आयुष्मान भारत-डिजिटल मिशन
प्रधानमंत्री नरेन्द्र मोदी ह आज वीडियो कान्फ्रेंसिंग ले आयुष्मान भारत डिजिटल मिशन के सुरूवात करीन। ओमन किहीन कि एखर ले देस के स्वास्थ्य के क्षेत्र म महत्वपूर्ण बदलाव होही। श्री मोदी ह किहीन कि आज के दिन बहुत मुख्य हरय। काबर कि आज देस स्वास्थ्य के क्षेत्र म एक नवा चरण म प्रवेस करत हे। आयुष्मान भारत डिजिटल मिशन गरीब अउ मध्यम वरग के लोगन के स्वास्थ्य संबंधी समस्या ल दुरिहाय खातिर बड़े भूमिका निभाही।
प्रधानमंत्री ह किहीन कि ए अभियान ले देस के हरेक नागरिक ल डिजिटल हेल्थ आईडी मिलही, जेखर ले उंखर रिकार्ड सुरक्षित रइही।
मुख्यमंत्री-छात्रावास
मुख्यमंत्री भूपेश बघेल ह जशपुर जिला के छात्रावास म घटे घटना ल देखत जिला कलेक्टर अउ पुलिस अधीक्षक ल अपन जिला के जम्मों छात्रावास के बेरा-बेरा म जांच करे के निरदेस दीन हे। ओमन जिला कलेक्टर मन ल सासकीय छात्रावास के जांच बर जिला शिक्षा अधिकारी, आदिवासी विकास विभाग के सहायक आयुक्त समेत आने जिला स्तरीय अधिकारी मनके ड्यूटी लगाय बर किहीन।
मुख्यमंत्री ह किहीन कि जांच के बेरा कोनों भी सासकीय छात्रावास म काम करत अधिकारी अउ करमचारी अपन काम म कोताही करत पाय जाही या फेर कोनों किसम के अनैतिक काम म जुड़े होही, त ओखर खिलाफ तुरते कार्रवाई करे जाय।
अमृत-महोत्सव
आजादी के अमृत महोत्सव म प्रदेसभर म कतकोन कारीकरम होवत हे। इही म आज मुंगेली के सरदार वल्लभ भाई पटेल सभागार म एक दिवसीय समेकित लोकसंपर्क कारीकरम राखे गीस। एमा छत्तीसगढ़ के वीर सपूत मनके फोटू प्रदर्सनी लगाय गीस। ए बेरा म कारीकरम के मुख्य अतिथि अउ बिलासपुर के सांसद अरूण साव ह जम्मों स्टॉल ल देखीन। ए मउका म क्षेत्रीय लोक संपर्क कार्यालय कोति ले आने-आने प्रतियोगिता, निबंध लेखन अउ प्रश्न मंच प्रतियोगिता राखे गीस।
चक्रवाती तूफान/गुल-आब
बंगाल के खाड़ी म उठे चक्रवाती तूफान गुल-आब कमजोर होके अवदाब के रूप म उत्तरी आंध्रप्रदेश अउ दक्षिण ओड़िसा कोति छह किलोमीटर घंटा के रफ्तार ले आगू बढ़त हे। अब एखर पश्चिम कोति बढ़े के संभावना हे। एखर परभाव ले छत्तीसगढ़ के बस्तर क्षेत्र म काली रतिहा ले सरलग बरसा होवत हे, जेखर ले नंदियां-नरवा उफान म हवय। सुकमा जिला के कोंटा विकासखंड के कतकोन क्षेत्र ले संपर्क टूट गेहे।
इही बीच, चक्रवाती परभाव ल देखत बस्तर कलेक्टर रजत बंसल ह आज जिला के सबो स्कूल म छुट्टी दे दे रिहीन।
उहें, ओड़िसा अउ विशाखापट्टनम के बीच चलइया कुछेक रेलगाड़ी ल रद्द करे गेहे। एमा कोरबा-विशाखापट्टनम स्पेशल ट्रेन सामिल हे।
विश्व पर्यटन दिवस
आज विश्व पर्यटन दिवय हरय। पर्यटन मंत्रालय आज ले नई दिल्ली म ‘‘राष्ट्रीय आतिथ्य सत्कार उद्योग समेकित डेटा बेस-निधि‘‘ के दूसर चरण के सुरूवात करत हे। ए मउका म संयुक्त राष्ट्र महासचिव एंटोनियो गुत्रेस ह किहीन कि पर्यटन वैश्विक अर्थव्यवस्था अउ समाज के हरेक वरग ल परभावित करथे। एसो विश्व पर्यटन दिवस के बिसय हरय- ‘‘समावेशी विकास के लिए पर्यटन‘‘
केन्द्रीय पर्यटन मंत्रालय के क्षेत्रीय कार्यालय जिला प्रसासन के मदद ले जगदलपुर म दू ठिन कार्यसाला राखे गीस। एमा एक बस्तर के होम स्टे मालिक मन बर अउ दूसर कार्यसाला जगदलपुर के युवा मन बर रिहीस। कार्यसाला के उद्घाटन बस्तर कलेक्टर रजत बंसल ह कहीन। ए बेरा म ओमन किहीन कि बस्तर म सामुदायिक सहभागिता के संग पर्यटन ल बढ़ावा दे बर काम करे जात हे।
अमृत महोत्सव-क्विज
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – केरल के गांधी रूप म जउन स्वाधीनता सेनानी लोकप्रिय रिहीन उंखर नाव बतावव।
ये प्रश्न के उत्तर वाट्सअप नंबर – आठ आठ दू छै पांच चार छै दो छै दो – या ई-मेल अमृत महोत्सव क्विज एट द रेट जी मेल डॅाट कॉम म भेजयं।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही।
स्पेशल ट्रेन
रेल यात्री मनके सुभीता ल धियान म राखत रेल प्रसासन कोति ले दुरूग अउ निजामुद्दीन के बीच सुपर फास्ट स्पेशल ट्रेन काली ले चलाय जाही। ए ट्रेन दुरूग ले हरेक मंगलवार अउ सुक्रवार के चलही। उहें, निजामुद्दीन ले हरेक बुधवार अउ सनिचर के रवाना होही। ए ट्रेन म सिरिफ कन्फर्म टिकिट वाले यात्री मन ही सफर कर सकत हे।
बीजापुर-आधार कार्ड
बस्तर संभाग के बीजापुर जिला म गांव के लोगन के आधार कारड बनाय बर बिसेस सिविर लगाय जाही। एखर बर बीजापुर जिला प्रसासन अउ राज्य सरकार के संस्था छत्तीसगढ़ इन्फोटेक प्रमोशन सोसायटी चिप्स कोति ले गांव के लोगन के आधार कारड बनाय बर चालीस झिन ऑपरेटर मनके नियुक्ति करे गेहे। चिप्स के मुख्य कार्यपालक अधिकारी समीर विश्नोई ह बतईन कि बीजापुर जिला के भीतरी क्षेत्र मन म गांव के लोगन तीर आधार कारड नइ होय के सेती कतकोन सरकारी योजना के फायदा ओमन नइ ले पावत हे।
लेखन-कौशल
लइका मन के लिखई म सुधार लाय अउ रचनात्मक लेखन कौशल ल आगू बढ़ाय बर आने-आने स्तर म प्रतियोगिता राखे जाही। एमा हरेक विद्यार्थी के मदद ले एक हस्तपुस्तिका बनाय जाही। ए प्रतियोगिता स्कूल ले संकुल स्तर अउ विकासखंड ले जिला स्तर तक होही। जिला स्तर म चुने गे अट्ठाईस ठन हस्तपुस्तिका के प्रदर्सनी राज्य स्तर म लगाय जाही। ए संबंध म जम्मों जिला सिक्षा अधिकारी अउ जिला समन्वयक अउ प्राचार्य ल निरदेस जारी करे गेहे।
दोहरा हत्याकांड-पर्दाफाश
रायगढ़ पुलिस ह लैलूंगा म होय दोहरा हत्याकांड के आरोपी मन ल पकड़ लेहे। पुलिस के मुताबिक ए हत्याकांड ल दू झिन बालिग अउ चार झिन नाबालिग लड़का मन ह नसा करे के बाद अंजाम दीन। रायगढ़ के पुलिस अधीक्षक अभिषेक मीणा ह बतईन कि हत्याकांड के आरोपी चोरी करे बर मित्तल परिवार के घर म पहुंचे रिहीन। फेर मकान मालिक के जागे ले मकान मालिक अउ उंखर गोसईन के हत्या कर दीन। हत्या के बाद आरोपी मन ल रूपिया ले भरे बैग मिलीस, जेला लेके ओमन उहां ले भाग गे। घटना म सामिल एक आने अरोपी ल पुलिस ह अभी गिरफ्तार नइ कर पाय हे।
हाथी आतंक
बिलासपुर जिला म मरवाही वन परिक्षेत्र के बेलझिरिया गांव म चालीस ठिन हाथी के दल पहुंचे ले गांव के लोगन म दहसत के माहौल हवय। ए हाथी मन फसल ल नकसान पहुंचाय हे। वन विभाग के करमचारी हाथी मनके निगरानी करत हे अउ जंगल कोति खदेड़े म जुटे हवय।
ओति, राजनांदगांव जिला के राजादंड जंगल म घलो जंगली हाथी आय के खबर हवय। ए हाथी मन ह पाछु दू-तीन दिन म मोहला क्षेत्र के कच्चा मकान अउ फसल ल नकसान पहुंचाय हे।
जीपी सिंह-राहत
प्रदेस के निलंबित आईपीएस अधिकारी जी.पी. सिंह ल दुरूग जिला म उंखर खिलाफ दरज मामला म गिरफ्तारी ले सर्वोच्च न्यायालय ह अभी राहत दे देहे। ए मामला म शीर्ष अदालत ह राज्य सरकार ल नोटिस जारी करके जुवाब मांगे हे।