प्रधानमंत्री-जल जीवन मिशन
प्रधानमंत्री नरेन्द्र मोदी ह जल जीवन मिशन ल जनभागीदारी के संग माईलोगिन अउ ग्रामीण भारत ल ससक्त बनाय खातिर एक ठिन आंदोलन बतईन। जल जीवन मिशन म देसभर के ग्राम पंचायत अउ जल समिति मनके संग वीडियो कान्फ्रेंसिंग के माध्यम ले बातचीत करत श्री मोदी ह कहिन कि ग्राम पंचायत मन ल पानी अउ स्वच्छता के सुविधा बर दू लाख पच्चीस हजार करोड़ रूपिया ले जादा के रासि दे गेहे। ओमन कहिन कि सरकार ह नल के पानी के गुणवत्ता अउ आपूर्ति संग योजना ले जुड़े सवाल मनके जवाब बर जल जीवन मिशन मोबाइल ऐप के सुरूवात घलो करीन।
प्रधानमंत्री ह भारत के लोगन ले स्वच्छ जल के महत्ता ल समझे के आग्रह करीन। ए मउका म श्री मोदी ह राष्ट्रीय जल जीवन कोष के घलो सुरूवात करीन। ओमन कहिन कि बछर दू हजार उन्नीस म जल जीवन मिशन के सुरूवात के बाद अब तक पांच करोड़ घर मन ल नल ले जल योजना ले जोड़े गेहे।
प्रधानमंत्री-कृषि कानून
प्रधानमंत्री ह ए घांव फेर कहिन कि उंखर सरकार छोटे किसान मन ल हर तरह ले ससक्त बनाय बर वचनबद्ध हे। ओमन कहिन कि कृषि कानून के जेन बिन्दु उपर असहमति हे, केन्द्र सरकार पहिली दिन ले ही ओ मुद्दा मन उपर चरचा बर तैयार हे। एक ठिन अंग्रेजी साप्ताहिक पत्रिका ल दे साक्षात्कार म प्रधानमंत्री ह कहिन कि ए संबंध म कई ठिन बइठका होय हे। फेर अभी तक असहमति के कोन्हों भी बिन्दु उपर कोनों सामने नइ आय हे, जेला ओ बदलना चाहत हे।
गोबर-बिजली
मुख्यमंत्री भूपेश बघेल ह गांधी जयंती के मउका म आज छत्तीसगढ़ के गौठान मन म गोबर ले बिजली उत्पादन के महत्वाकांक्षी परियोजना के वर्चुअल सुभारंभ करीन। पहिली चरण म रईपुर जिला के बनचरौदा गौठान म गोबर ले बिजली उत्पादन के यूनिट लगाय गेहे। इहां पांच किलोवाट के पावर जनरेटर के माध्यम ले बिजली उत्पादन करे जाही। ए स्थापित बायोगैस संयंत्र म हर दिन करीबन दू सौ पचास किलो गोबर के आवश्यकता पड़ही। एखर ले हर दिन पच्चीस घनमीटर गोबर गैस बने के क्षमता हे। एखर ले बनइया बिजली ले गौठान मन म प्रकास बेवस्था के संगेसंग आने मसीन मनके संचालन घलो हो सकही।
खबर के मुताबिक गोबर ले सस्ता बिजली उत्पादन होय के संगेसंग एखर ले मिलइया स्लरी ले जैविक खाद घलो उत्पादित होही।
अमृत महोत्सव-फ्रीडम रन
राज्यपाल अनुसुईया उइके ह युवा मन ले हवा, प्लास्टिक अउ जल प्रदूषण ल रोके बर आगू आय के आह्वान करीन। ओमन कहिन कि स्थानीय स्तर म घलो लोगन ल प्रदूषण के खिलाफ आगू आना चाही, जेखर ले आसपास स्वस्थ वातावरण के निर्माण हो सकय। राज्यपाल ह किहिन कि स्वस्थ मनखे ह समाज अउ राष्ट्र के विकास जादा योगदान दे सकत हे।
आज आजादी के अमृत महोत्सव के तहत नेहरू युवा केन्द्र संगठन अउ राष्ट्रीय सेवा योजना डहार ले आयोजित ‘‘फिट इंडिया फ्रीडम रन‘‘ कारीकरम ल संबोधित करत राज्यपाल ह कहिन कि एक स्वस्थ सरीर म स्वस्थ मन के वास होथे। सुश्री उइके ह किहिन कि भारतीय संस्कृति म सूर्योदय के पहिली उठ के योग, ध्यान अउ स्नान करे के पुराना पंरपरा ल जीवित राखे के आवश्यकता हे। ओमन ह युवा मन ले अपन जीवनशैली म परिवर्तन लाके समाज अउ राष्ट्र के विकास म भागीदार बने के आग्रह घलो करीन।
राज्यपाल ह ए मउका म फ्रीडम रन रैली ल हरा झंडी दिखाके रवाना करीन। संगेसंग क्लीन इंडिया अभियान के बुकलेट के विमोचन घलो करीन। ए अभियान इकतीस अक्टूबर तक चलही।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के आठवां अंक म छत्तीसगढ़ी बुलेटिन म प्रश्न रिहीस- ‘‘सरगुजा अंचल के गोपाल ग्राम म उरांव आदिवासी व्रिदोह कोन बछर म होय रिहीस ?‘‘ एखर सही जवाब हे- बछर 1918 ।
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – धमतरी जिला के ग्राम- तेंदूभाटा निवासी उमेंद कुमार निषाद। आकाशवाणी परिवार डहार ले श्री निषाद ल हमन बधाई अउ सुभाकामना देवत हन। श्री निषाद ह आकाशवाणी समाचार के नियमित श्रोता हरय।
गांधी/शास्त्री जयंती
पूरा देस आज राष्ट्रपिता महात्मा गांधी ल उंखर एक सौ बावनवां जयंती म श्रद्धांजलि अर्पित करत हे। ए अवसर म देस म अउ भारतीय दूतावास मन म कई ठिन कारीकरम आयोजित करे जात हे। राष्ट्रपति रामनाथ कोविंद अउ उप राष्ट्रपति एम. वेकैंया नायडु ह महात्मा गांधी के जयंती म श्रद्धांजति अर्पित करीन हे। उहें, प्रधानमंत्री नरेन्द्र मोदी ह कहिन कि महात्मा गांधी के आदर्श आज घलो दुनियाभर म प्रासंगिक हे अउ लाखों लोगन ल शक्ति देथे।
दिल्ली म बापू के समाधि राजघाट म सर्वधर्म प्रार्थना सभा के आयोजन करे गीस। प्रधानमंत्री ह आज बिहनिया राजघाट म महात्मा गांधी ल श्रद्धासुमन अर्पित करीन।
आज पूर्व प्रधानमंत्री लाल बहादुर शास्त्री के घलो जयंती हे। राष्ट्रपति ह लालबहादुर शास्त्री ल उंखर जयंती म श्रद्धांजलि अर्पित करत कहिन कि शास्त्री जी ह पूरा समर्पण, निष्ठा अउ सादगी के संग देस के सेवा करीन।
ऐति, छत्तीसगढ़ के राज्यपाल अनुसुईया उइके ह आज राजभवन म राष्ट्रपिता महात्मा गांधी अउ पूर्व प्रधानमंत्री लाल बहादुर शास्त्री के जयंती म ओमन ल नमन करीन। उहें, मुख्यमंत्री भूपेश बघेल ह अपन निवास कार्यालय म राष्ट्रपिता अउ शास्त्री जी के जयंती के अवसर म उंखर फोटू म श्रद्धासुमन अर्पित करत ओमन ल सुरता करीन।
राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के जयंती के अवसर म राजधानी रईपुर संग प्रदेसभर म आने-आने कारीकरम आयोजित करे जात हे। इही कड़ी म मुख्यमंत्री ह रईपुर के नगर निगम मुख्यालय परिसर के महात्मा गांधी सदन म राष्ट्रपिता के प्रतिमा के अनावरण करीन।
उहें, विधानसभा स्थित केन्द्रीय कक्ष म गांधी जी अउ शास्त्री जी के फोटो म फूलमाला चढ़ाके ओमन ल श्रद्धासुमन अर्पित करीन।
माओवादी-समर्पण
सुकमा जिला म एक माईलोगिन संग नौ माओवादी मन सुरक्षा बल के आगू आत्मसमर्पण करे हे। खबर के मुताबिक ए माओवादी मन जिला के गोलापल्ली-किस्टारम क्षेत्र म होय आने-आने माओवादी घटना म सामिल रेहे हे। ए माओवादी मन ह केन्द्रीय रिजर्व पुलिस बल-सीआरपीएफ अउ जिला पुलिस बल के आगू आत्मसमर्पण करीन।
दुर्घटना
मुख्यमंत्री भूपेश बघेल ह मैनपाट म होय बस दुर्घटना म घायल पुलिस जवान मनके अच्छा इलाज के निरदेस देहे। मुख्यमंत्री के निरदेस म घायल जवान मन ल ले बर हेलीकॉप्टर अंबिकापुर पहुंच गेहे।
खबर के मुताबिक सरगुजा जिला म मैनपाट के कमलेश्वर के तीर पुलिस जवान ले भरे एक ठिन बस अनियंत्रित होके पलट गे। ए हादसा म बारह जवान घायल होय हे। उहें, गंभीर रूप ले चार घायल जवान मन ल अंबिकापुर मेडिकल कॉलेज अस्पताल ले रिफर करे गेहे।
आत्मानंद हिन्दी स्कूल
मुख्यमंत्री भूपेश बघेल ह राजधानी रईपुर के मायाराम सुरजन शासकीय कन्या उच्चतर माध्यमिक विद्यालय ल प्रदेस के पहला स्वामी आत्मानंद हिन्दी माध्यम स्कूल बनाय के घोसना करीन हे। ओमन ह कहिन कि अंग्रेजी माध्यम स्कूल जइसन ही ए स्कूल म सबो सुविधा उपलब्ध कराय जाही। मुख्यमंत्री ह ए विद्यालय के छात्र मन ल बापू के आत्मकथा ‘‘सत्य के साथ मेरे प्रयोग‘‘ पुस्तक के बांटे के घोषणा घलो करीन।
कारीकरम म मुख्यमंत्री ह गोंदना कला पारंपरिक खिलौना निर्माण संग आने कारीकरम म अपन प्रतिभा के अच्छा प्रदर्सन करइया छात्रा मन ल सम्मानित घलो करीन। ए मउका म स्कूल के छात्रा मन ह गांधी जी प्रिय भजन ‘‘रघुपति राघव राजाराम अउ शास्त्री नृत्य प्रस्तुत करीन।