कोविड समाचार
प्रदेश म कोरोना संक्रमण के मामला म कमती देखे जात हे। औसत पॉजीटिवीटी दर कम होके शून्य दशमलव शून्य आठ प्रतिशत पहुंच गेहे। काली राज्य के बीस ठिन जिला म कोरोना संक्रमण के एको मामला आगू नइ आय हे।
उंहें प्रदेश म कुल चौदा नवा कोरोना मरीज मिले हे। ए बेरा तीन सौ ले जादा मरीज मनके इलाज अस्पताल मन म चलत हे।
एति प्रदेश के जम्मों जिला मन म टीका लगाये के काम चलत हे। कोरोना ले बचाव बर कोरिया जिला म आज ले सघन कोविड टीकाकरण अभियान शुरू करे गेहे। जिला कलेक्टर ह बइठका राखके एसडीएम, जनपद पंचायत के सीईओ, नगरीय निकाय के अधिकारी अउ पंचायत के नोडल अधिकारी मन ल शत प्रतिशत टीका लगाय के निर्देश दे हवय। संगेसंग ओमन वन, आयुर्वेद अउ शिक्षा विभाग ल स्वास्थ्य विभाग के संग मिलके काम करे बर केहे हे।
सिंहदेव मेडिकल कॉलेज
चंदूलाल चंद्राकर मेमोरियल अस्पताल अउ मेडिकल कॉलेज म खाली एक हजार इकचालिस पद म जल्दीच भर्ती करे के काम शुरू करे जाही। स्वास्थ्य मंत्री टी.एस. सिंहदेव ह काली मेडिकल कॉलेज के संचालक मंडल के बइठका म ए बात कीहिन ।
बइठका म स्वास्थ्य मंत्री ह अस्पताल अउ कॉलेज के बेवस्था के जानबा लीन अउ जरूरी निर्देश दीन। संगेसंग मेडिकल कॉलेज म पढ़त एक सौ पचास छात्र मनके पढ़ई अउ पढ़ाये जात विषय मन म पीजी कोर्स शुरू करे के मंजूरी दीन।
भाटिया/जुदेव निधन
भाजपा के पूर्व मंत्री अउ विधायक राजेंद्र पाल सिंह भाटिया ह काली संझा राजनांदगांव जिला के छुरिया स्थित अपन घर म आत्महत्या कर लीन। पुलिस ह सुसाइड नोट बरामद करे हे। जेमा पेट के बीमारी के सेती आत्महत्या करे के बात लिखे हे। राजेंद्र पाल सिंह भाटिया ह भाजपा शासन म परिवहन मंत्री रीहिन अउ खुज्जी विधानसभा क्षेत्र ले तीन बार विधायक चुने गीस। बछर दू हजार तेरा म होय विधानसभा चुनई म भाजपा डहार ले टिकट नइ देके सेती ओमन निर्दलीय चुनाव लड़े रीहिन।
राज्यपाल, मुख्यमंत्री, विधानसभा अध्यक्ष, भाजपा के राष्ट्रीय उपाध्यक्ष के संगेसंग बड़का नेता मन ह श्री भाटिया के निधन म संवेदना व्यक्त करे हे। उंहें भाजपा के पूर्व विधायक अउ ब्रेवरेज कार्पोरेशन के अध्यक्ष रेहे युद्धवीर सिंह जुदेव के आज बंगलुरू म निधन होगे। ओमन पाछू दिन ले बीमार रीहिन । श्री जुदेव ह भाजपा के बड़का नेता स्वर्गीय दिलीप सिंह जुदेव के बेटा रीहिन। युद्धवीर िंसह जुदेव ह राजनीति म पंचायत सदस्य के रूप म शुरूआत करीन। जेखर बाद चंद्रपुर ले विधायक बनीन अउ संसदीय सचिव घलो रीहिन।
राज्यपाल, मुख्यमंत्री, भाजपा के प्रदेश प्रभारी अउ राष्ट्रीय उपाध्यक्ष ह श्री जुदेव के निधन उपर दुख व्यक्त करे हे।
सर्व आदिवासी समाज-प्रदर्शन
छत्तीसगढ़ सर्व आदिवासी समाज ह आज अपन आने आने मांग ल लेके कतकोन जिला मन म धरना प्रदर्शन करीन। धमतरी के राष्ट्रीय राजमार्ग तीस उपर आदिवासी मन ह चक्का जाम करीन। जेखर सेती ए रद्दा म अवई जवई प्रभावित होइस।
उंहें महासमुंद जिला के लहरौद पडाव के तीर घलो आदिवासी समुदाय के लोगन मन ह आने आने मामला म कार्रवाई करे के मांग ल लेके चक्का जाम करीन।
एति रायगढ़ म आदिवासी समाज ह अपन सतरा सूत्रीय मांग ल लेके धरना प्रदर्शन करीन अउ संगेसंग पाछू दिन शहर के एक ठिन स्कूल म होय हत्या म शामिल दोषी मनके खिलाफ कार्रवाई के मांग ल लेके सिटी कोतवाली के घेराव करीन।
अमृत महोत्सव-क्विज
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – कांग्रेस के कोन से सत्र म पूर्ण स्वराज के घोषणा करे गे रीहिस। ये प्रश्न के उत्तर वाट्सअप नंबर – आठ आठ दू छै पांच चार छै दो छै दो – या ई-मेल अमृत महोत्सव क्विज एट द रेट जी मेल डॅाट कॉम म भेजयं।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही।
अमृत महोत्सव-स्वच्छता रथ
आजादी के अमृत महोत्सव के तहत ए बेरा प्रदेश म कतकोन कार्यक्रम चलाये जात हे। राजनांदगांव म जिला अउ जनपद स्तर म स्वच्छता ले स्वच्छाग्रह रथयात्रा निकाले गीस। दू अक्टूबर तक ये रथ ह जिला के आने आने गांव म घूम के सरकार के स्वास्थ्य ले जुड़े जन कल्याणकारी योजना के प्रचार प्रसार करही। रथ के माध्यम ले गांव के लोगन मन ल साफ-सफई के बारे म घलो बताय जाही।
विनोद कुमार शुक्ल-फैलोशिप
हिंदी के जाने माने कवि अउ साहित्यकार विनोद कुमार शुक्ल ल साहित्य अकादमी के प्रतिष्ठित फैलोशिप दे गेहे। ए फैलोशिप साहित्य अकादमी डहार ले दे जाय बड़का सम्मान हरय। बछर उन्नीस सौ अड़सठ म सबले पहिली डॅाक्टर सर्वपल्ली राधाकुष्णन ल ये फैलोशिप देगे रीहिस।
जानबा के मुताबिक रायपुर के रहइया साहित्यकार विनोद कुमार शुक्ल के पहिली कविता संग्रह बछर उन्नीस सौ इकहत्तर म लगभग जयहिंद – नाव ले छापे गे रीहिस। बछर उन्नीस सौ उन्यासी म नौकर की कमीज नाव ले ओखर उपन्यास छपीस। कतकोन सम्मान ले सम्मानित हो चुके विनोद कुमार शुक्ल के रचना दीवार में एक खिड़की रहती थी – बर बछर उन्नीस सौ निन्यानबे के साहित्य अकादमी पुरस्कार दे जा चुके हे।
धर्मांतरण-भाजपा प्रदर्शन
धर्मांतरण के मामला म गिरप्तार भाजपा कार्यकर्ता ल छोड़े के मांग ल लेके काली पार्टी डहार ले रायपुर म जेल भरो आंदोलन करे जाही।
जानबा के मुताबिक पाछू दिन रायपुर के पुरानी बस्ती म पादरी डहार ले धर्म परिवर्तन कराय अउ ओखर अधिकार बताय के मामला म भाजपा कार्यकर्ता मनके संग हाथापाई होइस। जेखर बाद पुलिस ह कार्रवाई करत भाजपा के सात झिन कार्यकर्ता मनके खिलाफ अपराध दर्ज करके तीन झिन कार्यकर्ता मन ल जेल भेज दीन।
पार्टी के प्रदेश अध्यक्ष विष्णुदेव साय ह आज रायपुर जेल म कार्यकर्ता मन ले मिलीन।
मौसम
अवइया चौबीस घंटा के दउरान प्रदेश के कतकोन जगा म हल्का ले मध्यम बरसा के संगेसंग बूंदाबांदी होय के संभावना बताय गेहे।
त उंहें बिलासपुर, दुर्ग अउ रायगढ़ संभाग के एक दू जगा म गाज गिरे अउ भारी बरसा होय के चेतावनी दे गेहे। मौसम विभाग के मुताबिक एक ठिन उपरी हवा के चक्रीय चक्रवाती घेरा पूर्वी राजस्थान अउ ओखर तीर तखार म स्थित हे। उंहें मानसून द्रोणिका दक्षिण पूर्व अउ उत्तर पूर्व बंगाल के खाड़ी म बने हे। जेखर सेती प्रदेश म बरसा के स्थिति बनत हे।
अउ अब थोरकुन समाचार सार म-
– भारतीय रेलवे डहार ले ए बेरा स्वच्छता पखवाड़ा मनाये जात हे। आज स्वच्छ सेवा परिसर थीम उपर दक्षिण पूर्व मध्य रेलवे के जम्मों स्टेशन म विशेष साफ सफाई अभियान चलाये गीस।
– छत्तीसगढ़ व्यावसायिक परीक्षा मंडल डहार ले पीएटी, पीवीपीटी प्रवेश परीक्षा छब्बीस सितंबर के होही। एखर बर रायपुर म तेरा केंद्र बनाये गेहे।
– कर्मचारी चयन आयोग डहार ले छब्बीस सितंबर के कनिष्ठ अभियंता परीक्षा राखे गेहे।
– अखिल भारतीय सिविल सेवा एथलेटिक्स प्रतियोगिता बर राज्य स्तरीय चयन स्पर्धा के आयोजन काली अउ परनदीन रायपुर के कोटा स्थित स्टेडियम म राखे गेहे।
अउ
– राज्य स्तरीय शालेय खेलकूद प्रतियोगिता काली ले जांजगीर म होही। ए प्रतियोगिता म प्रदेश के पांच जोन के खिलाड़ी मन भाग लीहीं।