प्रधानमंत्री-स्वच्छ भारत मिशन
प्रधानमंत्री नरेन्द्र मोदी ह आज स्वच्छ भारत मिशन-शहरी अउ सहर मन म बदलाव बर अटल मिशन-अमृत के दूसरा चरण के सुभारंभ करीन। ए अभियान के उद्देश्य जम्मों सहर मन ल कचरा मुक्त बनाना अउ सुरक्षित जलापूर्ति के बेवस्था करना हवय। ए मिशन तेजी ले होवत सहरीकरण के चुनौती मन ले निपटे के दिसा म सार्थक प्रयास हवय। एखर ले सत्त विकास लक्ष्य 2030 के तहत निर्धारित लक्ष्य मन ल प्राप्त करे म घलो मदद मिलही।
नई दिल्ली म एक कारीकरम म प्रधानमंत्री ह किहीन कि ए योजना मन ले पाछु छह-सात बछर म लोगन मनके जीवन म बड़का बदलाव आय हे। ओमन राज्य सरकार अउ स्थानीय प्रसासन मन ले स्वच्छता मिशन म सक्रिय भागीदारी के अपील करीन।
स्वास्थ्य मंत्री-रक्तदान
स्वास्थ्य मंत्री टी.एस. सिंहदेव ह आज राष्ट्रीय स्वैच्छिक रक्तदान दिवस के मउका म रक्तदान माह के सुभारंभ करीन। ओमन लोगन मन ल रक्तदान बर प्रेरित करे बर सिविल लाइन स्थित अपन निवास कार्यालय ले प्रचार-प्रसार रथ ल हरा झंडा देखाके रवाना करीन। ए प्रचार रथ रईपुर, बिलासपुर, दुरूग अउ भिलाई के प्रमुख हाट-बाजार, मॉल, स्कूल अउ कॉलेज मन म स्वैच्छिक रक्तदान करे बर नागरिक मन ल जागरूक करही। बतादन कि रक्तदान ल बढ़ावा दे बर हरेक बछर एक अक्टूबर के राष्ट्रीय स्वैच्छिक रक्तदान दिवस मनाय जाथे।
ए मउका म स्वास्थ्य मंत्री ह बतईन कि स्वास्थ्य विभाग प्रदेस के जम्मों सामुदायिक स्वास्थ्य केन्द्र मन म ब्लड-बैंक स्थापित करे के दिसा म काम करत हे। ओमन बतईन कि राज्य गठन के समय छत्तीसगढ़ म केवल नौ ब्लड-बैंक रिहीस, जउन ह अब बाढ़के पंचानवे होगे हे।
कोरोना टीकाकरण
प्रदेस म कोरोना टीकाकरण के सुरूवात के बाद पाछु सितंबर माह म सबले जादा संख्या म टीका लगाय गेहे। कोरोना टीकाकरण के राज्य नोडल अधिकारी डॉक्टर प्रियंका शुक्ला ह बतईन कि पहिली अउ दूसरा खुराक ल मिलाके सितंबर म पैंतालीस लाख तैंतीस हजार ले जादा टीका लगाय गेहे। प्रदेस म अब तक कोरोना ले बचाव बर एक करोड़ नब्बे लाख उन्नीस हजार ले जादा टीका लगाय जा चुके हे। राज्य म तिरपन लाख ले जादा लोगन मन ल कोरोना वैक्सीन के दूनों खुराक दे जा चुके हे।
ग्राम सभा
प्रदेस के ग्राम पंचायत मन म काली दू अक्टूबर ले ग्राम सभा मनके आयोजन करे जाही। ए ग्राम सभा म गांव के विकास अउ रोजगार समेत आने-आने महत्वपूर्ण बिसय उपर गांव वाले मनके संग गोठबात करे जाही। संगेसंग वन अधिकार पट्टा, जाति प्रमाण पत्र, किसान क्रेडिट कार्ड, तिरंगा पट्टा, राजस्व अभिलेख म दर्ज कराय समेत आने-आने प्रकरण उपर चरचा अउ अनुमोदन करे जाही।
एखरे संग लोक स्वास्थ्य यांत्रिकी विभाग डहार ले महात्मा गांधी के जयंती के मउका म दू अक्टूबर के राज्य के जम्मों गंवई मन म ग्राम सभा, ग्राम जल अउ स्वच्छता समिति अउ पानी समिति के बइठका आयोजित करे के निरदेस दे गेहे। ए बइठका मन म जल जीवन मिशन कारीकरम के अंतर्गत जल प्रदाय योजना मन बर गांव मनके पेयजल योजना के क्रियान्वयन, घरेलू कनेक्शन प्रदाय, भू-जल स्त्रोत मनके स्थायीकरण अउ गंदा पानी के निपटान करे जाना हे।
अमृत महोत्सव-फ्रीडम रन
आजादी के अमृत महोत्सव के तहत काली नेहरू युवा केन्द्र संगठन डहार ले राजधानी रईपुर म फिट इंडिया फ्रीडम रन के आयोजन करे जाही। कारीकरम के मुख्य अतिथि राज्यपाल अनुसुईया उइके होही। ए कारीकरम म कालीबाड़ी स्थित पीजी गर्ल्स कॉलेज म राखे जाही।
उहें, आजादी के अमृत महोत्सव के तहत काली कोंडागांव जिला म जिला पंचायत अध्यक्ष ह अच्छा काम करइया बीसी सखी मन ल सम्मानित करीन।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर डहार ले आयोजित करे जावत प्रश्नोत्तरी कार्यक्रम के श्रृंखला के तहत आज के कड़ी के प्रश्न पूछे ले पहिली ए बताना चाहबो कि श्रोता मन ल एस.एम.एस. या ई-मेल के माध्यम ले अपन जवाब के संग अपन नाम अउ पता भेजना जरूरी हवय। जउन प्रतिभागी के जवाब बिना नाव अउ पता के मिलही, उंखर जवाब ल स्वीकार नइ करे जाही। त छत्तीसगढ़ी बुलेटिन सुनइया मन बर आज के सवाल हे-
‘‘सरगुजा अंचल के गोपाल ग्राम म उरांव आदिवासी व्रिदोह कोन बछर म होय रिहीस ?‘‘
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए.डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस ले भेज सकत हे।
जउन श्रोता के सही जुवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग जीतइया प्रतिभागी ल प्रादेशिक समाचार एकांश डहार ले ई-प्रमाण पत्र दे जाही।
पुलिस भर्ती-आवेदन
छत्तीसगढ़ म पुलिस विभाग म सब इंस्पेक्टर अउ दूसर पद उपर भर्ती बर आज ले आवेदन जमा करे के प्रक्रिया सुरू होगे हे। ए आवेदन ऑनलाइन ले जावत हे। आवेदन जमा करे के आखिरी तारीख इकतीस अक्टूबर हवय। सूबेदार, उप निरीक्षक, प्लाटून कमांडर समेत पुलिस विभाग के नौ सौ पचहत्तर खाली पद मन बर ए भर्ती करे जात हे।
महासमुंद-लाठीचार्ज-एफआईआर
महासमुंद जिला के कोतवाली थाना म होय लाठी चार्ज मामला म आईपीएस उदय किरण, एसआई समीर डुंगडुंग अउ छत्रपाल सिन्हा उपर एफ.आई.आर. दर्ज करे जाही। ए संबंध म सुप्रीम कोर्ट ह बिलासपुर हाईकोर्ट के फैसला ल सही ठहराय हे। बतादन कि बछर दू हजार उन्नीस म हाईकोर्ट ह ए अधिकारी मन उपर एफआईआर दर्ज करके जांच के आदेस दे रिहीस। एखर बाद प्राथी मन सुप्रीम कोर्ट म अपील करे रिहीन। ए अपील उपर सुनवाई करत सुप्रीम कोर्ट के न्यायाधीश एम.आर. शाह अउ ए.एस. गोपन्ना ह ए फैसला सुनाईन। ए जानकारी आज आयोजित एक ठिन प्रेसवार्ता म पूर्व विधायक डॉक्टर विमला चोपड़ा ह दीन।
इही बीच, सुप्रीम कोर्ट म आज आईपीएस जी.पी. सिंह के तीन याचिका उपर सुनवाई होईस। सुनवाई के बाद सुप्रीम कोर्ट ह छत्तीसगढ़ उच्च न्यायालय ल याचिका मनके गुण-दोष के आधार म सुनवाई करे बर आठ हफ्ता के समय दीन। उहें, सुप्रीम कोर्ट ह आय ले जादा संपत्ति के मामला म जी.पी. सिंह के गिरफ्तारी उपर लगे रोक ल हटा लेहे। संगेसंग याचिकाकर्ता ल ए सुविधा देहे कि ओमन हाईकोर्ट ले ए मामला म स्टे के मांग कर सकत हे।
दुर्घटना
महासमुंद जिला म आज बिहनिया एक सड़क हादसा म पिता-पुत समेत तीन मनखे मनके मउकाच म मउत होगे। उहें, दू झिन दूसर मनखे मन गंभीर रूप ले घायल होय हे। पुलिस के अनुसार मृतक एकेच परिवार के हवय।
मिले जानकारी अनुसार तुमगांव थाना क्षेत्र म राष्ट्रीय राजमार्ग-तिरपन म ए दुर्घटना होईस, जेमा चारपहिया वाहन अनियंत्रित होके दूसर वाहन ले टकरा गीस। घायल मन ल इलाज बर सामुदायिक स्वास्थ्य केन्द्र तुमगांव म भर्ती कराय गेहे।
अंतर्राष्ट्रीय वृद्धजन दिवस
आज अंतर्राष्ट्रीय वृद्धजन दिवस हरय। ए मउका म प्रदेसभर म आने-आने कारीकरम राखे जात हे। दुरूग म वरिष्ठ पुलिस अधीक्षक बद्रीनारायण मीणा ह आज बिहनिया सिविक सेंटर पहुंच के सुबह के सैर म निकले सहर के वरिष्ठजन मन ल गुलाब के फूल भेंट करीन। ए मउका म वरिष्ठ पुलिस अधीक्षक श्री मीणा ह किहीन कि वरिष्ठजन मनके अनुभव समाज बर बहुतेच जरूरी हवय। ओमन किहीन कि सियान के डहार ले सुझाय गे विचार ल अमल म लाके सहर के कानून बेवस्था ल दुरूस्त करे जाही।