मन की बात
प्रधानमंत्री नरेन्द्र मोदी ह किहीन हे कि नंदियां ह जीयत इकाई हरय। आकाशवाणी ले ‘‘मन की बात‘‘ कारीकरम म श्री मोदी ह नंदियां मनके महिमा बतावत एला बचाय के होवत परयास ल सहरईन। आज विश्व नदी दिवस के मउका म ओमन किहीन कि भारतीय परंपरा म नंदियां ल महतारी केहे गेहे।
प्रधानमंत्री ह किहीन कि देसवासी मन मांघ महीना म गंगा अउ आने नंदियां तीर कल्पवास करथे। ओमन किहीन कि भारत के कई ठिन रीति-रिवाज ह जल संरक्षण ले घलो जुड़े हवय। ओमन यहू किहीन कि जउन तरह ले सौचालय बनाय ले गरीब मनके गरिमा बाढ़े हवय, उही तरह आर्थिक स्वच्छता ह गरीब मनके अधिकार ल तय राखथे।
‘‘मन की बात‘‘ कारीकरम म प्रधानमंत्री ह बतईन कि यूपीआई ले पाछु महीना अगस्त म तीन सौ पचपन करोड़ ले जादा लेनदेन होय हे अउ पंडित दीनदयाल उपाध्यय के जयंती मउका म सुरू होय आयुष्मान भारत योजना ह हाले म अपन तीन बछर पूरा कर लेहे। श्री मोदी ह किहीन कि कोविड महामारी ह देसवासी मन ल बहुत कुछ सिखईस। एखर ले लोगन म स्वास्थ्य बर जागरूकता बाढ़े हे। उहें, हमर देस म पारंपरिक रूप ले प्राकृतिक उत्पाद भरपूर हे, जेला बढ़ावा देके परयास करे जात हे।
गृह मंत्री-वामपंथी उग्रवाद बैठक
आज नई दिल्ली म वामपंथी उग्रवाद ल लेके एक ठिन समीक्षा बइठका होईस, जेखर पगरइति केन्द्रीय गृहमंत्री अमित शाह ह करीन। बइठका म बोलत केन्द्रीय गृहमंत्री ह किहीन कि प्रधानमंत्री नरेन्द्र मोदी के अगुवई म केन्द्र सरकार ह हर हाल म नक्सल प्रभावित क्षेत्र के विकास करना चाहत हे। ओमन किहीन कि जउन मन हथियार छोड़के लोकतंत्र के हिस्सा बनना चाहत हे, उंखर अनतस ले स्वागत हे। फेर, जउन मन हथियार उठा के निरदोष मनखे अउ पुलिस ल आहत करही, ओमन ल वइसने ही जवाब दे जाही।
श्री शाह ह राज्य मन ले आग्रह करीन कि वामपंथी उग्रवाद ले निपटे बर परभावित राज्य के मुख्य सचिव ह कम से कम हर तीन महीना म पुलिस महानिदेशक अउ केन्द्रीय एजेंसी के अधिकारी मन संग समीक्षा बइठका करय। श्री शाह ह बतईन कि वामपंथी उग्रवाद के घटना म जिहां तेईस प्रतिसत के कमती होय हे अउ मउत के संख्या म इक्कीस प्रतिसत कमती होय हे।
अमृत महोत्सव-स्वच्छता सम्मान
आजादी के अमृत महोत्सव के चलत पंचायत अउ ग्रामीण विकास मंत्री टी.एस. सिंहदेव ह वीडियो कान्फ्रेंसिंग के माध्यम ले राज्य के सरपंच मन संग साफ-सफई के मुद्दा उपर गोठबात करीन। ओमन सरपंच मन ले योजना के लागू करे म आवत समस्या के जानबा लीन अउ ओखर हल घलो बतईन। श्री सिंहदेव ह सबो गंवई ल खुला म सौच मुक्त बनाय के संगे पंचायत ल प्लास्टिक मुक्त बनाय के अपील करीन। ए स्वच्छता संवाद म करीबन दू हजार सरपंच म भाग लीन। संगे सबो जिला के मुख्य कार्यपालन अधिकारी-सीईओ मन घलो सामिल होईन।
ऐति, भारत सरकार के सूचना अउ प्रसारण मंत्रालय के क्षेत्रीय लोकसंपर्क कार्यालय बिलासपुर डहार ले आजादी के अमृत महोत्सव बिसय पर काली सत्ताईस सितंबर के मुंगेली जिला के सरदार वल्लभ भाई पटेल सभगार म एक दिन वाले समेकित लोक संपर्क कारीकरम राखे गेहे।
केन्द्रीय राज्यमंत्री-पंडो जनजाति
केन्द्रीय राज्यमंत्री रेणुका सिंह ह सरगुजा संभाग के बलरामपुर जिला के वाड्रफनगर ब्लॉक स्थित बैकुंठपुर गांव म वन विभाग के अधिकारी अउ कर्मचारी डहार ले बिसेस संरक्षित पंडो जनजाति के बाईस झिन के घर-दुवार ल कथित रूप ले तोड़फोड़ करके ध्वस्त करे के घटना उपर भारी रिस देखईन। ओमन ए पूरा मामला के उच्च स्तरीय जांच करके सबो दोसी मन उपर कठोर दंडात्मक कार्रवाई के मांग करीन हे।
चक्रवाती तूफान/गुल-आब
मौसम विभाग ह चक्रवाती तूफान गुल-आब बर रेड अलर्ट जारी करे हे। ए तूफान ह पाछु छह घंटा के दउरान पश्चिम डहार बाढ़ के उत्तर-पश्चित अउ तीर-तखार के पश्चिम मध्य बंगाल के खाड़ी म केन्द्रित हवय।
गुल-आब चक्रवात आज संझा गोपालपुर अउ कलिंगपटनम के बीच तट ले टकराय हे, जेखर परभाव ले छत्तीसगढ़ के बस्तर संभाग म तेज हवा चले के संग संभाग के सब्बो जिला म बड़ भारी बरसा हो सकत हे। मौसम विभाग ले मिले जानकारी मुताबिक ए चक्रवात ह कमजोर होके अवदाब के रूप म काली बिहनिया बस्तर जिला म प्रवेस कर सकत हे। जेखर चलत सुकमा, बीजापुर, दंतेवाड़ा अउ बस्तर जिला म कोनो-कोनो जघा झमाझम बरसा हो सकत हे। उहें, कोंडागांव, कांकेर, बालोद, धमतरी अउ गरियाबंद जिला म घलो रजरजहा पानी गिरे के चेतावनी दे गेहे। एखरे संगे दुरूग अउ रईपुर संभाग के जिला मन म घलो थोरबहुत ले जादा बरसा हो सकत हे।
जर्जर स्कूल-मरम्मत
राज्य के स्कूल सिक्षा विभाग ह प्रदेस म जर्जर स्कूल भवन मन ल तुरते मरम्मत कराय के निरदेस कई ठिन जिला के कलेक्टर अउ जिला सिक्षा अधिकारी ल देहे। कोनों-कोनों जगह म स्कूल बिल्डिंग के हालत जर्जर होगे, जउन ह बरसा अउ आने कंडिसन म लइका अउ सिक्षक मन बर खतरा बन सकत हे। कलेक्टर अउ डीईओ मन ले केहे गेहे कि एक हफ्ता भीतरी सब्बो जिला के ए स्कूल मनके के निरीक्षण करवा के जर्जर बिल्डिंग के तत्काल मरम्मत कराय जाय।
एखर संगे स्कूल सिक्षा विभाग ह कक्षा छठवीं ले बारहवीं म पढ़ईया स्कूली लइका मन ल अंग्रेजी अउ गणित म कुसल बनाय बर एनआईसी के सहयोग ले तुरते टेली प्रेक्टिस कारीकरम सुरू करे के घलो निर्णय लेहे।
साल इंटरनेशनल ट्राईबल फेस्टिवल
ए बछर ले आदिवासी महोत्सव के नाम ‘‘साल इंटरनेशनल ट्राईबल फेस्टिवल‘‘ राखे के निर्णय ले गेहे। मुख्यमंत्री भूपेश बघेल ह किहीन कि साल छत्तीसगढ़ के राजकीय वृक्ष हरय अउ आदिवासी संस्कृति म साल रूख के बड़भारी महत्ता हे। आदिवासी जन साल रूख ल देवता बरोबर मानथे अउ पूजा करथे। इही महत्तम ल देखत ट्राईबल फेस्टिवल के नाव ‘‘साल इंटरनेशनल ट्राईबल फेस्टिवल‘‘ राखे गेहे।
ए ट्राईबल फेस्टिवल के संगे राज्योत्सव ल अट्ठाईस अक्टूबर ले एक नवंबर तक रईपुर के साइंस कॉलेज मैदान म संघरा रूप म आयोजन करे जाही। ए दउरान आदिवासी मनके कला, संस्कृति अउ शिल्प वाले कई ठिन कारीकरम होही। उहें, एक नवंबर के राज्य अलंकरण समारोह म छत्तीसगढ़ के कला, संस्कृति विकास समेत कई ठिन क्षेत्र म बिसेस योगदान देवइया नामी मनखे अउ संस्था मन ल राज्य अलंकरण ले सम्मानित करे जाही।
विश्व फॉर्मासिस्ट दिवस
राज्य सरकार ह प्रदेस म वन औषधि ले जुड़े उद्योग लगाय हर तरह के सहायता दीही। एखर बर कच्चा माल, भूईंया, श्रम अउ जरूरी अधोसंरचना मुहैया कराय जाही।
मुख्यमंत्री भूपेश बघेल ह काली रईपुर के पंडित दीनदयाल उपाध्याय सभागार म विश्व फॉर्मासिस्ट दिवस मउका म राखे गे कान्फ्रेंस म बोलत ए बात किहीन। ओमन फॉर्मासिस्ट मन ल आरो देवत किहीन कि छत्तीसगढ़ म वन औषधि बड़भारी मात्रा म हवय, तेखर सेती ओमन इहां दवा अउ वन औषधि ले जुड़े उद्योग लगाय बर आगू आवय।
लोकवाणी
मुख्यमंत्री भूपेश बघेल ह लोकवाणी म ए बखत ‘‘जिला स्तर पर विशेष रणनीति से विकास की नई राह‘‘ यानि जिला स्तर म बिसेस रणनीति ले विकास के नवा रद्दा बिसय के भाग-दू जेमा कुछु अउ नवाचार, नवा कदम, अउ नवा योजना ल लेके गोठबात करही। ए बारे म सुनइया मन आकाशवाणी रईपुर के दूरभाष नंबर – शून्य-सात-सात-एक – दो-चार-तीन-शून्य-पांच-शून्य-एक, पांच शून्य दो अउ पांच शून्य तीन म सत्ताईस, अट्ठाईस अउ उनतीस सितंबर के मंझनिया तीन बजे ले चार बजे भीतरी फोन करके अपन सवाल रिकॉर्ड करा सकत हे। मुख्यमंत्री के मासिक रेडियोवार्ता ‘‘लोकवाणी के बाईसवां कड़ी के प्रसारण अवइया दस अक्टूबर के होही, जेला छत्तीसगढ़ स्थित आकाशवाणी के सब्बो केन्द्र, एफ.एम. रेडियो अउ क्षेत्रीय समाचार चैनल मन ले बिहनिया साढ़े दस बजे ले प्रसारित करे जाही।