इंदिरा गांधी कृषि वि.वि.
मुख्यमंत्री भूपेश बघेल ह आज इंदिरा गांधी कृषि विश्वविद्यालय के अंतर्गत लगभग तीस करोड़ रूपिया के लागत ले बने भवन अउ दूसर अधोसंरचना के लोकार्पण करीन।
एमा विश्वविद्यालय परिसर स्थित नवा बने कृषि विज्ञान केंद्र भवन, अक्ती जैव विविधता संग्रहालय, नवनिर्मित नॉलेज सेंटर भवन, रिकॉर्डिंग स्टूडियो अउ फाइटोसेनेटरी प्रयोगशाला के लोकार्पण शामिल हरय। एखरे संग वचुअर्ल रूप म उद्यानिकी महाविद्यालय जगदलपुर अउ कृषि महाविद्यालय रायगढ़ के नवा बने भवन, बालक छात्रावास, कन्या छात्रावास भवन अउ सोला कृषि महाविद्यालय म बने ई-क्लासरूम के घलो लोकार्पण करीन।
ए मउका म ओमन धान, करायत, सोयाबीन, मक्का अउ रसभरी समेत आठ फसल मनके उन्नत प्रजाति के बीजा के संगेसंग विश्वविद्यालय डहार ले विकसित करे गे चांवल म प्रोटीन अउ ग्लूकोज ल अलग करे के तकनीक के लोकार्पण करीन।
कोरोना टीका/समाचार
प्रदेश म कोविड के सक्रिय मामला के संख्या सरलग कम होवत हे। प्रदेश के सात ठिन जिला बालोद, कबीरधाम, गौरेला-पेण्ड्रा-मरवाही, सरगुजा, बलरामपुर रामानुजगंज, नारायणपुर अउ बीजापुर म अभी कोरोना के एको मामला आगू नइ आय हे। वर्तमान म राज्य म दू सौ पंद्रह मरीज मनके आने-आने अस्पताल या होम आइसोलेशन म इलाज चलत हे। ए समय प्रदेश के औसत पॉजीटिवीटी दर शून्य दशमलव एक दू प्रतिशत हरय। काली प्रदेश म कोरोना संक्रमण के चौबीस ठिन नवा मामला आगू आइस हे। राज्य के अठारा जिला मन म काली कोरोना संक्रमण के कोनो नवा मामला नइ मिलिस ।
राज्य म कोरोना ले बचाव खातिर अब तक एक करोड़ अंठानबे लाख तिहत्तर हजार ले जादा कोविड के टीका लगाये जा चुके हे । प्रदेश म एक करोड़ इकतालिस लाख अठारा हजार ले जादा लोगन मन ल पहिली टीका अउ संतावन लाख पचपन हजार ले जादा मनखे मन ल दूनों टीका लगाये जा चुके हे।
एति कोविड के तीसरा लहर के आशंका ल देखत दुर्ग जिला के सामुदायिक स्वास्थ्य केंद्र अहिवारा म लोक स्वाथ्य यांत्रिकी मंत्री गुरू रूद्र कुमार ह लईका मन बर दस ठिन बिस्तर वाला वार्ड के शुभारंभ करीन। संगेसंग ओमन अहिवारा विधानसभा क्षेत्र बर एंबुलेंस सेवा के घलो शुरूआत करीन।
कोरोना अनुग्रह राशि
कोविड के कारण मृत व्यक्ति मनके परिजन अउ आश्रित मन ल राज्य आपदा मोचन निधि के तहत पचास हजार रूपिया के अनुग्रह राशि दे जाही।
ए संबंध म राज्य सरकार डहार ले दिशा-निर्देश जारी करे गेहे। अनुग्रह राशि बर कोविड ले मृत मनखे मनके परिजन अउ आश्रित मन ल निर्धारित प्रारूप म संबंधित तहसील कार्यालय म पंद्रह अक्टूबर तक आवेदन जमा करना होही। आवेदन के संग, आधार कार्ड के छायाप्रति, बैंक पासबुक के छायाप्रति अउ डेथ अर्सेट्रनिंग कमेटी- सीडीएसी समिति डहार ले जारी प्रमाण पत्र घलो संलग्न करना होही।
सीडीएसी प्रमाण पत्र मुख्य चिकित्सा अउ स्वास्थ्य अधिकारी कार्यालय म आवेदन देके बनाये जा सकथे। जारी दिशा-निर्देश के अनुसार निर्धारित प्रमाण पत्र समेत आवेदन प्राप्त होय के तीस दिन के अवधि म अनुग्रह सहायता राशि के भुगतान करे जाही।
पीएससी परीक्षा
छत्तीसगढ़ लोक सेवा आयोग -पीएससी डहार ले छब्बीस नवंबर दू हजार बीस म एक सौ पचहत्तर पद बर लेगे मुख्य परीक्षा के परिणाम के आधार म पांच सौ बाईस अभ्यर्थी मन ल साक्षात्कार बर चुने गेहे। चयनित अभ्यर्थी मनके साक्षात्कार इक्कीस अक्टूबर ले आयोजित करे जाही।
बतादन कि फरवरी म राखे गे राज्य सेवा प्रारंभिक परीक्षा दू हजार बीस के परिणाम के आधार म दू हजार सात सौ तिरसठ अभ्यर्थी मनके चयन मुख्य परीक्षा बर करे गीस। एखर लिखित परीक्षा छब्बीस ले उनतीस जुलाई दू हजार इक्कीस के आयोजित करे गे रीहिस।
उंहें संघ लोक सेवा आयोग नई दिल्ली डहार ले आयोजित सिविल सर्विस प्रारंभिक परीक्षा दू हजार इक्कीस अवइया दस अक्टूबर के दू पाली म राखे जाही। परीक्षा बर रायपुर जिला म उनतालीस ठिन केंद्र बनाये गेहे।
कवर्धा शांति मार्च
मुख्यमंत्री भूपेश बघेल ह आज रायपुर स्थित अपन निवास कार्यालय म उच्च स्तरीय बइठका म कवर्धा के कानून अउ बेवस्था के स्थ्ति के समीक्षा करीन। बइठका म गृहमंत्री ताम्रध्वज साहू, वनमंत्री मोहम्मद अकबर अउ पुलिस महानिदेशक डी.एम. अवस्थी, रायपुर रेंज के पुलिस महानिरीक्षक आनंद छाबड़ा शामिल होइन। एखर अलावा वीडियो कॉन्फ्रेसिंग के माध्यम ले कवर्धा जिला के प्रभारी मंत्री टी.एस. सिंहदेव, दुर्ग रेंज के पुलिस महानिरीक्षक विवकानंद सिन्हा, कवर्धा के कलेक्टर रमेश कुमार शर्मा अउ पुलिस अधीक्षक मोहित गर्ग शामिल होइन।
इही बीच कवर्धा शहर म शांति बेवस्था फेर स्थापित करे बर आज सर्व समाज प्रमुख, जिला प्रशासन, व्यापारी संगठन अउ जन प्रतिनिधि के उपस्थिति म शांति रैली निकाले गीस। ए दउरान लोगन मनले शांति बेवस्था अउ सद्भावना बनाये राखे के अपील करे गीस। एखर पहिली कलेक्टर के अध्यक्षता म काली पुलिस अधीक्षक, नगर पालिका अध्यक्ष अउ सर्व समाज प्रमुख मनके बइठका होइस।
इही बीच पुलिस ह कई झन लोगन मनके खिलाफ मामला दर्ज करे गीस। एमा राजनांदगांव, कवर्धा, लोकसभा क्षेत्र के सांसद संतोष पांडेय, पूर्व सांसद अभिषेक सिंह, समेत भाजपा अउ विश्व हिंदू परिषद के चौदा मनखे मनके नाव शामिल हे।
खबर के मुताबिक ए मामला म उनसठ लोगन मनके गिरप्तारी होय रीहिस, जेमा बलवा समेत कई ठिन धारा लगाए गे रीहिस।
एति भारतीय जनता पार्टी के प्रतिनिधि मंडल ह राज्यपाल ले मिलके कवर्धा मामला म पार्टी कार्यकर्ता मनके खिलाफ एफआईआर दर्ज करे के विरोध करत ज्ञापन सौंपीन।
अमृत महोत्सव-क्विज प्रतियोगिता-छ.ग.
देश के आजादी के पचहत्तर बछर पूरा होय के मउका म आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
बछर 1876 के आदिवासी विद्रोह के बेरा बस्तर रियासत के राजा कौन रीहिन।
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेज सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग ओला प्रादेशिक समाचार एकांश डहार ले प्रमाण पत्र घलो जारी करे जाही।
अउ अब थोरकुन समाचार सार म –
– जशपुर जिला के स्वामी आत्मानंद उत्कृष्ट अंग्रेजी विद्यालय मन बर शिक्षक मनके भर्ती प्रक्रिया म अनियमितता पाये जाये के सेती राज्य सरकार ह जिला शिक्षक अधिकारी एस.एन. पंडा ल तत्काल प्रभाव ले निलंबित कर दीन। एखरे संग जशपुर कलेक्टर ल भर्ती बर फेर ले विज्ञापन जारी करे के निर्देश दीन हे।
– राजनांदगांव जिला म मोहला थाना क्षेत्र के गांव म एक तेंदुआ के हमला ले तीन मनखे मन घायल होगे। घायल मन ल मोहला स्वास्थ्य केंद्र म भर्ती कराय गेहे।
अउ
– राज्य सरकार ह लोक सेवा गारंटी अधिनियम के अंतर्गत संचालित ई-डिस्ट्रिक्ट परियोजना के पोर्टल मेंटनेंस के काम करे जात हे । एखर सेती ए पोर्टल आज संझा पांच बजे ले ग्यारा अक्टूबर बीहनिया नौ बजे तक बंद रीही।