प्रधानमंत्री फसल किस्म
प्रधानमंत्री नरेंद्र मोदी ह खेती-किसानी ल उद्योग के रूप म नहीं फेर एला एक मउका के रूप म विकास करके किसानी ले जुड़े बुनियादी बात अउ भविष्य म आगू बढ़ाय म जोर दीन।
श्री मोदी ह आज वीडियो कॅान्फ्रेसिंग के माध्यम ले विशेष गुण वाला फसल के पैंतीस ठिन किसम ल देश ल समर्पित करीन। संगेसंग ओमन यहू कीहिन कि पर्यावरण ल धियान म राखत बीजा मनके अइसन किसम ल तियार करे बर पड़ही, जउन ल प्रौद्योगिकी म उपयोग करत जलवायु परिवर्तन ले जुड़े चुनौती ले निपटे म सक्षम होवय।
श्री मोदी ह वीडियो कॅान्फ्रेसिंग के माध्यम ले रायपुर के बरौंडा म नवा बनाये गे भारतीय कृषि अनुसंधान परिषद के तहत राष्ट्रीय जैविक प्रतिबल प्रबंधन संस्थान ल देश ल समर्पित करीन।
ए मउका म मुख्यमंत्री भूपेश बघेल ह कीहिन कि जलवायु सहिष्णुता तकनीकी अउ पद्धति मनके प्रचार प्रसार करे खातिर भारत सरकार डहार ले शुरू करइया जागरूकता अभियान म छत्तीसगढ़ के जादा ले जादा भागीदारी होही। ओमन ह यहू कीहिन कि छत्तीसगढ़ सरकार डहार ले अवइया दू अक्टूबर गांधी जयंती के मउका म राज्य सरकार ह गोबर ले बिजली बनाय के शुरूआत करे जाही।
कोरोना टीकाकरण
देश म अब तक सत्यासी करोड़ सात लाख ले जादा लोगन मन ल कोरोना के टीका लगाय गेहे। केंद्रीय स्वास्थ्य मंत्रालय डहार ले बताय गेहे कि काली एक करोड़ दू लाख बाईस हजार ले जादा मनखे मन ल टीका लगाये गीस।
एति छत्तीसगढ़ म अब तक एक करोड़ छियांसी लाख बैसंठ हजार ले जादा मनखे मन ल कोरोना के टीका लगाय गेहे। राज्य के एक करोड़ पैंतीस लाख चौंवालिस हजार ले जादा लोगन मन ल पहिली टीका अउ इंक्यावन लाख अठारा हजार ले जादा लोगन मन ल दूसरइया टीका लगाय गेहे।
राज्य म कोरोना संक्रमण के मामला म सरलग कमी आवत हे। प्रदेश म काली सत्ताईस झिन नवा मरीज पाये गीस। अभी वर्तमान म राज्य म दू सौ बंयासी झन कोरोना मरीज हे।
अमृत महोत्सव हैरिटेज वॉक
आजादी के अमृत महोत्सव के तहत आज जगदलपुर म केंद्रीय पर्यटन मंत्रालय ले जुड़े इंडिया टूरिज्म मुंबई डहार ले हैरिटेज वॉक के कार्यक्रम राखे गीस। एमा स्कूल के लईका मनके संगेसंग जिला प्रशासन के बड़का अधिकारी मन ह शामिल होइन।
ए कार्यक्रम ल जगदलपुर के दंतेश्वरी मंदिर ले शुरू करे गीस। जउन ल मउली माता मंदिर सीरासार भवन ले होवत फेर वापिस दंतेश्वरी मंदिर म खतम करे गीस। बाद म लईका मन ह आजादी के लड़ई म शहीद होय वीर गुंडाधुर के गांव नेतानार के भ्रमण घलो करीन।
ए दउरान भूमकाल आंदोलन के बेरा विद्रोह के सेती आंदोलनकारी मन ल जउन जगा म फांसी देगे रीहिस, वो जगा मन ल लईका मन ल देखाय गीस।
ए मउका म पर्यटन विभाग के क्षेत्रीय निदेशक श्री वैंकेटेशन दत्तारेयन ह कीहिन कि आजादी के अमृत महोत्सव ह हर भारतीय के उत्सव हरय। ए उत्सव म आजादी म अपन परान गंवइया वीर जवान मन ल सुरता करे जात हे।
इही बीच आजादी के अमृत महोत्सव के तहत राष्ट्रीय विधिक सेवा प्राधिकरण के पैन इंडिया अवेयरनेस एंड आउटरीच प्रोग्राम के तहत दुर्ग जिला विधिक सेवा प्राधिकरण डहार ले जिला म दू अक्टूबर चौदा नवंबर तक विधिक जन-जागरूकता अभियान चलाये जाही। ए बारे म जिला विधिक सेवा प्राधिकरण के अध्यक्ष अउ सत्र न्यायाधीश राजेश श्रीवास्तर ह बताइन कि ए दउरान जिला के जम्मों चार सौ गांव मन म शिविर के माध्यम ले गांव वाले मन म विधिक जानकारी दे जाही।
अमृत महोत्सव प्रश्नोत्तरी
आजादी के अमृत महोत्सव के तहत आकाशवाणी समाचार डहार ले स्वाधीनता संग्राम अउ उंखर गौरवशाली इतिहास उपर विशेष प्रश्नोत्तरी कार्यक्रम करे जात हे। श्रोता मन ल बतादन कि ये प्रश्न राष्ट्रीय स्तर म करे जात प्रश्नोत्तरी प्रतियोगिता म पूछे जाही। एखर जुवाब ल प्रादेशिक समाचार के क्विज बर ई-मेल या मोबाइल नंबर के जगा आज के प्रश्न के बाद बताए जात वाट्सअप नंबर अउ ई-मेल म भेजना हे।
अमृत महोत्सव के तहत आज के प्रश्न हे – ईस्ट इंडिया एसोसिएशन के स्थापना कोन ह करे रीहिन हे ?
श्रोता मन अपन जवाब वाट्सअप नंबर – आठ आठ दू छै पांच चार छै दू छै दू – या फेर ई -मेल अमृत महोत्सव क्विज एट द रेट जी मेल डॅाट कॅाम म भज सकत हव। ए प्रतियोगिता म एक झन भाग्यशाली प्रतिभागी ल विजेता चुने जाही। अउ काली बीहनिया के समाचार प्रभात म उंखर नाव के घोषणा करे जाही। जितइया प्रतिभागी ल ई-प्रमाण पत्र अउ सांकेतिक पुरस्कार घलो दे जाही।
माओवादी समाचार
सुकमा जिला के किस्टाराम इलाका म काली चौबीस झन माओवादी मन ह पुलिस के आगू म आत्म समर्पण कर दीन। एमा सात झन महिला माओवादी घलो शामिल हे। जिला के पुलिस अधीक्षक सुनील शर्मा ह बताइन हे कि आत्म समर्पित करइया माओवादी मन ह मिलिशिया अउ सी.एन.एम. के सदस्य हरय।
एति बीजापुर जिला के बासागुड़ा-जगरगुण्डा क्षेत्र म पुलिस के टीम डहार ले एक झिन माओवादी ल गिरप्तार करे गीस।
ओति राजनांदगांव जिला के बकरकट्टा म जवान मन डहार ले पांच किलो के कुकर बम बरामद करे गीस हे, जेला बम निरोधक दस्ता के टीम डहार ले निष्क्रिय कर दे गीस।
राष्ट्रीय पोषण माह
राष्ट्रीय पोषण माह के तहत राज्य म कई ठन कार्यक्रम करे जात हे। ए दउरान आंगनबाड़ी मन म योग आयोग के मदद ले गरभवती माइलोगिन, नोनी अउ नान्हें लईका मन ल योग के महत्ता के बारे म बतात योगा अभ्यास अउ व्यायाम कराय म जोर दे जात हे।
अभियान के दउरान योग प्रशिक्षक मन डहार ले कई ठन योग घलो सिखाय जात हे।
भाजपा प्लास्टिक मुक्त भारत
भारतीय जनता पार्टी डहार ले शुरू करे गे सेवा ही संगठन अउ समर्पण अभियान के तहत पाछू छब्बीस अउ सत्ताईस सितंबर के मुंगेली ले प्लास्टिक मुक्त भारत जन-जागरण अभियान चलाये गीस। ए दउरान कार्यकर्ता मन ह व्यापारी मनले दुकान के आगू म कचरा नई फैलाय के अपील करीन।
भाजयुमो के मंडल प्रभारी यश गुप्ता ह बताइन कि प्रधानमंत्री नरेंद्र मोदी के जन्मदिन सतरा सितंबर ले दू अक्टूबर गांधी जयंती तक युवा मोर्चा डहार ले ये अभियान ल देशभर म चलाये जाही।
शारदीय नवरात्र डोंगरगढ़
कोरोना के तीसरा लहर के आशंका ल देखत एसो शारदीय नवरात्र के बेरा डोंगरगढ़ म मां बम्लेश्वरी के दर्शन करे खातिर श्रद्धालु मन बर बनाये गे एप म रजिस्ट्रेशन कराय बर पड़ही।
खबर के मुताबिक श्रद्धालु मन ल मंदिर म पहुंचे के बाद बहत्तर घंटा पहिली कोविड के जांच के निगेटिव रिपोर्ट के संगेसंग टीका के सर्टिफिकेट घलो दिखाय बर पड़ही। ए दारी पदयात्रा, मेला, मीना बजार अउ झूला म प्रतिबंध लगाय गेहे। उंहें डोंगरगढ़ बर स्पेशन ट्रेन चलाये के अनुमति नइ दे गेहे।
भगत सिंह जयंती
देश ह आज महान क्रांतिकारी अउ स्वतंत्रता संगाम सेनानी शहीद भगत सिंह के जयंती के मउका म ओमन ल श्रद्धांजलि देवत हे।
उप राष्ट्रपति एम. वेंकैया नायडू ह ट्वीट म कीहिन हे कि भगत सिंह ह महान देशभक्त अउ राष्ट्रवादी रीहिन हे। प्रधानमंत्री नरेंद्र मोदी ह शहीद भगत सिंह ल श्रद्धांजलि दीन। एति मुख्यमंत्री भूपेश बघेल ह स्वतंत्रता संग्राम के महानायक अमर शहीद भगत सिंह के मूर्ति म फूलमाला चढ़ईन।