बांध सिंचाई
प्रदेश के किसान मन ल खरीफ फसल के सिंचाई बर आज ले गंगरेल सहित दूसर बांध मनके पानी उपलब्ध कराय जात हे । ए संबंध म किसान संगठन के पदाधिकारी अउ जन प्रतिनिधि मन मुख्यमंत्री ले चर्चा के दउरान अपन मांग रखीन।
किसान मनके मांग उपर निर्णय लेत मुख्यमंत्री ह आज से ही गंगरेल बांध सहित दूसर जलाशय मनले सिंचाई बर पानी छोड़े के निर्देश देहे। ये संबंध म जल संसाधन मंत्री रविंद्र चौबे ह विभागीय अधिकारी मन ल तत्काल आवश्यक कदम उठाय बर कीहिन। गंगरेल बांध ले पानी छोड़े से धमतरी, बालोद, रायपुर, बलौदा बजार, भाटापारा जिला के किसान मन ल सिंचाई बर पानी उपलब्ध होवत हे ।
शराब बंदी बैठक
राज्य म पूर्ण शराबबंदी बर सरकार डहार ले गठित करे गे सामाजिक संगठन के समिति के पहिली बइठका म शराबबंदी बर रणनीति अउ एखर ले उत्पन्न होने वाला परिस्थिति मन उपर विस्तार ले चर्चा करे गीस।
नवा रायपुर म होय बइठका म ये सुझाव दे गीस कि शराब दुकान मन ल चुनिंदा जगा मन म ही संचालित करे जाय। संगेसंग शराब दुकान के खोले के समय सीमा म कटौती करे जाय। एखर अलावा समिति ह आबकारी नियम मनके कड़ाई के पालन करे के आग्रह करीन। उंहें नवा पीढ़ी ल नशा ले बचाय बर हुक्का बार मन उपर कड़ा कार्रवाई करे के सुझाव दीन।
समिति के यहू कहना रीहिस हे कि बहुत से युवा मन नशा बर गुटखा अउ तंबाखू के संगेसंग कुछ विशेष दवाई के इस्तेमाल घलो करत हे, एखर उपर कड़ाई से रोक लगाये के जरूरत हे।
ये बइठका म पूर्ण शराबबंदी ल लेके जनचेतना अभियान अउ शराबबंदी अभियान सहित अलग अलग मुद्दा मन उपर सामाजिक संगठन के प्रतिनिधि मन अपन विचार रखीन।
निर्वाचक नामावली पुनरीक्षण
प्रदेश म फोटोयुक्त निर्वाचक नामावली के विशेष संक्षिप्त पुनरीक्षण के संबंध म राजनीतिक दल मनके बइठका आज रायपुर म संपन्न होइस। छत्तीसगढ़ निर्वाचन पदाधिकारी कार्यालय म होय राज्यस्तरीय बइठका म भारतीय राष्ट्रीय कांग्रेस अउ भारतीय जनता पार्टी सहित अन्य दल मनके प्रतिनिधि शामिल होइन।
प्रदेश के मुख्य निर्वाचन पदाधिकारी रीना बाबासाहेब कंगाले ह बताइन कि निर्वाचन नामावली के पुनरीक्षण एक नवंबर ले शुरू होही। इही दिन एकीकृत मतदाता सूची के प्रारंभिक प्रकाशन घलो करे जाही।
उंहें 20 दिसंबर तक दावा आपत्ति के निराकरण करे जाही। मतदाता सूची के अंतिम प्रारंभिक प्रकाशन अगले बछर पांच जनवरी के करे जाही ।
एम ओ यू हस्ताक्षर
दुर्ग जिला के पाटन विकासखंड म झीट गांव के सामुदायिक स्वास्थ्य केंद्र म आदर्श ग्रामीण स्वास्थ्य अनुसंधान इकाई स्थापित करे जाही। स्वास्थ्य मंत्री टी.एस. सिंहदेव के मौजूदगी म आज ए संबंध म एक समझौता उपर हस्ताक्षर करे गीस। ये इकाई जबलपुर स्थित राष्ट्रीय जनजाति स्वास्थ्य अनुसंधान संस्थान के सहयोग ले स्थापित करे जाही। एमा करीब दू करोड़ रूपिया खर्च होय के अनुमान हे।
ये मउका म स्वास्थ्य मंत्री ह कीहिन कि आदर्श ग्रामीण स्वास्थ्य अनुसंधान इकाई के स्थापित होय ले प्रदेश म अलग-अलग बीमारी मनके जांच, अनुसंधान, निगरानी अउ पूर्वानुमान म मदद मिलही। संगेसंग प्रदेश के स्वास्थ्य विभाग अउ अस्पताल म काम करइया तकनीशिन अउ पैरा मेडिकल स्टाफ ल प्रशिक्षण घलो दे जा सकही।
कृषि मंत्री बैठक
प्रदेश के गौठान मन म महिला स्व सहायता समूह ल आजीविका संबंधी गतिविधि मनसे जोड़े जाही। एखरे संग ही ग्राम पंचायत मनके तालाब के जरिया आर्थिक रूप ले कमजोर वर्ग ल रोजगार उपलब्ध कराय के प्रयास करे जाही। ये संबंध म कृषि अउ पशुपालन मंत्री रविंद्र चौबे ह बिलासपुर म होय विभागीय समीक्षा बइठका म अधिकारी मन ल आवश्यक कदम उठाय के निर्देश दीन।
कोविड टीका/समाचार
छत्तीसगढ़ म अब तक करीबन एक करोड़ अठ्यासी लाख टीका लगाये जा चुके हे। एमा ले एक करोड़ छत्तीस लाख ले जादा लोगन मन ल पहिली टीका अउ बावन लाख ले जादा मन ल दूनो डोज लग चुके हे।
इही बीच राज्य के तीन जिला कबीरधाम, नारायणपुर, अउ गौरेला-पेण्ड्रा -मरवाही म वर्तमान म कोरोना के एको सक्रिय मरीज नइ मिले हे। प्रदेश के पंद्रह जिला म काली कोरोना के कोई नवा मामला नइ आय हे। पूरा प्रदेश म काली होय बाईस हजार ले जादा सैंपल मनके जांच म सिरिफ तीस व्यक्ति संक्रमित पाये गीस। प्रदेश म अभी सक्रिय मरीज मनके संख्या दू सौ पच्यासी हे।
इही बीच नीति आयोग के सदस्य डॅाक्टर वी.के. पॉल ह कीहिन कि ए बछर सुरक्षित रूप ले तिहार मनके आयोजन कोविड महामारी ले संघर्ष म निर्णायक भूमिका निभाही।
आजादी के अमृत महोत्सव कार्यक्रम
आजादी के अमृत महोत्सव के तहत ए बेरा म प्रदेश म कई ठन आयोजन करे जात हे। इही कड़ी म भिलाई नगर निगम डहार ले शहर ल स्वच्छ अउ सुंदर बनाये बर जागरूकता कार्यक्रम के आयोजन करे गीस। कार्यक्रम के जरिया स्थानीय नागरिक मन ल स्वच्छता के प्रति जागरूक करे जात हे। ये मउका म निगम क्षेत्र म कचरा के निष्पादन करइया उद्यमी मन ल सम्मानित करे गीस। ये कार्यक्रम ह दू अक्टूबर तक चलही।
उंहें बीजापुर म आज इंद्रावती टाइगर रिजर्व डहार ले बाघ संरक्षण जागरूकता रैली के आयोजन करे गीस। ये रैली इंद्रावती टाइगर रिजर्व के दफ्तर ले शुरू होके जिला कलेक्टोरेट परिसर म संपन्न होइस।
गौरतलब हे कि आजादी के अमृत महोत्सव के तहत राष्ट्रीय बाघ संरक्षण प्राधिकरण डहार ले पचहत्तर सप्ताह तक बाघ संरक्षण के दिशा म देश के इंक्यावन टायगर रिजर्व क्षेत्र म अलग-अलग कार्यक्रम आयोजित करे जात हे।
अमृत महोत्सव क्विज
आजादी के अमृत महोत्सव के चलत प्रादेशिक समाचार एकांश आकाशवाणी रायपुर डहार ले छै अगस्त ले एक ठिन प्रश्नोत्तरी कार्यक्रम शुरू करे गेहे। एखर चलत छत्तीसगढ़ म स्वाधीनता संग्राम के बेरा होय घटना के अलावा राज्य के स्वाधीनता सेनानी अउ समाज सुधारक मनले सवाल पूछे जात हे।
ए कार्यक्रम के चलत काली आकाशवाणी रायपुर ले प्रसारित होवइया छत्तीसगढ़ी अउ इंग्लिश बुलेटिन म सवाल पूछे जाही। दूनों बुलेटिन म पूछे गे सवाल के आधार म सबले पहिली सही जवाब देवइया एक-एक विजेता के चयन करे जाही।
जवान घायल
बीजापुर जिला म चिन्ना कोडपाल अउ मुरकीनार के बीच सड़क उपर माओवादी मन डहार ले लगाए गे प्रेशर बम के विस्फोट होय ले गश्त म निकले केंद्रीय रिजर्व पुलिस बल सीआरपीएफ के दू जवान मन घायल होगे। ये घटना मोदकपाल थाना क्षेत्र के आय। जिला के अतिरिक्त पुलिस अधीक्षक पंकज शुक्ला ह बताइन कि एमा ले एक जवान के हालत गंभीर हे। दूनों घायल जवान मन ल जिला अस्पताल म भर्ती कराय गेहे ।
भाजपा बैठक
भाजपा के राष्ट्रीय महामंत्री सी.टी. रवि ह आज भिलाई म पार्टी के अलग-अलग मोर्चा के पदाधिकारी मनके बइठका लीन। राष्ट्रीय महामंत्री ह पार्टी के जनाधार ल देशभर म अउ बढ़ाय बर जोर देत बछर 2023 अउ 2024 के चुनाव बर पार्टी पदाधिकारी अउ कार्यकर्ता मन ल उत्साहित करीन। ओमन पार्टी डहार ले संचालित सेवा अउ समर्पण अभियान के तहत होय संगोष्ठी म घलो शामिल होइन।
महापरीक्षा अभियान
पढ़ना लिखना अभियान के अंतर्गत प्रौढ़ शिक्षार्थी मनके आकलन बर राज्यव्यापी महापरीक्षा आज संपन्न होइस। एमा ढाई लाख शिक्षार्थी मनके शामिल करे के लक्ष्य रखे गे रीहिस। प्रदेश के 28 जिला के 121 विकासखंड अउ 102 नगरीय निकाय मन म ये परीक्षा के आयोजन करे गीस।