प्रधानमंत्री-जन्मदिन
प्रधानमंत्री नरेन्द्र मोदी के आज इकहत्तरवां जन्मदिन हे। ए दिन मुख्यमंत्री अउ प्रधानमंत्री के रूप म श्री मोदी के दू दसक के सेवा अउ सुसासन बर उंखर समर्पण के उत्सव मनाय के मउका घलो हे। आकाशवाणी अवइया दिन म आने-आने क्षेत्र म प्रधानमंत्री श्री मोदी के योगदान ल प्रस्तुत करही।
राष्ट्रपति रामनाथ कोविंद, उप राष्ट्रपति एम. वेकैंया नायडू, केन्द्रीय गृहमंत्री अमित शाह, केन्द्रीय सूचना अउ प्रसारण मंत्री अनुराग सिंह ठाकुर अउ छत्तीसगढ़ के मुख्यमंत्री भूपेश बघेल ह प्रधानमंत्री के जनम दिन म ओमन ल बधाई अउ सुभकामना देवत उंखर अच्छा स्वास्थ्य के कामना करीन हे।
भाजपा अध्यक्ष जे.पी. नड्डा ह प्रधानमंत्री नरेन्द्र मोदी के जनम दिन म आज नई दिल्ली म पार्टी मुख्यालय म सेवा अउ समर्पण अभियान के सुरूवात करीन। ए मउका म ओमन ह एक ठिन प्रदर्सनी अउ रक्तदान सिविर के उद्घाटन करीन।
उहें, प्रधानमंत्री नरेन्द्र मोदी के जन्म दिन के मउका म भारतीय युवा मोर्चा डहार ले रईपुर के प्रदेस भाजपा कार्यालय म ‘‘नवा भारत के युवा दर्शन‘‘ बिसय म संगोष्ठी के आयोजन करे गीस। संगेसंग राजधानी के मरीन ड्राईव म ‘‘नवा भारत प्रदर्शनी‘‘ घलो लगाय गे हवय। ए प्रदर्सनी उन्नीस सितंबर तक चलही। ए दउरान रक्तदान सिविर अउ स्वास्थ्य सिविर घलो आयोजित करे जाही।
उहें, भाजपा के रईपुर जिला इकाई डहार ले ‘‘सेवा ही समर्पण‘‘ कारीकरम म रईपुर रेलवे स्टेशन म सफाई अभियान चलाय गीस। संगेसंग फल घलो बांटे गीस।
ओति, जांजगीर म ‘‘सेवा ही समर्पण‘‘ कारीकरम म विधायक नारायण चंदेल ह दिव्यांग मन ल ट्रायसाइकिल अउ श्रवण यंत्र बांटीन।
खबर के मुताबिक अवइया बीस दिन तक भाजपा डहार ले प्रधानमंत्री श्री मोदी के जनम दिन के मउका म ‘‘सेवा ही समर्पण‘‘ के तहत कतकोन कारीकरम आयोजित करे जाही। ए दउरान स्वच्छता अउ गरीब मनके सेवा बर काम करे के संगेसंग गांव-गांव म जाके केन्द्र सरकार के योजना के जानकारी लोगन ल दे जाही।
महंगाई-भत्ता
राज्य के सरकारी कर्मचारी मनके महंगाई भत्ता म बढ़ोतरी करे गे हवय। मंत्रालय ले जारी आदेस के अनुसार राज्य के करमचारी मन ल एक जुलाई दू हजार इक्कीस ले सातवां वेतनमान म पांच प्रतिशत अउ छठवां वेतनमान म दस प्रतिशत उपरहा महंगाई भत्ता दे जाही। अइसने, अब राज्य सरकार के कर्मचारी मन ल सातवां वेतनमान म सत्रह प्रतिसत अउ छठवां वेतनमान म एक सौ चौंसठ प्रतिशत के दर ले महंगाई भत्ता मिलही। बाढ़े महंगाई भत्ता के रासि के भुगतान एक जुलाई दू हजार इक्कीस ले नगद रूप म करे जाही।
मुख्यमंत्री-व्यावसायिक शिक्षा
मुख्यमंत्री भूपेश बघेल ह आज प्रदेश के उच्चतर माध्यमिक विद्यालय म हायर सेकेंडरी के पढ़ई के संगेसंग आई.टी.आई. व्यावसायिक शिक्षा के संयुक्त पाठ्यक्रम के सुरूवात करीन। छत्तीसगढ़ माध्यमिक शिक्षा मंडल अउ राज्य व्यावसायिक प्रशिक्षण परिषद डहार ले संयुक्त रूप ले तैयार करे गे ए दू बछर के पाठ्यक्रम म कक्षा ग्यारहवीं अउ बारहवीं के पढ़ई के संगेसंग आई.टी.आई. कोर्स के पढ़ई घलो विद्यार्थी मन कर सकही। ए पाठ्यक्रम म बारहवीं के परीक्षा पास करइया विद्यार्थी मन ल हायर सेकेंडरी के संग आई.टी.आई. के प्रमाण पत्र घलो मिलही। एखर ले विद्यार्थी मनके समय अउ ऊर्जा के बचत होही। ए दू बछर के पाठ्यक्रम म पढ़ईया लइका मन ल कक्षा बारहवीं के प्रमाण पत्र माध्यमिक सिक्षा मंडल डहार ले दे जाही, जेखर ले ओमन ह उच्च सिक्षा म प्रवेस ले सकही। ए दूनों कोर्स एके संघरा चलही।
मुख्यमंत्री ह आज अपन निवास कार्यालय म वीडियो कान्फ्रेंसिंग के माध्यम ले दुरूग जिला के पाटन के स्वामी आत्मानंद स्कूल ले व्यावसायिक सिक्षा बर तैयार करे गे ए पाठ्यक्रम के सुरूवात करीन। छात्र मन बर वेल्डर ट्रेड अउ छात्रा मन बर स्टेनोग्राफी हिन्दी पाठ्यक्रम निर्धारित करे गेहे। ए मउका म मुख्यमंत्री ह किहीन कि छत्तीसगढ़ के लइका मन ह स्कूल म पढ़ई करे के संगेसंग हुनरमंद घलो बनही।
न्याय जनता के द्वार अभियान
छत्तीसगढ़ राज्य विधिक सेवा प्राधिकरण डहार ले आज ले प्रदेसभर म ‘न्याय जनता के द्वार‘‘ अभियान सुरू करे गेहे। एमा छत्तीसगढ़ उच्च न्यायालय के कार्यवाहक मुख्य न्यायधीश प्रशांत कुमार मिश्रा अउ हाईकोर्ट के सब्बो न्यायाधीश मन ह आज छत्तीसगढ़ उच्च न्यायालय परिसर ले दू ठन लीगल एड क्लीनिक बस ल हरा झंडा दिखाके रवाना करीन। ए बस ह राज्य के सब्बो जिला के दूरस्थ अंचल म जाके लोगन ल न्याय बर जागरूक करही।
कोविड टीका/समाचार
छत्तीसगढ़ म कोरोना ले बाचे बर टीकाकरण जोरशोर ले चलत हे। काली प्रदेस म दू लाख चौदह हजार ले जादा लोगन ल कोविड टीका लगाय गीस। राज्य म अभी तक करीबन एक करोड़ बाईस लाख लोगन ल पहिली डोज अउ उनचालीस लाख छियालीस हजार ले जादा लोगन ल दूसर डोज दे गे हवय। अइसने, प्रदेस म अभी तक कोविड वैक्सीन के एक करोड़ इकसठ लाख तिहत्तर हजार ले जादा डोज लगाय गे हवय।
इही बीच, प्रदेस म कोरोना संक्रमण के मामला म कमी आवत हे। राज्य म पॉजीटिविटी दर कमती होके सून्य दशमलव एक-एक प्रतिसत म पहुंच गे हवय।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर डहार ले आयोजित करे जावत प्रश्नोत्तरी कार्यक्रम के श्रृंखला के तहत आज के कड़ी के प्रश्न पूछे ले पहिली ए बताना चाहबो कि श्रोता मन ल एस.एम.एस. या ई-मेल के माध्यम ले अपन जवाब के संग अपन नाम अउ पता भेजना जरूरी हवय। जउन प्रतिभागी के जवाब बिना नाव अउ पता के मिलही, उंखर जवाब ल स्वीकार नइ करे जाही। त छत्तीसगढ़ी बुलेटिन सुनइया मन बर आज के सवाल हे-
‘‘झंडा सत्याग्रह बिलासपुर म कोन बछर म सुरू होय रिहीस।‘‘
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए.डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस ले भेज सकत हे।
जउन श्रोता के सही जुवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग जीतइया प्रतिभागी ल प्रादेशिक समाचार एकांश डहार ले ई-प्रमाण पत्र दे जाही।
अमृत महोत्सव-रेल कौशल विकास
इही बीच, आजादी के अमृत महोत्सव के तहत रेल मंत्री ह आज रेल कौशल विकास योजना के सुरूवात करीन। एमा रेलवे प्रशिक्षण संस्था मनके माध्यम ले पचास हजार युवा मन ल औद्योगिक कौशल म प्रशिक्षित करे जाही, जेखर लक्ष्य युवा मन ल आने-आने ट्रेड म सुघ्घर प्रसिक्षण देके उंखर रोजगारपरक विकास करना हे।
मौसम
प्रदेस म पाछु एक हफ्ता ले जारी तेज बरसा के दौर कुछ दिन बर थमत हे। मौसम विभाग के अनुसार एक ठिन निम्नदाब के क्षेत्र उत्तर-पश्चिम मध्यप्रदेश अउ ओखर ले लगे दक्षिण-पश्चिम उत्तरप्रदेश के उपर म हवय। एखर अवइया चौबीस घंटा म लगातार कमजोर पड़े के संभावना हे। अवइया चौबीस घंटा के दउरान प्रदेस के आने-आने जगह म हल्का ले मध्यम बरसा होय के अउ गरज चमक के संग छींटा पड़े के संभावना हे। फेर, बीस सितंबर ले एक घांव फेर छत्तीसगढ़ म जादा ले जादा जगह म हल्का ले मध्यम अउ कुछेक जगह म भारी बरसा होय के संभावना जताय गे हवय।
अउ अब थोरकुन समाचार सार म-
– मुख्यमंत्री भूपेश बघेल ह विश्वकर्मा जयंती के मउका म आज अपन निवास म भगवान विश्वकर्मा के पूजापाठ करके प्रदेस के सुख, समृद्धि के कामना करीन।
अउ
– राजीव गांधी किसान न्याय योजना म समर्थन मूल्य म धान बेचे अउ खरीफ फसल के खेती बर सहायता रासि के फायदा ले बर किसान मन ह अब इकतीस अक्टूबर तक पंजीयन करा सकही।