मुख्यमंत्री-उर्जामंत्री मांग
मुख्यमंत्री भूपेश बघेल ह रिवेम्प्ड डिस्ट्रीब्यूशन सेक्टर स्कीम ल राज्य म लागू करे के योजना म सैद्धांतिक सहमति दे देहे।
मुख्यमंत्री ह आज अपन निवास कार्यालय ले वीडियो कॅान्फ्रेसिंग ले केंद्रीय उर्जा मंत्री श्री राजकुमार सिंह ले गोठबात करत रीहिन। ए बेरा म श्री बघेल ह योजना ल सैद्धांतिक सहमति देत आने राज्य के डहार ले बिजली सबसिडी के भुगतान बर जादा समय सीमा दे जाय के मांग करे के घलो समर्थन करीन।
ओमन ह कीहिन हे कि ए स्कीम के चलत प्रदेश म विद्युत अधोसंरचना ल बढ़ाये के संगेसंग एखर आधुनिकीकरण करे जाही। ए योजना म कृषि उपभोक्ता मन ल छोड़के सबो उपभोक्ता मनके इंहा स्मार्ट मीटर लगाये जाही।
आयुष्मान कार्ड
आयुष्मान भारत प्रधानमंत्री जन आरोग्य योजना के तीन बछर पूरा होय म देशभर म आयुष्मान पखवाड़ा के आयोजन करे जात हे। इही कड़ी म प्रदेश म अवइया तीस सितंबर तक आयुष्मान पखवाड़ा के चलत निशुल्क आयुष्मान कार्ड बनाये जात हे। प्रदेश म अब तक छियांसी प्रतिशत परिवार तक ये योजना ल पहुंचाय जा चुके हे।
छत्तीसगढ़ म सोला सितंबर दू हजार अठारा ले शुरू होय आयुष्मान भारत प्रधानमंत्री जन आरोग्य योजना डॅाक्टर खूबचंद बघेल स्वास्थ्य सहायता योजना के चलत सबो जगा म सुघ्घर काम करे गेहे। राज्य म आपके द्वारा आयुष्मान अभियान के चलत लगभग एक करोड़ पांच लाख हितग्राही मनके आयुष्मान कार्ड के पंजीयन करे जा चुके हे।
जानबा के अनुसार ए अभियान के चलत छत्तीसगढ़ ह पूरा देश म कीर्तिमान रचत पच्चीस मार्च दू हजार इक्कीस के एक दिन म छै लाख छब्बीस हजार ले जादा आयुष्मान कार्ड पंजीयन कराय के रिकार्ड बनाये रीहिस। राष्ट्रीय स्वास्थ्य प्राधिकरण के आंकड़ा के अनुसार आयुष्मान कार्ड पंजीयन के मामला म छत्तीसगढ़ देश म तीसरा स्थान म हवय।
कोदो कुटकी समर्थन मूल्य
प्रदेश के चौदह ठिन जिला म समर्थन मूल्य म कोदो कुटकी के खरीदी करे जाही। उंहें ए जिला के गोठान मन म कोदो के प्रसंस्करण केंद्र घलो बनाये जाही। अउ प्रसंस्कृति कोदो के बाजारीकरण के घलो बने बेवस्था करे जाही। कोदो कुटकी के उत्पादन करइया जिला म बस्तर संभाग के सात ठिन जिला, सरगुजा संभाग के पांच जिला, राजनांदगांव अउ कवर्धा जिला शामिल हे ।
कोविड टीका समाचार
छत्तीसगढ़ म कोरोना ले बचे बर अब तक एक करोड़ चौहत्तर लाख चालीस हजार ले जादा टीका लगाये जा चुके हे। एमा एक करोड़ उनतीस लाख अठारा हजार ले जादा मनखे मन ह पहिली डोज अउ पैंतालिस लाख इक्कीस हजार ले जादा लोगन मन ह दूनो डोज लगवा लेहे।
उंहें बलौदाबाजार जिला म तेजी ले टीकाकरण होवत हे। पाछू पांच दिन म औसतन पंद्रह हजार टीका हर रोज लगाये जात हे। जिला म कुल दस लाख दू सौ तिहत्तर लोगन मन ल टीका लगाये के लक्ष्य राखे गेहे।
इही बीच प्रदेश म कोरोना संक्रमण के दर ह सरलग कमी होवत हे। अउ औसत पॉजीटिवीटी दर ह शून्य दशमलव शून्य नौ प्रतिशत म आगे हे। प्रदेश म काली कोरोना संक्रमण के छब्बीस ठिन नवा मामला आगू आय हे।
उंहें काली राज्य के पंद्रह जिला म कोरोना संक्रमण के एक भी मामला आगू नइ आय हे। इही बीच मुख्यमंत्री भूपेश बघेल ह कीहिन हे कि कोरोना के लड़ाई म प्रदेश के सबो वर्ग ह जउन तरीका ले सहयोग अउ एकजुटता दिखाइन हे ओखर सेती आज प्रदेश ह कोरोना संक्रमण ले सुरक्षित हवय।
अमृत महोत्सव क्विज
आजादी के अमृत महोत्सव के चलत प्रादेशिक समाचार एकांश आकाशवाणी रायपुर डहार ले छै अगस्त ले एक ठिन प्रश्नोत्तरी कार्यक्रम शुरू करे गेहे। एखर चलत छत्तीसगढ़ म स्वाधीनता संग्राम के बेरा होय घटना के अलावा राज्य के स्वाधीनता सेनानी अउ समाज सुधारक मनले सवाल पूछे जात हे।
ए कार्यक्रम के चलत काली आकाशवाणी रायपुर ले प्रसारित होवइया छत्तीसगढ़ी अउ इंग्लिश बुलेटिन म सवाल पूछे जाही। दूनों बुलेटिन म पूछे गे सवाल के आधार म सबले पहिली सही जवाब देवइया एक-एक विजेता के चयन करे जाही।
सौ दिन सौ कहानिया
राज्य के स्कूल म लईका मनके पढ़ई ल अउ अच्छा करे बर सौ दिन सौ कहानियां कार्यक्रम चलाये जाही। जेखर चलत मीडिल स्कूल के लईका मनके कहानी पढ़े के तेजी अउ ओला समझके सवाल के जवाब देके क्षमता के अध्ययन करके डाटा इकट्ठा करे जाही।
समग्र शिक्षा के जिला मिशन समन्वयक मनके डहार ले ए जानकारी ल गूगल फार्म म राज्य परियोजना कार्यालय समग्र शिक्षा ल भेजे जाही। ए कार्यक्रम के चलत संकुल ले जिला स्तर तक प्रतियोगिता के आयोजन बर दिन तय करे गेहे। जेमा सबो लइका मन ल शामिल करे के निर्देश जिला मिशन समन्वयक मन ल दे गेहे। प्रतियोगिता बर तय करे गे तिथि म मीडिल स्कूल म बीस दिसंबर म संकुल स्तर म आयोजित होही।
तेंदूपत्ता संग्रहण भुगतान
प्रदेश म चालू वित्तीय बछर के बेरा तेंदूपत्ता संग्रहण करे वाले बारा लाख चौदा हजार ले जादा संग्राहक मन ल पांच सौ बाईस करोड़ रूपिया के भुगतान कर दे गेहे। अब तक करीबन तेरा लाख पांच हजार ले जादा मानक बोरा तेंदूपत्ता के संग्रहण करे गेहे।
वनमंत्री मोहम्मद अकबर ह बताइन हे कि एखर ले राज्य के आदिवासी, वनवासी सहित तेंदूपत्ता संग्राहक मन ल कोरोना संकट के विषम परिस्थिति म रोजी रोटी के कोनो प्रकार के समस्या नइ आइस अउ वनवासी मन ल एखर ले बड़ सहारा मिले हे। ए बछर राज्य म सबले जादा तेंदूपत्ता संग्रहण करे वाले पांच मंडल म- पूर्व भानुप्रतापपुर, बलरामपुर, सुकमा, भानुप्रतापपुर पश्चिम अउ बीजापुर शामिल हवय।
हरिहर वैष्णव निधन
बस्तर के लोक साहित्यकार हरिहर वैष्णव के आज निधन होगे । श्री वैष्णव ह बस्तर के लोक जीवन म आधारित आदिवासी संस्कृति जनजाति म प्रचलित कहानी अउ गीत ल लिपिबद्ध करे रीहिन। संगेसंग बस्तर के स्थानीय बोली हल्बी, भतरी म घलो ओमन ह साहित्य के सृजन करीन।
मुख्यमंत्री भूपेश बघेल ह बस्तर के साहित्यकार हरिहर वैष्णव के निधन म शोक व्यक्त करीन हे। ओमन ह कीहिन कि ए ह साहित्य जगत बर एक ठिन अपूरणीय क्षति हवय।
पंडो जनजाति मौत
बलरामपुर-रामानुजगंज जिला के रामचंद्रपुर विकासखंड म आने-आने बीमारी ले पाछू छै महीना म पंडो जनजाति के बीस झिन मनखे के मउत होगे। जिला के मुख्य चिकित्सा अउ स्वास्थ्य अधिकारी ह बताइन हे कि एमा ले साठ ले अस्सी बछर के छै झिन सियनहा मनके मउत लकवा अउ आने बीमारी ले होय हे। उंहें लीवर संबंधित बीमारी के सेती चार झिन मनखे के मउत होय हे। दिल के दौरा पड़े ले तीन अउ निमोनिया के सेती दू लोगन के मउत होगे। बाकि मनखे के आने आने बीमारी ले मउत होय हे।
ओमन ह बताइन हे कि मरने वाला लोगन मनके इलाज स्थानीय अस्पताल अउ अंबिकापुर मेडिकल कॉलेज अस्पताल म चलत रीहिस। ओमन ह बताइन कि विशेष पिछड़ा जनजाति समुदाय बर विशेष कार्ड बनाये के पहल करे गेहे। संगेसंग जिला के सबो पंडो अउ पहाड़ी कोरवा के रहइया जगा म विशेष स्वास्थ्य अउ जन जागरूकता शिविर के आयोजन घलो करे जात हे।
वृद्धजन दिवस आयोजन
समाज कल्याण विभाग डहार ले एक अक्टूबर के अंतर्राष्ट्रीय वृद्धजन दिवस म सियनहा मन बर आने-आने कार्यक्रम आयोजित करे जाही। ए दिन रायपुर म राज्य स्तरीय आयोजन होही। जेमा खेल, साहित्य, संगीत, अभिनय, नाच-गाना, कोरोना वारियर के रूप म ख्याति प्राप्त वरिष्ठ नागरिक मन ल सम्मानित करे जाही।
ए मउका म सियनहा मन बर खेल प्रतियोगिता के घलो आयोजन होही। सबो जिला म अधिकारी मनले सियनहा मन बर पच्चीस सितंबर तक जिला स्तरीय खेलकूद प्रतियोगिता आयोजित करे बर केहे गेहे।