आज दिनभर के खबर ल अपन गुरतुर छत्तीसगढ़ी भाखा म पढ़व

बारिश-मौसम-01

प्रदेस म पाछू तीन-चार दिन ले सरलग होत बारिस के सेती कई ठिन जिला म लोगन मनके जीना दूभर होगे हे। उहें, नदिया के जलस्तर बाढ़े अउ जलासय ले पानी छोड़े के सेती आने-आने रद्दा म अवई-जवई घलो परभावित होय हे।
बिलासपुर जिला म सरलग होत बारिस के बीच अरपा-भैंसाझर बांध ले पानी छोड़े गीस, जेखर सेती नदिया के तीर-तार के बस्ती म पानी घुसे के खबर हे। परसासन अउ नगर निगम ह जोन-एक, तीन, पांच, छह, सात अउ आठ म स्कूल अउ सामुदायिक भवन ल राहत सिविर म बदल देहे। इहां करीबन सौ झिन परिवार ल रोके गेहे।
इहीं बीच, बूटापारा के टापू म तीन परिवार के मनखे मनके फंसे होय के खबर हावय। समाचार लिखे जाय तक ए परिवार ल सुरक्षित बाहिर निकाले जाय के परयास करे जात हे। उहें, ग्राम पंचायत सोनसाय-नवागांव के ग्रामीण मन ले मिले सूचना के आधार म अरपा नदी के बाढ़ म फंसे एक झिन सियनहा समेत तीन झिन लोगन ल बचा लेहे।
ओती, कोरबा जिला के मिनीमाता बांगो बांध के जलस्तर ह तेजी ले बाढ़त हे। अभी के बेरा म बांध म तीन सौ अंठावन दसमलव तीन-सून्य मीटर तक पानी भर चुके हे। जलभराव ल देखत बांध के तीन ठिन दरवाजा ल खोल दे गेहे। परसासन ह बांध के नीचे के क्षेत्र म रहइया लोगन मन ल सुरक्षित जघा म जाय बर किहीन हे। उहें, परभावित होय वाले गांव म मुनादी घलो करा दे गेहे।
अेती, रायगढ़ जिला म बने जलासय ले पानी छोड़े के सेती महानदी के जलस्तर सरलग बाढ़त हे। एखर ले जिला के सरिया अउ पुसौर क्षेत्र के कई ठिन गांव म पानी भर गेहे। जेखर बाद लोगन मन ल सुरक्षित जघा म पहुंचाए खातिर परसासन डहार ले राहत अउ बचाव काम सुरू कर दे गेहे।

बारिश-मौसम-02

ऐती, राजनांदगांव जिला म बारिस के रूके के बाद घलो नदिया-नाला उफान म हावय। पहाड़ अउ आने-आने क्षेत्र ले पानी के अवई बने हुए हे। एखर ले जिला के तीन ठिन बैराज पूरा भर गेहे। सुरक्षा ल धियान म राखत मोंगरा बैराज के तीन ठिन गेट खोल दे गेहे। उहें, सूखा नाला अउ घुमरिया बैराज ले घलो पानी छोड़े जात हे।
उहें, महासमुंद जिला के मुढ़ेना गांव म पथरा खदान म फंसे एक झिन ग्रामीण ल परसासन के मदद ले बचा ले गेहे। जिला म जनहानि अउ धनहानि ल रोके खातिर तियारी सुरू कर दे गेहे। कलेक्टर डोमन सिंह ह लोगन मन ल नदिया-नाला अउ पुराना पुल-पुलिया ल पार करत बेरा सावधानी बरते बर केहे हे।
इहीं बीच, मौसम बिभाग ले मिले जानकारी के अनुसार एक ठिन चक्रीय चक्रवाती घेरा पूर्व मध्य बंगाल के खाड़ी अउ तटीय म्यांमार के उपर हावय। एखर सेती प्रदेस म अवईया चौबीस घंटा के बेरा कुछु जघा म हल्का ले मध्यम बरसा होय या फेर गरज-चमक के संग बूंदाबांदी होय के संभावना हे।
उहें, एक जून दू हजार इक्कीस तक राज्य म एक हजार चौबीस दसमलव एक मिलीमीटर औसत बरसा दरज करे जा चुके है। एक जून ले सोलह सितंबर तक रिकार्ड करे गे बारिस के अनुसार कोरबा जिला म सबले जादा एक हजार चार सौ नौ मिलीमीटर ले जादा बरसा होय हे। ऐती, कबीरधाम जिला म सबले कम करीबन आठ सौ तीन मिलीमीटर औसत बरसा दरज करे गेहे।

मादक पदार्थ-चेकपोस्ट

राज्य सरकार ह अवैध मादक पदार्थ अउ आने अवैध सामान के तस्करी उपर रोक लगाए खातिर प्रदेस के सीमावर्ती क्षेत्र म चेकपोस्ट लगाए के निरदेस जारी करे हे। इहीं बीच, पुलिस महानिदेशक डी.एम. अवस्थी ह सबो पुलिस       अधीक्षक मनले किहीन हे कि अइसन जिला जेखर मनके सीमा आने प्रदेस से लगथे, उहां चेकपोस्ट लगाए जाही। संगेसंग चेकपोस्ट म कैमरा घलो लगाए जाय। ओमन ह चेकपोस्ट म ससस्त्र बल के पर्याप्त जवान मनके ड्यूटी लगाए के निरदेस घलो दीन हे। श्री अवस्थी ह सबो पुलिस अधीक्षक मन ल अपन-अपन जिला म गांजा अउ आने मादक पदार्थ के अवैध भंडारण, विक्रय, अवैध परिवहन अउ तस्करी उपर रोक लगाय बर किहीन।

मन की बात-सुझाव

प्रधानमंत्री नरेन्द्र मोदी ह किहीन हे कि आकाशवाणी ले छब्बीस सितंबर के प्रसारित होवइया ‘‘मन की बात‘‘ कारीकरम बर ओमन ल अच्छा सुझाव मिलत हे। ए मासिक रेडियो कारीकरम के इक्यासीवां कड़ी होही। एक ठिन ट्वीट म श्री मोदी ह लोगन मन ले नमो ऐप अउ माई जीओवी म अपन विचार साझा करत रेहे के आग्रह करे हे। लोगन मन अपन संदेस 1 8 0 0 1 1 7 8 0 0 म हिन्दी या फेर अंग्रेज म रिकार्ड करा सकत हे। फोन लाइन ह चौबीस सितंबर तक खुले रइही।

अमृत महोत्सव-क्विज

आजादी के अमृत महोत्सव म प्रादेशिक समाचार एकांश, आकाशवाणी रायपुर कोति ले छै अगस्त ले एक प्रश्नोत्तरी कार्यक्रम शुरू करे गेहे। जेखर चलत एमा छत्तीसगढ़ म स्वतंत्रता संग्राम के बेरा होय घटना, राज्य के स्वतंत्रता सेनानी, अउ समाज सुधारक मनले जुड़े प्रश्न पूछे जात हे।
प्रश्नोत्तरी प्रतियोगिता के तहत काली सत्रह सितंबर के छत्तीसगढ़ी अउ हिंदी प्रादेशिक समाचार बुलेटिन म आने आने सवाल पूछे जाही अउ ये दूनो समाचार बुलेटिन म पूछे गे सवाल के आधार म सबले पहिली सही जवाब देवइया एक-एक विजेता मन ल चुने जाही।
ऐति, दुरूग जिला म आजादी के अमृत महोत्सव के चलत ‘‘सत्याग्रह से स्वच्छाग्रह रथ यात्रा‘‘ ल रवाना करे गीस। जिला स्तरीय ए रथ ह दू अक्टूबर तक जिला के सब्बो ग्राम पंचायत म घुमही।

रेलवे -स्वच्छता पखवाड़ा

भारतीय रेलवे डहार ले स्वच्छ रेल-स्वच्छ भारत के चलत स्वच्छता ही सेवा पखवाड़ा के आज ले आयोजन करे जात हे। ए अभियान के चलत हर एक दिन थीम के अनुसार आने-आने कारीकरम के आयोजन करे जाही। संगेसंग कई ठिन स्तर म तीनों रेलमंडल के सबो खंड उपर सेमीनार घलो आयोजित करे जाही। दू अक्टूबर तक चलइया ए आयोजन म श्रमदान, नुक्कड़-नाटक अउ वृक्षोरापण के कारीकरम घलो करे जाही। संगेसंग जोन, मंडल मुख्यालय अउ कारखान म स्वच्छता ले संबंधित सपथ घलो ले जाही।

अउ अब थोरकुन समाचार सार म-

– मुख्यमंत्री भूपेश बघेल ह स्वतंत्रता संग्राम सेनानी पंडित वामनराव लाखे के जयंती सत्रह सितंबर म ओमन ल सुरता करीन। मुख्यमंत्री ह अपन संदेस म किहीन कि वामनराव लाखे ह छत्तीसगढ़ म सहकारिता के जनक के रूप म जाने जाथे।

– मुख्यमंत्री ह भगवान विश्वकर्मा के जयंती के पूर्व संझा म प्रदेसवासी मन ल बधाई अउ सुभकामना दीन हे।

– रईपुर के माना विमानतल म पदस्थ केन्द्रीय औद्योगिक सुरक्षा बल के उप निरीक्षक ल पैंगोलिन सल्क के तस्करी करे के आरोप म वन विभाग ह गिरफ्तार करे हे।
अउ

– जांजगीर-चांपा जिला म हसौद ल तहसील के दर्जा देके मांग ल लेके सर्वदलीय धरना-प्रदर्शन करे जाही। ए बेरा म प्रदर्सनकारी मन रैली निकाल के तहसीलदार ल राज्यपाल के नाव म ज्ञापन सौंपही।