाभर चलइया ए देसव्यापी स्वच्छ भारत अभियान ल ए महीना के पहिली तारीख म सुरू करे गे रिहीस। ए अभियान नेहरू युवा केन्द्र संगठन के माध्यम ले देसभर के 744 जिला मनके 6 लाख गांव के युवा मन डहार ले करे जावत हे।
महानवमी/दशहरा
महानवमी के परब आज छत्तीसगढ़ समेत जम्मों देसभर म श्रद्धा अउ उल्लास ले मनाय जावत हे। नवरात्र पर्व के नौवां दिन ल महानवमी के रूप म मनाय जाथे। ए दिन दुर्गा देवी के महिषासुर मर्दनी अवतार के पूजा-अर्चना करे जाथे, जउन ह बुराई म अच्छाई के प्रतीक हवय। ए दिन मां सिद्धिदात्री ल घलो समर्पित हवय।
महानवमी म आज ले प्रदेस के आने-आने देवी मंदिर मन म प्रज्जवलित ज्योति कलश अउ जवारा के विसर्जन सुरू होगे हवय। संगेसंग सार्वजनिक समिति डहार ले स्थापित मां अम्बे के मूर्ति मनके विसर्जन घलो करे जावत हे। ऐति, कबीरधाम जिला म हर बछर के जइसन ए बछर घलो प्राचीन परंपरा के मुताबिक मंदिर मन ले खप्पर घलो निकाले गीस।
इही बीच, काली विजयादशमी के पर्व धार्मिक उछाह के संग मनाय जाही। ए दउरान कोविड प्रोटोकाल के दिसा-निरदेस मनके पालन करत दसहरा उत्सव समिति डहार ले राजधानी रईपुर समेत आने-आने जगह मन म रावण के पुतला जलाय जाही। रावण के पुतला मनके ऊंचाई दस फीट ले अधिक नइ होही। दसहरा पर्व समिति मनके पदाधिकारी मन ले केहे गेहे कि आयोजन स्थल म अवइया-जवइया मनखे मनके नाव अउ पता रजिस्टर म दर्ज करय। पुतला दहन वाला स्थान म सांस्कृतिक कारीकरम, बाजार-मेला, प्रसाद वितरण अउ पंडाल लगाय के अनुमति नइ दे गे हवय।
राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डॉक्टर चरणदास महंत ह जम्मों प्रदेसवासी मन ल विजयादशमी परब के अपन बधाई अउ सुभकामना दीन हे।
बस्तर दशहरा
75 दिन तक चलइया विश्व प्रसिद्ध अउ ऐतिहासिक बस्तर दशहरा म आज जोगी उठाई अउ मावली परघाव रस्म संपन्न करे जावत हे। ए रस्म म माई के डोली अउ छत्र के स्वागत, राजपरिवार के सदस्य, राजगुरू अउ दंतेश्वरी मंदिर के पुजारी मन करही। एखर बाद छत्र ल दंतेश्वरी मंदिर लाय जाही।
एखर पहिली, काली बीच रतिहा के बस्तर दसहरा म निशा जात्रा पूजा विधान के रस्म पूरा करे गीस।
टेकाम-व्यावसायिक शिक्षा
स्कूल शिक्षा मंत्री डॉक्टर प्रेमसाय सिंह टेकाम ह काली रईपुर जिला के अटारी गांव के शासकीय हायर सेकेंडरी स्कूल म व्यावसायिक सिक्षा के उद्घाटन करीन। ए स्कूल म अब ले कक्षा ग्यारहवीं म पढ़ईया लइका मन खातिर उंखर मनके स्कूली पढ़ई के संगेसंग अब आई.टी.आई. के जरिया ले रोजगार के सिक्षा घलो दे जाही। अटारी के लइका मन ल नजदीक के आई.टी.आई. प्रशिक्षण केन्द्र म प्रवेस दिलाय गे हवय, जिहां ‘‘स्मार्ट हेल्थ केयर‘‘ अउ ‘सोलर पैनल इलेक्ट्रॉनिक्स‘ ट्रेड म लइका मन ल प्रसिक्षण दे जाही। ए मउका म स्कूल सिक्षा मंत्री ह किहीन कि राज्य के जम्मों विकासखंड म एक ठिन हायर सेकेंडरी स्कूल ल औद्योगिक प्रशिक्षण केन्द्र ले जोड़े जावत हे।
अउ अब थोरकुन समाचार सार म –
– पूर्व राष्ट्रपति अउ महान वैज्ञानिक भारत रत्न डॉक्टर ए.पी.जे. अब्दुल कलाम के काली जयंती हवय। ए मउका म मुख्यमंत्री भूपेश बघेल ह उंखर व्यक्तित्व अउ कृतित्व के सुरता करत किहीन कि डॉक्टर कलाम के पूरा जीवन राष्ट्र सेवा खातिर समर्पित रिहीस हे।
– आज विश्व दृष्टि दिवस हवय। ए मउका म राजधानी रईपुर के मरीन ड्राईव म सहायक नेत्र अधिकारी अउ डॉक्टर मनके मौजूदगी म जागरूकता रैली निकाले गीस।
– मुख्यमंत्री भूपेश बघेल के अध्यक्षता म 21 अक्टूबर के कलेक्टर मनके अउ 22 अक्टूबर के पुलिस महानिरीक्षक अउ पुलिस अधीक्षक मनके कॉन्फ्रेंस रईपुर के न्यू सर्किट हाउस म आयोजित करे जाही।
– छत्तीसगढ़ माध्यमिक सिक्षा मंडल डहार ले चलत सैक्षणिक सत्र म हाईस्कूल अउ हायर सेकेंडरी मुख्य परीक्षा खातिर नियमित विद्यार्थी 550 रूपिया विलंब सुल्क के संग 20 अक्टूबर तक आवेदन कर सकत हे।
– रईपुर स्थित इंदिरा गांधी राष्ट्रीय मुक्त विश्वविद्यालय-इग्नू म स्नातक, स्नातकोत्तर कोर्स खातिर ऑनलाइन पंजीयन करे के तारीख 11 ले बढ़ाके 25 अक्टूबर कर दे गे हवय।
– महासमुंद जिला के ग्राम बरोंडा बाजार स्थित बाल संप्रेषण गृह ले नौ झिन लइका मन ह फरार होगे हवय। पुलिस ह ए लइका मनके तलाश म जुट गे हवय।
अउ
– रईपुर पुलिस ह 6 किलो गांजा के संग एक झिन आरोपी ल गिरफ्तार करे हे। जब्त करे गे गांजा के कीमत 40 हजार रूपिया बताय जावत हे।