प्रधानमंत्री स्वामित्व योजना
प्रधानमंत्री नरेंद्र मोदी ह कीहिन हे कि स्वामित्व योजना ह सिरिफ कानूनी कागजात देके योजना नइ हरय, ये ह आधुनिक प्रौद्योगिकी के मदद ले देश के गांव मन म विकास अउ विश्वास के नवा मंत्र घलो हरय। प्रधानमंत्री ह ये बात आज वीडियो कान्फ्रेंस के माध्यम ले मध्यप्रदेश म एक लाख इकहत्तर हजार लाभार्थी मन ल वर्चुअल माध्यम ले ई-संपत्ति कार्ड बांटे बर राखे गे कार्यक्रम म ए बात कीहिन।
ओमन कीहिन कि पहिली गांव के लोगन मन करा संपत्ति के रिकार्ड नइ रहाय, जेखर सेती अपन भुंइया के सही ढंग ले प्रयोग नइ कर सकय। प्रधानमंत्री ह कीहिन कि प्रधानमंत्री स्वामित्व योजना ले जम्मों लोगन मन ल ताकत मिलही।
सड़क परिवहन पुरस्कार योजना
केंद्रीय सड़क परिवहन अउ राजमार्ग मंत्रालय ह अइसन परोपकारी मनखे मन बर इनाम देके योजना शुरू करे हे, जउन ह मोटर गाड़ी दुर्घटना म घायल होय मनखे मन ल तुरते मदद पहुंचाही। ए योजना के उद्देश्य सड़क दुर्घटना जइसन आपातकालीन बेरा म पीड़ित मनखे ल तुरते राहत पहुंचाय म मदद बर लोगन मन ल आगू लाना हे। ए योजना ह पंद्रह अक्टूबर ले लागू हो जाही।
राम वनगमन पर्यटन-परिपथ
रईपुर के तीर स्थित चंदखुरी म राम वनगमन पर्यटन परिपथ के काली शुभारंभ करे जाही। ए मउका म मुख्यमंत्री ह काली चंदखुरी स्थित माता कौशल्या के प्राचीन मंदिर परिसर के विकास अउ सौंदर्यीकरण काम के लोकार्पण करही। ए मउका म तीन दिन के कार्यक्रम घलो राखे गेहे। जेमा राष्ट्रीय अउ अंतर्राष्ट्रीय स्तर के कलाकार अउ मानस मंडली मन ह अपन प्रस्तुती दीही। संगेसंग लाइट एंड साउंड शो के माध्यम ले भगवान राम के वनवास अउ राम वनगमन पथ के कहानी उपर आधारित कार्यक्रम पेश करे जाही।
जानबा के मुताबिक राम वनगमन पर्यटन परिपथ परियोजना के तहत छत्तीसगढ़ के अइसन जगा मन ल पर्यटन स्थल के रूप म विकसित करे जात हे। जिहां ले मान्यता के मुताबिक वनवास के बेरा भगवान राम ह इंहा ले गुजरे रीहिन।
कोरोना टीका/समाचार
देशभर म कोविड टीकाकरण अभियान म अब तक बयानबे करोड़ सतरा लाख ले जादा टीका लगाए जा चुके हे। केंद्रीय स्वास्थ्य मंत्रालय ह बताइन कि पाछू चौबीस घंटा के दउरान उनसठ लाख अड़तालीस हजार ले जादा टीका लगाये गीस।
एति प्रदेश म कोविड के सक्रिय मामला के संख्या म सरलग सुधार होवत हे। प्रदेश के सात जिला – कबीरधाम, गौरेला-पेण्ड्रा-मरवाही, धमतरी, बलरामपुर सरगुजा, नारायणपुर अउ बीजापुर म कोरोना के एको मामला नइ हे। ए बेरा राज्य म दू सौ बीस मरीज मनके आने आने अस्पताल म इलाज चलत हे।
काली प्रदेश म कोरोना संक्रमण के तेरा ठिन नवा मामला आगू आय हे। राज्य के बाइस जिला म काली कोरोना संक्रमण के कोनो नवा मामला नइ मिले हे।
राज्य स्थापना दिवस
छत्तीसगढ़ राज्य स्थापना दिवस के मउका म एक नवंबर के जिला मुख्यालय म एक दिवसीय कार्यक्रम राखे जाही। राज्य के सामान्य प्रशासन विभाग डहार ले जारी दिशा निर्देश के मुताबिक ए कार्यक्रम मन म मुख्य अतिथि के रूप म मंत्री या संसदीय सचिव मन शामिल होही। कार्यक्रम के जगा म आने आने विभाग के सफलता ल बतावत प्रदर्शनी लगाये जाही। संगेसंग स्थानीय कलाकार मन डहार ले सांस्कृतिक कार्यक्रम घलो पेश करे जाही।
एति राजधानी रायपुर के साइंस कालेज मैदान म अठाईस अक्टूबर ले एक नवंबर तक राष्ट्रीय आदिवासी नृत्य महोत्सव अउ राज्योत्सव के आयोजन करे जाही। एक नवंबर के राज्योत्सव के मउका म आने आने क्षेत्र म बढ़िया काम करइया मनखे अउ संस्था मन ल राज्य अलंकरण ले सम्मानित करे जाही।
निर्वाचक नामावली पुनरीक्षण
प्रदेश म निर्वाचक नामावली के पुनरीक्षण काम एक नवंबर ले शुरू होही। इही बीच एकीकृत मतदाता सूची के प्रारंभिक प्रकाशन घलो करे जाही। फोटो वाले निर्वाचक नामावली के विशेष संक्षिप्त पुनरीक्षण के बारे म राजनैतिक दल के पाछू दिन रायपुर म बइठका होइस।
प्रदेश के मुख्य निर्वाचन पदाधिकारी रीना बाबासाहेब कंगाले ह बताइन कि पुनरीक्षण काम म जादा ले जादा मतदाता मन ल जोड़े बर चौदा अउ इक्कीस नवंबर के विशेष जागरूकता शिविर लगाये जाही। ओमन पुनरीक्षण के दउरान मतदाता मनके नाव जोड़े, हटाये, या संशोधन करे म राजनैतिक दल मनले विशेष मदद के अपील करे हे।
ओमन बताइन कि दावा-आपत्ति दर्ज कराये बर एक नवंबर ले तीस नवबर तक के बेरा तय करे गेहे। उंहें बीस दिसंबर तक दावा-आपत्ति के निपटारा करे जाही। मतदाता सूची के आखरी प्रकाशन अवइया साल पांच जनवरी के करे जाही।
शारदेय नवरात्रि
शक्ति के आराधना के परब शारदेय नवरात्रि काली ले शुरू होवत हे। ए मउका म प्रदेश के जम्मों देवी मंदिर मन म नौ दिन तक विशेष पूजा-पाठ करे जाही। देवी मंदिर के संगेसंग शक्तिपीठ मन म मनोकामना ज्योति कलश के स्थापना घलो करे जाही।
मुख्यमंत्री भूपेश बघेल ह प्रदेश के लोगन मन ल नवरात्रि परब के बधाई अउ शुभकामना दे हवय। अउ लोगन मनके जिनगी म सुख अउ उछाह के प्रार्थना करे हे। एति नवरात्रि परब ल लेके आने आने जिला प्रशासन डहार ले दिशा निर्देश जारी करे गेहे। दुर्ग जिला प्रशासन डहार ले जारी निर्देश के मुताबिक पंडाल म जादा ले जादा पचास लोगन मन एक संगरा आ सकथे। मूर्ति के उंचाई आठ फीट होना चाही। संगेसंग पंडाल के लंबाई चौड़ाई पंद्रह बाई पंद्रह फीट ले जादा नइ होना चाही।
कोरोना संक्रमण के तीसर लहर ल देखत रासगरबा-डांडिया के आयोजन बड़का जगा म नइ हो सकय। ए कार्यक्रम म जादा ले जादा सौ मनखे शामिल हो सकथे। एखर अलावा पंडाल के जगा म प्रसाद,देके अनुमति नइ हे। संगेसंग विसर्जन के बेरा या विसर्जन के बाद कोनो भी प्रकार के भोग भंडारा के आयोजन नइ करे जा सकय।
ओति डोंगरगढ़ म मां बम्लेश्वरी के दर्शन बर श्रद्धालु मन ल निर्धारित एप के माध्यम ले पहिली रजिस्ट्रेशन कराय बर पड़ही, जेखर बाद मंदिर पहुंचे के बहत्तर घंटा पहिली के कोविड के जांच के निगेटिव रिपोर्ट या वैक्सीनेशन प्रमाण पत्र दिखाय बर पड़ही। ए बार पदयात्रा के संगेसंग मंदिर परिसर म मेला मीना बाजार अउ झूला मन उपर रोक लगाय गेहे।
कवर्धा प्रतिनिधि मंडल
भारतीय जनता पार्टी के प्रतिनिधि मंडल ह आज कवर्धा पहुंचीन। जेमा नेता प्रतिपक्ष धरमलाल कौशिक, सांसद संतोष पांडे अउ भाजपा नेता नारायण चंदेल, अउ डॅाक्टर कृष्णमूर्ति बांधी के संगेसंग पार्टी के आने लोगन मन शामिल होइन। एमन आज कवर्धा के सर्किट हाउस म पार्टी के पदाधिकारी अउ कार्यकर्ता मन संग बइठका करीन, जेखर बाद ए प्रतिनिधि मंडल मन ह हालेच म कवर्धा शहर म होय घटना के पीड़ित मनले मिले के प्रयास करीन। फेर पुलिस ह एमन ल मंजूरी नइ दीन, जेखर बाद भाजपा नेता मन ह सर्किट हाउस परिसर म धरना म बइठ गे। जेखर बाद संझाकुन धरना समाप्त होगे। बाद म पत्रकार मनले गोठबात म भाजपा नेता मन ह कवर्धा जिला प्रशासन डहार ले ओमन ल रोके के प्रयास ल लोकतंत्र के विरूद्ध बताइन।
मौसम
आज ले दक्षिण-पश्चिम मानसून के बिदाई शुरू होगे हे। मौसम विभाग के मुताबिक अवइया तीन-चार दिन म गुजरात, राजस्थान, पंजाब, उत्तरप्रदेश अउ मध्यप्रदेश के कोनो कोनो भाग ले मानसून के बिदाई हो जाही ।
एति तटीय तमिलनाडु के उपर एक ठिन चक्रवाती घेरा बने हे, जेखर प्रभाव ले प्रदेश म नमी आवत हे। जेखर सेती अवइया चौबीस घंटा के दउरान प्रदेश के कोनो-कोनो जगा म हल्का ले मध्यम बरसा हो सकथे। राज्य के एक दू जगा म गरज चमक के संग गाज गिरे के चेतावनी घलो दे गेहे ।