वाणिज्य उत्सव
आजादी के पचहत्तरवां वर्षगांठ के मउका म आज ले रायपुर म दू दिन के वाणिज्य उत्सव के आयोजन करे जात हे। मुख्यमंत्री भूपेश बघेल ह आज ये उत्सव के शुभारंभ करीन।
ये बेरा म बोलत मुख्यमंत्री ह कीहिन कि छत्तीसगढ़ म प्राकृतिक संसाधन अउ खनिज भरपूर मात्रा म हवय जेखर सेती इंहा उद्योग अउ व्यापार के संभावना हवय। ओमन कीहिन कि छत्तीसगढ़ लैण्डलॉक प्रदेश होय के सेती इंहा के उत्पाद ल बाहिर भेजे बर कार्गो के सुविधा जरूरी हवय। मुख्यमंत्री ह कीहिन कि भारत सरकार ले छत्तीसगढ़ म एयर कार्गो के सुविधा देवाय के आग्रह करे गेहे।
मुख्यमंत्री गोधन न्याय योजना
मुख्यमंत्री भूपेश बघेल ह गोधन न्याय योजना म आज पशुपालक मन ल गोबर बिसाय के रकम अउ गोठान समिति, स्व सहायता समूह ल उंखर लाभांश के राशि बांटिन।
रायपुर म राखे गे एक ठिन कार्यक्रम म ओमन पांच करोड़ चोबीस लाख के रकम हितग्राही मनके बैंक खाता म भेजीन। ये बेरा म मुख्यमंत्री ह कीहिन कि गोधन न्याय योजना ले महिला सशक्तिकरण, किसान मनके आमदनी म बढ़वार, पशुधन विकास अउ कृषि लागत म कमी जइसन कतकोन लक्ष्य पूरा होवत हे।
ओमन बताइन कि योजना म राज्य म अब तक इंक्यावन लाख कुंटल ले जादा गोबर बिसाय गेहे।
कोविड टीका/समाचार
प्रदेश म कोरोना संक्रमण के मामला म सरलग कमी आवत हे। काली दरज करे गे आंकड़ा के मुताबिक कोरोना के सक्रिय मरीज के संख्या तीन सौ ले नीचे पहुंच गेहे। औसत पॉजीटिवीटी दर शून्य दशमलव एक छै प्रतिशत होगे हे।
काली राज्य के पंद्रह ठिन जिला म कोरोना संक्रमण के एको ठिन नवा मामला आगू नइ आइस। उंहें प्रदेश म काली कुल अड़तीस नवा कोरोना संक्रमित करीज मिले हे।
इही बीच महासमुंद जिला म शासकीय उच्चतर माध्यमिक विद्यालय बकमा के पांच झिन लईका कोरोना पॉजीटिव पाय गेहे। सुरक्षा ल देखत स्कूल ल हप्ता भर बर बंद कर दे गेहे। संक्रमित लईका मनके इलाज होम आइसोलेशन म होवत हे। उंहें कोरिया जिला म काली ले सघन कोरोना टीकाकरण अभियान शुरू करे गेहे। शत प्रतिशत टीकाकरण के लक्ष्य के संग ये अभियान म काली पहिली दिन करीबन ग्यारा हजार टीका लगाये गीस। जिला कलेक्टर श्याम धावड़े ह काली कछार, मधला, लटमा, अउ सुंदरपुर समेत कई ठन आने गांव म पहुंच के उंहा के लोगन ल जागरूक करीन।
क्वांटीफायबल डाटा आयोग दौरा
प्रदेश के जनसंख्या म आने पिछड़ा वर्ग अउ आर्थिक रूप ले कमजोर वर्ग के सर्वे करे खातिर बनाये गे क्वांटीफायबल डाटा आयोग ह आज ले बिलासपुर जांजगीर-चांपा, अउ रायगढ़ जिला के दउरा म हावय।
ये बेरा म आयोग के सदस्य आने पिछड़ा वर्ग अउ आर्थिक रूप ले कमजोर वर्ग के संगठन अउ प्रतिनिधि मन संग सर्वे के संबंध म गोठबात करही। डाटा आयोग आज सबले पहिली बिलासपुर पहुंचही, जिहां ले जांजगीर जाय के कार्यक्रम हवय।
माओवादी आत्मसमर्पण
सुकमा जिला म एक माओवादी दंपत्ति ह पुलिस के आगू आत्मसमर्पण करीस हे। एमा पुरूष माओवादी केरलापाल एरिया के एलओएस कमांडर रीहिस। ओखर घर गोसईन माओवादी संगठन म डिप्टी कमांडर के रूप म सक्रिय रीहिस। ए दूनो उपर सात लाख रूपिया के इनाम घोषित रीहिस संगेसंग कई ठन बड़े वारदात म शामिल रेहे के आरोप हवय। ए माओवादी मन ह जिल पुलिस अधीक्षक सुनील शर्मा के आगू आत्मसमर्पण करीन हे।
अमृत महोत्सव-क्विज
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – पूना समझौता कोन-कोन दू झन नेता के बीच होय रीहिस।
ये प्रश्न के उत्तर वाट्सअप नंबर – आठ आठ दू छै पांच चार छै दो छै दो – या ई-मेल अमृत महोत्सव क्विज एट द रेट जी मेल डॅाट कॉम म भेजयं।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही।
इही बीच आजादी के अमृत महोत्सव कार्यक्रम म नारायणपुर जिला के ग्राम पंचायत पालकी म स्वच्छता अभियान चलाये गीस। जिला कलेक्टर धर्मेश साहू के अगवई म स्वच्छता समूह ह घर-घर जाके कचरा इकट्ठा करीन। ये बेरा म गांव के लोगन ल सूखा अउ गीला कचरा के महत्ता बताये गीस। कार्यक्रम म गांव के लोगन ल साफ-सफाई कोति जागरूक रेहे अउ कोरोना ले बचाव नियम के पालन करे के शपथ देवाय गीस।
बच्चे बीमार शिशु वार्ड शुभारंभ
सूरजपुर जिला म लईका मन म वायरल बुखार के बीमारी फैले के खबर मिले हे। खबर के मुताबिक जिला अस्पताल म ये बखत वायरल ले पीड़ित करीबन सत्तर झिन लईका के इलाज चलत हवय। एला देखत स्वास्थ्य विभाग अउ जिला प्रशासन कोति ले एहतियात बरते जावत हे। जिला के मुख्य स्वास्थ्य चिकित्सा अधिकारी डॅाक्टर आर.एस. सिंह ह बताइन कि सबो लईका सर्दी, ख्ांसी अउ बुखार ले पीड़ित हवय। ये लईका मनके कोरोना जांच कराय गे हवय, फेर कोनो भी कोरोना पॉजीटिव नइ हे।
जिला कलेक्टर गौरव सिंह ह बताइन कि प्रशासन कोति ले हालत म सरलग निगरानी राखे जात हे। अइसने कोरिया जिला म घलो बड़ संख्या म लईका मन सर्दी, खांसी अउ बुखार के चपेट म हवय। एला देखत स्वास्थ्य विभाग कोति ले चौंतीस बिस्तर वाले शिशु वार्ड के शुभारंभ करे गेहे।
संसदीय सचिव अंबिका सिंहदेव ह ए शिशु वार्ड के उद्घाटन करीन। ये बेरा म मुख्य चिकित्सा अउ स्वास्थ्य अधिकारी डॅाक्टर रामेश्वर शर्मा ह एक बयान जारी कर बताइन कि मौसमी बीमारी ले कोनो लइका के मउत नइ होय हे। पाछू दिन तीन झिन लईका के मउत आने बीमारी ले होय रीहिस। ओमन कीहिन कि जिला चिकित्सालय म ऑक्सीजन अउ दवई के पूरा बेवस्था हवय।
मौसम
अवइया चौबीस घंटा म सरगुजा, बिलासपुर, दुर्ग, अउ रायपुर संभाग के कुछएक जगा म भारी बरसा होय अउ गाज गिरे के चेतावनी दे गेहे।
मौसम विज्ञान केंद्र के मुताबिक एक निम्न दाब के क्षेत्र पश्चिम बंगाल अउ ओखर तीर तखार म हवय। एखर संगेसंग उपरी हवा म एक चक्रवाती घेरा बने हे। उंहें मानसून द्रोणिका घलो सक्रिय हावय। जेखर प्रभाव ले राज्य के कतको जगा म काली गरज-चमक संग छींटा बौछार होय के संभावना हवय।
अउ अब थोरकुन समाचार सार म-
– दुर्ग जिला के दउरा के बेरा काली सेलुद म राखे गे एक ठिन कार्यक्रम म मुख्यमंत्री ह बेमेतरा म छियानबे लाख रूपिया के लागत ले सहकारी बैंक के नवा भवन बनाये के घोषणा करीन।
– कबीरधाम जिला म सरकारी नौकरी लगाय के नाव म करीबन साढ़े सात लाख रूपिया के ठगी करे के आरोप म पुलिस ह एक झिन आरोपी ल गिरप्तार करे हे।
– कोरिया जिला के खड़गवां क्षेत्र के कटकोना गांव म हाथी के हमला ले एक झिन गांव के मनखे घायल होगे। जंगली हाथी के दल ह गांव के घर म तोड़फोड़ कर दीन।
– अखिल भारतीय सिविल सेवा एथलेटिक्स प्रतियोगिता बर राज्य स्तरीय चयन स्पर्धा के आयोजन आज ले रायपुर म शुरू होगे हे। काली पंजीयन कराय के आखरी तारीख हवय।
– जांजगीर म आज ले तीन दिवसीय राज्य स्तरीय शालेय खेलकूद प्रतियोगिता होवत हे। एमा राज्य के पांच जोन ले खिलाड़ी संघरत हवय। ये प्रतियोगिता तेईस सितंबर तक चलही।
– दुर्ग के ट्रांसपोर्ट नगर के हथखोज तरिया म पाछू रतिहा एक मनखे बुड़ गे रीहिस। एनडीआरएफ के टीम ह आज भिनसरहा ये मनखे के शव तरिया ले बाहिर निकालिस।
अउ
– जगदलपुर पुलिस ह करीबन चोंतीस लाख रूपिया के गांजा बरामद करे हे। ये मामला म दू झिन आरोपी ल गिरप्तार करे हे।